هل فعلا احنا عندنا مشكله؟ هل الفصل بين الستات و الرجاله غلط؟

Separation_between_males_and_females_1

عاده في جوده لا ندخل في الخلافات على مواقع التواصل ذات الطابع الاجتماعي. لكن المره دي الخلاف كان على الصوره المرفقه. دول ناس في المطريه قرروا يفطروا مع بعض كجيران افطار جماعي. ناس نشرت شايفين الأجواء المبهجة. و ناس ردت قالت امال فين الستات مش قاعدين معاهم ليه. و كلمه من هنا و من هناك و أصبحت عركه بين الفيلق العلماني ضد الخندق الاسلامي. و ضاعت اصول القضيه طبعا في الصراع.

طيب ممكن نفهم شويه؟

معظم ثقافات العالم بما فيها الثقافه الغربيه اقرت انواع محدده من الفصل بين الجنسين. مثلا في الحمامات او أماكن خلع الملابس. ده بقى وضع قانوني في العالم كله و انت تتعاقب لو دخلت مثلا حمام لغير جنسك في بلد غربي و لم تستمع للتحذير. اذا هذا فصل قانوني بين الجنسين في العالم كله.

مش بس كده كتير من الثقافات كمان اقرت انه فيه أوقات النساء بيتعرضوا لاوضاع غير آمنه و بالتالي بغرض الأمن و الأمان safety يجب إقرار الفصل. مثلا المترو في اليابان بعض القطارات مخصص للسيدات فقط. انظر الصوره. كمان القطارات في الهند فيها عربيّات مخصصه للسيدات فقط.

لذلك بصفه عامه الضمير العالمي او الغربي نقدر نقول أقر انه الستات في المواصلات العامه عرضه لاوضاع غير آمنه unsafe و بالتالي الأفضل الفصل.

فيه كمان ديانتان في العالم الان بيفصلوا الستات عن الرجاله في الصلاه: اليهوديه و الاسلام. المدخل للصلاه في حائط المبكى اليهودي في القدس مختلف للنساء عن الرجال. انظر الصوره.

Separation_between_males_and_females_4.jpg

كمان امريكا ذاتها فيها مدارس مقتصره على البنات فقط او اولاد فقط. ذات الوضع في كندا و بريطانيا. مصدر ١. القانون الامريكي في الباب السابع من قانون الحقوق المدنيه لعام ١٩٦٤ أقر بحق الناس انها تعمل مدارس للبنين و للبنات فقط. مصدر ٢.

بالعكس فيه دراسات (مصدر ٣) بتقول انه مدارس البنات فقط مفيده للبنات لانها مناسبه لطريقه تفكيرهم. و طبعا ده مهم بالذات في الدول الناميه اللي من الصعب إقناع البنات فيها بالتعليم في مدارس مشتركه تو تحت ضغط.

كمان لما بتيجي في الغرب ذاته تطلب مدرب لياقه بدنيه او ممرضه او طبيب بيسألك هل عاوز ست ام راجل. مستقر في الضمير الغربي انه فيه شيئ اسمه خصوصية و ان الست ممكن ترتاح فيه مع ست و الراجل مع الراجل. يعني مثلا ست ممكن تفضل طبيب الولاده يبقى ست. و الراجل يفضل ان مدرب اللياقة البدنيه ليه يبقى راجل.

اكتر من كده زي ما احنا عارفين استقر الضمير العالمي في الموضوع ده انه الرياضه مثلا لازم تكون مفصوله segregated بين الجنسين. و ده بحكم انه فيه تفاوت بيولوجي في القدرات العضويه بحيث انه مشاركه الستات مع الرجاله بيمنع الستات انها تفوز و بالتالي ده يبقى تمييز و بيحدد من قدرات المرأه.

السكن الجامعي في الغرب و بالذات في امريكا مفصول بين الجنسين. و اكتر من كده مثلا جمعيات السكن المشترك الجامعي و دي جماعات من الطلبه بيشتركوا مع بعض و يعيشوا مع بعض (بيسموها fraternities للولاد و sororities للبنات) كلها مفصوله بين الجنسين. محدش اعترض في العالم.

امال المشكله بتحصل امتى؟ امتى يبقى الفصل بين الجنسين مشكله؟ و حناخد هنا وجهه نظر مواطن متعلم و فاهم. لان الزياط في الغرب مشابه جدا للزياط هنا و هو بس بيكون في حاله ان الفصل هو عمل يقوم به المسلمون.

الفصل او عدم الفصل يكون مشكله في حاله من اتنين:

١- لما يُحد او يقلل من تطوير البشر.

المثال الصارخ على ده هو منع طالبان التعليم العالي للإناث. بالتأكيد ده تقليل من المرأه و تقليل من قدراتها و بيحد من تطورها.

طبعا العكس من ده هو اننا نغمض عنينا ان السيدات بيتعرضوا للتحرش في المواصلات العامه و نطبق قواعد عدم الفصل بشكل اعمى و بالتالي ينتج عن كده تحرش بالستات اللي بالتأكيد بيؤثر على نفسيتهم و يُحد من تطورهم الثقافي و السياسي و الاجتماعي.

٢- لما يكون له تأثير اقتصادي سيئ.

