صفحات منسية من حياة الرسول  صلى الله عليه وسلم  … الحلقة ١٨

هل فعلا أهل المدينه ألطف من أهل مكه؟ و كيف مهد الرسول للهجره و ماذا نتعلم من ذلك؟ 

Forgotton_Pages_of_the_prophet_life_18

وفد يثرِب اللي رجع بعد الحج (الحلقات السابقه في مصدر ١) و بعد بيعه الرسول في العقبه رجع و معاه شخصيه مهمه جدا. الرسول سلى الله عليه و سلم بعت معاهم مصعب بن عُمير عشان يعلمهم الاسلام و يفتح قلبهم للإيمان. البيعه دي نقطه فاصله في الاسلام لان الرسول تحول عندها من داعيه و نبي و رسول لقائد سياسي الناس بتبايعه بيعه سياسيه بالتأييد. نلاحظ ان ده جه مباشره بعد الإسراء و المعراج اللي الرسول فيها مبقاش نبي عادي لكن بقى زعيم الأنبياء. بقى بيؤم أنبياء عظام في السماوات. لذلك كتير من المؤرخين بيقولوا دي نقطه تحول شديد (مصدر ٢) في الاسلام. مبقاش بس دعوه. بقى رساله للعالمين. و العجيب ان دي بالضبط النقطه اللي عندها الرسول كان في قمه الضعف من المعامله اللي شافها في الطائف. اللي شفنا انها بالضبط كده زي ما تروح الساحل الشمالي تقنع الناس بالتقوى و الفضيله. محدش حيسمعك و يتريقوا عليك. ربنا بيعلمنا ان التحولات الكبرى بتبدأ بالضبط عند لحظات الضعف الشديد. 

العديد من أهل يثرِب دخلوا الاسلام على يد مصعب. و محصلتش مشاكل و لا حاولوا يضطهدوا مصعب و لا يضربوه. السؤال اللي لازم نسأله هو ليه؟ اشمعنى مكه حاربت الرسول و الاسلام بشده. في حين يثرِب دخلت الاسلام؟ 

الشائع لحد دلوقتي انه أهل المدينه ألطف من أهل مكه. هل ده حقيقي و هل ده السبب؟ 

الحقيقه ان يثرِب كانت ديانتها بالضبط زي مكه. لكن يثرِب كانت مستعده لتقبل الاسلام اكثر بكثير من مكه. 

مكه و المدينه الاتنين كانوا بيؤمنوا بالله و انه فيه اله واحد اكبر من كل الالهه التانيه. لكن الاله ده بعيد جدا و بالتالي محتاجين آلهه اقرب للتقرب له. يثرِب كانت بتعبد مناه و بتؤمن انها بنت الله (اعوذ بالله). كانوا زي مكه بالضبط في كده. لكن يثرِب مكانش عندها حاجات كتيره تخسرها زي مكه. مجتمع مكه كان زي نيويورك او دبي او سنغافوره دلوقتي. مجتمع تجاري متمدين و متحضر و غني و معتمد على التجاره. الفرق ان مكه معتمده على تجاره بتخلط الدين بالتجارة لانها تجاره بتحصل في موسم الحج. و بالتالي مكه عندها كتير تخسره لو القبائل العربيه مبقتش تيجي الحج. يثرِب معندهاش كده خالص. 

الحاجه التانيه ان يثرِب كانت قبائل كتيره متناحره مع بعضها و محاربين بعض فترات طويله زي ما شفنا الحلقه اللي فاتت. و اهمهم قبيلتين الاوس و الخزرج. مكه مسيطر عليها قبيله واحده بس هي قريش. يثرِب كانت زهقت من الاقتتال و عاوزين حد يخلصهم و يوحدهم. مكه مكانتش بتحارب. 

سيطره قريش على كل حاجه في مكه خلت كمان العادات و التقاليد تبقى مسيطره. زي ما تقول كده نظام حكم مركزي مش بيسمح بأي اختلاف او تغيير. عاوز الناس تلبس نفس اللبس و الاعلام يبقى موجه و مفيش معارضه خالص. في يثرِب كل قبيله كانت عايشه في واحه من واحات يثرِب و دي واحات على امتداد كذا ميل و كل قبيله عايشه جوه حصن و بتختلط بالقبائل التانيه في حدود و خوف. نقدر نقول نظام حكم كونفيدرالي بيسمح بالتعدد و التغيير و الاختلاف اكتر بكتير من قريش. و دي نقطه نطبقها هنا في مصر بسهوله. الحكم المركزي في مصر هو اكبر عقبه في طريق اي تغيير. 

