صفحات مخفيه من حياة الرسول صلى الله عليه و سلم … الحلقه ١٧

الرد على المشككين في الإسراء و المعراج و معنى اسم عبد المطلب! 

من اكتر الحوادث في الاسلام اللي بيتم التشكيك فيها هي رحلة الإسراء و المعراج. و الشكوك الحقيقة بدأت من ابن اسحاق نفسه. طبعا الراجل مكانش بيشكك في الرحله ذاتها لكن سؤاله كان هل الرسول راح بروحه فقط ام روحه و جسده و لا انه ربنا اوحى له بالرحله. طبعا أضاف للموضوع حديث السيده عائشه اللي قالت فيه انه ما فقد جسد الرسول صلى الله عليه و سلم لكن اسرى بروحه. و هو حديث ثبت لاحقا انه ضعيف. طبعا اول المشككين كانوا أهل مكه. المؤمنون لما عرفوا قصه الأسراء و المعراج طلبوا من الرسول أرجوك ما تحكيش القصه لأهل مكه. باختصار احنا مش ناقصين و هم أكيد حيكذبوك. الرسول رفض و اصر يحكي لأهل مكه ايه اللي شافه في الإسراء و المعراج. أهل مكه طبعا ضحكوا و قالوا اخيرا مسكنا عليك حاجه. ده القافله بتاخد شهر عشان تروح القدس. أنت جاي تقول انك روحت في ليله؟ بعد كده توالى المشككين لحد عصرنا دلوقتي. و أعم المشككين طبعا هم اتباع الديانات الاخرى بالذات المسيحيه او اليهوديه. و ده الحقيقه امر عجيب. ليه؟ لان في الإنجيل العهد القديم سفر التكوين قصه سيدنا يعقوب و كيف انه صعد على سلم للسماء تحفه الملائكه. و قيل انها رؤيه و قيل حقيقه. و الكنائس المصريه تعرض سلم يعقوب في حكايات للأطفال و داخل الكنائس. مصدر ١. لذلك غريب جدا ان يقوم اليهود و المسيحيون بالسخرية من الإسراء و المعراج! 

Forgotton_Pages_of_the_prophet_life_17

الصوره هي وصف المسيحين الأرثوذكس في مصر لسلم سيدنا يعقوب. 

بعد حادثه الإسراء و المعراج تأكد الرسول ان مكه لم تعد تتسع له و للمؤمنين. و لكن السؤال هو الى أين؟ 

تبدو المدينه دلوقتي اختيار مناسب او يمكن الاختيار الوحيد المناسب. الرسول صلى الله عليه و سلم كان عنده علاقه قويه بالمدينه او يثرِب زي ما كان اسمها وقتها. اولا زي ما شفنا في الحلقات السابقه (مصدر ٢) والد الرسول مات فيها. و بعد ده بست سنين والده الرسول برضه ماتت فيها و هي بتزور قبر زوجها. الجد الأكبر للرسول كمان هاشم شخصيا اتجوز من أهل المدينه و أنجب منها. هاشم كان ممثل قريش لدى حكام و تجار الشام. و بالتالي كان بيعدي باستمرار على يثرِب في الطريق للشام. هاشم اتجوز يثربيه من قبيله الخزرج و بعدين سابها و كمل رحلته شمالا و مات في غزه. وجود الطفل ده فضل مش معروف ٧ سنين. لما وصلت الأخبار مكه ان هاشم عنده طفل في المدينه اخو هاشم و اسمه المطلب اصر انه يأخذ الطفل و يرجع بيه مكه. خصوصا ان عبد المطلب مكانش عنده اولاد و هاشم ده كان ابنه الوحيد و الباقيين كلهم بنات. تقريبا خلاف على الحضانه زي اللي بنشوفهم دلوقتي. فيه قصه بتقول ان الام في الاخر وافقت مع اصرار عبد المطلب. و قصه تانيه بتقول انه اخد الولد على الجمل و طلع بيه من غير ما الام تاخد بالها. المطلب حاول يخبي الطفل خلال الرحله و قال عليه انه عبد بدل ما يقول انه ابن أخيه. و بالتالي بقى اسمه عبد المطلب. ده حيببقى جد الرسول و حيكون الراجل اللي شفناه في الحلقه الاولى بينقذ حياه ابنه عبد الله اللي حيكون والد الرسول (مصدر ٢). لذلك كان فيه علاقه ما بين الرسول صلى الله عليه و سلم و يثرِب. 

يثرِب وقتها كانت تعتبر ريف بالنسبه لمكه. مكه كان فيها التجاره و العلاقات مع العالم. حاجه زي نيويورك او دبي كده. يثرِب كانت ريف. بلد زراعيه. وادي في وسط الصحرا أهل المدينه تقف فيه شويه على الطريق و فيها شويه فلاحين. حاجه زي المنصوره كده مثلا. 

في حين مكه كانت مسالمه لان اَهلها عباره عن قبيله واحده هي قريش، يثرِب كانت كذا قبيله بينهم مشاكل كبيره كلها خلافات على ملكيه الارض الزراعيه. لذلك كل قبيله في يثرِب كانت عايشه داخل حصن يقدروا يحتموا فيه لو حصل حرب بين القبائل. اكبر قبيلتين في يثرِب كانوا الاوس و الخزرج و كان بينهم كذا حرب في ظرف اخر كام سنه قبل الهجره. محدش منهم قدر يغلب التاني بشكل حاسم و بالتالي العلاقات في يثرِب كانت متوتره. الحاجه الوحيده اللي كانت بتوحد أهل يثرِب هي احساسهم بالنقص ربنا او الغضب تجاه أهل مكه اللي كانوا متعاليين عليهم بالضبط كده احساس واحد من التجمع الخامس تجاه ناس ريفيين بسطاء. أهل مكه كانوا عندهم فعلا احساس بالتعالي تجاه القرويين الساذجين بتوع المدينه اللي كمان مش عارفين يحكموا نفسهم و يحافظوا على السلام بينهم و بيتخانقوا على أراضي و حاجات بالنسبه لتجاره قريش العالميه تعتبر حاجات هايفه

خلال موسم الحج الرسول كان بيروح يتلي القرآن بين خيام الحجاج. طبعا كتير منهم سمع عن محمد صلى الله عليه و سلم بالذات بعد حمله قريش ضده و بالتالي عندهم حب استطلاع يسمعوه. لكن محدش كان بيدخل الاسلام لحد سنه ٦٢٠ م دي جه ٦ حجاج من قبيله الخزرج يدوروا على الرسول. كانوا فعلا مستغربين ازاي واحد كان من شويه الصادق الأمين يتحول ان مكه معظمها ضده. الحجاج السته كانوا منبهرين ازاي الرسول حل مشكله وضع الحجر الأسود في الكعبه. و قالوا للرسول انه مفيش قوم في الدنيا بينهم خلافات زي اللي بيننا في يثرِب. يمكن ربنا أراد انك انت اللي تحل خلافاتنا زي ما حليت مشكله الحجر الأسود. السته دول دخلوا الاسلام و رجعوا المدينه ينشروا الدعوه و وعدوا يرجعوا السنه اللي بعدها. فعلا رجعوا سنه ٦٢١ م في موسم الحج و كان في أوائل الصيف. السته قابلوا الرسول على مسافه ٣ اميال خارج مكه في وادي منى. السته مش بس رجعوا لكن جابوا معاهم ٦ تانيين منهم ٣ من قبيله الاوس. و كل واحد منهم كان بيمثل عيله من عائلات يثرِب الكبيره. يعني يثرِب كلها كانت ممثله في اللقاء ده. ال١٢ دعوا الرسول انه يجي يثرِب يحل مشاكلهم. الرسول اصر انه ميجيش لوحده و لازم يجي معاه حوالي ٢٠٠ مسلم و مسلمه من مكه. كثير منهم كانوا من غير حمايه المتم اللي شفناها في الحلقات السابقه. كمان كان فيه عدد اكبر عاوز يدخل الاسلام لكن خايف. 

أهل يثرِب كانوا عاوزين الرسول يبقى حكم بينهم. الرسول رفض انه بس يبقى حكم. لو عاوزينه يبقوا مش بس ياخدوا المؤمنين معاه انهم لاجئين او ضيوف لكن يبقوا أهل في يثرب و اخوه و انهم يتقبلوا ان كلهم اخوه معترفين بالشهاده انه لا اله الا الله و ان محمد رسول الله. دي حاجه محصلتش قبل كده في التاريخ. ممكن قبل كده ان ناس بقت لاجئين طالبين حمايه زي اليهود في التيه او في فلسطين بعد الخروج من مصر مثلا. او ان ناس يستقروا في ارض مفيهاش حد زي معظم هجرات البشر القديمه. او واحد يهاجر من مكان لآخر زي نبي الله ابراهيم. لكن مجموعه من الناس تهاجر و تأخذ المكان الجديد بيت لها و تشترك فيه مع ناس موجوده فعلا دي جديده و محصلتش خالص. 

المجتمعون في منى موصلوش لاتفاق كامل لكن اتفقوا انهم يراجعوا الموضوع مرت تانيه في الحج القادم. و قبل ما يمشوا عاهدوا الرسول على الولاء له. و نص البيعه كان:

بَايَعَنَا رَسُولُ اللَّهِ Mohamed peace be upon him.svg لَيْلَةَ الْعَقَبَةِ الأُولَى عَلَى أَنْ لا نُشْرِكَ بِاللَّهِ شَيْئًا، وَلا نَسْرِقَ، وَلا نَزْنِيَ، وَلا نَقْتُلَ أَوْلادَنَا، وَلا نَأْتِيهِ بِبُهْتَانٍ نَفْتَرِيهِ بَيْنَ أَيْدِينَا وَأَرْجُلِنَا، وَلا نَعْصِهِ فِي مَعْرُوفٍ، فَإِنْ وَفَّيْتُمْ فَلَكُمُ الْجَنَّةَ، وَإِنْ غَشِيتُمْ مِنْ ذَلِكَ شَيْئًا، فَأُخِذْتُمْ بِحَدِّهِ فِي الدُّنْيَا فَهُوَ كَفَّارَةٌ لَهُ، وَإِنْ سُتِرْتُمْ عَلَيْهِ إِلَى يَوْمِ الْقِيَامَةِ، فَأَمْرُكُمْ إِلَى اللَّهِ، إِنْ شَاءَ عَذَّبَ وَإِنْ شَاءَ غَفَرَ.

ده كان قسم واضح على الولاء. القسم ده تحول ضخم في حياه الرسول اللي كان عمره وقتها في أوائل الخمسينات. الرسول مبقاش بس مبعوث من الله لقريش و لا للعرب و لا للعالمين فقط زي ما بان من قيادته لبقيه الأنبياء في الإسراء و المعراج. الرسول بقى قائد سياسي كمان. و دي بدايه تحول مهم جدا في الاسلام حيزيد مع مرور الوقت. 

و نتابع الحلقات الجايه. 

المصادر:

١- حلم سيدنا يعقوب 

https://youtu.be/vevzqlxTiFw

٢- الحلقات السابقه مجمعه

https://jawdablog.org/category/التاريخ/صفحات-منسية-من-حياة-الرسول-ص/

٣- ابن اسحاق 

٤- الطبري 

٥- ابن كثير. 

٦- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.