صفحات منسيه من حياة الرسول صلى الله عليه و سلم  … الحلقه ٣٠

“مذبحه” بني قريظه

ليه الرسول قتل يهود بني قريظه؟ 

هل كانت مذبحه غير مبرره؟ هل كان لا بد منها؟ ما هو الباقي منها حتى الْيَوْمَ؟ 

Forgotton_Pages_of_the_prophet_life_30.jpg

ليله يوم جمعه من شهر فبراير ٦٢٧ م انسحب الأحزاب من حصار المدينه بعد فشلهم سياسيا و بعد لما جات ريح قويه عصفت بنار التدفئة زي ما شفنا في الحلقه السابقه (مصدر ١). 

في صلاة الجمعه الرسول أعلن هزيمه الأحزاب في الخطبه. لكن أعلن حاجه تانيه مهمه جدا. أعلن ان بني قريظه و هم اخر قبيله يهوديه فضلت في المدينه كانوا متعاونين مع الأحزاب و انه يجب حصار قريتهم. المؤمنون خرجوا من الصلاه و اخدوا سيوفهم و سلاحهم و راحوا حاصروا قريه بني قريظه. 

خلال حصار الأحزاب كان فعلا في اشاعات ان خَيْبَر المتحالفه مع الأحزاب و فيها بنو النضير اللي اتطردوا من المدينه قبل كده، اتصلوا مع يهود بني قريظه عشان الأحزاب تفتح جبهه داخل المدينه ذاتها و تخلخل المدينه من جواها. في نفس الوقت برضه طلعت اشاعات ان الرسول صلى الله عليه و سلم كان في مفاوضات مع الأحزاب و عرض عليهم جزء من محصول التمر في المدينه مقابل الانسحاب. الشائعه دي بالذات اثارت أهل المدينه اصحاب المحصول ان محصولهم و تعبهم بيتحط على مفاوضات دون علمهم. هل دي كانت حقيقه ام شائعه هدفها برضه خلخله الوضع و السلام الداخلي في المدينه؟ محدش الحقيقه عارف بالضبط تفاصيل ده. لكن في اي حصار في القرن السابع الميلادي بيبقى فيه اشاعات و اشاعات مضاده زي ما بيبقى فيه مفاوضات و مبعوثون و رسل من الطرفين بيحاولوا يشوفوا حل. 

قيادات بني قريظه اجتمعوا و لقوا ان قصادهم ٤ اختيارات:

١- الدخول في الاسلام 

٢- ينتحروا كلهم زي ما حصل في حصار المسادا مع الرومان 

٣- يخرجوا من المدينه 

٤- يقاتلوا المسلمين. 

الحل الرابع كان غبر ممكن لان الفارق في القوه كان كبير. قيادات بني قريظه شافوا ان الحلول التلاته الاولى ملهمش لزمه. و كان عندهم اسباب منطقيه لكده:

١- انهم فضلوا في تحالف مع قبيله الاوس مده طويله عكس بني النضير و بالتالي الاوس حتنقذهم و تتوسط لهم عند الرسول و ان الرسول صلى الله عليه و سلم فقط بيبالغ معاهم عشان ياخد تنازلات. 

٢- انهم شاركوا مع المسلمين في حفر الخندق. صحيح انهم ما اشتركوش في الدفاع عن الخندق بالسلاح لكن السبب في كده ان قريتهم بعيده عن الخندق و انهم ٨ ميل جنوب الخندق ذات نفسه. 

٣- انهم ممكن يكونوا دخلوا في نقاشات مع بني النضير و خَيْبَر خلال المعركه لكن ده طبيعي من قبيله مستقله انها تحاول تستكشف كل الاحتمالات. 

زعماء بني قريظه راحوا للاوس حلفائهم و قالولهم النقاط دي. لكن اكتشفوا ان الاوس مقدرتش تعلمهم حاجه. و اكتشفوا ان الرسول صلى الله عليه و سلم مُصر في قراره. 

و بالفعل بعد حصار اسبوع خرج بنو قريظه من قريتهم للاستسلام لجيش المسلمين. الرسول امر انهم يتحطوا في أغلال او يتقيدوا من ارجلهم. هنا الاوس فهمت معنى ده انه أكيد الرسول مش حيسيب بني قريظه يطلعوا من المدينه بس كده زي ما بنو النضير عملوا. قيادات الاوس راحوا يحاولوا تاني مع الرسول. 

الرسول قال لزعماء الاوس انه حيختار واحد مهم يقرر مصير بني قريظه. ده بالضبط اللي الرسول عمله مع بني النضير. لذلك الاوس افتكروا ان الازمه خلصت و ان القرار حيبقى خروج بني قريظه من المدينه و انهم يسيبوا ممتلكاتهم زي ما حصل مع النضير. لكن الرسول اختار سعد بن مُعاد عشان يقرر الحكم. سعد كان معروف عنه انه ضد اي تصالح مع الأحزاب و كان بيقول انه معندوش الا السيف مع الأحزاب و كان رافض تماما انهم ياخدوا جزء من محصول التمر عشان ينسحبوا. و سعد كمان من أشد المدافعين عن الخندق و بالفعل أصيب اصابه شديده و كان على وشك الموت. الناس جابوا سعد محمول على فراش و طلبوا منه انه يحكم على بني قريظه. 

سعد بن معاد حكم ان الرجال يتقتلوا و النساء و الأطفال يبقوا عبيد. الاوس مكانش عندها حاجه تقولها لانه فعلا واحد منهم هو اللي حكم. و بالفعل تم حفر خندق حوالين سوق المدينه و استمرت عمليه القتل ٣ ايّام اتقتل فيها ٤٠٠ رجل من بني قريظه. 

الرسول اختار فتاه من السبايا اسمها ريحانه عشان تبقى زوجته السابعه. ريحانه كانت أصلا مِن بني النضير و اتجوزت من بني قريظه و فضلت مع جوزها لما النضير انطردوا. 

القصه دي في بعض الادبيات الغربيه بيتقال عليها مذبحه بني قريظه. من السهل فهم ازاي ممكن تصويرها بكده. سهل قوي يتقال شايفين ازاي همجيه نبي الاسلام. مش بس قتل الرجاله اللي كانوا مسالمين و دون دليل دامغ و بوحشيه بقطع الرقبه. كمان اتجوز واحده من السبايا دليل انه مزواج و انه كثيف الشهوه للنساء. 

في مقابل كده الادبيات الاسلاميه و ادبيات بعض المستشرقين تستميت في الدفاع. الدفاع يتمثل في التالي:

١- ان بني قريظه خانوا العهد و تحالفوا مع الأحزاب 

٢- ان ده كان طبيعي في التعامل في العصر ده و انه مش لازم نحكم على تصرفات القرن ٧ الهجري بمقياس العصر الحالي. 

٣- انه الموضوع محصلش من اساسه و ان كلام ابن كثير عنه مجرد تهويل يتناسب مع عصر كتابه ابن كثير للوقائع. 

قصاد ده يوجد المسلمون اللي مش شايفين ان الموضوع يستحق الدفاع أساسا لأن ان اليهود كلهم يستاهلوا بالضبط زي بني قريظه. و ده طبعا زاد مع قيام دوله اسرائيل. 

فيه تناقضات كتيره في كل المواقف السابقه:

١- التناقض الأساسي في الموقف الاسلامي هو قتل رجال بني قريظه في مقابل ان القرآن الكريم بيقول بشكل واضح انه لا قتل لمن يستسلم. طيب مش بني قريظه استسلموا؟ 

٢- في معرض الدفاع باستخدام ان كل عصر و له مقاييسه بينسى اللي بيقول كده كم المجازر اللي ارتكبت و ترتكب حتى الان في القرنين ٢٠ و ٢١ و دون حتى شبهه من خيانه. 