نقطه كمان مهمه قوي هي وجود القبائل اليهوديه في يثرِب عكس مكه. على فكره غير ما معظم المصريين فاكرين، لو قلت ليهودي او إسرائيلي دلوقتي ان كان فيه يهود كتير في المدينه ممكن يستغربوا. مش بيدرسوا هم الجزء ده من التاريخ قوي في المدارس. طبعا مراكز الأبحاث شيئ تاني. وقت الرسول صلى الله عليه و سلم معظم الشرق الاوسط و البحر المتوسط كانت مجتمعات مسيحيه على الأقل بالاسم بحكم سيطره الامبراطوريه الرومانيه. العاده كانت المحكومين يتبعوا بشكل عام ديانه الحاكم. لكن اليهوديه بشكل عام استمرت و ان كانت طبعا بأعداد صغيره جدا. ده بالرغم ان تأثير اليهود السياسي وقتها كان محدود جدا. اليهود استمروا بسبب انهم انتشروا بعد الرومان لما طردوهم من فلسطين في مساحات ضخمه جدا في العالم. و بالتالي صعب ان الامبراطوريه الرومانيه تقضي عليهم في أماكن بعيده و متفرقه بالذات لو المكان ده منطقه مقفره صحراويه محدش مهتم بيها زي الجزيره العربيه. 

بعد انتفاضه اليهود ضد الرومان في فلسطين و اللي قادها بار كوخبا في القرن التاني الميلادي، اليهود هربوا من فلسطين بعد القمع الروماني و طبيعي انهم يطلعوا في الصحرا في مكان الرومان اما مش حيلاقوهم فيه او مش عاوزين يروحوا فيه. و طبعا مش حيعيشوا فجأه في الصحرا بعد حياه الوديان في فلسطين. حيدوروا على وديان في الصحرا يعيشوا فيها و بالتالي استقروا في سلسله من الواحات ممتده من تبوك (على حدود الاردن و فلسطين) جنوبا لحد المدينه المنوره. سلسله الواحات دي متقاربة جدا في طبيعه الارض و المناخ مع فلسطين و يقدروا يعيشوا فيها و يزرعوا زي ما كانوا في فلسطين. سلسله الواحات دي كانت من الشمال للجنوب هي تبوك و تيمه و خَيْبَر و اخيرا المدينه او يثرِب في أقصى الجنوب (الخريطه المرفقه) اليهود دول تعربوا بشكل كبير. و كمان بقوا يقولوا الله و كمان يسموا عبد الله. الفارق الوحيد بينهم و بين العرب انهم كانوا بيسيبوا خصل من شعرهم على الجنب زي اليهود الأرثوذكس دلوقتي و هو امر مفروض من التوراه او هكذا يعتقدون. 

اليهود لحد دلوقتي من عاداتهم في المعبد اليهودي ان نسخه من التوراه تكون محفوظه في صدر المعبد و يوجد طقوس خاصه لفتحها و لمسها. و بيعاملوها كأنها كنز. ده في وقت كانت القراءه فيه او وجود اي كتاب شيئ نادر. و بالتالي العرب أطلقوا على اليهود و لاحقا المسيحين كمان أهل الكتاب. أهل يثرِب بالتأكيد اختلطوا مع اليهود عكس أهل مكه و بالتالي كانوا اولا متقبلين الاختلاف في الديانه اكتر لكن كمان متقبلين اكتر فكره انه فيه دين واحد و اله واحد. و طبعا لما الدين ده يكون جاي بالعربي مش بالعبري و بيقول ان المؤمنين كلهم اخوه فده بالضبط اللي أهل يثرِب كانوا بيدوروا عليه عشان يتخلصوا من خلافاتهم. 

من ذكاء الرسول صلى الله عليه و سلم انه بعت واحد زي مصعب و كان صبور جدا و محاور جيد و شخصيه محبوبه و بالتالي ابتدى أهل يثرِب يدخلوا في الاسلام. 

مع موسم الحج اللي بعد بيعه العقبه و كان في أوائل يونيو ٦٢٢ كان وفد المدينه لمقابله محمد مكون من ٧٢ من قيادات يثرِب و معهم امرأتان. رقم كبير و يورينا انهم كانوا فعلا جادين جدا. 

عكس بيعه العقبه في ٦٢١ البيعه المره دي حتبقى جد. بمعنى انها بقت اتفاقيه دفاع مشترك بالقتال لو اقتضى الامر. بمعنى يثرِب حتحمي محمد و المؤمنين بالسيف و الرسول و من معه حيحاربوا للدفاع عن المدينه لو اقتضى الامر. بيعه العقبه الاولى سموها بيعه النساء بالرغم ان مكانش فيها نساء خالص. بيعه العقبه التانيه سموها بيعه الرجال (بالرغم من حضور نساء) و قيل أيضا بيعه الحرب لان بقى فيها دفاع بالسلاح. 

نص بيعه العقبه التانيه:

يَا مَعْشَرَ الْخَزْرَجِ، هَلْ تَدْرُونَ عَلامَ تُبَايِعُونَ هَذَا الرَّجُلَ؟ قَالُوا: نَعَمْ. قَالَ: إِنَّكُمْ تُبَايِعُونَهُ عَلَى حَرْبِ الأَحْمَرِ وَالأَسْوَدِ مِنَ النَّاسِ، فَإِنْ كُنْتُمْ تَرَوْنَ أَنَّكُمْ إِذَا نُهِكَتْ أَمْوَالُكُمْ مُصِيبَةً، وَأَشْرَافُكُمْ قَتْلا أَسْلَمْتُمُوهُ، فَمِنَ الآنَ، فَهُوَ وَاللَّهِ خِزْيُ الدُّنْيَا وَالآخِرَةِ إِنْ فَعَلْتُمْ. وَإِنْ كُنْتُمْ تَرَوْنَ أَنَّكُمْ وَافُونَ لَهُ بِمَا دَعَوْتُمُوهُ إِلَيْهِ عَلَى نُهْكَةِ الأَمْوَالِ، وَقَتْلِ الأَشْرَافِ فَخُذُوهُ، فَهُوَ وَاللَّهِ خَيْرُ الدُّنْيَا وَالآخِرَةِ. قَالُوا: فَإِنَّا نَأْخُذُهُ عَلَى مُصِيبَةِ الأَمْوَالِ وَقَتْلِ الأَشْرَافِ، فَمَا لَنَا بِذَلِكَ يَا رَسُولَ اللَّهِ، إِنْ نَحْنُ وَفَّيْنَا؟ قَالَ: الْجَنَّةُ. قَالُوا: ابْسُطْ يَدَكَ، فَبَسَطَ يَدَهُ، فَبَايَعُوهُ.

أهل يثرِب برضه سألوا الرسول و قالوله طيب احنا بايعناك و لو ربنا كتب لك النصر هل حترجع لأهلك و تسيبنا؟ الرسول صلى الله عليه و سلم رد: انتم مني و انا منكم. احارب من تحاربون و اسالم من تسالمون. 

الرسول ساب قريش و مكه و ارتبط من وقتها بيثرب و اَهلها. 

ده درس مهم جدا لينا. الارتباط بالاهل و القبيله و الارض وقتها كان اكتر بكتير من دلوقتي. القبيله كانت كل حاجه. الوطن و الشرطه و الحمايه و الجيش و الجواز و الاكل و كله. و مع ان مكه هي أحب بلد للرسول لكن نلاحظ ان الرسول مرجعش أبدا بعد كده لمكه الا للفتح ثم الحج و فقط. 

