الدور الامريكي و البريطاني في حرب ٤٨ – الحلقه ١٦ من حرب ١٩٤٨ و قيام دوله اسرائيل

الدور الامريكي و البريطاني في حرب ٤٨

1948_war_and_Israel_establishment_16_1.jpg

في الحلقه الماضيه (مصدر ١) شفنا الوضع العربي المحيط بتطورات حرب ٤٨. الحلقه دي حنفهم الوضع الدوليه الحقيقه الخيطين المهمين في الوضع الدولي كانوا امريكا و بريطانيا. و الدول العربيه كلها فشلوا تماما في فهم الموقفين الامريكي او البريطاني. قراءتهم كانت خاطئه و سيئه و تسببت في بلاوي تكررت في حرب ٦٧ لاحقا و حرب ١٩٩٠ كمان. حنشوف ازاي.

امريكا من ناحيه كانت طالعه من الحرب العالميه التانيه قوه منتصره و نموذج جذاب و ناجح و بتساعد أوروبا الغربيه انها تتحرك مره تانيه. بريطانيا كانت صحيح طالعه منتصره لكن اقتصادها كان متهالك و لدرجه ان الناس في لندن كانت بتموت من التلوث مثلا. مصدر ٢.

بريطانيا كانت كمان دوله استعماريه مكروهه. امريكا طالعه من الحرب ضد السياسات الاستعماريه تماما. و بتضغط على بريطانيا و فرنسا انهم يتخلّوا عن المستعمرات في العالم. اولا بسبب ان اقتصاد بريطانيا مش مستحمل المستعمرات و امريكا مش مستعده تصرف على بريطانيا و مستعمراتها عشان العنجهية البريطانيه. خد بالك امريكا وقتها كانت بتدي قروض لبريطانيا عشان تشتري الاكل و كانت بتفرض شروط على بريطانيا انها لازم تقلل الإنفاق الحكومي. حاجه كده شبه شروط صندوق النقد الدولي دلوقتي. و اكتر ان شروطه مثلا ان بريطانيا و مستعمراتها لازم يفتحوا أسواقهم للمنتجات الامريكيه. مصدر ٣. ثانيا امريكا كانت شايفه ان احتفاظ الغرب بالمستعمرات بيعرض الغرب لثورات مضاده بالأكيد حتكون شيوعيه و بالتالي الغرب يدخل في حروب قمعيه ضد شعوب العالم الثالث في المستعمرات و ده يخليها تتحول للشيوعيه و دي خساره للمعسكر الغربي.

1948_war_and_Israel_establishment_16_2

بريطانيا فعلا انسحبت من الهند و باكستان تحت الضغط الامريكي. لكن طبعا على مضض. لكن الشرق الاوسط كان حاجه تانيه. و السبب طبعا هو البترول. أكد اهم اسباب ان امريكا كسبت الحرب هو مصادرها الصناعيه الجباره و الصناعه دي محتاجه طاقه. و الطاقه وقتها كانت البترول و امريكا صحيح كان عندها و لسه احتياطي ضخم جدا من البترول لكن بريطانيا و امريكا الاتنين كانوا عارفين ان الخليج فيه احتياطيات ضخمه من البترول برضه. و انه لو بريطانيا عاوزه تفضل قوه مهمه في العالم لازم تفضل موجوده في الشرق الاوسط. امريكا طبعا كانت شايفه نفس الكلام. صحيح ان بريطانيا دوله صديقه لكن الثروات من النوع ده مينفعش تقسمها حتى مع الأصدقاء. مصدر ٤.

المشكله ان ملك السعوديه عبد العزيز اثناء الحرب قابل رئيس امريكا وقتها فرانكلين روزفلت في قناه السويس. بريطانيا محدش قالها عن المقابله الا قبلها بأيام. الإنجليز كانوا حيجننوا. لدرجه ان تشرشل راح قابل عبد العزيز بعدها بس عشان يثبت ان بريطانيا لسه موجوده. الامريكان كانوا شايفين ده و بيضحكوا على الأسد البريطاني العجوز اللي لسه عاوز يحتفظ بالمستعمرات. مصدر ٤.

لذلك بريطانيا كانت شايفه ان السعوديه بتروح منها في اتجاه امريكا (اللي بريطانيا شايفه انها قوه فتيه بس هابله و مش فاهمه العالم ماشي ازاي – لحد دلوقتي بريطانيا بتفكر كده و المسئولين الإنجليز شايفين ان دورهم يمنعوا امريكا من التصرف بطيش) و معاها الثروه البتروليه هناك كمان رايحه في أتجاه امريكا.

بريطانيا كان عندها موقعين مهمين جدا في الشرق الاوسط: الاردن و مصر. الاردن كانت سهله التعامل (و ما زالت) مع بريطانيا. قائد الجيش الاردني كان إنجليزي. الملك عبد الله متحالف تماما مع بريطانيا و بينسق معاها كل الحركات. مقابل ان صحيح مصر فيها قاعده قناه السويس لكن باستمرار مصر بتعمل مشاكل و بتطلب استقلال.

1948_war_and_Israel_establishment_16_3

لو بصينا على الخريطه (المرفقه) حتلاقي ان اكبر تهديد للسعوديه بيجي من الاردن. المسافه من تبوك في السعوديه لعمان في الاردن حوالي ٣ ساعات قياده فقط. و مننساش ان عبد العزيز طرد ابي الملك عبد الله من عرش الحجاز بعد الحرب العالميه الاولى. اذا الاردن تهديد حقيقي و مؤثر للموقع الامريكي في السعوديه. و بالتالي بريطانيا أكيد شايفه انها مش حتسمح ان الاردن تنهزم من اسرائيل. لان ده معناه انهيار حكم عبد الله وانهيار موقع بريطانيا شرق قناه السويس.

امريكا كانت مندفعه جدا في تأييدها لإسرائيل. كان جموح شديد جدا. المسئولين العرب كانوا مندهشين منه. لأنهم كانوا تحت انطباع ان الاسرائليين كلهم مهاجرين من أوروبا الشرقيه و بيعملوا كيبوتزات و بالتالي شيوعيين و امريكا ضد الشيوعيه. يبقى ليه بقى امريكا تبقى معاهم. ده كان خطأ رهيب جدا في الحساب العربي. لأنهم بحكم الجهل عن السياسه الامريكيه مكانوش يعرفوا تأثير اليهود في السياسه الامريكيه (و هو تأثير مش بالقوه اللي احنا بنتصورها و كمان مش بالضعف لإهماله. مش كل أغنياء امريكا يهود مثلا. بيل جيتس مش يهودي. لكن طبعا لهم تأثير. و العرب كالعاده اما يهولوا كل حاجه او يصغروا كل حاجه). و رئيس امريكا وقتها هاري ترومان كان نازل انتخابات صعبه جدا و هو وصل الرئاسه لانه كان نائب الرئيس لفرانكلين روزفلت اللي مات و حل هوه محله. و بالتالي عاوز يدخل التاريخ انه كسب بنفسه و بقى رئيس بنفسه. و بالتالي كان جامح جدا في تأييد اسرائيل حتى ضد توصيات وزاره الخارجيه نفسها. مصدر ٥.

بريطانيا طبعا شايفه ده و شايفه ان اليهود أساسا بقوا بيحاربوها و يكرهوها. و بالتالي هم بريطانيا انها متسمحش لليهود انهم يدخلوا النقب و ان النقب تروح الاردن. لو اسرائيل دخلت النقب معنى كده ان امريكا من ورا اسرائيل حاوطت السعوديه الكنز الرئيسي من كل ناحيه و ان بريطانيا فقدت نقطه اتصال مهمه مع الكنز البترولي السعودي. كمان ان قاعده قناه السويس تقل في أهميتها بسبب ان اسرائيل تقدر تتدخل بسهوله في القناه لو حصل اي تهديد للملاحه.

في يوليو ١٩٤٨ خلال الهدنه الكونت السويدي برنادوت حاول يوصل لحل ان اسرائيل تسيب النقب للأردن و تأخذ الجليل و يبقى ده تبادل للأرض بين العرب و اسرائيل. العرض ده كان بايعاز من بريطانيا. مصدر ٦. برنادوت أتقتل من عضو من جماعه شتيرن الارهابيه اللي كان زعيمها شيمون شامير اللي بقى رئيس وزرا اسرائيل لاحقا.

شفنا ليه النقب يروح الاردن بدل مصر اللي كانت فعلا محتله النقب. بريطانيا بتثق في الاردن اكتر بكتير من مصر اللي دايما عامله مشاكل و استقلال و الخ.

لما الهجوم الاسرائيلي حصل على الجيش المصري و شفناه في الحلقات السابقه انه كان هجوم ساحق. مصر جريت تستنجد ببريطانيا. اول حاجه انجلترا سألت كانت انتم عاوزين مساعده ليه؟ تحت اي بند؟ هل عاوزين المساعدة تنفيذا لاتفاقيه ١٩٣٦؟ و دي الاتفاقيه اللي مصر كانت عاوزه تلغيها. لذلك بريطانيا كانت عاوزه تطلع من حرب ٤٨ مضروبه شويه عشان تحرم تقول استقلال بعد كده.

طبعا الهجوم الاسرائيلي زاد جدا عن المدى لدرجه ان اسرائيل دخلت النقب كلها. بريطانيا ابتدت تقلق جدا ان الموضوع مبقاش شده ودن لكن النقب كلها حتروح. امريكا ضغطت ان بريطانيا تبعد و تسيب اسرائيل. الاسرائليين استمروا لدرجه ان اسرائيل حاصرت العريش ذاتها و هنا الطيران البريطاني طلع يدافع عن مصر ذات نفسها بالرغم من احتجاج امريكا لان ده بقى مرمغه لهيبه بريطانيا ذاتها في التراب.

الحقيقه ان مش بس مصر اللي انهزمت في الحرب. انجلترا كمان انهزمت.و بقت مسأله وقت انها تنسحب من المنطقه كلها و تسيبها لامريكا و ده اللي أتأكد في حرب ٥٦ بعد قطع امريكا المعونه عن بريطانيا و إجبارها على الانسحاب من بورسعيد. و الحقيقه ان مصر ٤٨ كان الأفضل لها زي ما قلنا قبل كده تعمل تنسيق أقوى مع إنجلترا و تعاون دفاعي قوي فيه الأمور واضحه. او تفهم الوضع الامريكي الداخلي و تحاول تخترقه. او متدخلش الحرب خالص. او تدخل و تعمل خط دفاعي قوي في بير سبع زي ما شفنا في الحلقات اللي قبل كده. لكن مصر اختارت اسوء سياسه ممكنه و عملتها.

في الحلقه الجايه حنشوف ازاي اسرائيل دخلت إيلات لانها قصه مهمه و الحلقه اللي بعدها و الاخيره حنشوف احنا اتعلمنا أيه من حرب ٤٨ بعون الله و نختم.

المصادر

١- الحلقات السابقه مجمعه من صفحات مخفيه من تاريخ مصر 

https://goo.gl/R7pPAk

٢- اقتصاد بريطانيا بعد الحرب 

https://www.theredhillacademy.org.uk/pluginfile.php?file=%252F14911%252Fmod_resource%252Fcontent%252F1%252FD5-+Economic+recovery%252C+45-51.ppt&fbclid=IwAR2pTXQge_FfZyEr9bg-ACvomfdS9tDWuE8qEM6lgPCdQgo6P3nfQxUP54g

٣- قروض امريكا لبريطانيا

https://www.independent.co.uk/news/business/news/britain-pays-off-final-instalment-of-us-loan-after-61-years-430118.html?fbclid=IwAR0ODabe6ZeiV_XfFhdt_pUd7-g2RpsszLT5B2sIX2zSs25issUuY5Y0Zew

٤- الصراع على البترول في الشرق الاوسط 

http://arnosworld.free.fr/sustainability/Daniel%20Yergin%20-%20The%20Prize%20-%20The%20Epic%20Quest%20for%20Oil,%20Money,%20&%20Power%20(1991).pdf?fbclid=IwAR1kwA2u150fY6zVgxKOO35hsibVxLwLqr9GTnq7hEeoCXgzqAl2MnWFzqc

٥- تأييد هاري ترومان لإسرائيل 

https://www.trumanlibrary.org/hst/h.htm

٦- عرض الكونت برنادوت 

https://www.jewishvirtuallibrary.org/the-bernadotte-truce-plan?fbclid=IwAR3-GNTcRfumjADlUO-fS3CxbQrPkmwv-gC-Z_liyOBkEDzJRe-aWUVzBaQ



Categories: حرب ١٩٤٨ و قيام دوله اسرائيل

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.

%d bloggers like this: