المعلم سيد العسكري وعماله

sayed_el3askry

المعلم سيد العسكري من اكبر تجار مصر. المعلم سيد بيتاجر في الخضار و الفاكهة و الدواجن و كمان أتوسع و بيعمل نوادي و ملاهي و بيبني طرق و كباري. لكن المشكلة عنده هي انه أتوسع جامد و دخل في ادارة مشاريع ملوش خبرة فيها و ابتدت الأمور تخرج عن سيطرته و العمال عنده بقوا متضررين و بيهددوا يعملوا ثوره و يسيبوا الشغل. المعلم سيد العسكري اتزنق و استلف جامد دولارات من المعلم فهد السعودي تاجر كبير جدا في المنطقة جنبه. لكن لان المعلم سيد برضه مش عارف يشغل الأمور العملية لسه مش شغالة. راح مره تانية للمعلم فهد يطلب منه قرض حسن او منحة جديدة. المعلم فهد رفض و قاله انه المره دي لازم يستلف من البنوك بالدولار. المعلم سيد فعلا استلف من البنوك بالدولار. لكن سيد خايف انه يصرف فلوس السلفه في اي مشاريع جديدة. و في نفس الوقت مش عاوز يصرفها كلها على العمال عشان شايف انهم مايستهلوش. يقوم يعمل ايه؟ المعلم سيد عاوز يوهم العمال حواليه انه لسه راجل غني و كسيب و كاسر عينهم. قام المعلم سيد واخد الفلوس الدولارات اللي استلفها من البنوك و حطها في حساب في البنك و طلع اشاعه بين العمال ان حسابه في البنك بالدولار وصل اعلى رقم ممكن و هو ٤٠ مليار دولار. رقم رهيب يرهب بيه اي عامل. مع ان الحقيقه انه مديون ب ٨٠ مليار دولار. يعني ال ٤٠ دول لازم يرجعهم و فوقهم كمان ٤٠ زيهم! 

قوم العمال ينبسطوا و يقولوا ياااه الأيام الحلوه رجعت تاني و المعلم سيد أكيد خلاص حينغنغنا. ده معاه في حسابه أربعين مليار دولار. 

قوم المعلم سيد العسكري قائل للعمال لما حيجوا يطلبوا اي فلوس انتم صدقتم و لا ايه. انا مش مش عاوز اديكم. انا مش قادر اديكم. 

المعلم سيد بيشتري وقت و بيضحك عليكم. 

المعلم سيد العسكري عمال يضحك عليكم طول الوقت. عمره ما قال صدق.

متصدقش المعلم سيد. 

كلام المعلم سيد ان احتياطي البنك المركزي ٤٠ مليار دولار:

http://m.youm7.com/story/2018/1/3/البنك-المركزى-ارتفاع-الاحتياطى-النقدى-لـ-37مليار-دولار-لأول-مرة/3584629

ديون المعلم سيد العسكري ٨٠ مليار دولار:

http://www.bbc.com/arabic/business-41442301

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s