التاريخ السري للمخابرات المصريه و مباحث أمن الدوله… الحلقه 19

دور عبد الناصر في تأسيس دوله المخابرات اكبر من دور صلاح نصر و سامي شرف

Hidden_History_Egyptian_Intelligence_18.jpg

في يناير ١٩٥٧ اصبح صلاح نصر المدير الثالث لجهاز المخابرات العامه بعد زكريا محيي الدين و علي صبري. الحقيقه انه خلال حرب ٥٦ زي ما شفنا الحلقه اللي فاتت (مصدر ١) المخابرات العامه المصريه فشلت في تقدير توجهات بريطانيا و فرنسا و اسرائيل بالرغم من توافر معلومات كافيه عنهم. بالرغم ان معظم الفشل ده راجع في الحقيقه لخطأ عبد الناصر ذاته في التوقع و انه أهمل تماما دور اسرائيل و فرنسا و انه تخلص من كبار رجال المخابرات وقت الملك اللي ربما كانوا اكثر درايه بطبائع الغرب، لكن عبد الناصر في تقديره ان المشكله هي ان زكريا محيي الدين (المشرف العام على المخابرات و مدير المخابرات العسكريه) و علي صبري (رئيس جهاز المخابرات العامه) كانوا مشغولين في الحرب ذاتها و ده سبب الفشل الاستخباراتي. لذلك عبد الناصر جاب صلاح نصر عشان يبقى المدير الثالث للمخابرات و كلفه بمهمة “احياء جهاز المخابرات العامه”. صلاح كان متردد في قبول المهمه لانه مكانش عاوز يشترك في جهاز بيتجسس على المصريين (مصدر ٢). 

صلاح نصر كان ضابط و صديق لجمال عبد الناصر و عضو في تنظيم الضباط الأحرار. صلاح نصر ذاته في مذكراته (مصدر ٢) ذكر انه مكانش عنده اي خبره في المخابرات. اول حاجه عملها صلاح نصر انه بدأ يقرأ الكتب في مكتبه الجهاز عن تنظيم المخابرات في العالم. صلاح نصر أقر انه عجبه جدا تنظيم المخابرات في امريكا بالذات الفصل بين تركيز السي اي ايه على الخارج و تركيز الاف بي اي على الداخل و الان اس ايه على التجسس التكنولوجي. 

صلاح نصر كان قارئ جيد جدا. و ده خلاه لاحقا كمان يبقى كاتب كويس. كتب مذكراته مثلا من اربعه مجلدات. كمان كتب ٣ كتب اسس فيهم لأسلوب المخابرات العامه المصريه و الكتب دي ما زالت صالحه لحد دلوقتي لفهم ازاي المخابرات المصريه بتفكر. 

صلاح نصر شاف انه المخابرات لازم توجه عملها في ٤ اتجاهات (مصدر ٢) و كتب عن كل أتجاه منهم كتاب ما زال هو الكتاب المحدد لطرق عمل المخابرات المصريه:

١- حرب الكلمه 

٢- حرب العقيدة 

٣- حرب العقل و المعرفه

٤- الحرب الخفيه 

حرب الكلمه معناها السيطره على الاعلام في مصر. 

حرب العقيدة معناها غسل دماغ الشعب و توجيه الاعلام بشكل كامل و مستمر. 

حرب العقل و المعرفه معناها الاتصال بالعالم و مراكزه الحساسه لضمان تأمين النظام. 

الحرب الخفيه معناها انه العالم كله بيتآمر على مصر و لازم مصر ترد بنفس الشكل. 

———————-

تعليق جوده:

لحد دلوقتي دي بالضبط أدوات المخابرات المصريه. 

١- سيطره على الاعلام و شراء لأدواته. السيسي يفعل ذلك. حرب الكلمه. 

٢- غسيل مخ مستمر من خلال هذا الاعلام. حرب العقيدة. 

٣- اتصال بالسعوديه و الإمارات و اسرائيل و الجماعات الصهيونيه في امريكا لتأمين النظام. حرب العقل و المعرفه. 

٤- اتهام العالم كله بالتآمر على مصر و هم يعتقدون في ذلك بشكل كامل و السيسي يرددها دوما. و يسمونها الان حروب الجيل الخامس. 

———————- 

لكن اتجاهات صلاح نصر الاربعه هي في الحقيقه تنفيذ لتوجيه استراتيجي عام من عبد الناصر ذاته. 

