صفحات منسيه من حياه الرسول  صلى الله عليه و سلم  … الحلقه ٢٨

صفحات منسيه من حياه الرسول 

صلى الله عليه و سلم 

زيجات الرسول و حقيقتها و 

القصه الحقيقه وراء حادثه الإفك و الأحداث التي لم تروى! 

Forgotton_Pages_of_the_prophet_life_28

الزواج في العالم في القرن السابع كان مفهومه مختلف جدا عن دلوقتي. في معظم الأوقات كان وسيله لتوطيد العلاقات داخل العائله الواحدة او وسيله لحل الصراعات بين الأعداء. يعني طبيعي جدا في القرن السابع الميلادي في أوروبا او اسيا انه ملكين كان بينهم حرب و لما تنتهي الحرب جزء من اتفاق السلام انه كل واحد منهم يتجوز أخت او ابنه الثاني. و هكذا. في شبه الجزيره العربيه الزواج كان واخد شكل مؤسسي للعلاقات بين القبائل. يعني تلاقي القبائل كلها بينها و بين بعضها علاقات تزاوج واسعه جدا. ده كان له هدفين مهمين جدا: اولا ضمان انهم ميحاربوش بعض. مش معقول مثلا حتحارب قبيله ابن زعيمها هو ابن اختك مثلا. و خصوصا ان لو ابن اختك ده هو اللي عليه الدور يأخذ الزعامه. ثانيا انها بقت شبكه إنذار مبكّر و تداول اخبار بين القبائل العربيه عن مين بيعمل ايه. الزوجه بتبعت لأبيها في قبيله تانيه تقوله ان قبيله جوزها متضايقة من الموضوع كذا و ياريت تحلوه او ان قبيله جوزها فيها مشاكل كذا او بتحضر لحرب ضد قبيله تانيه و هكذا. شبكه اخبار و إنذار مبكّر مضمونه و بيها الجزيره العربيه بتضمن نوع من الاستقرار. طبعا مستحيل انه لو شيخ القبيله محدد انه يتجوز واحده بس ان شبكه العلاقات دي تتكون. و مع ملاحظه انه فيه عشرات القبائل في الجزيره فلازم يبقى عدد الزيجات كبير بالذات كل ما المنصب ارتفع. 

لذلك موضوع النظره للزواج انه علاقه رومانتيكية بين رجل و امرأة دي عمليه جديده جدا. و لا حتى من القرن ١٩. دي نشأت مع القرن العشرين. و يمكن من أوائل الناس اللي عملوها كان الرسول شخصيا في زواجه من السيده خديجه و عدم ارتباطه بأي واحده تانيه. 

لذلك احنا بنغلط جدا و المستشرقون كمان بيغلطوا لما يبصوا لشخصيه الرسول انها شخصيه أحاديه الأبعاد. يعني الرسول اتجوز كتير يبقى ده صح او غلط. الرسول في حياته فيه نموذجين. الاول هو نموذج الزواج من سيده واحده فقط عن علاقه اقتناع و معرفه كامله بينهم بشكل سابق تماما لعصره و بشكل ما انتشرش في العالم الا في القرن ال ٢٠. و فيه في حياه الرسول نموذج تاني خالص و هو نموذج تكوين علاقات واسعه مع القبائل العربيه المهمه و مع كبار الصحابه بحكم العصر اللي الرسول كان عايش فيه و بسبب وضعه كقائد للمسلمين. النموذجان دول يخلونا نفكر شويه. اي نموذج فيهم المفروض نطبقه؟ النموذج المتماشي مع العصر اللي احنا فيه و لا نطبق وضع الرسول كزعيم للامه الاسلاميه؟ مع ملاحظه ان القرآن نفسه بيقولنا نعمل ايه! و على فكره مفيش عيب في الاختلاف في التطبيق بين الشعوب الاسلاميه المختلفه. يعني لما تونس او تركيا ألغوا تعدد الزوجات، ناس كتير هاجمت. طيب مش الرسول نفسه تزوج السيده خديجه فقط؟ و القرآن قال بوضوح لن تعدلوا؟ في نفس الوقت مش عيب و مش غلط ان مجتمع قبلي زي السعوديه او الكويت او قطر يبقى فيها تعدديه مناسبه لمجتمعهم. العقل حلو لكن احنا ساعات بندخل في مناقشات و اتهامات بغضب و ارتفاع ضغط دون سند لا من الكتاب و لا السنه. 

الرسول بعد وفاه خديجه تزوج من السيده سوده و كانت ارمله في زواج رتبه له أصحابه اللي كانوا خايفين عليه من الحزن الشديد بعد وفاه خديجه. بعدها عرض ابو بكر على الرسول ان يتزوج ابنته عايشه. و بعدها و حرصا الا يبدو انه يفضل ابي بكر على عمر، الرسول قبل الزواج من السيده حفصه بنت عمر بعد ترملها في موقعه بدر. 

بعد كده تزوج عثمان بن عفان ثري بني اميه من بنت الرسول الكبرى. لكنها ماتت بعد احد بقليل فتزوج اختها السيده ام كلثوم. و الرسول صلى الله عليه و سلم بنفسه دبّر زواج علي بن ابي طالب من بنت الرسول فاطمه. 

نلاحظ ايه في الزيجات دي؟ ابو عائشه و ابو حفصه أصبحا الخليفه الاول و الثاني بعد الرسول. و زوج ام كلثوم و زوج فاطمه كانا الخليفين الثالث و الرابع. اذا ترابطت مؤسسه الزواج مع عمليه تقويه المجتمع الاسلامي و الدوله الاسلاميه و هو نفس المنطق الذي جرى عليه العرف وقتها. 

السيده عائشه كانت مختلفه تماما عن كل امهات المؤمنين. اولا هي العذراء الوحيده التي تزوجت الرسول و تزوجته في سن صغير. الموضوع ده لسه لحد دلوقتي بيعمل مشكله لان البعض بياخده ضد الاسلام و يقول اتفرج الرسول اتجوز طفله . الحقيقه انه جرت العاده في القرن السابع ان البنات تتزوج عند سن البلوغ يعني ١٢-١٣ سنه. و ترتبط ايضا بعقد قران في سن التاسعه. ده الطبيعي. الحقيقه ان السيده عائشه تمسكت تماما ان قرانه عقد على الرسول صلى الله عليه و سلم و هي في سن السادسه و تزوجته في سن التاسعه. في الأغلب هذا امر مشكوك فيه بالرغم من اصرار السيده عائشه عليه بعد وفاه الرسول. السيده عائشه كانت عاوزه تبقى مختلفه في كل شيئ و متفردة. مش حتبقى زي بقين البنات و الستات يتجوزوا عند ١٢ سنه. لا هي مختلفه. اتجوزت اصغر كمان. و طبعا وقتها من الصعب حد يجادل مع السيده عائشه. مش بس انها ام المؤمنين. لا كمان هي كانت قويه الحجه و محدش كان يقدر يجادلها. لدرجه ان معاويه ذات نفسه كان يقول عنها انها مفيش مره يبقى عاوزها تبطل كلام في موضوع و يقدر يسكتها عنه. و مفيش مره يبقى عاوزها تفتح اي موضوع و يخليها تفتحه. كانت شخصيه في منتهى القوه و النفوذ. 

لو فعلا كانت السيده عائشه تزوجت في سن التاسعه كان في الأغلب حيبقى حدث ضخم وكان حيبقى فيه ذكر له في وقتها مش بعد وفاه الرسول عن لسانها هي. 

طبعا صعب كمان فهم ان السيده عائشه تتذكر زواج في سن التاسعه او ١٢. لكن هذه القوه في الشخصيه و الرغبه في التفرد سببت احد اهم المشاكل اللي المستشرقين المغرضين بيحاولوا يمسكوها عن الرسول و الاسلام و تشويه صورته. بينما الحقيقه في الأغلب انه كان زواج متفق تماما مع عصره. 

مش دي بس المشكله الوحيده اللي السيده عائشه تسببت فيها. مشكلتين تانين حصلوا. الاولى حادثه الإفك و بعد وفاه الرسول صلى الله عليه و سلم كانت مشكله دورها في احداث الفتنه الكبرى. 

السيده عائشه كانت مش بس شخصيه قويه. كمان كانت شخصيه جذابه جدا و محبوبه جدا. و كان الرسول بيسمح لها بحاجات كتير الا انها تتكلم عن السيده خديجه. الرسول صلى الله عليه و سلم كان بيحب شراب العسل و هو شراب معمول بخلط البيض مع لبن الماعز مع عسل النحل. حاجه كده زي الفرابيتشينو دلوقتي. الرسول أتأخر عند زوجه تانيه لانها عملتله شراب العسل. لما الرسول راح لعائشه سألته انت شربت ايه. قالها. سدت مناخيرها و قالت أكيد النحل كان واكل زهر بدود! و الرسول ضحك. لذلك احنا مش بنتعامل مع شخصيه عاديه في الاسلام. شخصيه مؤثرة جدا و مش اي زوجه. 

الرسول صلى الله عليه و سلم اخد عائشه و مجموعه من أصحابه شمال المدينه لاقناع بني المستلق بالتحالف معه بعد الهزيمه في احد. وقتها كانت هي في سن المراهقه. المفاوضات مع بني المستلق فشلت و اندلع قتال. السيده عائشه كانت بتشجع المؤمنين على القتال من الهودج بتاعها فوق الجمل. الرسول انتصر في المعركه. لكن الدنيا كانت ليلت لما الرسول قرر يرجع للمدينه عشان يسافروا و الجو معقول بليل. قبل التحرك السيده عائشه راحت للحمام وراء مجموعه من الأشجار. و رجعت على جملها في الوقت اللي القافله كانت على وشك الحركه. اول ما قعدت حطت أيدها على رقبتها و اكتشفت ان سلسلتها راحت. شيئ طبيعي جدا للستات. السلسله دي كانت هديه زواجها من الرسول. في الأغلب السلسله شبكت في غصن شجره. طبيعي انها تفكر انها لو نزلت بسرعه دورت عليها و رجعت بسرعه حتلحق القافله. دول جمال و بيتحركوا ببطء. 

التدوير على السلسله اخد وقت لانها انقطعت و تناثرت الحبيبات بتاعتها. و بالتالي اخدت وقت تدور عليهم بالذات ان الشجر ده الورق بتاعه بيقع و يبقى عامل زي الشوك على الارض. في الاخر لقيت كل الحبيبات. لكن على بال ما خلصت تدوير كانت القافله اتحركت و مشيت مسافه كويسه. 

السيده عائشه بدل ما تحاول تجري تلحق القافله قررت انه أأمن ليها انها تستنى في مكانها و تقعد تحت شجره سنط (اللي العرب كانوا بيعملوا منها الصمغ – انظر الصوره) و أكيد حيلاحظوا غيابها ويرجعوا ياخدوها. ازاي محدش يلاحظ غياب السيده عايشه؟ 

القافله وصلت المدينه من غير ما حد يلاحظ غيابها الا لما وصلوا. النهار كان طلع و الجو بقى حار. لكن من حسن حظ السيده عايشه ان واحد من المحاربين مع الرسول اسمه صفوان أتأخر عن القافله لانه كان بيطارد فلول المستلق. و كان راجع على جمله لوحده على المدينه. فشاف السيده عايشه تحت الشجره فطبعا وقف. و أخدها على الجمل و خلاها هي تركب و هو مشي جنب الجمل مسافه العشرين ميل لحد المدينه. 

مدينه الرسول زي اي مدينه، الناس شافت المنظر و بقت مستغربه. بدل ما يقولولها حمد الله على السلامه كنتي فين، قعدوا يبصوا عليه ساكتين. طبعا السيده عايشه لاحظت الموقف و فهمت على طول هم بيفكروا في ايه. الألسنة ابتدت تتكلم في السر. آه أكيد مرتبين مع بعض انهم يتقابلوا. قال بتقول سلسله ضاعت منها قال. الخ. 

الرسول صلى الله عليه و سلم مكانش عنده شك اطلاقا في عائشه. لكن لاحظ طبعا ان الكلام بيزيد بالرغم انه في البدايه تجاهله. الرسول قرر يبعت عائشه على بيت ابيها لحد ما يقرر في الامر. 

علي بن ابي طالب نصح الرسول انه يطلقها و يخلص من الموضوع. لكن حتى ده مشكله. لان الطلاق اعتراف انه حصل حاجه غلط. في مقابل كده لو رجعت بيت الرسول معناها ان الكلام حيقول آه البنت الصغيره ضحكت على الراجل الكبير. 

نصيحه علي بن ابي طالب بالطلاق دي اتسببت في مشاكل سياسيه ضخمه جدا في احداث الفتنه الكبرى بعد وفاه الرسول لان السيده عائشه ما نسيتش ده اطلاقا من علي. 

عايشه حاولت تقنع الناس ان كل ده غلط. لكن في النهايه مكانش فيه حاجه قدامها تعملها غير انها تعيط. كانت بتبكي باستمرار. 

زود كلام الناس كمان ان لحد وقتها الرسول لم ينجب من اي من زوجاته بعد وفاه خديجه. وطبعا ده زود القيل و القال في مجتمع مكه. 

مكانش فيه حل الا تدخل الهي. نكمل القصه المره الجايه ان شاء الله. 

الصوره لشجره السنط التي انتظرت السيده عائشه تحت شجره مثيله لها. 

و نكمل ان شاء الله. 

المصادر:

١- الحلقات السابقه مجمعه

https://jawdablog.org/category/التاريخ/صفحات-منسية-من-حياة-الرسول-ص/

٢- ابن اسحاق 

٣- الطبري 

٤- ابن كثير. 

٥- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s