في السلسله دي بنحاول نبسط المفاهيم الاقتصاديه المكلكعه ساعات و نطبقها كمان على اوضاعنا. المره دي حنحاول نفهم هل التجار في مصر جشعين؟ و مين مستفيد من غلاء الأسعار؟ و هل فعلا الامنتاع عن شراء سلعه معينه بيخلي سعرها يقل زي ما الاعلام في مصر بيقول للناس؟ و مين المسئول لو ده فعلا اللي بيحصل و التجار جشعه و بتستغل الناس؟ هل الحكومه ام الناس ام غياب الضمير؟ حنثبت كل ده بالعلم. Read more
حنسألك سؤال غريب شويه. لو انت عاوز تنزل سعر الطماطم بأسرع وقت ممكن تعمل ايه؟ بسيطه. اول حاجه تنزل طماطم كتيره في السوق. تغرق السوق طماطم. الحاجه التانيه انك تقلل استهلاك الطماطم. يعني مثلا لو فيه في البلد مصنع صلصه تقفله. و الحاجه التالته و الاخيره انك تحاول تلم الفلوس من الناس عشان لو الفلوس قلت معاهم مش حيشتروا طماطم الا لو رخصت. الخطوه الاولانيه دي بنسميها زياده العرض supply. التانيه تقليل الطلب demand. التالته بنقول عليها تقليل إمداد الفلوس money supply. التلاته مع بعض لازم يخسفوا سعر الطماطم. ده بالضبط اللي السيسي و طارق عامر بيحاولوا يعملوه. نفهم ازاي. الهدف الرئيسي للسيسي و عامر دلوقتي هو تقليل سعر الدولار بأي شكل عشان يغطوا على الطريقه السيئه جدا اللي تم بيها تعويم الجنيه و اللي نتج عنها قفزه كبيره جدا في كل الأسعار واضح انها عامله مخاوف أمنيه اكتر من اللي باين على السطح و حنعرف دلوقتي ليه. Read more
تعالوا نتعلم الاقتصاد ببساطه … كل موظف يجيب جنيه و ال opportunity cost!
المعلم تامر العسكري هو اكبر تاجر خضار في المنطقه. المعلم تامر مشغل ١٠ عمال عنده بيديهم الف جنيه في الشهر. لكن المعلم تامر بيستقطع من مرتبهم رسم تأمين صحي و رسم مواصلات و رسم طرق و رسم كباري مجموعهم على بعض ٣٠٠ جنيه. العمال بيدفعوا الرسوم دي لكن في نفس الوقت المعلم تامر بيفرض عليهم انهم لازم يتعالجوا في المستشفى بتاعه المعلم تامر (بناها في سنه ٢٠١٣ من عرق جبينه زي ما بيقول) و ان العمال لازم يستخدموا المواصلات بتاعه المعلم تامر برضه اللي عملها برضه من عرق جبينه. كل ده كويس. المشكله هي ان العمال لما بيمرضوا و يروحوا مستشفي المعلم تامر بيلاقوا انهم اما يدفعوا كل تكاليف العلاج او انهم يستنوا شهور لحد ما حد يعبرهم في القسم المجاني في مستشفى المعلم تامر. و نفس الكلام لما يستخدموا المواصلات. مش بس كده المعلم تامر زود أسعار المواصلات و زود كمان الرسوم اللي بيخصمها من العمال. الاتنين في ذات الوقت! ده طبعا غير كارته الطرق و الكباري اللي بياخدها مع انه بياخذ ضرائب، نقصد رسوم من العمال عنده. العمال مش قادره تعمل حاجه لان المعلم تامر هو راجل قوي و مقتدر و اَي حد بيقف في طريقه بيختفي ورا الشمس. Read more
عشان تفهم حط كده كام معلومه جنب بعض الاول. بالضبط ٤ معلومات:
١- معظم مشتريات السندات الدولاريه الاخيره كانت من اجانب. مصدر ١.
يعني الحكومه المصريه بتطرح سندات او أوراق بالدولار بسعر فايده عالي عشان تجمع دولارات هي محتاجها. طبعا دي ديون. المره الاخيره كان معظم اللي اشتروا اجانب. يعني دفعوا دولارات. أخدوا في مقابلها ورق من الحكومه المصريه في مقابل فايده حوالي ١٥٪ و هي طبعا فايده عاليه جدا جدا على الدولار. مصدر ٢. Read more
في السلسله دي بنشرح مبادئ الاقتصاد “المكلكعه” و نبسطها. و السلسله كلها في مصدر ١.
عمليه الائتمان ربما اهم مصدر للتقدم و الحضاره في العالم كله! تخيلوا! حنشوف ازاي. و حنفهم كمان ليه العالم بيتقدم و مصر مثلا مش بتتقدم.
نشوف مثال. الاستاذ محمد مدني فتح بنك في طنطا. المعلم طه الدسوقي راجل مقاول عمل اول شغلانه ليه و كسب منها مبلغ مش بطال. حوالي مليون جنيه. المعلم طه راح حاطط فلوس المكسب في البنك. و بالتالي حسابه في البنك بقى مليون جنيه. البنك بقى عنده رأسمال قيمته مليون جنيه برضه و هي قيمه الوديعة الموجوده عند البنك. Read more
ماذا يحدث للبورصه المصريه؟
تعالوا نتعلم الاقتصاد ببساطه
فيه ناس بتقول الحق ده سعر البورصه المصريه عمال يطلع. و طبعا قنوات التطبيل استغلت الفرصه لتمارس وظيفتها في التطبيل. مصدر ١.
الحقيقه ان الأسهم المصريه التي يتم تبادلها في سوق لندن انخفضت حوالي ٣٠٪ في يومين اتنين فقط. مصدر ٢. لدرجه ان دلوقتي بقي سعر الأسهم دي اقل بكتير مما كانت عليه في ٣٠ يونيو ٢٠١٣ عندما تراجعت الثقه في الاقتصاد المصري تماماً و حصل الانقلاب وقتها زي ما احنا عارفين.
هذه الاسعار في لندن هي المهمه. ليه؟ لانها مقيمه بالدولار. و بالتالي مقيمه بعمله ثابته و متداوله. بينما اسعار البورصه المصريه في مصر مقيمه بالجنيه المصري. و لذلك ممكن جدا حاجه ترتفع بالجنيه المصري بس لان الجنيه المصري ذاته نازل جدا فالحاجه دي في الحقيقه تكون بتنزل قيمتها جدا بالدولار.
لكن مش ده الحاجه الوحيده اللي تفسر ليه سعر البورصه المصريه بيزيد في حين سعر الأسهم المصريه في لندن بيقل جدا. بينهار الحقيقه. Read more
لماذا لن يؤدي تعويم الجنيه لانطلاق الاقتصاد المصري؟
تعالوا نتعلم الاقتصاد ببساطه
البعض يقول ان تعويم الجنيه سيودي لتدفق الاستثمارات بسبب انخفاض سعر العماله في مصر و تقليل سعر الصادرات المصريه و بالتالي زيادتها و كل ذلك سيؤدي لتحسين الاقتصاد المصري بل و انطلاقه و ان ما فعله السيسي هو في الحقيق ثوره اقتصاديه في مصر.
الحقيقه هذا كلام غير علمي و لن يحدث. لماذا؟ تعالوا نفهم ليه.
الاستاذ ابراهيم مدني راجل عنده مصنع منسوجات من زمان قوي. المصنع ده مشغل فيه عمال كتير و بينتج فيه فوط قطن بيصدرها للعالم. الاستاذ ابراهيم مدني بيشتري القطن من الفلاحين. كل فوطه داخل فيها قطن قيمته ١٠ جنيه. و كمان كل فوطه بتتكلف عماله قيمتها حوالي ٥ جنيه بيدفعها اجور للعمال. و كل فوطه بتتكلف حوالي ٥ جنيه كمان بيدفعها كهربا و إكراميات و ضرائب الخ. يعني كل فوطه بتتكلف حوالي ٢٠ جنيه. الدولار زمان كان بخمسه جنيه. زمان. يعني كل فوطه متكلفه على الاستاذ ابراهيم حوالي ٤ دولار. الاستاذ ابراهيم كان بيبيع الفوطه بحوالي ٦ دولار. يعني بيكسب ٢ دولار في الفوطه. الامور كانت ماشيه جدا. Read more
