اخر ما تخيلناه ان ينبري احد المصريين للدفاع عن التنازل عن ارض تحت السياده المصريه. و لكن اما و قد حدث فكان لا بد من الرد. اليكم كل حجج دراويش السيسي و الرد عليها:
١- كل ارض المسلمين واحده و نحن لا نعترف بالحدود!
—————————
و هل وجود الجزيرتين تحت السياده المصريه معناه وقوعهما مع كفره؟
و لماذا لا تقل ذلك للسعوديه ذاتها؟
و لماذا تنصب السعوديه الحدود حتي انك لا تستطيع الحج ذاته دون تأشيره من سفير جلاله الملك؟
و هل معني ذلك انك الان اصبحت مع عوده الخلافه الاسلاميه و قد اتهمت الاخوان بأنهم يريدون عوده الخلافه؟
العجيب ان السعوديه ذاتها تستميت في محاوله اخذ واحه البوريمي من سلطنه عمان و دخلت معها حروب طويله من اجل تلك الواحه. و حاولت الامارات مؤخراً ان تدخل في الامر و تأخذ الواحه لنفسها و صدتها السعوديه بقسوه. اليست تلك اخوه ايضا؟
٢- السعوديه عندها جيش قوي الان و لا تحتاج لمصر للدفاع عن الجزيرتين ضد اسرائيل!
—————————–
معني ذلك ان الجيش المصري ضعيف و يحتاج السعوديه الان للدفاع عن الجزيرتين!
متي اذن سيحتاج السودان للدفاع عن حلايب و بريطانيا للدفاع عن الاسكندريه و اسرائيل لتأمين القاهره؟
و بذات المنطق لم لا نعيد منطقه قناه السويس كلها لبريطانيا و نعيد قاعده قناه السويس؟ فالجيش البريطاني دون شك أقوي و اقدر عن الدفاع عن مصر.
و الله ان عقود طويله مرت كانت ساسه مصر يجولون العالم من اجل قضيه الاستقلال و يحاولون فيها إثبات قدره مصر الدفاع عن نفسها دون الحاجه لبريطانيا (مصدر ١). لهم الله ساسه مصر العظام من اول عرابي و مصطفي كامل حتي مصطفي النحاس.
ثم ان الجيش البريطاني الشقيق يحارب مع الجيش الأردني الشقيق في ليبيا لصالح من تدعمهم مصر (مصدر ٢). و توني بلير يأتي للسيسي كل شهر تقريبا. زيتنا في دقيقنا.
٣- دي حركه عظيمه من السيسي عشان السعوديه كده مش مرتبطه بكامب ديفيد!
——————————
اللطيف ان السعوديه سرعان ما أعلنت التزامها باتفاقيه كامب ديفيد علي قناه العربيه بذات نفسها و أكدت ذلك جريده الفجر ذاتها المؤيدة للسيسي (مصدر ٣). و الاسوء هو اعلان اسرائيل و تأكيد جريده الأهرام (مصدر ٤) انه تم الحصول علي موافقه اسرائيل علي نقل السياده و تعديل اتفاق كامب ديفيد.
يعني ببساطه السيسي قرر ان الاسرائليين اهم من شعب مصر. بعني الاسرائيليون كانوا عارفين الموضوع و الشعب المصري مثل الزوج مع زوجه خائنه هو اخر من يعلم.
٤- الجزر دي أصلا سعوديه و عندهم وثائق:
————————————–
طيب اسرائيل قدمت وثائق من مئات الصفحات تثبت ملكيتها لطابا (مصدر ٥). هوه اي حد يجيب وثائق حنديله ارض؟
بلاش. هوه مش السعوديه نفسها دي قبل ما تقوم الدوله السعوديه الحديثه دخلها ابراهيم باشا نفسه عشان يقمع الحركه الوهابيه الاولي في الجزيره العربيه و اصبحت الجزيره العربيه تابعه لمحمد علي؟
في احسن من كده كمان. ابراهيم باشا عمل مسجد سماه بأسمه في سنه ١٨١١ قرب الحفوف الي الغرب من حقل غوار اكبر حقول البترول في العالم (مصدر ٦).
طبعا ال سعود هدموا المسجد برغم جماله و جمال قبته (الصوره المرفقه) لكن بقيت الصور شاهده علي ذلك.
المهم ان ما يفوت الناس بتوع الوثائق هو ان اعمال السياده علي اي ارض تأتي من اعتراف العالم بممارسه دوله ما لسيادتها علي الارض. في وضع جزيرتي تيران و صنافير فنحن امام اتفاقيه كامب ديفيد واضحه لا لبس فيها و بها خريطه واضحه لا لبس فيها (الصوره المرفقه و مصدر ٧) ان اسرائيل و الولايات المتحده أقرتا بان مصر ستعاود اعمال السياده علي مناطق الانسحاب من سيناء و تضع الخريطه جزيرتي تيران و صنافير بوضوح كجزء من المنطقه ج. و قد تم وضع الاتفاقيه في الامم المتحده و لم تعترض عليها حكومه السعوديه مما يعني اقرار بالأمر الواقع.
و بالنسبه لمن يقول ان السعوديه لا تعترف بإسرائيل و لذلك لا تستطيع الاعتراض علي اتفاقيه اسرائيليه، نقول كان ممكن جدا ان تعترض السعوديه مثلما اعترضت تركيا علي اتفاق تخطيط الحدود البحريه لقبرص و الذي قالت فيه:
“مع تحفظنا انه لا يوجد في قبرص حكومه شرعيه تمثل حقوق الأتراك في قبرص فإننا ايضا نسجل اعتراضنا علي صيغه الاتفاق في النقاط التاليه:”
(مصدر ٨).
معني ذلك اعتراف سعودي de facto بالأمر الواقع.
الأكثر نكايه في اتباع السيسي ان امريكا وضعت قوات حفظ السلام في جزيره تيران و اقرت انها ارض مصريه (مصدر ٩).
كذلك فالكتب المدرسيه المصريه و عشرات الخطب من حكام مصر أكدت علي مصريه الجزر.
إذن اما كل هؤلاء كانوا يكذبون. ما المانع ايضا انهم يكذبون عن حلايب و عن شلاتين للسودان و عن النيل لاثيوبيا و عن سينا لإسرائيل و المسجد الاقصي ايضا لها؟
او ان كل هؤلاء أقروا أمرا واقعا ان الجزر مصريه.
٥- الجزر اقرب للأراضي السعوديه:
——————————-
برغم عدم صحه هذا و يكفي فقط القاء نظره علي الخريطه لتعرف ذلك، فان القرب و البعد لا علاقه له بالأمر. انظر فقط للجزر اليونانية التي تقع علي مرمي حجر من الاراضي التركيه الداخليه proper و لكنها تحت السياده اليونانية. و هذا القرب من تركيا بالمناسبه هو الذي يسهل هروب اللاجئين نحو اليونان.
٦- و احنا عاوزين ايه من شويه تراب، السعوديه حتطور الجزر دي احسن
——————————-
و ليبيا القدافي كان معاها فلوس أكتر عشان مرسي مطروح كمان.
السؤال هو اين ينتهي هذا النوع من المنطق؟ في الاسكندريه؟ في مصر الجديده؟ في العباسية؟ هل كل شيئ للبيع؟ ما هو ليس للبيع؟
٧- منظرنا قدام العالم اننا بتوع قانون و بنحل مشاكلنا بالتراضي و القانون!
—————————–
بالعكس. النهارده نيويورك تايمز اهم صحيفه في امريكا كاتبه بالنص ان مصر تتنازل عن جزيرتين للسعوديه تعبيرا عن امتنانها للسعوديه (مصدر ١٠).
يعني الارض في مقابل المال.
ده منظرك قدام العالم.
٨- يعني انت كنت رحت زرت الجزيرتين دول؟
—————————–
ده كلام عمرو اديب طبعا.
يعني هل ال ٣٠٠ مليون أمريكي راحوا ألاسكا عشان يعتبروها ارض امريكيه؟
بلاش. هل المليار صيني راحوا جزر بحر الصين الجنوبي اللي الصين عماله مش بس تدافع عنهم. لا كمان بتردم حواليهم تراب عشان توسعهم و تعمل عليهم مطارات. مع انك لو بصيت علي الخريطه حتلاقيهم بعيد جدا عن الصين ذاتها. و الاهم انهم كمان ممنوع علي اي حد الاقتراب منهم حتي من الصينيين. لكن الصين بتعمل كده عشان لهم اهميه استراتيجيه (مصدر ١١).
و علي فكره تايوان و فيتنام (اللي الصين دافعت عنها و حاربت معاها ضد امريكا) و الفيليبين كلهم عاملين قضايا ضد الصين في محكمه العدل الدوليه عشان حقهم في الكدر دي.
و لا فيتنامي عمره زار اي من الجزر دي. لكن لهم اهميه استراتيجيه.
ده الفرق بين دول صاعده و دول هابطه او هابله.
و طبعا السيد عمرو اديب كل حاجه عنده سياحه و كده. يعني لازم تزور مكان و تقعد علي قهوته و تتفرج علي العرض الراقص عشان يبقي المكان تبع مصر.
و طبعا ننسي ان دي محميه طبيعيه بقرار من مجلس وزرا مصر و ممنوع زيارتها الا بتصريح.
٩- احنا بنثق ان جيش مصر مش ممكن يفرط في اي حبه من تراب مصر!
—————————-
و بنثق ان اي دكتور أقسم قسم أبوقراط مش ممكن يدبح عيان او ياخد منه فلوس زياده. و بنثق ان اي مدرس مش بيدي دروس خصوصيه. و بنثق ان بنات مصر كلهم شرفاء و مفيهومش عاهره واحده. و بنثق في رجاله مصر ان مفيش فيهم اي واحد بيتحرش بأي بنت. و بنثق في شرطه مصر انها مش بتعذب اي حد. كلها حالات فرديه. طبعا طبعا.
١٠- احنا بنثق في السيسي شخصيا. ده انقذنا!
————————-
الكلام ده لو هذه لم تكن اخر حلقه في سلسله تنازلات السيسي:
– مياه النيل من اجل اعتراف افريقيا بالانقلاب
– حقول غاز المتوسط من اجل اعتراف اليونان و إيطاليا و الاتحاد الاوروبي بالانقلاب
– فتح المجال امام اسرائيل لتضرب في سيناء من اجل تثبيت الانقلاب
– ضرب و حصار غزه من اجل عيون اسرائيل لتثبيت الانقلاب
– و اخيرا الارض مقابل المال
و البقيه تأتي
الحكم النهائي:
مصر تهبط بالسيسي و تزداد هبوطا. و العالم الان يعرف ذلك و هذا له ما بعده. فالكل الان يعرف ان الارض و العرض مقابل المال. و كل شيئ للبيع. و يوجد اعلام مصري يستطيع تبرير كل شيئ. و يوجد من يصدقونه. لذلك لا تستغرب بيع سينا و المسجد الاقصي.
#كسر_الانقلاب
المصادر:
——–
١- كفاح مصر من اجل الاستقلال:
https://goo.gl/SFCgrr
٢- بريطانيا و الاْردن تحاربان معا في ليبيا:
http://www.theguardian.com/world/2016/mar/25/sas-deployed-libya-start-year-leaked-memo-king-abdullah
٣- السعوديه تعلن التزامها باتفاق كامب ديفيد:
http://goo.gl/lFRAOU
https://www.elfagr.org/2097246
٤- الحصول علي موافقه اسرائيل لتسليم الجزر للسعوديه:
http://www.jpost.com/Middle-East/Egypt-Saudi-maritime-border-deal-requires-change-to-peace-treaty-with-Israel-450855
http://m.arabi21.com/Story/900957
٥- الوثائق القانونيه في قضيه التحكيم في طابا:
http://legal.un.org/riaa/cases/vol_XX/1-118.pdf
٦- مسجد ابراهيم باشا في الحفوف:
http://www.britannica.com/place/mosque-of-Ibrahim-Pasha
٧- اتفاق كامب ديفيد و ملحق الخرائط به:
http://muqtafi.birzeit.edu/InterDocs/images/284.pdf
٨- اعتراض تركيا علي اتفاق ترسيم الحدود البحريه لقبرص:
http://www.un.org/ga/search/view_doc.asp?symbol=A%2F70%2
٩- امريكا لديها قوات حفظ سلام في تيران:
http://www.nytimes.com/2016/04/11/world/middleeast/egypt-gives-saudi-arabia-2-islands-in-a-show-of-gratitude.html?_r=0
١٠- نيويورك تايمز: مصر تتنازل عن جزيرتين للسعوديه تعبيرا عن امتنانها للسعوديه
http://www.nytimes.com/2016/04/11/world/middleeast/egypt-gives-saudi-arabia-2-islands-in-a-show-of-gratitude.html?_r=0
١١- دفاع الصين عن جزر بحر الصين الجنوبي:
http://www.forbes.com/forbes/welcome/#2b795fc48b77
http://www.bbc.com/news/world-asia-pacific-13748349