المؤمنون ابتدوا يهاجروا في اتجاه يثرِب بعد بيعه العقبه اللي هي في الحقيقه حلف دفاعي حقيقي. طبعا زعماء قريش ابتدوا ياخدوا بالهم. و بالتالي ابتدوا يمنعوا الناس من الهجره بالقوه. ابو جهل اكتشف واحد كان حيهاجر. جابه بالقوه من الصحرا على بعد ٦ اميال بره مكه و رجعه و ضربه على الارض و اجبره يتراجع عن الاسلام و قال لأهل مكه اعملوا فيهم كده قبل ما يهاجروا. حتى النساء مخلصوش. ام سلمه كانت مهاجره مع زوجها و ابنها الرضيع. اَهلها قالوا لجوزها انت عاوز تهاجر اتفضل لكن مش حتاخد بنتنا. سحبوها بالجمل و اخدوها من جوزها. أهل جوزها ظهروا و حصلت خناقه على مين يأخذ الطفل و الطرفين قعدوا يسحبوا الطفل من بعض لحد لما خلعوا كتفه. في الاخر أهل الراجل اخدوا الطفل. أهل ام سلمه اخدوها. و زوجها هاجر لوحده. كل يوم ام سلمه كانت تقعد في مكه تعيط انها محرومه من جوزها و ابنها لحد لما الطرفين زهقوا. سابوها تاخد الطفل و هاجرت على جمل لوحدها خالص. 

خلال صيف عام ٦٢٢ كل يوم كان بيت في مكه بيفضى و أهله بيهاجروا. على سبتمبر كان مئات من الرجال و النساء و الأطفال هاجروا. 

ابو جهل زهق و ابتدا يتريق على الموضوع و قال انه محدش حيعيط عليهم. يعني مع السلامه. لكن الحقيقه ان الأهل كانوا فعلا زعلانين ان ولادهم هاجروا. 

بالرغم ان الغضب في قريش اتركز على الرسول لانه هوه السبب في نظرهم، الرسول قرر انه مش حيمشي الا لما يتأكد ان المؤمنين وصلوا للأمان. 

لكن فجأه الراجل اللي كان بيحمي الرسول صلى الله عليه و سلم بعد وفاه عمه ابي طالب زي ما شفنا قبل كده و اسمه المتم، الراجل ده مات. على بن ابي طالب و ابو بكر حاولوا يقنعوا الرسول انه مفيش وقت و انه لازم يمشي. 

بوفاه المتم خلاص الرسول مبقاش عنده حمايه. الحاجه الوحيده اللي تحميه بعد ربنا هو الخوف من انتقام بني هاشم لو حصلت له حاجه. زعماء قريش اجتمعوا يشوفوا حيتخلصوا منه ازاي. ابو جهل طلع بالفكرة العبقريه انه واحد شاب من كل عيله يقتلوه بضربه رجل واحد و بنو هاشم ميقدروش ينتقموا من قريش كلها. و مضمون ان ابي لهب زعيم بني هاشم مش حيعمل حاجه. بالعكس حيشوف الحركه دي انها جميل من قريش ليه. 

بقيه القصه معروفه لينا كلنا و مش حنعيدها هنا. قريش حطت جايزه مائه ناقه للي يلاقي محمد. طبعا بتوع اقتفاء الأثر لقوا لقيه و فعلا وصلوا للرسول في غار ثور بالرغم ان الرسول أخذ طريق جنوبي عكس الاتجاه الرئيسي للوصول للمدينه. و برضه عارفين احنا القصه. لا تحزن ان الله معنا. 

الرسول و ابو بكر بعد غار ثور بعتوا لواحد دليل موثوق فيه و معاه جمال و أتحرك التلاته الاول في اتجاه الجنوب اكتر و بعدين شرق في اتجاه البحر الاحمر و بعدين شمالا في جبال البحر الاحمر. الرحله في العاده بتأخذ ٣ ايّام. الرسول و صحبه وصلوا المدينه بالضبط وقت الظهر و الشمس في نصف السماء يوم ٢٤ سبتمبر ٦٢٢ بعد ١٠ أيام من البدايه. 

واحد من اليهود كان اول واحد شاف الركب و خرج ينادي و قال يا أهل الاوس و الخزرج هذا صاحبكم قد جاء. الناس من أهل يثرِب تدافعوا عشان يحيوا الرسول و يطلبوا انه يقف عندهم. و دي بدايه عهد جديد تماما في تاريخ العالم و الإنسانيه. 

و نكمل ان شاء الله. 

المصادر:

————-

١- الحلقات السابقه مجمعه

https://jawdablog.org/category/التاريخ/صفحات-منسية-من-حياة-الرسول-ص/

٢- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

٣- ابن اسحاق 

٤- الطبري 

٥- ابن كثير.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s