صفحات منسية من حياة الرسول  صلى الله عليه وسلم ! الحلقة ١٥

انتهاء المقاطعة و تطبيقها على أحداث العصر الحالي! 

Forgotton_Pages_of_the_prophet_life_15.jpg

باستثناء ابي جهل و ابي لهب اللي كان كلهم حقد و غضب من الرسول و المسلمين، بقيه مكه و على رأسها ابو سفيان كان عندهم مشاكل محدده مع الرسول صلى الله عليه و سلم. مشاكلهم انحصرت ان الدين الجديد ده تغيير كبير جدا لنظامهم السياسي و الاجتماعي. القرآن الحقيقه اطلق على قريش وقتها لفظ الكفار. ساعات كتير احنا بنفهم الكفار غلط. الكفر في اللغه هو عدم الامتنان لنعمه الله. أهل قريش كانوا مؤمنين بربنا. لكن كمان كانوا مؤمنين باللات و العزى و منات انهم بنات الله. أهل قريش كانوا بيحرسوا و يصونوا الكعبه. لكن المشكله كانت انهم زودوا في الدين و حرفوه لمصالحهم و عشان يعملوا أرباح ماديه. أهل قريش كانوا انتهازيين في الدين. و بالتالي ده يخليهم غير ممتنين لنعمه ربما عليهم لأنهم أشركوا معاه آلهه تانيه بغرض الفلوس.

أهل قريش مكانوش وحشين في كل حاجه. أهل قريش كان عندهم مشاكل محدده. لذلك الانسان عشان يبقى كافر مش لازم انه يبقى وحش في كل شيئ. احنا عندنا صوره نمطيه عن الكفار و أهل قريش وقت الجاهليه مش دقيقه تماما. ده درس خطير جدا جدا لينا. نفكر فيه شويه كده. الانسان ممكن يكون بيعمل اعمال حلوه لكن غير ممتن لنعم الله. انه مثلا بيستغل الدين لتحقيق مصالح ماديه مثلا و بيستغل الناس و بيطبل لحاكم ظالم عشان مصالحه و يعوج الدين عشان يبرر للحكام الظالم عشان يستفيد ماديا. مش هوه ده اللي كفار قريش كانوا بيعملوه؟ مش لازم الاله الصغير يكون اسمه اللَّات و العزى. ممكن يكون فرعون صغير او حاكم ظالم. هي نفس الخصائص و الصفات لكن بمسميات العصر اللي احنا فيه. أهل قريش كانوا فعلا خدمه و حماه بيت الله الحرام و كانوا واخدين الموضوع ده بمنتهى الجديه. حاجه كده زي ال سعود دلوقتي. مهتمين بالبيت الحرام و بيعملوا توسعات و بيخدموا الحجيج. و ممكن فيهم ناس اخلاق و أدب و كرم. كل ده موجود، لكن …. لذلك محدش يجي يقول أصل دول كويسين و بيعملوا كيت و كيت فخلاص بقى. ده افراط في عدم فهم أصل الدين. 

الرسول عليه الصلاه و السلام في الفتره دي رجع تاني لليالي طويله من التأمل في غار حراء. الرسول كان فعلا زعلان. ابن اسحاق بيقول ان في الفتره دي الرسول كان شايف ان قريش، قومه، هم اللي دوروا ضهرهم ليه. الرسول كان فعلا متألم انه جابلهم رساله الحق و انهم مش عاوزين يسمعوا و انه اصبح السبب في الفرقه داخل قريش. كان زعلان عليهم و زعلان منهم. في الوقت ده نزلت سوره الكافرون:

قُلْ يَا أَيُّهَا الْكَافِرُونَ (1) لَا أَعْبُدُ مَا تَعْبُدُونَ (2) وَلَا أَنْتُمْ عَابِدُونَ مَا أَعْبُدُ (3) وَلَا أَنَا عَابِدٌ مَا عَبَدْتُمْ (4) وَلَا أَنْتُمْ عَابِدُونَ مَا أَعْبُدُ (5) لَكُمْ دِينُكُمْ وَلِيَ دِينِ (6)

ايه اهميه سوره الكافرون في الوقت ده؟ اول حاجه وضحت جدا انهم كافرين. الحاجه التانيه وضحت انه مفيش حل وسط. مفيش توافق بين المؤمنين و بين بقيه أهل قريش. موقف حاد جدا لكن مبدأي و مفصلي. 

و في الرد على حزن الرسول انه شايف انه السبب في تفرقه أهل قريش الوحي نزل للرسول انه: ” انك لا تسمع الموتى و لا تسمع الصم الدعاء”. و كمان نزل قوله تعالى: “لعلك باخع نفسك الا يكونوا مؤمنين.” يعني متزعلش نفسك. متقهرش نفسك انهم مش بيسمعوا نداء الإيمان. “دعهم في غيهم يعمهون” يعني سيبهم هم الخسرانين. و انهم حتى لو نزلت حته من السماء قدام عينيهم حيقولوا ده سحاب وقع. ربنا و الوحي بيقولوا للرسول متزعلش. لا تحزن. و كمان ربنا بيقول بإعلان واضح في سوره الكافرون انه الأمور واضحه و انه فيه فارق واضح. 

الموقف ده احنا بنتعلم منه كتير قوي. احنا شايفين حوالينا ناس بالضبط زي اللي القرآن أتكلم عنهم. لو نزلت حته من السماء برضه حيقولوا ان شويه سحاب. ناس قدامهم كل اعمال السيسي: دمار اقتصادي يقولك اصبر شويه. قتل. يقولوا ما يمكن ناس وحشه احنا مالنا. تعاون مع اسرائيل واضح مكشوف يقولوا أصل دي سياسه. مشاريع فاشله يقولوا أهوه بيحاول. بيع جزر للسعوديه و تبعيه و عماله لآل سعود و الإمارات يقولوا خطه. 

قيادات قريش بعد سنتين من المقاطعه وصلوا للنتيجه المؤكدة و هي ان الرسول محمد صلى الله عليه و سلم ما استجابش للضغط و ان بني هاشم وقفت معاه وفق التقاليد العربيه اللي قيادات قريش نفسها بتدعي انها بتحافظ عليها و ان الحصار سبب تعاطف كبير مع المؤمنين لدرجه ان ناس زي عمر بن الخطاب و حمزه عم الرسول دخلوا في الإيمان. و كمان بعض من المؤمنين هاجروا الحبشه و هربوا من الموضوع كله. و كمان كل عائلات قريش باستثناء الاتنين اللي وقعوا وثيقه المقاطعه تعاطفوا مع بني هاشم و بقوا يهربوا لهم الأكل و التجاره. الحصار عمل نتايج عكسيه. المؤمنون ثبتوا على مواقفهم و الناس اتعاطفوا معاهم. بالرغم زي ما شفنا في الحلقه اللي فاتت (مصدر ١) ان قريش استخدمت كل انواع العنف باستثناء الحرب. قيادات المقاطعه وصلت بعد سنتين ان الحرب مستحيله لانها حتخرب بيت قريش كلها و توقف الحج مصدر الرزق و ان المقاطعه بتجيب نتيجه عكسيه و بالتالي قرروا ينهوا المقاطعه. في الوقت ده كان اعلان المقاطعه المتعلق في الكعبه كانت الشمس و الرياح بعد سنتين مسحته كله باستثناء اسم الله عليه. 

نفس الحكايه مع اعلان مقاطعه قطر. الحرب مستحيله بسبب التواجد الامريكي و التركي. لذلك مفيش غير انهم يستخدموا العنف مع المستضعفين. يجروا واحد لابي ظبي و يعذبوه و يطلعوه عيان على الكويت. يحاولوا يخطفوا مرات واحد تاني. يحتجزوا بنات واحد تالت. و هكذا. كل ده حيستمر و حيزود تعاطف العرب و المسلمين مع قطر. في خلال سنتين يعني ٢٠١٩ قيادات المقاطعه حنكتشف انه مش جايب نتيجه و حيبتدي يتآكل بالتدريج. لكن اهم حاجه في الموضوع هو الثبات و الاهم عدم قدره العدو على الحرب المباشره. لانه لو يقدر يعمل حرب مباشره حيعملها. 

بعد انتهاء الحصار مباشره السيده خديجه ماتت. مش معروف بالضبط ليه. ممكن من الضغط العصبي خلال فتره الحصار و سببلها ازمه قلبيه. السبب اننا بنقول كده انها ماتت فجأه بدون مرض و بدون اي مقدمات. 

لمده ٢٤ سنه السيده خديجه كانت رفيقه عمر الرسول. كانت اللي بيجبها جدا و بادلته حب شديد زي ما شفنا في حلقات سابقه. كانت ملاذه. كانت الصخره في حياته. هي اللي شافت فيه انه حيبقى رسول. آمنت بيه على طول. عاشلهم من الخلفه ٤ بنات و ربوا ولدين تانيين في بيتهم. في ذراعها الرسول رجع من غار حراء بعد نزول الوحي يطلب الأمان. و دلوقتي بس في الوقت اللي الحصار انتهى هي كمان ماتت. 

الرسول تزوج كثيرات (٩ بالعدد) بعد السيده خديجه. لكن مفيش واحده حبها قد حبه للسيده خديجه. السيده عائشه اللي هي اصغر من تزوجها الرسول قالت انها مغارتش من حد قد غيرتها من خديجه. 

صحيح البخاري ذكر أيضا عن أم المؤمنين عائشه قالت : استأذنت هالة بنت خويلد أخت خديجة على رسول الله صلى الله عليه وآله ، فعرف استيذان خديجة ، فارتاع لذلك ، فقال ” اللهم هالة ” قالت : فغرت ، فقلت : ما تذكر من عجوز من عجايز قريش ، حمراء الشدقين ، هلكت في الدهر قد أبدلك الله خيرا منها ! ؟ وفي مسند أحمد بعد هذا : ” فتغير وجه رسول الله تغيرا ما كنت أراه إلا. 

يعني الرسول خلى هاله أخت خديجه تدخل عليه و كان قلقان هي عاوزه ايه خايف يكون فيه حاجه. فالسيدة عائشه غارت. اشمعنى أهل خديجه تعمل معاهم كده و اهلى لأ. و قالت ان خديجه كانت عجوزه و ماتت من زمان (هلكت في الدهر) و حمراء الشدقين (يعني كانت عجوزه من غير سنان فلثتها باينه انها حمرا) و ربنا جابلك اللي أحسن منها (يعني السيده عيشه طبعا). فالرسول زعل جدا و وشه اتغير بدرجه انه محدش شافه زعلان بالشكل ده قبل كده أبدا! 

تخيلوا قد ايه حب خديجه اذا. لذلك اي حد يقول الرسول اتجوز عشان أغراض شخصيه مش عارف بيقول ايه. 

و نكمل الحلقه الجايه ان شاء الله. 

الصوره لمقبرة المعلاه بطريق الحجوم بمكه مكان مدفن السيده خديجه

المصادر:

1- الحلقات السابقه من صفحات منسيه من حياه الرسول محمد صلى الله عليه و سلم

https://jawdablog.org/category/التاريخ/صفحات-منسية-من-حياة-الرسول-ص/

https://jawdablog.org/2017/12/09/forgotten_pages_prophet_life_10/

https://jawdablog.org/2017/12/01/forgotten_pages_of_prohets_life_09/

https://jawdablog.org/2017/11/17/forgotten_pages_of_prohets_life_08/

https://jawdablog.org/2017/11/11/forgotten_pages_of_prohets_life_07/

https://jawdablog.org/2017/11/04/forgotten_pages_of_prohets_life_06/

https://jawdablog.org/2017/10/28/forgotten_pages_of_prohets_life_05/

https://jawdablog.org/2017/10/21/forgotten_pages_of_prohets_life_04/

https://jawdablog.org/2017/10/14/forgotten_pages_of_prohets_life_03/

https://jawdablog.org/2017/10/07/forgotten_pages_of_prohets_life_02/

https://jawdablog.org/2017/09/30/forgotten_pages_of_prohets_life_01/

٣- ابن إسحاق

٤- المسلم الاول

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s