صفحات منسية من حياة الرسول  صلى الله عليه و سلم! الحلقة ١٤

استخدام قريش للعنف و الخطوه التاليه للسيسي! 

Forgotton_Pages_of_the_prophet_life_14

نهينا الحلقه اللي فاتت (مصدر ١) بكسر المؤمنين في مكه للحصار و المقاطعة بالهجرة للحبشة. و شوفنا ان معظم عائلات قريش ما اشتركوش قوي في المقاطعة و حصار بني هاشم. و شفنا انهم حتى ما وقعوش على وثيقه الحصار اللي اتعلقت على الكعبة و انهم كانوا بيتظاهروا بالمقاطعة لكن الحقيقة كانوا بيتاجروا مع بني هاشم في السر. ده جنن زعماء المقاطعة بالذات ابي جهل (من بني مخزوم) و كان جارر معاه ابي سفيان (من بني اميه) بالرغم ان ابي سفيان كان اعقل بكثير و عرف عنه الحكمة. و ابو طالب عم الرسول و زعيم بني هاشم عمل قصيده رهيبه (نشرناها و ترجمناها كمان بلغه عربية اسهل الحلقة الماضية) فضح فيها زعماء قريش و ورى قد ايه هم منافقين و انهم بيدعوا انهم بتوع مبادئ و التزام بالتقاليد العربيه لكن هم اول ناس خرقوا التقاليد دي و نهاها انه مش حيسلم ابن أخيه محمد حتى لو الأمر استدعى الحرب. القصيدة انتشرت في كل بيت في قريش و الناس كانت بتردد القصيده دي في الشوارع. حاجه كده زي بيان في قناه فضائيه دلوقتي. و ده جنن ابي جهل اكتر و اكتر. 

لكن قبل ما نبدأ برد فعل ابي جهل ان سياسته مكانتش شغاله قوي حنرد على شويه أمور مهمه. ناس بتكتب و بتقول انتم بتوظوا الدين بأنكم بتسقطوا احداث الأيام الاولى للإسلام على المواقف السياسيه دلوقتي. دول ناس لو أخدنا منطقهم يبقى الدين حيتحول بس لعبادات. يعني قوم صلي و خلاص. طيب السؤال هوه مش لما موسى وقف قدام فرعون مش دي كانت سياسه؟ مش ده كان ضد الاستعباد و مع حريات الناس و لا موسى كان واقف ضد فرعون اللي رباه عشان يخلي الناس تصلي و تصوم؟ و هوه الرسول محمد صلى الله عليه و سلم لما وقف قدام قريش هل كان عشان بس الناس تصلي و تصوم؟ لو الموضوع ان شويه مؤمنين يصلوا و يصوموا و يعبدوا ربنا كانت قريش مكانش حيبقى عندها اي مشكله مع محمد و اتباعه. أهو دين من بقيه الأديان اللي موجوده. المشكله ان رساله محمد كانت بتقوض مبادئ مجتمع الجزيره العربيه السياسيه و الاجتماعيه. بتقول ان الاجداد مش دايما صح. ده كان زي ما شفنا مبدأ سياسي و اجتماعي أساسي. بتقول ان القبيله مش مهمه بالمقارنه بالارتباط بين المؤمنين. ده بالضبط زي ما نيجي دلوقتي و نقول الدوله او القوميه مش مهمه مقارنه بالارتباط بين المؤمنين. مش دي سياسه و لا احنا بيتهيألنا؟ بتقول ان الناس سواسيه. مفيش فرق بين عبد و سيد. ده اختراق رئيسي للنظام الاقتصادي و المجتمعي في الجزيره. بتقول ان كونك معاك فلوس ميدكش انك تدخل الجنه. مش ده تقويض للهرم الاجتماعي و السياسي برضه و لا احنا بندعي؟ طيب لو احنا مفهمناش اساسيات الدين دي و طبقناها يبقى معلش ايه لزمته بقى؟ 

ناس بتقول طيب طبقوا الحاجات دي بس بلاش إسقاطات على الاوضاع السياسيه دلوقتي لان كل الموجودين دلوقتي غلط و محدش ممكن يتقارن بالمسلمين الأوائل او بسيدنا محمد. جميل متفقين. محدش يقارن بالمسلمين الأوائل. خالص. يبقى ازاي ممكن و امتى نقدر نطبق و نتعلم من قصص المسلمين الأوائل؟ حيحصل امتى؟ الناس اللي بيقولوا كده ميفرقرش خالص عن تحويل الاسلام لعبادات فقط لأنهم بيتقبلوا فكره تطبيق و التعلم من الاسلام لكن بيتقبلوها في اوضاع غير موجوده و غير ممكنه و بالتالي عمليا هم مش بيقبلوها. 

اخيرا ناس بتكتب و تقول انتم ازاي تستخدموا اللغه العاميه في سرد احداث الاسلام الاولى. لازم تستخدموا الفصحى. ده كلام خطير لسببين. الاول انه بيحول الدين لكهنوت. و بمرور الوقت اللغه المستخدمة في الدين تنعزل و تنفصل عن اللغه المستخدمه يوميا. و ده حصل في مصر المسيحيه. ان الديموطيقيه بقت لغه الكهنوت و اليوناني بقت لغه الناس. معلش ازاي تطبق تعاليم انت مش فاهمها؟ طبيعي ان اللغه في العالم كلها مرنه و بيدخل فيها مصطلحات و معاني جديده باستمرار بحكم التطور البشري. بالعكس احنا نظرتنا المفروض تبقى ان العاميه و الفصحى جزء من لغه واحده هي اللغه العربيه. احنا شايفين ان الفصل بينهم في عقولنا عمليه خطيره جدا. و العجيب ان مثلا الانجليزي القديم فيه كلمات و مصطلحات محدش يعرفها دلوقتي لكن محدش بيطلع يقول الانجليزية العاميه لغه مختلفه عن الانجليزية الفصحى. فيه طبعا colloquial English و فيه slangs لكن مفيش الفصل الحاد اللي موجود في مخيلتنا عن العربيه. و بالتالي احنا واقعين في فخ حينتهي مع مرور الوقت ان العاميه تبقى لغه مختلفه زي لغه أهل مالطه كده مع ان اصلها عربي و الفصحى تبقى حبيسه المتاحف و المصاحف اللي متعلقة في العربيات. احنا دعاه انها لغه عربيه واحده لها لهجات و استخدامات مختلفه و انها امتداد واحد. نقطه كمان ان العاميه بتوصل الفكره أسرع و لناس اكتر و ده اهم بكتير من حبس الفصحى في وعاء. و الموضوع مطروح للنقاش طبعا لكن فكر فيها شويه. مع ملاحظه اننا بننشر مثلا قصيده ابي طالب و بنوضح معانيها بلغه سهله عشان نزود حصيله الناس من الكلمات. 

رد فعل ابي جهل كان استخدام العنف. العنف اللي ميوصلش لحرب مفتوحه مع قريش. انه يحرض البلطجيه انهم يعذبوا المؤمنين اللي ملهومش ضهر. ناس زي بلال بن رباح مثلا. او آل ياسر. انهم ياخذوا الناس دي و يستخدموا معاهم التعذيب او القتل. و مهم ان التعذيب ده يكون علني قدام الناس عشان يبقى عبره. ابي جهل مش عاوز حرب مع بني هاشم لان الحرب بتهدم اقتصاد مكه كله. لكن عاوز متنفس لفشله السياسي في تطبيق الحصار. يبقى مفيش غير العنف. و ده طبيعي جدا في اي صراع فيه طرف قوي مش قادر يحقق أهدافه السياسيه مع طرف اضعف لكن مش بيستسلم. الطرف القوي ده لازم حيلجأ للعنف لتحقيق أهدافه اللي مش قادر يحققها بتكلفه سياسيه اقل. العنف ده ممكن يكون حرب و لو الحرب مش ممكنه مع القوي حيبقى استهداف الضعفاء و إعدامهم و تعذيبهم. نظن يعني الموضوع واضح و تطبيقه في حاله مصر قدامنا مفيش أوضح منه. منقدرش نحارب قطر و تركيا برغم حصارهم و مش قادرين على ابي طالب يبقى ندخل على الضعفاء و نعدمهم و نعذبهم. و ده بالتأكيد حيستمر و حيزيد و حيتضاعف كمان. التعامل مع الرسول محمد صلى الله عليه و سلم كان مختلف لانه عنده ضهر هوه بني هاشم و ابي طالب. يبقى ميقدروش يعذبوه و بالتأكيد ميقدروش يعدموه لان ده معناه الحرب. لكن يقدروا يبعتوا بلطجيه يبهدلوه. مثلا يجي يقرأ قرآن في الكعبه يتلموا حواليه البلطجيه يزعقوا و يشتموا. يجيبوا شويه عيال يحدفوه بالطوب. ممكن شويه مواطنين شرفاء يضربوه علقه سريعه. كده يعني. ممكن كمان الهجاء في الشعر و السخريه و دفع فلوس للشعراء عشان يسخروا من محمد و الدين الجديد. حاجه كده زي دلوقتي القنوات الفضائيه و المذيعين المأجورين (معروفين طبعا). 

التعذيب مع الضعاف اللي ملهومش ضهر وصل لمرحله ان البلطجيه مع بعض الناس يشاوروا على خنفسه ماشيه و يقولوا للضحيه ده ربنا و الضحيه يوافق عشان يخلص من التعذيب. 

المشكله ان حمله العنف من قريش دي بمرور الوقت بدأت تجيب نتايج عكسيه جدا. ازاي؟ 

اول حاجه حصلت هي انقسام جوه ال مخزوم نفسهم. واحد شاب من بني مخزوم دخل الاسلام. اخوه الكبير كان راجل عصبي جدا و قوي جدا. ابو جهل زعيم بني مخزوم راح للأخ الكبير يستأذنه انه يؤدب الواد الصغير. اخوه قاله أدبه نعم. لكن لو اي حاجه حصلت لحياته النتيجه حتكون حياتك انت. طبعا ابو جهل تراجع ان يؤدب اي حد في بني مخزوم. 

في الوقت ده ابو بكر تدخل لإنقاذ بلال من التعذيب و فداه بعبد اخر لم يدخل الاسلام. 

بعدها حمزه عم الرسول كان راجع من رحله صيد عشان يجيب اكل لبني هاشم لتجنب المقاطعه. كالعاده رجع عشان يطوف حوالين الكعبه للشكر. لقى ابي جهل فوق راس الرسول محمد و عمال يلعنه و الرسول محمد صلى الله عليه و سلم ساكت. حمزه مكانش راجل بتاع سلميتنا أقوى من الرصاص. حمزه كان أقوى رجل في قريش و معروف عنه الشده. حمزه اخد رمحه و حط طرفه على كتف ابي جهل و قاله بشده انت تعمل كده في ابن اخويا لو عرفت أني انا كمان مسلم و من اتباعه؟ ابو جهل و الرمح في كتفه و مشدوه ان واحد زي حمزه بيعلن إسلامه معرفش يرد. جه شويه من بلطجيه بني مخزوم عشان ينجدوا ابي جهل. ابو جهل شاف الموقف و قالهم أمشوا امشوا. يلا بينا من هنا. انا اللي غلطان. انا زودت عيار السب لمحمد شويه. 

بعد كده على طول جه اسلام عمر بن الخطاب. عمر كان برضه معروف عنه الشده و الاندفاع و طول القامه لدرجه انه لو واقف الناس تفتكر انه راكب حصان. عمر كان مع أصحابه و قالهم ان محمد فرق قريش و فرق بين العائلات. انا حاخد سيفي و اروح اقتله. واحد صاحبه قاله قبل ما تروح تقتله شوف الاول بيتك و اهلك اللي دخلوا الاسلام. عمر اكتشف ان فاطمة اخته دخلت الاسلام. عمر دخل عليهم في بيت اخته لقاها مع زوجها و أصدقاء يقرأون سوره طه. الْيَوْمَ ده انتهى ان عمر دخل الاسلام. 

لذلك اللي حصل هو ان اندفاع ابي جهل و قريش في التعذيب و القتل و التنكيل بالضعاف و الضغط على المؤمنين ابتدا يجيب نتايج عكسيه ان بعض عليه القوم في مكه ابتدوا يتعاطفوا مع المسلمين و يدخلوا الاسلام. 

و الحقيقه دي نقطه مهمه احنا مفتقدينها دلوقتي في التعامل مع السيسي و محور الإمارات – محمد بن سلمان. محتاجين احنا ناس تتغير و تسيب المحور من الدائره الداخليه للمحور ده. لذلك الناس اللي بتقول احنا مش بنستقبل حد و اللي ضدنا في رابعه خلاص يبقى ضدنا على طول الحقيقه غلطانين. احنا محتاجين ناس قريبه من الدائره الداخليه بشكل علني تتركها و تقول انها كانت غلطانه و ان السيسي ده مجرم. بالذات لو ناس قريبه جدا من القمه و عندها معلومات و كمان لو ناس عندهم اتصالات دوليه كبيره. لان دول ممكن يحموا الضعاف زي ما سيدنا ابو بكر عمل. 

رساله القرآن لسيدنا محمد كانت وقتها ان ده حصل لكل الأنبياء و ان عليك بالصبر. و انك مش مسئول عن إيمانهم. انت بس مسئول عن دعوتهم. 

العجيب ان المسلمين دلوقتي اي حد في العالم يتريق على الاسلام او القرآن أو سيدنا محمد يطلعوا يهيجوا و بدل ما هوه موضوع صغير يتحول يبقى قصه طويله يموت فيها مسلمين ! مع ان رساله القرآن في ايّام الاسلام الاولى كانت تجاهل النوع ده من اللغو. و للاسف اي مغرض مغمور دلوقتي عاوز يشتهر يطلع في الغرب يشتم سيدنا محمد و هوه عارف كويس جدا ان ده أسهل طريق للشهره و المال. ركزوا كويس في أفعالكم. لان كمان حكومات العرب بتهيج المسائل اكتر و تسمح بالمظاهرات و شويه تكسير كمان عشان تبين للغرب ان الشعوب دي شويه همج و ان احنا بس اللي نقدر نسيطر عليهم. ناخد بالنا و نخلينا اذكياء شويه. 

و نشوف الحلقه الجايه ازاي الحصار انتهى على مفيش. 

المصادر:

١- الحلقات السابقه مجمعه من صفحات منسيه من حياه الرسول 

https://jawdablog.org/category/التاريخ/صفحات-منسية-من-حياة-الرسول-ص/

https://jawdablog.org/2017/12/09/forgotten_pages_prophet_life_10/

https://jawdablog.org/2017/12/01/forgotten_pages_of_prohets_life_09/

https://jawdablog.org/2017/11/17/forgotten_pages_of_prohets_life_08/

https://jawdablog.org/2017/11/11/forgotten_pages_of_prohets_life_07/

https://jawdablog.org/2017/11/04/forgotten_pages_of_prohets_life_06/

https://jawdablog.org/2017/10/28/forgotten_pages_of_prohets_life_05/

https://jawdablog.org/2017/10/21/forgotten_pages_of_prohets_life_04/

https://jawdablog.org/2017/10/14/forgotten_pages_of_prohets_life_03/

https://jawdablog.org/2017/10/07/forgotten_pages_of_prohets_life_02/

https://jawdablog.org/2017/09/30/forgotten_pages_of_prohets_life_01/

٣- ابن إسحاق

٤- المسلم الاول

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s