صفحات منسيه من حياه الرسول صلى الله عليه و سلم… الحلقه ٢٥

تصرف ابي سفيان المفاجئ بعد نهايه معركه احد

ماذا فعل؟

Forgotton_Pages_of_the_prophet_life_24

شفنا في الحلقات السابقه (مصدر ١) ان زعماء مكه كانت عادتهم يخلوا أهالي القتلى في المعارك السابقه يطلعوا يحمسوا المقاتلين. بالضبط مثلا زي ما السيسي دلوقتي يطلع أهالي “الشهداء” معاه في التلفزيون متجاهلين تماما ان الناس دي رايحه تقتل و تسكر بيوت أهالي سيناء دم تمييز. في معركه أحد، ابو سفيان اختار ١٥ من ارامل و بنات القتلى في بدر و كانت بتقودهم زوجته شخصيا هند بنت عتبه. لاحظ الفارق هنا ان ابي سفيان كان عنده شجاعه مش زي الانظمه العربيه دلوقتي. هند كانت من عيله أرستقراطية في قمه الهرم في مكه اللي كانت وقتها حاجه زي دبي كده. زي ما تقول انها مثلا مرات محمد بن زايد او محمد بن راشد دلوقتي. 

هند كانت بتقول الشعر و كانت شخصيه سياسيه مهمه جدا و ابو سفيان كان زوجها التالت و تزوجته بعد ما تركت زوجها الاول و التاني و قالت لوالدها انها مش حتتجوز حد الا لما يتعرض عليها الاول و توافق او ترفض و ابوها قالها “ذلك لك”. 

في احد هند قادت النسوه و كانت بتقول الشعر التالي:

نحن بنات طارق نمشي على النمارق

إن تقبلوا نعانق وإن تدبروا نفـارق

يعني احنا ولاد عز. النمارق هي المخدات. يعني احنا ولاد عز قوي لدرجه اننا بنمشي على المخدات. لو “تقبلوا” يعني تهجموا في الحرب، حنحضنكوا لما ترجعوا. و لو تدبروا يعني تتراجعوا في الحرب حنفارق يعني مش حتشوفوا مننا حاجه. 

هند كانت رايحه و في دماغها انتقام او تار شخصي جدا. ابوها و اخوها الاثنان اتقتلوا في بدر. و اللي قتلهم كان شخص واحد هو عم الرسول حمزه. هند كانت مصممه ان حمزه يتقتل. هند عملت صفقه مع عبد إثيوبي انه يأخذ حريته و معاها فلوس كمان في مقابل انه يقتل حمزه في المعركه. فقط عبد هو اللي يفكر يقبل صفقه زي دي بسبب ان حمزه عم الرسول كان مقاتل شرس جدا. كنت تعرف مكان حمزه في المعركه من كتر الناس اللي بيحاولوا يحاربوا ضده. حمزه كان مميز جدا أنه كان بيلبس ريشه نعامه فوق دماغه. ام واحد من كفار مكه كانت بتطاهر البنات. حمزه كان شايف ان دي من عادات الجاهليه (تخيلوا قد ايه احنا اتغيرنا). حمزه كان لما يقابل حد في المعركه يقوله “هلم الي يا بن العاهره”. يعني تعال يا بن العاهره. لما حمزه قابل الراجل اللي أمه كانت بتختن البنات و كان اسمه سباع بن عبد العزى الغبشاني، وكان يُكنى بأبي نيار، فقال حمزة: «هلم إلي يا ابن مقطعة البظور»، وكانت أمُّه أمُّ أنمارٍ مولاةَ شريق بن عمرو بن وهب الثقفي، وكانت ختانة بمكة، فلما التقيا ضربه حمزة فقتله.يعني تعال يا بن الست اللي بتقطع الأعضاء التناسلية للبنات. العجيب ان ناس دلوقتي تقول ختان البنات من الاسلام!

العبد الاثيوبي كان اسمه وحش. استخدم الرمح ضد حمزه عشان يتجنب القتال المباشر معاه. وحش رمى الرمح على حمزه و بقوه كبيره لدرجه انه اصاب بطنه و نزل من رجليه. وحش انتظر لحد لما حمزه مات (تخيل كان خايف منه لدرجه ايه) و اخد الرمح بتاعه. 

بالرغم من كده كان لسه المؤمنين منتصرين في المعركه لحد لما رماه السهام من على جبل احد قرروا ينزلوا عشان ياخدوا الغنائم بالمخالفة لامر الرسول ليهم. ده أدى فرصه لابي سفيان يعمل هجوم مضاد زي ما درسناه في الحلقه السابقه (مصدر ١) و ينتصر. الرسول أصيب في دماغه في المعركه دي (الاصابع دي حتكون سبب وفاته بعد سنين طويله) و انتشرت اشاعه انه مات. لما ابو سفيان سمع اشاعه ان الرسول صلى الله عليه و سلم مات قرر انه يهدي الهجوم المضاد شويه عشان يوري أهل المدينه انه مشكلته مع محمد بس. 

