التاريخ السري للمخابرات المصريه و مباحث أمن الدوله … ١٩٥٥ – بدايه العداء مع امريكا و القواعد الحاكمه للعداوه! الحلقه ١٦

Hidden_History_Egyptian_Intelligence_16_1

من ١٩٤٩-١٩٥٣ الحدود بين مصر و اسرائيل في غزه كانت مفتوحه. بمعنى ان اللاجئين الفلسطينين في غزه كانوا بيرجعوا يزوروا اهلهم اللي فضلوا و بيوتهم. اسرائيل كانت بتصد الناس دي طبعا لانها مش عاوزاهم يرجعوا. مصر في الحقيقه وقتها كانت بتحاول تحد من الاختراقات دي تجنبا لمشاكل و تصعيد مع اسرائيل و رغبه ان التهدئه معاها ممكن توصل لحل

بعض الفلسطينيين اللي كانوا بيخترقوا الحدود كانوا داخلين لتنفيذ عمليات داخل الاراضي المحتله. واحد منهم كان خليل الوزير (ابو جهاد) اللي اخترق الحدود من غزه سنه ١٩٥٣ و هو سنه ١٨ سنه عشان يعمل عمليات عسكريه داخل اسرائيل. المخابرات الحربيه المصريه اعتقلت جهاد الوزير عشان ميعملش مشاكل لكن افرجت عنه بعد تدخل من ياسر عرفات في القاهره. مصدر ٣.

لكن المخابرات الحربيه كانت وقتها لسه بتبعت بدو او ناس تابعين ليها في غزه يدخلوا اسرائيل بهدف جمع معلومات عن الجيش الاسرائيلي بالذات في النقب و العوجه. الاختراق كان بيبدأ من غزه و يدخل النقب و منها يوصل للخليل في جنوب الضفه التابعه وقتها للأردن.

Hidden_History_Egyptian_Intelligence_16_2

مصطفى حافظ كان ضابط المخابرات الحربيه المصريه في غزه من سنه ١٩٥١. مصطفى كان ذكي و متحرك و كون علاقات كويسه جدا مع السكان في قطاع غزه. مصطفى كان واخد تدريب في المخابرات على مستوى مرتفع في بريطانيا و كان واحد من قلائل من ضباط المخابرات الحربيه الكبار اللي النظام الجديد خلاهم في اماكنهم. مصطفى بمرور الوقت ابتدى يتحرك من انه يبعت مهمات استطلاع انه يبعت كمان مهمات تخريب داخل اسرائيل سواء ضد الجيش الاسرائيلي او ضد المستوطنات الجديده في بير سبع و النقب و العوجه.

في فبراير ١٩٥٥ واحده من الغارات دي أدت لمقتل مستوطن إسرائيلي. حصل رجه في اسرائيل و اتغيرت الوزاره اللي كانت عاوزه تهدئه مع مصر و اتفاق معاها برعايه امريكيه و جه بدلها وزاره فيها ديفيد بن جوريون وزير دفاع، اللي مكانش عاوز اي سلام مع العرب.

بن جوريون اصدر أوامر بتنفيذ عمليه السهم الأسود للانتقام من مصر. الجيش الاسرائيلي دخل قطاع غزه و قتل ٣٦ جندي مصري في ليله واحده. الغاره دي اثبتت لجمال عبد الناصر انه:

١- قوته اقل بكتير من اسرائيل 

٢- ان اسرائيل مش عاوزه سلام 

٣- ان الغرب مش حيديله سلاح يعمل توازن مع اسرائيل

و ده خلى ناصر يلجأ للاتحاد السوفيتي في صفقه السلاح الشهيره مع تشيكوسلوفاكيا.

في نفس الوقت بالضبط كانت تركيا و العراق بدعم من بريطانيا بيعملوا حلف بغداد و ناصر شاف ده انه تهديد له شخصيا. و ده زود شكوك ناصر في امريكا.

في نفس الوقت برضه كان على صبري و سامي شرف بيدوا عبد الناصر معلومات انه امريكا بتدعم تمرد داخل الجيش المصري ضده. ناصر واجه السفير الامريكي في مصر هنري بايرود بالمعلومات دي في اغسطس ١٩٥٥. لكن بايرود نفى تماما ان فيه اي مؤامرات امريكيه ضده. و انه لو كان فيه حيكون هو على علم بيها. و كمان قاله انه ميسمعش كلام سامي شرف و علي صبري لان مصادرهم مبالغ فيها و غير موثوقه و انه غلط يسمع اي كلام من مصدر مخابرات واحد فقط. مصدر ٤.

لكن رفض امريكا تسليح مصر الا في وجود اتفاق أمن بين مصر و امريكا مع توترات حلف بغداد مع معلومات سامي شرف و علي صبري، كل ده مع بعض خلى العلاقه الدافئة بين عبد الناصر و المخابرات المركزيه تبدي تبرد جدا.

مع ذلك استمرت المخابرات المركزيه و ام اي ٥ البريطانيه في تدريب الضباط المصريين حتى يظل الخلاف محكوم و ميحصلش تصاعد فيه. و هنري بايرود كتب ان تدريب الضباط المصريين في امريكا و بريطانيا في حد ذاته مصدر معلومات هائل.

مع الوصول لسنه ١٩٥٥ حاجتين حصلوا:

١- مصر و اسرائيل و فرنسا و بريطانيا كانوا في مسار حرب. 

٢- دوله المخابرات في مصر كان تم تأسيسها بشكل كامل. مثلا المخابرات العامه وزعت منشور على كل مؤسسات الدوله بمنع التعامل مع اي اجنبي الا بإذن. سيطره المخابرات في مصر بدأت من اللحظه دي

الصوره لمصطفى حافظ قائد المخابرات الحربيه في قطاع غزه.

و نكمل ان شاء الله.

المصادر:

———-

١- الحلقه السابقه من التاريخ السري https://goo.gl/9hBQdH

٢- الحلقات السابقه مجمعه

https://jawdablog.org/category/التاريخ/صفحات-مخفيه-من-التاريخ/

٣- كتاب “عرفات”. ا. هارت. مطبعه جامعه انديانا. ١٩٨٤.

٤- برقيه من السفير بايرود عن محادثات مع ناصر في ٨ اغسطس ١٩٥٥. المحفوظات الامريكيه.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.