هل كنت تعلم ان المخابرات الامريكيه و عملاء النازي ساعدوا في تأسيس صوت العرب؟

التاريخ السري للمخابرات المصريه و أمن الدوله

الحلقه ١٤

Hidden_History_Egyptian_Intelligence_14

الصوره لعمر امين فون ليير. او يوهان فون ليير الأب الروحي للكذب الحصري في التلفزيون المصري. 

اتفاقيه القناه في أكتوبر ١٩٥٤ تمت بضغط مباشر من امريكا و بمساعده كيرميت روزفلت مسئول المخابرات الامريكيه في القاهره. مصدر ١. هدف امريكا وقتها كان تصفيه الاستعمار الاوروبي و تنظيم العلاقه مع الدول الناتجه عن فك الاستعمار في تحالفات مع امريكا باعتبار ان الاستعمار انتهى وقته. 

الاتفاقيه مكنت عبد الناصر انه يبتدي يفكر في التوسع. بعدها على طول نشر عبد الناصر كتاب فلسفه الثوره و فيه تحدث ان مصر في مركز ٣ دوائر: عربيه و اسلاميه و افريقيه. 

عبد الناصر طلب من ضابط في سلاح المشاه اسمه محمد فتحي الديب انه يعمل مكتب للشئون العربيه داخل المباحث. محمد فتحي الديب مع زميل له اسمه عزت سليمان وضعوا خطه لتحرير الدول العربيه من الاستعمار الاوروبي بالذات التركيز على اليمن اللي كان جنوبها تحت الاحتلال البريطاني. اهم جزء في الخطه كان انشاء اذاعه اسمها صوت العرب. مصدر ٢. 

في نفس الوقت كانت المخابرات الحربيه برياسه زكريا محيي الدين مشغوله في السيطره على الحركه داخل الجيش و كانت المباحث العامه اللي اتكبرت عام ١٩٥٢ مشغوله بالامن الداخلي تحت رياسه زكريا محيي الدين برضه اللي بقى وزير داخليه و رئيس المخابرات العسكريه. لذلك صدر في مارس ١٩٥٤ قرار جمهوري بتأسيس المخابرات العامه للتركيز خارج مصر. 

في البدايه رأس زكريا محيي الدين المخابرات العامه و كانت بشكل عام تابعه للمخابرات الحربيه. صلاح نصر ذاته قال ان المخابرات العامه لم تستقل عن المختبرات العسكريه و يبقى لها نشاطها الخاص الا بعد عام ١٩٥٧. 

صوت العرب اخدت في البدايه اجهزه الإرسال من المخابرات المركزيه الامريكيه و أخدت منها كمان الدعايه المضاده للشيوعيه. مصدر ٣. 

صلاح نصر نفسه قال ان المخابرات العامه كمان تم تشكيلها على نمط المخابرات المركزيه الامريكيه. 

جيمس ايكلبرجر مسئول مكتب المخابرات المركزيه في القاهره (شفناه في الحلقات السابقه – مصدر ٤) كان كمان بيساعد صوت العرب في كيفيه التأثير في الناس باستخدام الدعايه. كمان بول لاينبرجر مساعده في القاهره كان من المتخصصين في الحرب النفسيه و كتب كتاب مهم في الموضوع سنه ١٩٤٨. مصدر ٣. 

المصريين كمان استعانوا بليوبولد فون ميدلنستين اللي كان مسئول بروباجندا جوبلز في الشرق الاوسط عشان يبقى خبير في اذاعه صوت العرب و كمان استعانوا بخبير في الدعايه عند النازي اسمه جوهان فون ليير. اللي غير اسمه اول ما وصل مصر و سنى نفسه عمر امين فون ليير و اشتغل في صوت العرب. مصدر ٥. 

امريكا لفتره طويله حاولت تنشأ إذاعات موجهه للمنطقه لكن فشلت. لذلك كان فيه انبهار أمريكي بنجاح صوت العرب. المخابرات المصريه في اغسطس ١٩٥٤ طلبت من المخابرات الامريكيه مواد دعايه قويه ضد الشيوعيه. لكن بمرور الوقت صوت العرب بقت بتهاجم امريكا ذاتها لدرجه ان امريكا طلبت تهدئه النبره. بريطانيا كمان بدأت تشك في عبد الناصر بعد لما انشأ اذاعه موجهه بالسواحلي لكينيا لتأليب القبائل هناك ضد بريطانيا. 

لما التأثير الامريكي على صوت العرب قل، قررت امريكا انها ترجع تنشأ اذاعاتها الخاصه الموجهه للمنطقه. مصدر ٢. 

و للاسف ما زالت الإذاعة المصريه و الاعلام المصري بصفه عامه أسير نشأته الاولى انه يبقى اعلام بروباجندا و حرب تأثير نفسيه على الشعب المصري ذاته. 

المصادر:

————

١- عبد الملك. المجتمع العسكري المصري. Egypte Societe Militaire. باريس. ١٩٦٢. 

٢- فتحي الديب. عبد الناصر و حركه تحرير اليمن. دار المستقبل العربي.

٣- إيفيلاند. حبال الرمال. Ropes of Sand. نيويورك. ١٩٨٠. 

٤- الحلقات السابقه:

https://www.facebook.com/jawda.org/photos/a.760968033973412/2236307343106133/?type=3

٥- برقيه من مدير مكتب المخابرات في ميونيخ لوزاره الخارجيه الامريكيه عن “نشاط مجرمي الحرب النازيين في الجمهوريه العربيه المتحده” محفوظات الخارجيه الامريكيه.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.