المثال الصارخ على كده هو منع السعوديه قياده الإناث للسيارات و تعويض ذلك باستيراد سائقين رجال من الخارج (في خلوه مع النساء في السياره!) و بالتالي جعل حركه النساء حكر على من يستطيع الدفع و دفع مليارات الدولار مرتبات لسائقين من الأفضل استغلالهم في اعمال مربحه للاقتصاد بشكل افضل.

هم دول المعيارين اللي يجب من الناحيه العمليه استخدامهم للحكم هل الفصل او عدم الفصل امر جيد أم لا. و على فكره المعيارين دول هم من أصل الدين الذي لا توجد منفعه الا ثم فيها شرع الله.

احنا حنطبق المعيارين دول بأمثله. و نشوف نقبل المثل او نرفضه بناءا على ذلك. لكن شده الرفض تعتمد كمان هل الفصل او الاختلاط مفروض بالقانون ام عمل عرفي ام عمل تطوعي.

ناخد مثلا منع قياده الستات للسيارات في السعوديه. وفق المعيار الاول الحقيقه ان منع الستات من القياده لا يُحد من تطورهم. لان تعلم قياده السياره مش حاجه مهمه جدا في ثقافه الانسان. كمان الست في السعوديه قادره تروح الجامعه و التسوق الخ. لذلك وفق المعيار الاول منقدرش نقول انه فصل سيئ قوي. ممكن نقول انه له اثار نفسيه انه بيكون اجواء تحس فيها المرأه انها مش قادره او عاجزه. وفق المعيار التاني و هو معيار اقتصادي نقول ان منع قياده الستات للسيارات عمل سيئ. لذلك نقول ٥ من ١٠ في المعيار الاول و ١٠ من ١٠ في المعيار التاني. لذلك الحكم هو رفض منع قياده الستات للسيارات. هل نرفضه بقوه و لا نطنش يعتمد هل المنع تطوعي و لا قانوني. زي ما احنا عارفين في السعوديه المنع كان بقوه القانون. لذلك احنا كمسلمين عاقلين نرفضه بقوه.

فيه ناس زياطه تقول المنع ده بيشوه صوره الاسلام في الغرب. في رأينا ده مش معيار أساسي. المعيار الأساسي هو المنفعه للناس. هل بتتقدم بسبب سياسات معينه و الناس بتتقدم و تستنفع و لا لأ.

طيب نطبق المعايير دي على صوره المطريه.

١- هل افطار الرجاله في الشارع و الستات لوحدها في البيوت بيحد من تقدم الستات و بيحد من تعليمها و قدراتها؟

نقول انه على اسوء الفروض ممكن يكون بيخلق جو عام الستات تحس فيه انها مش واخده حقها. لذلك نقول ممكن ٥ من ١٠ وفق المعيار ده. طبعا ناس ممكن تقول بالعكس ده ممكن الستات تكون مبسوطه انها نزلت الرجاله بدري و انهم قاعدين مع بعض. ممكن.

ممكن كمان نقول انها مشابهه لمجموعه من الاصحاب في الغرب في fraternity خرجوا مع بعض كأخوه و أعضاء في ذات النادي.

لذلك بنقول على اسوء الفروض ٥ من ١٠.

٢- هل افطار الرجاله مع بعض قلل النشاط الاقتصادي في اي شيئ؟

الحقيقه فكرنا كتير و مش لاقيين حاجه نقولها هنا لذلك وفق المعيار ده نقول صفر من ١٠.

يعني نجمع المعيارين مع بعض و نقول على اسوء الفروض احنا بنتعامل مع ٥ من ٢٠ او ٢ من ١٠ من ناحيه قدرتنا على رفض الفصل بين الستات و الرجاله في الافطار الجماعي ده. يعني منقدرش نرفضه او على اسوء الفروض لو رفضناه المفروض اننا نطنش حتى.

طيب لو حتى قررنا نرفضه هل نرفضه قوي و لا مش قوي؟ هل هوه مفروض بالقانون؟ لأ. يبقى حتى لو قررنا نرفضه مش حيبقى رفض قوي. هل هو مفروض بالعادات؟ نعم.

في غياب المعايير يضيع كل شيئ. في وضع معايير ممكن نتكلم بعلم و دقه. و نلاقي في الاخر انه وفق المعايير اللي حطينها احنا قدام عمل لم يضر احد و لم يُحد من النشاط الاقتصادي لأحد. و لم يتم فرضه بالقانون و هو عمل تطوعي ناس عملاه عشان تفرح وفق ثقافتهم. خليهم يفرحوا. مضروش حد. بالعكس احنا تدخلنا في حياتهم له أضرار كثيره. Unintended consequences.

امتى حنعقل؟ و امتى ندع الخلق للخالق في الأمور الثقافية الخلافيه اللي ما تستاهلش؟

Separation_between_males_and_females_6Separation_between_males_and_females_5Separation_between_males_and_females_3Separation_between_males_and_females_2

المصادر:

١- التعليم المشترك و المفصول في الولايات المتحده 

https://www.usatoday.com/story/news/nation-now/2014/05/15/school-segregation-civil-rights-project/9115823/

٢- القانون الامريكي أقر امكانيه الفصل بين الجنسين في التعليم 

https://www.aauw.org/what-we-do/legal-resources/know-your-rights-at-work/title-vii/

٣- دراسات التعليم المفصول 

https://www.theatlantic.com/education/archive/2017/02/the-benefit-of-racial-isolation/516018/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s