عبد الناصر كان شخصيه شكاكه لحد بعيد. داج همرشولد سكرتير عام الامم المتحده السويدي كتب عن عبد الناصر انه pathologically auspicious شكاك بشكل مرضي. مصدر ٣. 

عبد الناصر ذاته قال لدبلوماسي بريطاني انه بسبب انه اشتغل في العمل السري لفتره طويله فهو اصبح شكاك في كل حد و اي حد. مصدر ٤. 

عبد الناصر كان مغرم بالتسجيلات. كل شيئ كان بيسجله. و كان بيطلب تسجيلات عن كل حد و اي حد. و كان بيقضي اربع ساعات كل يوم يقرأ الجرايد و يقرأ تقارير المخابرات. مصدر ٢. 

المخابرات كل يوم كانت تدي عبد الناصر أربع تقارير:

١- ملخص رسايل السفراء في الخارج 

٢- تقرير وزاره الداخليه عن الأمن الداخلي 

٣- تقرير عن تأمين الجيش ضد المؤامرات و الانقلابات 

٤- تقرير اقتصادي. 

لحد دلوقتي ما زال هذا التقليد متبع. التقارير دي كانت بتصب في مكتب سامي شرف مدير مكتب الرئيس. زي في اي دوله ديكتاتوريه بيتحول الشخص اللي ماسك قناة الاتصال لمركز قوى بذاته. سامي شرف اصبح مركز قوة و مسيطر على المعلومات اللي بتدخل للرئيس. صلاح نصر بقى مصدر المعلومات لرئيس مستهلك بشكل شره للمعلومات مهما كانت تافهه و سامي شرف موجه المعلومات للرئيس. 

السفير الامريكي في القاهره كتب عن سامي شرف انه رجل العمليات القذره و انه صاحب شخصيه ملتوية. مصدر ٥. 

سامي شرف تولى تنسيق العمل مع المخابرات السوفيتيه كي جي بي. بعد سقوط الاتحاد السوفيتي رشح ان الكي جي بي جندت سامي شرف للعمل معاها و ان اسمه الحركي كان الأسد. مصدر ٦. 

زي ما شفنا في الحلقات اللي فاتت ان السي اي ايه جندت حسن التهامي و الكي جي بي جندت سامي شرف و الموساد جندت اشرف مروان، كلهم جندوا ناس داخل المخابرات المصريه ذاته و على اعلى المستويات. و السبب في ده هو:

١- استهانه بعمليات التأمين داخل جهاز المخابرات. الفهلوه المصريه الاعتيادية. 

٢- نزوع ناصر لتعيين أهل الثقه ليتحولوا لمراكز قوه صعب إزاحتهم و يسيطروا على كل المعلومات الداخله لرئيس الجمهوريه و بيحسوا بحصانه تخليهم يتعاملوا مع المخابرات الأجنبيه اما عن حسن ظن و هبل لو فعلا بعماله. 

و ده شيئ غريب ان ناصر بالرغم من شكوكه في الجميع لكن شكوكه مكانتش بتوصل للدايره اللي حواليه. بالعكس كان بيتعامل معاهم انهم رجالته و دي كانت نقطة ضعف أساسيه استغلتها كل اجهزه المخابرات في العالم. 

الضعف ده امتد للسادات و مبارك و السيسي. كل دوله يوليو تطبعت بالديكاتوريه الفرديه الشلليه. 

نفس اللي حاصل دلوقتي. عباس كامل دلوقتي هوه سامي شرف و صلاح نصر في بعض. و لا نستبعد اطلاقا ان عباس كامل تم تجنيده من قبل اي من المخابرات العامله في المنطقه سواء الموساد او السعوديه او غيرها. و التسريبات من مكتبه تشي بهذا. 

و نتابع. 

المصادر:

———-

١- السلسله كامله مجمعه 

٢- مذكرات صلاح نصر 

https://download-islamic-religion-pdf-ebooks.com/22781-free-book

٣- ك كايل. السويس. مطبع سان مارتين. نيويورك ١٩٩١. 

٤- ترافيليان. الثوره في الشرق الاوسط. لندن. ماكميلان. ١٩٧١. 

٥- مركز الشرق الاوسط. The Middle East remembered. 

٦- سي أندريو. The inside story of the KGB. هاربر كولينز. نيو يورك. ١٩٩٠.



Categories: التاريخ السري للمخابرات المصريه و مباحث أمن الدوله

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.

%d bloggers like this: