صفحات منسيه من حياة الرسول صلى الله عليه وسلم… السهل الممتنع  نبي الحرب و السلام…  الحلقه ٣٢ 

Forgotton_Pages_of_the_prophet_life_32.jpg

بالوصول لصلح الحديبيه الرسول اثبت انه مش بس نبي الحرب لكن برضه نبي السلام. الرسول عكس مقولة كلاوسفيتس قبلها ب ١١ قرن و اثبت ان الحرب و السلام الاتنين وسائل من وسائل السياسه و تحقيق الأهداف. غاندي نفسه حقق اقل من اللي حققه الرسول بالسلام. الرسول أرغم مكه انها تنزع سلاحها و انها ميبقاش قدامها الا انها تنازعه بالحجه و طبيعي ان حجتهم اقل بكتير. الرسول بصلح الحديبيه زي ما شفنا في الحلقه السابقه (مصدر ١) انتزع القدره انه يلغي تحالفات مكه السابقه و بالتالي يقدر انه اولا يقنع القبائل في نجد اللي كانت متحالفه مع مكه بدخول الاسلام و انه كمان يطلق أيده انه يحارب قبائل عندها تحالف ضمني مه قريش من غير ما قريش تتدخل. 

تعليق جوده:

بعض من هذا حاوله السادات لاحقا. السادات الحقيقه كان قارئ و دارس للتاريخ و فاهم التاريخ الاسلامي بشكل كويس جدا على غير ما اعداؤه صوروه. السادات حاول انه باتفاقيه السلام مع اسرائيل انه يطلق أيده هوه شخصيا في تحويل رأي اليهود الامريكان و حتى داخل اسرائيل انهم ينقلبوا ضد التوسع الصهيوني. في البدايه المحاوله دي نجحت و قدر انه يشكل رأي عام إسرائيلي فعلا عاوز السلام. و فعلا كتير من اليهود الامريكان تعاطفوا معاه ضد حتى مناحم بيجين. و حتى الرأي العام العالمي ابتدى وقتها يبقى ضد اسرائيل. المشكله انه مات قبل ما الرأي العام ده يتحول لحركه سياسيه حقيقيه. و مبارك جه بعده درن فهم و دون كاريزما و دون شخصيه السادات. فحصل ان اسرائيل عكست الأمور و بدل ما وصلنا في قمه رفض الرأي العام العالمي في ١٩٩١ لإسرائيل لدرجه ان وزير خارجيه امريكا وقتها يرفض يقابل رئيس وزراء اسرائيل في خلاف علني و انه العالم رافض القمع الاسرائيلي لانتفاضة الحجارة و بدل ما جنود اسرائيل نفسهم يرفضوا الخدمه في الجيش، نلاقي نفسنا ان بعد ده ب ٣٠ سنه من حكم مبارك ان اسرائيل هي اللي بتتقابل في افريقيا و العالم و حتى في العواصم الاسلاميه. اسرائيل نجحت في تحويل معاهده السلام معها من خلال مبارك الى كنز استراتيجي. 

————————-

الرسول صلى الله عليه و سلم رجع المدينه من الحديبيه و بعد شهر ابتدى انه لازم يُؤْمِن اقرب موقع معادي له و هو واحه خَيْبَر و هي اقرب واحه شمال المدينه (ما زالت موجوده). 

خَيْبَر عباره عن واحه كبيره يسكنها ٧ قبائل يهوديه كل واحده فيهم ساكنه في مدينه صغيره داخل أسوار ممكن اغلاقها. الطبيعه دي زي المدينه المنوره نفسها و زي ما شفنا ان ابي سفيان فشل في اقتحام المدينه. لكن الرسول حيعمل حمله ضد خَيْبَر يحب ان تدرس في الكتب العسكريه. 

بدل ما الرسول صلى الله عليه و سلم يحاصر خَيْبَر كلها زي ما ابو سفيان عمل، الرسول قرر انه اولا يحيد القبائل البدويه حوالين خَيْبَر انه بوعدهم بجزء من محصول التمر في خَيْبَر. ثانيا الرسول حاصر الاول اضعف حصون خَيْبَر لوحدها. و خلاهم يستسلموا. و بعدين حاصر الاقل ضعفا و هكذا. و في كل مره الرسول كان بيعرض عليهم الاستسلام مقابل فقط. انهم يدوا نصف محصول التمر كضريبه مقابل الحمايه و انهم يقروا بان الرسول هو قائد المنطقه. الشروط دي مهاوده جدا بالمقارنه باللي حصل مع يهود المدينه. و بالتالي خَيْبَر كانت سعيده جدا بالشروط دي. الرسول مكانش محتاج يستخدم العنف لانه خلاص اظهر انه قادر يستخدم العنف و بالتالي كله أطاع. 

—————

تعليق جوده:

د محمد مرسي في ديسمبر ٢٠١٣ كان لابد يصر على أعاده مجلس الشعب المنتخب و التخلص من المحكمه الدستوريه العليا و المجلس العسكري حتى لو باستخدام العنف. و كان معاه استخدام العنف وقتها. لو ده حصل كانت الأمور استقرت. لكن اللي حصل انه أتردد و نتج عن كده ضحايا اكتر بكتير. و ده بيورينا ان استخدام الرسول العنف في المدينه كان ضروره. بنقول كده عشان نتعلم. زي ما قلنا في الحلقات السابقه في شروط لاستخدام العنف. لو الشروط دي اتحققت لازم تستخدمه لان الضحايا حتكون اقل لاحقا. 

————— 

الرسول تزوج السيده صفيه و هي بنت زعيم خَيْبَر اليهودي لتصبح الزوجه اليهوديه الثانيه له. و ده بيورينا ان الرسول مكانش بيحارب اليهود فقط بغرض حربهم و قتالهم زي ما الناس بتقول. بالعكس كان بغرض سياسي و الزواج بعدها هدفه تقريب القبائل اليهوديه منه لاحقا. مش عيب. 

بعد خَيْبَر الرسول راح تيمه و هي واحه يهوديه اخرى على الطريق بين المدينه و بترا في الاردن. تيمه استسلمت بسرعه و دون قتال برضه. و بكده كل شمال الحجاز تم تأمينه مع الرسول بدون ما قريش تقدر تتدخل اطلاقا بسبب صلح الحديبيه. 

بعد كده الرسول بدأ المرحله التانيه من العوده لمكه. في فبراير ٦٢٩ الرسول و معاه ٢٠٠٠ من أصحابه راحوا مكه للعمره. ابو سفيان نفذ وعده و قريش فضت الحرم الشريف للرسول و أصحابه. 

في الْيَوْمَ التالت للعمره عم الرسول عباس اشرف على زواج الرسول من ميمونه. عباس مكانش لسه دخل الاسلام لكن كان واضح ان الاسلام ابتدى يبقى على وشك الانتصار. ابتدى ميبقاش فيه عداء. ابتدى يبقى فيه تقبل ان محمد انتصر و ان رسالته قويه. 

ميمونه كانت خالة خالد بن الوليد. مش حاجه سهله ان خالة أشهر محاربي مكه تتجوز الرسول. فكر فيها كده. دي زي دلوقتي الملك سلمان يجوز بنته لأمير قطر مثلا. خلاص المسأله بقت مسأله وقت. 

خالد بن الوليد و عمرو بن العاص دخلوا الاسلام في الْيَوْمَ التالت من العمره و راحوا ورا الرسول راجعين المدينه. المدينه استقبلتهم استقبال كبير بالرغم انهم حاربوا ضد المسلمين في احد. 

الرسول تزوج ام حبيبه بنت ابي سفيان نفسه بعد رجوعه المدينه بعدة ايّام! كمان. مش بس ميمونه! 

معنى كده انه بالتأكيد ابو سفيان و الرسول صلى الله عليه و سلم اتقابلوا في السر خلال العمره. ابو سفيان كان ذكي جدا و أكيد ادرك انه خلاص الأمور بقت مسأله وقت لان صلح الحديبيه أدى الرسول و المسلمين فرصه انهم يقنعوا كتير من أهل مكه نفسهم و القبائل المتحالفه معاهم بدخول الاسلام. ابو سفيان شاف انه طالما الرسول حينتصر يلقى يجوزه بنته و دي كانت وسيله العرب في التقارب السياسي وقتها. 

دلوقتي حما الرسول بقى ابو سفيان و بالتالي يقدروا يتفاوضوا على شروط الصلح النهائي و المرحله الاخيره من فتح مكه. 

و نتابع ان شاء الله. 

المصادر:

———-

١- الحلقات السابقه مجمعه 

https://jawdablog.org/category/التاريخ/صفحات-منسية-من-حياة-الرسول-ص/

٢- ابن كثير 

٣- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_butto



Categories: (صفحات منسية من حياة الرسول (ص

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.

%d bloggers like this: