JAWDA

يقال لينا دايما بصوا على الإمارات و بالذات دبي و ربما أيضا ابو ظبي انهم نوعوا مصادر الدخل و بقوا اما غير معتمدين او بقوا اقل اعتماداً على البترول. و تضرب الامثلة بذلك مثل طيران الإمارات او الاتحاد او الاسواق الحرة في دبي او صناعة الألومنيوم في الإمارات او الصناعات التجميعية في ميناء جبل علي. و مؤخراً قيل لنا دة الإمارات حتطلع أقمار صناعيه و عندها برنامج للوصول للمريخ. و للاسف هناك عادة لدينا اننا نعتمد على الامثلة او ما يطلق عليه anecdotes و نهمل تماما النظر للمؤشرات الإحصائية للاقتصاد. مع ان علم الإحصاء اُختُرع من اجل هذا بالضبط و هو تجنب اللجوء لامثلة قصوى و النظر للامر على انه منحنى جرس فيه النهايات القصوى من الجانبين و لكن العبرة بالمتوسط و الانحراف المعياري!

في المقالة دي حندحض تماماً الاسطورة دي و حنفهم لأي حد فعلا اقتصاد الإمارات او حتى السعوديه غير معتمد على البترول و ليه. Read more

الامبراطورية الرومانية لما ابتدت تتراجع و تفلس بعد لما ضيعت فلوسها في القرن التاني في حروب من غير فايدة و مع تزايد التهديدات حواليها من القبائل الجرمانية، زادت فيها الانقلابات و التخلص من الخصوم بالقتل. السبب في كدة بسيط. مفيش مشكلة سياسيه متتحلش بالفلوس. اي مشكله داخل ال سعود كان حلها تاخد كام مليار تعمل بيهم تجارة و تعيش حلو و خلاص. مقرن ساب ولاية العهد كده. لكن مع تراجع الدخل و تضييع الفلوس على مصر و اليمن و ترامب و غيره و توقعات افول عصر البترول و التهديدات من حواليها من صعود نجم ايران و تركيا ، طبيعي ان الحل يبقى باستخدام العنف و الانقلابات. لو عاوز تقرأ عن الامبراطورية الرومانية و تراجعها لازم ترجع لكتاب جيبون تراجع و سقوط الامبراطورية الرومانية و هو كتاب اكتر من ممتاز و للاسف ملقيناش ترجمه عربية ليه! لكن موجود بالمجان بالإنجليزي في مصدر ١.  Read more

فيه تفسير بسيط جدا للموضوع. الحايس أول ما شاف الضرب جري و هرب ناحية الصحرا بعيد عن الوادي. و في معركة كمين ambush أتقتل فيها ٥٠ واحد تقريبا طبيعي ان واحد او اتنين يهربوا بجلدهم و يستخبوا ورا تل و القاتل بيكون مشغول انه بيقتل اللي قدّامه مش حينشغل قوي بواحد او اتنين جريوا بعيد و مفيش داعي يعرض نفسه للخطر انه يجري وراهم. غالباً البيه تاه شوية في الصحرا. قعدوا يدوروا عليه. لقوه. رجع البيت خلصان. اتنسى في الزحمة و أعصابه كانت تعبانة. و بعدين أفتكر انه ضابط و طلع بالقصة بتاعته انه قاوم الاهوال و كل الكلام الفارغ ده. كل ما في الموضوع ان البيه جبان بس عاوز يبقى هو و اللي مشغلينه كمان يبقوا مؤلفين لأفلام الخيال العلمي.

الاعلام في امريكا مشغول جدا الأيام دي بقصة ازاي روسيا اتدخلت في الانتخابات الامريكية عن طريق فيسبوك. مصدر ١. كتير منكم يمكن ميعرفش ان فيسبوك بيستخدم ألجوريثم algorithm بيحدد بيه مين و عدد الناس اللي اي بوست توصلهم. مثلا احنا على صفحة جوده فيه ربع مليون مشترك. انت طبعا فاكر اننا لما نحط بوست بيوصل لكل الربع مليون. الحقيقة ده ابعد ما يكون عن الصحة. فيسبوك بيختار عينة عشوائية من المشتركين في اول ساعه او نحو ذلك بعد نشر البوست و يبعتلهم البوست و يشوف هل حيفتحوه و يقروه و يعملوا لايك و شير مثلا و لا لأ. كل تصرف من دول ليه سكور score. و بناءا على العينة دي و تصرفها الاْلجوريثم بيقرر كام واحد في المشتركين و مين بالضبط حيوصلهم البوست.