ستات مكه نزلوا ساحه المعركه يدوروا على الغنائم. ياخذوا السيوف و الجمال و الحصنه الخ. لكن هند كانت بتدور على حاجه تانيه خالص. هند قعدت تدور من جثه للتانيه على حمزه. اول ما شافت حمزه صرخت صرحه اللي سمعها بيقول انه بعدها بسنين كل ما يفتكروا الصرخه الدم بيتجمد في عروقهم. هند اخدت سكينه و بأيديها الاتنين ضربت السكينه في جسد حمزه عشان تطلع كبده. و رفعت الكبد فوق دماغها و زغردت. و بعدين قصاد كل الناس حطت الكبد في بقها و قعدت تمضغه و الدم نازل من بقها و على وشهاو صدرها و دراعتها. 

المنظر ده خلى جيش مكه يتلهي بالانتصار و ده هدى المعركه اكتر و خلى مجموعه المقاتلتين اللي فضلت حوالين الرسول تدافع عنه انهم ينسحبوا في اتجاه سفح جبل احد عشان يتسلقوه تاني و يدوروا حواليه في اتجاه المدينه. 

الليل دخل و الرسول صلى الله عليه و سلم ومعاه قله معسكرين على سفح الجبل في انتظار انهم يقدروا ينسحبوا و يرجعوا المدينه. لكن فجأه ابو سفيان نفسه جه على حصانه و قرب منهم و قال بصوت عالي: أفي القوم محمد؟ فقال رسول الله ﷺ «لا تجيبوه» مرتين، ثم قال: أفي القوم ابن أبي قحافة ثلاثا، فقال رسول الله ﷺ «لا تجيبوه»، ثم قال: أفي القوم ابن الخطاب ثلاثا، فقال رسول الله ﷺ «لا تجيبوه»،

ابو سفيان بص لاصحابه اللي معاه و قال : أما هؤلاء فقد قُتلوا، لو كانوا في الأحياء لأجابوا فلم يملك عمر بن الخطاب نفسه أن قال: كذبت يا عدو الله فقد أبقى الله لك ما يخزيك، فقال: أعل هُبَل، أعل هُبَل، فقال رسول الله ﷺ «أجيبوه» يعني ردوا عليه متسيبهوش يمجد هبل و الالهه بتاعته فقالوا: ما نقول؟ قال: قولوا: «الله أعلى وأجل»، فقال أبو سفيان: ألا لنا العزى ولا عزى لكم، فقال رسول الله: «أجيبوه»، قالوا: ما نقول؟ قال: قولوا: «الله مولانا ولا مولى لكم».

ولما أجاب عمر أبا سفيان قال له أبو سفيان: هلم يا عمر، يعني تعال يا عمر انا عاوز اقابلك فقال رسول الله: «ائته فانظر ما شأنه» يعني روح شوف عاوز ايه. 

فجاءه فقال له أبو سفيان: أنشدك يا عمر أقتلنا محمدا؟

يعني قولي الصراحه احنا قتلنا محمد؟ 

فقال عمر: «اللهم لا، وإنه ليسمع كلامك الآن»، فقال: أنت أصدق عندي من ابن قمئة. ده الشخص اللي طلع اشاعه ان محمد صلى الله عليه و سلم مات. يعني أنا أكيد اصدقك انت مَش حاصدق ابن قمئه. 

ثم نادى أبو سفيان: إنه قد كان في قتلاكم مُثُل، والله ما رضيت وما سخطت وما نهيت وما أمرت. 

دي بقى نقطه مهمه جدا. ابو سفيان عرف ان الرسول سامع فراح منادي بصوت عالي انه سمع ان قتلى المؤمنين أتمثل بجثثهم. انا ما امرتش بكده. لكن ما نهيتش عنه. كمان انا ما رضيتش بكده لكن برضه ما زعلتش لما عرفت. بالنظر انهم في حاله حرب نقدر نقول انه تقريبا زي ما يكون اعتذار عن التمثيل بجثه حمزه. الأرستقراطيين العرب القدماء دول افضل مليون مره من اللي بيحكموا العرب دلوقتي. 

ابو سفيان قال بعدها ان احد رد على بدر و ان المعارك بتاخد دورات مره ليك و مره عليك. و بعدين مشي و امر جيشه بالانسحاب ناحيه مكه. 

ده كان انعطاف مهم جدا في تاريخ الاسلام لان ابو سفيان بكده اثبت انه عدو عاقل. 

و نكمل تأثير احد على المسلمين لما رجعوا منها. 

المصادر:

١- الحلقات السابقه مجمعه

https://jawdablog.org/category/التاريخ/صفحات-منسية-من-حياة-الرسول-ص/

٢- ابن اسحاق 

٣- الطبري 

٤- ابن كثير. 

٥- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button



Categories: (صفحات منسية من حياة الرسول (ص

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.

%d bloggers like this: