صفحات منسية من حياة الرسول … الحلقة 16

صفحات منسية من حياة الرسول 

صلى الله عليه و سلم

ماذا حدث بعد وفاة خديجة 

تفاصيل فتره قليل ما نتذكرها من حياه الرسول

بعد رفع الحصار عن بني هاشم و وفاه السيده خديجه (مصدر ١) بعدها بأسابيع مرض عم الرسول و حاميه ابو طالب. ابو طالب كان عجوز و بالتالي الكل توقع ان فراش المرض حيكون هو فراش الموت. زعماء قريش الكبار زاروا ابي طالب في سريره و استغلوا ده انه يكون محاوله اخيره انهم يتفاوضوا معه على مشكلة محمد عليه الصلاه والسلام. حتى ابو جهل نفسه زار ابي طالب و اخد موقف معقول عكس كل مواقفه السابقه. في الأغلب ابو جهل عمل كده بسبب انهيار و فشل المقاطعه. ابو سفيان زعيم بني اميه فتح الموضوع مع ابي طالب و قاله: انت عارف اننا بنحترمك و نحترم مكانتك في قريش. لكن دلوقتي انت قربت على الموت و احنا كلنا قلقانين ايه اللي ممكن يحصل بعد كده. فاحنا بنطلب منك انك تخلينا نعمل اتفاق مع ابن اخيك انه يسيبنا لوحدنا و نسيبه لوحده. هوه يبقى عنده الدين بتاعه و احنا عندنا ديننا. مش القرآن بتاعه قال كده؟ 

ابو سفيان اختار بالضبط الفاظ القرآن. لكم دينكم و لي دين. لكن اللي كان مقبول وقتها مبقاش مقبول دلوقتي و حنشوف ليه. 

ابو طالب استدعى محمد عليه الصلاه و السلام و وقف جنب سرير عمه.ابو طالب سأله: الناس الاشراف دول جايين و عاوزين ياخدوا منك حاجه و يدوك حاجه مقابلها. 

بالرغم ان ابي طالب كان مريض لكن طبعا فاهم ان محمد لازم حيتنازل عن حاجه. حيتنازل طبعا عن ان الدين بتاعه ينتشر لانه باعترافه دلوقتي انه يسيبهم في حالهم معناها ان دينهم مقبول. دي تفرق كتير عن لكم دينكم و لي دين. واحده إبراء من الاعتراف بدينهم. التانيه اعتراف انه ممكن الاتنين يكملوا متوازيين. لاحظ قد ايه ابو طالب كان خبير سياسي. احنا متاكدين ان معظم القرّاء مخدوش بالهم من النقطه دي. و للاسف دي طبيعه طيبه او حتى غفله نقدر نقول انها موجوده عند المصريين المحدثين. لكن ابي طالب ده راجل سياسي من الدرجه الاولى بحكم انه تعامل مع إمبراطوريات و تاجر مع الشام والروم و الفرس و ده بيخليه يبقى مفتح جدا لأي تغيرات سياسيه و لو حتى بسيطه لانها بتأثر على تجارته. 

الرسول محمد طبعا برضه كان فاهم الموضوع و قال انه مش حيتنازل الا لما قريش تقبل انه مفيش اله غير الله و ترفض كل الأصنام. 

ابو سفيان مقدرش يرد و لا حد من زعماء قريش ردوا. هزوا دماغهم و هزوا أيديهم و مشيوا و سابوا ابي طالب و محمد. 

الروايات متضاربة عن ايه اللي قاله ابو طالب لابن أخيه. روايه بتقول انه قاله يا ابن اخي ايه اللي خلاك تتشدد معاهم. و روايه تانيه بتقول انه قاله يا ابن اخي ليه مطلبتش اكتر منهم. 

على اي الأحوال عند النقطه دي ابو طالب كان بيموت. الرسول أخد أيده و طلب منه انه يقول الشهادتين و يقبل الاسلام. قولها يا عمي عشان أشفع لك يوم القيامه. 

ابو طالب رد و قال: انا اقولها عشان خاطرك عشان تبقى مبسوط بس اخاف ان قريش يعايروني أني قلتها عشان خايف من الموت. انا حأفضل على عهد الآباء و الاجداد. 

و توفي ابو طالب بعد أسابيع من وفاه خديجه. 

بتبدأ من هنا نقطه منسيه في حياه الرسول. بنو هاشم اجتمعوا عشان يختاروا زعيمهم و طبعا اختاروا مين؟ اختاروا ابي لهب. يعني من اكبر داعم للرسول يخلفه اكبر حاقد على الرسول. 

في البدايه ابو لهب أكد للرسول انه حيحميه زي ما كان ابو طالب بيعمل. لما عمل كده بقيه زعماء قريش احتجوا. انت حتهرج. احنا لما صدقنا انك جئت بعد ابي طالب. ازاي تحمي واحد بيقول عن آباءنا و اجدادنا بما فيهم هاشم شخصيا و ابو طالب كمان انهم حيروحوا النار. ابو لهب سحب حمايته من الرسول. معنى كده ان اي هجوم على الرسول خلاص بقى من غير عواقب. بنو هاشم مش حيطالبوا بالتار. بلغتهم وقتها معناها انه احل دمه. 

بالنسبه للرسول دي نقطه مهمه جدا و لازم نقف عندها شويه. الرسول محمد صلى الله عليه و سلم كان بيحب مكه و قريش جدا. أحب البلاد ليه زي ما كلنا عارفين. الرسول مكانش عاوز يبقى بره. مكانش عاوز يعمل ثوره. الرسول كان بيقول انه عاوز الإصلاح. عاوز يصلحهم من الداخل مش من الخارج. الرسول لما رجع من الباديه بعد لما قضى وقت مع حليمه السعديه كان عاوز يبقى جزء من قريش. مكانش عاوز يبقى غريب. زي ما شفنا في الحلقات السابقه كان بيقضي معظم وقته قريب من جده عبد المطلب. الرسول مكانش عاوز يعمل ثوره. لكن أهل قريش مكانوش عاوزين الإصلاح. اللي هوه كان شايفه انه إصلاح هما كانوا شايفينه انه ثوره. 

بالنسبه لابي لهب و ابي سفيان دعوه محمد لاصلاح طريق الآباء و الاجداد هي في الحقيقه ثوره حتغير المجتمع كله و بالتالي شافوا محمد صلى الله عليه و سلم انه خاين. 

نفس الكلام ده احنا شايفينه دلوقتي. اي نظام قمعي شمولي زي النظام المصري الحالي او نظام مبارك او نظام ال سعود بيشوف اي دعوه للإصلاح او دعوه للعدالة على انها خيانه. و بالتالي اللي بيقوم بيها خاين بيحرض الناس ضد الأمن و الاستقرار و انهم ناس مدمرين مدفوعين بالحقد و الكراهيه. باختصار دي ما قال السيسي انهم أهل الشر. 

لما قريش عرفت ان ابي لهب سحب حمايته، بدأ البلطجيه حملات اعتداء على الرسول. يحدفوه بالتراب و هوه رايح الكعبه. واحد رمى عليه فضلات بهائم و الرسول جوه بيته. بالتالي أصبحت حياه الرسول ذاتها مهدده. 

الرسول سافر للطائف يطلب الحمايه هناك. ده اخر مكان ممكن يلاقي الرسول فيه حمايه. ليه؟ لان الطايف وقتها و ما زالت كانت بلد على مسافه يوم سفر من مكه. معظم أغنياء مكه كان عندهم بيت صيفي هناك بسبب ان الطايف على تلال مرتفعه و فيها ابار ميه و خضره كتيره و بالتالي جوها جميل في الصيف. بالضبط كده زي الساحل الشمالي دلوقتي. تخيل انك تروح الساحل الشمالي تدعوهم للإصلاح. تخيل! 

طبعا أهل الطايف اتريقوا على محمد. قالوله هوه ربنا ملقاش غيرك يبعته لينا. استغفر الله. و واحد تاني قاله طيب طالما انت رسول من الله ازاي احنا نتكلم معاك. انت اعلى من مستوانا كتير. و بعدين ابتدوا يرموه بالطوب. 

الرسول ساب الطايف و بيقول اللهم اشكوا إليك ضعف قوتي و قله حيلتي و هواني على الناس. و رجع على مكه بس طبعا مش قادر يدخلها بدون حمايه من حد جواها. من غير زعيم و قبيله كبيره تحميه. حمزه لوحده او عمر معاه ممكن يحموه بجسمهم مؤقتا لكن مش حل قابل للاستمرار على طول. 

الرسول بعت للزعماء اللي مشاركوش في الحصار يطلب منهم الحمايه. في النهايه واحد منهم استجاب و اسمه المُتم. كان راجل عجوز و متمسك بالمبادئ. و فعلا بعت شباب مسلحين يحموا الرسول و هوه داخل مكه. ابو جهل سأل المتم عن الموضوع و قاله دي حرب و لا انت بس بتحميه؟ قاله دي حمايه بس. ابو جهل مكانش قدّامه غير انه يرد و يقول طالما في حمايتك احنا كمان نحنميه. دي كانت التقاليد وقتها. 

ده أعطى الرسول فرصه وقت محدوده. مش افضل وضع و ممكن فعلا يكون غير قابل للاستمرار. دي النقطه اللي الرسول كان فيها أكتر وقت معرض و مكشوف من الناحيه الامنيه. من ناحيه حياته هوه شخصيا. 

نلاحظ حاجه بقى. عند النقطه دي بالضبط حصلت رحله الإسراء و المعراج. عند نقطه انه مفيش أمل الرسول يروح المسجد الأقصى و يطلع منه على السماوات السبع و يقابل عند كل سماء نبي من الأنبياء العظام. آدم و عيسى و يحيى و يوسف و ادريس و هارون و اخيرا في السماء السابعه ابو الأنبياء ابراهيم. النبي اللي كل العرب عارفينه انه ابو الأنبياء و بعضهم زي ما شفنا قبل كده اتبع دينه و كانوا بيسموا نفسهم الأحناف. و الرسول محمد يؤم كل الأنبياء العظام دول. 

ايه اهميه ده عند النقطه دي بالذات؟ الرسول محمد تحول من انه رسول لقريش انه بقى زعيم للأنبياء دول كلهم و بالتالي زعيم للعالمين. الرسول مبقاش بس صاحب دعوه اصلاحيه. بقى زعيم دعوه ثوريه حتغير مرسله للعالم كله و هي دعوه امتداد للرسالات الثوريه دي كلها. ابراهيم كان صاحب دعوه ثوريه. عيسى كان صاحب دعوه ثوريه. موسى صاحب دعوه ثوريه. الخ. كلهم بدأوا بالإصلاح و انتهوا انه لازم تغيير كبير. موسى بدأ يحاول يدعو فرعون. و في النهايه فرعون انتهى. الرسول بدأ انه يحاول يصلح قريش عشان يبعدوا عن الأصنام. لازم الأصنام تنتهي. لازم التفرقه العنصريه و الاستعباد ينتهوا. لازم توظيف الدين لتجاره مكه ينتهوا. الإسراء و المعراج هي نقطه تحول ضخمه. 

الحاجه التانيه ان يجي واحد زي يوسف زيدان يقول أصل المسجد الأقصى مش في القدس و العجيب أن البعض يصدقه بحجه ان العرب معرفوش القدس. امال تجاره قريش كانت مع مين؟ دول كانوا بيتجاروا مع الشام و الرومان و مصر. ده هاشم جد الرسول الأكبر مات في غزه! و شفنا رحلات الرسول نفسه للشام و لقاءه بالراهب بحيرا في الحلقات السابقه و رصدنا مكان اللقاء انه في الاردن الحاليّه. و بعدين ازاي الرسول يقابل سيدنا ابراهيم و موسى و يوسف و عيسى و كلهم عاشوا في او بالقرب من القدس كما نعلمها نحن الان و يعلمها الجميع في اليهوديه و المسيحيه و بعدين يؤمهم الرسول محمد في الصلاه و ميبقاش ده دليل ديني ان الاسلام أتى ليكون اولى بالقدس و ما حولها؟ و هي القدس كما نعلمها الان. للاسف مفيش منطق او هو تخلي عن اسس الدين او على الأقل نقول عدم فهم. 

Forgotton_Pages_of_the_prophet_life_16

الصوره تظهر تخيل الفنانين المسلمين في قرون سابقه للبراق. 

المصادر:

١- الحلقات السابقه من صفحات منسيه من حياه الرسول محمد صلى الله عليه و سلم

https://jawdablog.org/category/التاريخ/صفحات-منسية-من-حياة-الرسول-ص/

٢- الطبري

٣- ابن إسحاق و ابن كثير

٤- المسلم الاول

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.