صفحات مخفيه من حياة الرسول صلى الله عليه وسلم  … الحلقه ٢٣

استخدام العنف ضد المعارضين! 

و هل كان هناك عبيد بياده وقت الرسول؟ 

Forgotton_Pages_of_the_prophet_life_23.jpg

في الحلقه اللي فاتت شفنا ازاي الرسول اتعامل مع بني قينقاع. شفنا الظروف السياسيه المحيطه بطردهم من المدينه. و دي نقطه مهمه جدا لان كتير منا بيغلط انه يقول و الله كل اليهود يستحقوا القتل مثلا او الطرد او الخ. و بعدين في نفس الوقت نقول دول أهل كتاب و الاسلام تصالح مع أهل الكتاب. الخ. نفس الكلام ينطبق على علاقاتنا مع المسيحيين و غيرهم. و بالتالي بنتلخبط و يبقى سهل الضحك علينا و يمكن نشك في ديننا كمان.

الكلام ده مش سليم في المطلق. بني قينقاع زي ما شفنا كان حواليهم كذا مشكله سياسيه: 

١- انهم لقوا ان وضعهم في المدينه كأصغر قبائل اليهود بقى مهدد بعد معركه بدر بالذات. قبل بدر كان فيه قبيلتين أوس و خزرج و بيتخانقوا مع بعض و بالتالي قبائل اليهود الصغيرة بتتحامى في قبيلة منهم و الأمور بتمشي. بعد بدر بقى الجميع في المدينه موحدين مع محمد. و بالتالي مفيش أوس و خزرج. فيه غالبيه من المؤمنين و حيبقى اقليه يهود و بني قينقاع اقليه في الاقليه. لذلك حريه الحركه عندهم حتقل جدا. قدام كده هم لعبوا لعبه في منتهى في الخطوره. انه طالما مفيش أوس و خزرج و خناقات بين القبائل الكبيره تخلي الضعيف يتحامى في ان الكبار بيتخانقوا (دي زي اللهم اضرب الظالمين ببعضهم و اخرجنا منهم سالمين) فقرروا انهم يلعبوا بين المدينه و مكه طالما ده خط الخلاف الجديد. و الإشاعات المتواترة ان بني قينقاع هم اللي قالوا لابي سفيان انه جيش المدينه في اتجاه قافلته. 

٢- ان حامي بني قينقاع في المدينه كان واحد اسمه عبد الله بن أُبي و ده كان على وشك انه يكون حاكم المدينه قبل الهجره. و بالتالي عنده غيره شديده من محمد صلى الله عليه و سلم. بعد بدر طبعا بقى موضوع قياده الرسول للمدينه مفيهوش شك. و بالتالي عبد الله بن ابي كان لازم يعمل اي مشاكل عشان يبان ان الأمور مش مستقره لمحمد و المؤمنين و بالتالي يقول لأهل المدينه انتم جبتوا محمد عشان يجيبلكم أمن و أمان. أهوه خناقات أهي و مشاكل و عدو صعب في مكه. مفيش قدامكم غيري. 

و بناءا عليه بني قينقاع دبروا خناقه مختلقه في السوق ان واحد من شبابهم حاول يكشف جلباب بياعه بدويه قام واحد من المسلمين قتله قام شباب بني قينقاع اتلموا و قتلوه. واضح انه موضوع مدبر عشان اثاره القلاقل في المدينه بهدف سياسي. 

لذلك الموضوع مش ديني. بالعكس الرسول زي ما شفنا في دستور المدينه أدى بني قينقاع حقوق مواطنه كامله طالما ميساعدوش الأعداء. و حتى بالرغم انهم منعوا شبابهم من دخول الاسلام و بالرغم ان الرسول كان مستغرب جدا أزاي اليهود اقرب الناس للمسلمين في حاجات كتيره مَش شايفين ان دي رساله جت لاصلاح اليهوديه. لكن كل ده مكانش خالص سبب ان الرسول اخد موقف حاد ضد بني قينقاع. القرآن زي ما شفنا في الحلقه اللي فاتت (مصدر ١) كان واضح جدا في الموضوع ده. 

زي ما شفنا نتعلم من ده حاجتين:

١- مفيش تعارض اطلاقا بين اننا نتعامل مع أهل الكتاب و اليهود انهم مواطنين طالما ينطبق دستور واحد علينا و لا توجد خيانه. في الوضع ده ممكن يبقى فيه خلافات دينيه و نقاشات و رغبه او عدم رغبه في دخول الاسلام. كل ده لا يبرر لا قتل و لا اعتداء. 

٢- لكن قدام انقلاب او محاوله انقلاب على حكم المسلمين في المدينه او على نظام الحكم فده خيانه للدستور اللي كتبناه مع بعض و اتفقنا عليه بالإجماع (مش اغلبيه) فده لازم معاه استخدام العنف. 

احداث نوفمبر – ديسمبر ٢٠١٢ و هي محاوله الانقلاب الاولى في مصر مشابهه جدا جدا لأحداث بني قينقاع. محاوله انقلاب و بلبله و اثاره مشاكل بعد انتصارات خارجيه ل د محمد مرسي (خطاب ايران، حرب غزه و وصفه من تايم ماجازين انه اهم رجل في الشرق الاوسط) و داخليه (التخلص من عنان و طنطاوي). التعامل معاها بشده كان ضروري و مهم.

لكن كان في حاله تانيه هي حاله قتل كعب بن الأشرف. كعب كان يهودي من بني النضير. بعد بدر، كعب راح مكه و معاه حوالي ٥٠ واحد من الشباب. كعب كان شاعر (إعلامي) و كان رايح مكه يحفزهم انهم يروحوا يحاربوا. و اشعر فيهم ان زهره شباب مكه ماتوا في بدر و انتم قاعدين هنا. 

عداء كعب للمسلمين وصل لدرجه انه أهل قريش سألوه: أديننا أحب إليك أم دين محمد وأصحابه؟ وأيُّ الفريقين أهدى سبيلاً؟”

فقال الكافر: “أنتم أهدى منهم سبيلاً. 

وفي ذلك أنزل الله : {أَلَمْ تَرَ إِلَى الَّذِينَ أُوتُوا نَصِيبًا مِنَ الْكِتَابِ يُؤْمِنُونَ بِالْجِبْتِ وَالطَّاغُوتِ وَيَقُولُونَ لِلَّذِينَ كَفَرُوا هَؤُلاَءِ أَهْدَى مِنَ الَّذِينَ آمَنُوا سَبِيلاً} 

يعني بيقولهم الكفر اقرب لليهوديه من الاسلام. 

الطاغوت هو الحاكم المستبد اللي بيخرج المسلمين من ديارهم. الجبت هو قوانين الحاكم ده و شعائره. و دي نقطه مهمه جدا. ان كعب بن ثابت و امثاله من الناس دول مش بس بيؤمنوا بالطاغوت. لا كمان بيؤمنوا و يآمنوا بأي حاجه يقولها. حاجه زي عبيد البياده دلوقتي. 

حسان بن ثابت شاعر الرسول قال شعر هجا فيه كعب بن ثابت بقوه. قام كعب اخدته الحماسه و يبدو انه أفتكر ان دستور المدينه ينطبق عليه بعد ما خان قام راجع المدينه تاني عشان يواجه حسان بن ثابت. 

الرسول صلى الله عليه و سلم في الوقت ده قال: 

مَنْ لِي بِكَعْبِ بْنِ الأَشْرَفِ؛ فَإِنَّهُ آذَى اللَّهَ وَرَسُولَهُ؟”.

مجموعه من المسلمين انتظروا كعب و هاجموه و قتلوه. 

بنو النضير اتبروا من كعب و جددوا عهدهم مع محمد و بالتالي دستور المدينه استمر في التطبيق عليهم بدون مشاكل. 

بعد الحادثه دي مباشره اتغير أتجاه القبله من انه يبقى اتجاه المسجد الأقصى شمالا زي اليهود و المسيحيين انه يبقى أتجاه الكعبه جنوبا. 

الرساله هنا كانت موجهه للجميع:

١- لمكه بتقولهم اننا راجعين تاني و مش ناسيين. 

٢- لليهود بتقولهم طيب طالما مَش عاوزين تعترفوا و تدخلوا الاسلام فده انفصال ديني بينا و بينكم. 

لاحظ انه فيه فرق بين فصل ديني او مفارقه دينيه و برضه ان لسه دستور المدينه ينطبق على الجميع طالما الكل موافق و ملتزم ببنود دستور المدينه. 

بنتعلم من كده كذا حاجه:

١- في بلد واحده مهم الاتفاق بالإجماع على قواعد ازاي حنتعامل مع بعض. دي اكبر مشاكل مصر. اننا بسبب قله فهمنا عاجزين نتفق على دستور ينطبق علينا كلنا و فيه أساسيات حمايه الشرف و العرض و الملكيه اللي مفيش عليها خلاف. 

٢- طالما فيه التزام بالاتفاق مفيش عقاب. ممكن نختلف دينيا و ثقافيا و نتخانق على الدين كمان لكن الكل موجود تحت دستور زي دستور المدينه. 

٣-خيانه الدستور تستدعي الشده. زي مع بني قينقاع. حاله جماعيه للخيانه. تستلزم عقاب جماعي. 

٤- خيانه الدستور تستدعي الشده زي ما حصل مع كعب بن الأشرف. حاله فرديه للخيانه اخدت عقاب فردي. و السيئه لم تعم على بني النضير كلهم. بالعكس. 

و نكمل ان شاء الله. 

المصادر:

١- الحلقات السابقه مجمعه

https://jawdablog.org/category/التاريخ/صفحات-منسية-من-حياة-الرسول-ص/

٢- ابن اسحاق 

٣- الطبري 

٤- ابن كثير. 

٥- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.