٣- القرآن بيعتبر اليهود أهل ذمه؟ هل فعلا كلهم يستاهلوا مصير بني قريظه؟ 

في معارك التاريخ الكبرى التناقضات دي كلها بتكون موجوده. في الحرب العالميه التانيه مثلا مش ألمانيا كان لديها بعض الحق لانها عوملت بشكل مجحف في نهايه الحرب الاولى؟ هل الحلفاء مثلا لم يستخدموا القوه المفرطه ضد اليابان؟ هل سيدنا معاويه عندما استخدم الخديعه و القوه المفرطه ضد سيدنا علي، هل مكانش عنده مبررات انه بيبني دوله اسلاميه او امبراطوريه قويه؟ 

التاريخ في الحقيقه عمل انساني. الصراع، و هو جزء من التاريخ، هو برضه عمل انساني. و بالتالي هو يخضع لتوازنات كثيره بعضها قد يتم تغليبه على الاخر. حنحاول ندرس ده من منظور لو كان الرسول صلى الله عليه و سلم متعاملش بحزم مع بني قريظه. 

بنو قريظه في الأغلب فعلا تعاونوا مع الأحزاب و باعترافهم لبني الاوس او على الأقل كان عندهم استعداد للتعاون مع الأحزاب في حاله نصر الأحزاب – اللي في وقتها بدا انه ممكن جدا. لو الرسول متعاملش معاهم بحزم ده كان حيفتح قوس طويل جدا من قبائل كتيره بعضها داخل المدينه نفسها انها ممكن تخون المسلمين و تتراجع عن تحالفها معهم دون اي مشكله. أقصى شيئ ممكن يحصل انهم يخرجوا بفلوسهم و مجوهراتهم زي بني النضير و يمولوا و يشاركوا في معارك قادمه ضد المسلمين. و الاسوء انه لو القبائل دي خارج المدينه أساسا. يعني في نجد مثلا. انهم ممكن يغيروا تحالافاتهم و يسيبوا التحالف مع المسلمين من غير ما اي شيئ يحصلهم لأنهم مش ممكن طردهم من المدينه لأنهم بره المدينه أساسا. 

إذن لو الرسول لم يتعامل بحزم شديد مع بني قريظه كان تحالف المسلمين داخل المدينه و خارجها حيبقى معرض للتفتت. 

النص القرآني اللي بيحرم قتل الأسرى الحقيقه يسري في حاله حرب معلنه مش في حاله خيانه داخليه زي الوضع مع بني قريظه. في معظم دساتير العالم و قوانينها فعقوبه الخيانه وقت الحرب هي القتل. 

الحزم ده ممكن نتناقش في درجته. يعني هل مثلا كان فقط يقتل زعماء بني قريظه؟ هنا الوضع اصبح لا يختلف كثيرا لانها في كل الأحوال كان حيطق عليها “مذبحه”. 

طيب هنا البعض حيقول مش ده برضه اسمه الغايه تبرر الوسيله؟ يعني الغايه هي تثبيت دعائم الاسلام. الوسيله هي قتل رجال بني قريظه. مش دي مكيافيلي اللي بنقول فيه العبر؟ تعالوا نفهم الوضع على حقيقته. 

و ده نفسه مثلا اللي بيرتكز عليه اي ديكتاتور في العالم بما فيهم السيسي في استخدام العنف. يعني السيسي حيقول انه عمل مذبحه رابعه عشان يحافظ على الدوله المصريه. الصين بتقول نفس الكلام عن مذبحه تيان ان مين. و هكذا. 

الامر هنا الحكم عليه يخضع لتلات عوامل:

١- طبيعه الغايه ذاتها اللي تبرر استخدام العنف

٢- البدائل المتاحه عن استخدام العنف و تبعات اختيار البدائل دي. هل فيه وسيله تانيه ممكن تنجح غير العنف؟ هل تم تجربتها؟ 

٣- درجه العنف المستخدم في الوسيله المتاحه و هل هو عنف متناسق مع طبيعه الجرم ام لا. 

في حاله بني قريظه حنلاقي:

١- الغايه هي تثبيت دعائم الاسلام 

٢- زي ما شفنا انه اي بديل اخر عن استخدام العنف ضد بني قريظه كان حيفتح قوس طويل من التمرد ضد المسلمين. 

٣- اننا قدام خيانه عظمى. ممكن نقول هل الزعماء بس اللي عملوها. و لا انه في قبيله كلها على بعضها ٤٠٠ رجل مش معقول ان مفاوضات مع الأحزاب كانت بتتم دون علم الغالبيه على الأقل. 

الحقيقه ان جزء من الاسلام كونه دين شامل انه بيعلمنا ان العنف و استخدامه هو جزء من الصراع الإنساني. الاسئله هي:

١- لماذا تستخدم العنف؟

٢- ما هي بدائل استخدامه؟ 

٣- هل تستخدمه في حدود المطلوب و الشرعي او القانوني فقط ام لا؟ 

احنا بينضحك علينا لما يتقال لنا ان الاسلام دين عنيف. و ننسى ان العنف طبيعه في كل العصور. يبقى المهم هو الاجابه عن ال ٣ أسئله السابقه. 

قصاد ده لو حاولنا نجاوب عن ال ٣ اسئله في مذبحه رابعه مثلا نلاقي انه:

١- الهدف كان الوصول للسلطه 

٢- كانت توجد بدائل سلميه كثيره مطروحه و هو مما معروف الان للجميع و باعتراف كثيرين شاركوا في مفاوضات و أقروا ان الاخوان رضوا بالتخلي عن الاعتصام في مقابل مفاوضات. مصدر ٢. 

٣- ان القتل كان خارج اي نطاق قانوني او شرعي و دون اي مسوغات 

اخيرا. زي ما ذكرنا في الحلقات السابقه ان الزواج في الوقت ده كان وسيله تكوين علاقات و تفاهمات سياسيه. الرسول صلى الله عليه و سلم في اختياره لفتاه من بني النضير انها تبقى زوجته بيقول لبني النضير انه صحيح اتعامل بحزم مع بني قريظه لكن معندوش مشكله انه يفتح علاقات سلميه مع بني النضير. و دي نقطه احنا بننساها تماما في التعامل مع اليهود. بالعكس الرسول كان سياسي مِن الدرجه الاولى و احنا ساعات كتير بناخد تصرفاته بشكل سطحي من غير فهم ابعادها. 

احنا علاقتنا مع اليهود و اسرائيل الان يشملها قوانين الحرب في الاسلام. مش قوانين الخيانه العظمى. الخيانه دي حصلت وقت الدوله العثمانيه من اليهود و المسلمين كمان فيها. لكن وقتها الان انتهى الا في حاله المواطنين اليهود اللي عايشين في دول اسلاميه و دول اقليات لا تذكر الان بشكل عام الا في المغرب العربي. مشكلتنا دلوقتي انه في اتفاقات سلام مع اسرائيل بتقول ان الحرب و قوانينها في الاسلام لا تنطبق على الاسرائليين، لكن شعوبنا غير مقتنعه بالاتفاقات دي نظرا لان الحكام اللي أبرموا الاتفاقات دي الشعوب بتشكك في شرعيتهم و بالتالي في شرعيه الاتفاقيات. و بالتالي قدام عدم شرعيه الاتفاقيات فجانب من الشعوب دي بتلجأ لاستخدام عنف ضد اليهود في اسرائيل اصبح الان يطلق عليه ارهاب لانه ضد الاتفاقات المبرمه. أصل المشكله هو عدم شرعيه الحكام بعد تفتت دوله الخلافه. 

و نتابع ان شاء الله ازاي الرسول بدأ من تثبيت دعائم الاسلام في المدينه بعد الأحزاب برنامج ناجح جدا لدخول مكه في ربنا انجح برنامج سياسي في التاريخ! 

المصادر:

————

١- الحلقات السابقه مجمعه 

https://jawdablog.org/category/التاريخ/صفحات-منسية-من-حياة-الرسول-ص/

٢- طرق إنهاء رابعه بشكل سلمي:

https://www.bbc.com/news/world-middle-east-23533567

https://www.newyorker.com/news/news-desk/egypts-catastrophe-of-choice

٣- ابن كثير 

٤- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.