طيب لو احنا عاوزين البوست يوصل لأعداد اكبر نعمل ايه؟ لازم تدفع يا حبيبي. بس عشان البوست يوصل للمشتركين. و على فكره التسعيرة تختلف من بلد للتانية. المواطن الامريكي مثلا تسعيرته اعلى تقريبا ١٠٠ مرة عن المواطن المصري! و لو مش حتدفع فيسبوك بيقفل المحبس عليك الا في حالة واحدة بس ان البوست بتاعتك تكون رهيبة مع العينة العشوائية. و حتى في الحالة دي أخرنا اننا نوصلها ل ١٠٪‏ بس من كل المشتركين. و لو البوست مش شعبية قوي مش حتوصل الا بالكتير ١٪‏ من المشتركين و الباقي كله بالدفع.

خطورة ده انه ممكن جدا ان بوست ممتاز و مفيد جدا لكن مش شعبي ميوصلش الا لعدد محدود الا اذا دفعت رقم كبير و اذا كنت فقير و معندكش الا فكرك فالبوست بتاعك مش حيروح لحد. Read more

الخبر ده مستحيل حتسمع عنه في مصر. الفيلم المصري “حادثه هيلتون النيل” حصل على جايزه افضل فيلم من النقاد في مهرجان ساندانس Sundance film festival. و هو اهم مهرجان سينمائي للأفلام المستقله يعني اللي هوليوود ما انتجتهاش. مصدر ١. الجائزة دي طريق مفتوح لدخول هوليوود لان منتجين هوليوود دايما بيدوروا على دم جديد في ساندانس. مش بس كده الفيلم نزل في السينمات في العالم و عليه إقبال كبير و اتعرض في مهرجان فانكوفر الدولي للسينما. المشاهدين ادوا للفيلم نسبه ٧٨٪‏ على موقع روتن توماتو rotten Tomato (مصدر ٢). و ده اهم موقع لتقييم الأفلام السينمائية في امريكا و نسبه ٧٨٪‏ دي نسبه عاليه جدا بالنظر ان مثلا أفلام رهيبه زي “مهمه مستحيله ٣” بطوله توم كروز واخد فقط ٦٩٪‏ و هو في نفس نوعيه الأفلام زي حادثه هيلتون النيل و هي نوعيه أفلام الاثاره thriller. يعني لو عجبك فيلم مهمه مستحيله ٣ و شفت توم كروز و هو بيتشعبط على برج خليفه حيعجبك جدا فيلم حادثه هيلتون النيل.  Read more

كاس العالم في الأرجنيتن سنه ٧٨ كان اول عهد كتير مننا بالفرجه على كاس عالم. ده المونديال بتاع جيل الخطيب و فاروق جعفر و حسن شحاته اللي اتغلبوا من تونس في تونس بعد لما كسبناهم في القاهره بتشجيع أسطوري من ضمنه ان محمد نوح غنى في ميكروفون أستاد القاهره مدد مدد شدي حيلك يا بلد. و ده خلى الفيفا يلغي التشجيع في الميكروفون. تونس راحت كاس العالم في الأرجنتين و لو انت من الجيل ده حتفتكر اننا شجعنا تونس اللي كسبت اول ماتش ليها مع المكسيك ٣-١. كاس العالم ده كان بتاع ماتش الأرجنتين ضد بيرو (بلبسهم الأبيض اللي فيه خط احمر) اللي الأرجنتين كسبت ٦-صفر! و شفنا فيه كيمبيس الارجنتيني بيجيب ٦ اجوان في كأس العالم. و شفنا التشجيع الارجنتيني الجنوني و هما بيقولوا “ارجنتينا ارجنتينا” و كانت اول مره في حياتنا نشوف ورق الكونفيتي بيترمي في الملعب بالكميات المهوله دي. و سهرنا طول الليل نتفرج على ماتش النهائي و هو بيتلعب ٣٠ دقيقه إضافي بعد التعادل ١-١ بين الأرجنتين و هولندا. و في الاخر الأرجنتين كسبت ٣-١. و ده كان برضه جيل باولو روسي في إيطاليا. و لو نفتكر مدرب الأرجنتين العقر جدا و اسمه سيزار لويس مينوتي. و كان في منتهى الهدوء و التركيز لحد لما الأرجنتين كسبت الكأس.  Read more