… صفحات منسيه من حياه الرسول محمد صلى الله عليه و سلم الحلقه ١٣

حمله المقاطعه و الحصار ضد بني هاشم و ضد قطر!

Forgotton_Pages_of_the_prophet_life_13

مع فشل قاده مكه في إقناع ابي طالب انه يسلم ابن أخيه ليهم ومع فشلهم في إقناع محمد نفسه ان يغير اتجاهه حتى مع الوعد بالثروه او الْمُلْك، القاده دول زاد غضبهم جدا. ازاي طلباتهم تترفض بالشكل ده؟ و اللي زود الموضوع ان الرفض مكانش لأن ابو طالب او محمد عليه الصلاه و السلام غلطانين. بالعكس الرفض ده كان لان ابو طالب متمسك بالعادات و التقاليد بتاعه مكه و هي ان رأس القبيله يحمي أبناء القبيله. ده زي ما شفنا في الحلقه اللي فاتت (مصدر ١) هو أهم اسس مجتمع قريش و مجتمع الجزيره العربيه.

لذلك مش بس الرفض ده زعلهم لان طلباتهممش بتحصل. لكن كمان لانه كشفهم و كشف انهم منافقين بيظهروا غير ما يبطنوا. بيظهروا تمسكهم بالعادات و طرق الآباء و الاجداد و هم في الحقيقه عاوزين يتحللوا منها على مزاجهم. دي مش بس قصه حياه الرسول محمد. دي قصه انسانيه أساسيه لازم نتعلم منها كلنا. ازاي؟ دي نفس قصه هجوم السعوديه و الإمارات مثلا على قطر و تركيا. السعوديه و الإمارات بيقولوا ان مشاكلهم مع قطر هي دعم الاٍرهاب و التطرّف، قناه الجزيره، إيواء الاخوان الفارين و يقولون في دعاياتهم الموجهه للداخل ان قطر عميله لإسرائيل و امريكا. و الحقيقه ان قاده الإمارات و السعوديه منافقون. مثلا معظم جنسيات منفذي ١١ سبتمبر كانوا سعوديين و إماراتيين. و التطرّف للاسف كان منبعه فتاوى سعوديه وقف لجانبها ملوك ال سعود. و هم يدعون انهم يقفون مع الحق الفلسطيني بينما هم اول من يتآمر مع الاسرائليين و اليمين المتطرف الامريكي. و العجيب ان إيواء الهارب من شيم العرب التي يتحدث بها ال سعود و ال نهيان. و الأعجب انهم يقولون انهم دعاه الوحده العربيه و الاسلاميه و هم اول من ينقضوا الوحده و الجوار. بيقولوا انهم مسلمين و مع ذلك هم اول ناس بيحاربوا المسلمين. و ما يزيدهم غضبا هو انه كلما تحركوا كلما انكشف نفاقهم امام الناس اكثر. و هذا جزء مهم من البناء الإنساني لفعل النفاق. 

و لان خيار الحرب كان مستحيل لانه يهدم تجاره مكه كلها فكان الحل هو المقاطعه. و في ذات الظروف بعد ١٤ قرن و لان خيار الحرب مستحيل لانه يهدم تجاره و وجود دبي و بسبب الاعتراض الامريكي كان الحل هو المقاطعه. 

قاده المقاطعه كانوا اثنين فقطعا غير برغم تعدد قبائل مكه. لكن شارك فيها اثنان فقط. ابو جهل من بني مخزوم بالطبع هو القائد الأساسي و هو كان زي ما شفنا شديد الحقد و الغضب من الاسلام. و الثاني هو ابو سفيان من بني اميه. و الناس استغربت من دخول ابي سفيان المقاطعه لانه عرف بالعقل و الرشاد. لكن ضغوط ابي جهل الشديده اجبرت ابي سفيان انه يدخل المقاطعه اللي شملت كل بني هاشم. 

الاتنين كتبوا وثيقه المقاطعه و علقوها على باب الكعبه و فيها قرروا انهم يقاطعوا بني هاشم في كل شيئ. مفيش تجاره. مفيش بيع. حتى الأكل مش حيبيعوه ليهم. مفيش مشاركه معاهم في التجاره. مفيش زواج. مفيش حتى إلقاء السلام في السوق. يعني لما يشوفوا حد من بني هاشم يودوا وشهم الناحيه التانيه. 

الفكره كانت حاجه من اتنين. اما ان ابو طالب يزهق و يسلم محمد او ان بني هاشم يثوروا على ابي طالب و يمشوه و يحطوا حد يتجاوب مع مطالب المقاطعه. نفس أهداف مقاطعه قطر دلوقتي. اما ان قطر تستسلم و تسلم الاخوان و توقف الجزيره. او ان الشعب القطري يتخلص من حكام قطر و يحطوا ناس تعمل اللي ابو جهل و ابو سفيان عاوزينه. 

العجيب انه جزء من عمليه النفاق انه ممكن يبقى فيه شخصين او شخصيتين. واحد هو ابو جهل. مينفعش يتغير. مفيش منه أمل. حيتوصف دايما انه ابو جهل. و واحد تاني اعقل و ربما منه أمل و هو ابو سفيان. هل ده بينطبق على اللي بنشوفه دلوقتي؟ مين ابو جهل و مين ابو سفيان؟ و لا كلهم دلوقتي ابو جهل؟ 

بقيه عائلات قريش ما دخلتش في المقاطعه. أظهرت في العلن انها مع المقاطعه لكن في السر كانت بتساعد بني هاشم. كانوا يهربوا الاكل لبني هاشم او يدخلوا معاملات تجاريه معاهم في السر او يبقوا واجهه لتعاملات بني هاشم التجاريه. لكن لما يشوفوهم في الاسواق يلفتوا وشهم الناحيه التانيه و يعملوا نفسهم انهم مقاطعين. ليه عملوا كده؟ نحاول نفهم. 

عشان اي حمله مقاطعه تنجح لازم يبقالها شرعيه اخلاقيه عشان الجميع يلتزم بيها. لو ملهاش شرعيه اخلاقيه محدش حيلتزم بيها و بالتالي تسقط حمله المقاطعه حتى و لو طال الوقت. بقيه عائلات قريش ممكن متضايقين من محمد و دعوته. يمكن شايفين انه محرض. لكن هم كمان شايفين ان جزء من كلامه على الأقل سليم. اننا فعلا بعدنا عن التقاليد الأساسيه للعروبه. و الاهم انهم شايفين ان موقف عمه ابي طالب موقف اخلاقي جدا و أنهم كانوا حيعملوا زيه. ازاي يتخلّوا عن واحد من القبيله. هل ده من الشهامه العربيه؟ هل ده من تقاليد الانتماء للقبيله؟ و ده شايفينه دلوقتي في مواقف عمان و الكويت مثلا. 

ابو لهب و هو من بني هاشم و عم الرسول طبعا كان مع مقاطعه بني هاشم! و هدفه كان ان بني هاشم تتخلص من أخيه ابي طالب و يخلوه هوه يبقى كبير بني هاشم. في كل زمن فيه واحد زي ابي لهب. ناخذ بالنا. 

كمان نقطه مهمه ان شبكه الجوازات بين القبائل المختلفه في قريش ابتدت تتأثر بالمقاطعة. شبكه الجوازات دي مهمه جدا لمنع الحروب بين القبائل. لكن بدأت الجوازات اما تستمر او تتفسخ بسبب حمله المقاطعه دي. مثلا بعد اعلان ابي بكر إسلامه تبعته زوجته و اثنان من ابنائه و أعلنوا اسلامهم. لكن واحد من ابنائه فضل معارض للإسلام بشده. كمان اخو السيده خديجه كان واحد من أشد أعداء الاسلام. لكن ولاده واحد منهم كان معاه و التاني كان ضده و مع الاسلام.

ابو لهب نفسه واحد من ولاده دخل الاسلام و التاني كان مع ابيه و هو عتيبه بن ابي لهب. عتيبه كان متزوج السيده رقيه بنت الرسول. و تحت ضغوط والده طلقها و بعد كده هي تزوجت سيدنا عثمان زي ما احنا عارفين. 

لذلك مش غريب انه نلاقي دلوقتي ان حمله مقاطعه قطر فرقت عائلات الخليج و ان كمان الانقلاب في مصر فرق عائلات في مصر. دايما اللحظات الفارقه في حياه المجتمعات بيبقى تأثيرها كده و ده شيئ طبيعي. لان الأحداث الفارقه في حياه المجتمعات بتيجي برساله تغيير للمجتمع. بثوره ضخمه في المجتمع. و بالتأكيد الثوره الكامله دي مش بس بتبقى سياسيه لكن كمان اجتماعيه و ثقافية. و زي اي ثوره لازم حتقطع مش بس في الهرم السياسي للمجتمع لكن كمان حتقطع في العلاقات الاسريه لان ناس كتير حتلاقي انه فيه هدف اخلاقي اهم من علاقه الزواج. لذلك الناس اللي اتخضت و اتضايقت ان ده حصل في مصر الحقيقه انهم مقروش حتى تاريخ دينهم كويس. 

طبعا ناس حتقولنا انتم ازاي تقارنوا تاريخ الاسلام بالانقلاب في مصر. الناس دي عاوزين ان تاريخ الاسلام يفضل زي المصحف اللي بيحطوه في العربيه. منقراهوش. منتعلمش منه. منطبقهوش. و اذا طبقناه يبقى ازاي اننا نصلي و نصوم و العبادات و خلاص. 

ابو طالب زاد في عناده مع المقاطعه و الحصار و زاد تمسكه بالأصول. و ألقى قصيده رهيبه هجا فيها المقاطعه و هجا ابي سفيان و قريش و ابي لهب. القصيده ده زي ما تقول دلوقتي برنامج ناري لقناه تلفزيونيه. كل بيت في مكه بقى بيقولها. القصيده بتقول:

ألا أبلغا عني على ذات بيننا * لؤيا وخُصَّا من لؤي بني كعبِ

(يعني قولوا عني القصيده دي. شير يعني بمصطلحات فيسبوك دلوقتي. و قولوها لكل واحد عايش بيننا. و كعب بن لؤي هو الجد السادس لابي طالب. يعني بلغوا كل من ينتسب لقريش و فكروهم ان اجدادنا كانوا ساده. و دي عاده العرب زي ما شفنا في الحلقات السابقه التباهي بالاجداد. بيقول يعني “شير عني. انتم مش عارفين انتم بتكلموا مين”.)

ألم تعلموا أنا وجدنا محمدا * نبيا كموسى خُط في أول الكتب

(يعني ايه الفرق بين الكلام اللي محمد بيقوله و الأنبياء زي موسى اللي احنا كمان مؤمنين بيهم و بنقول اننا بنعبد رب واحد؟ و بالرغم ان ابو طالب منطقش الشهادتين الا ان البيت ده بيؤكد فطرته السليمه)

وأن عليه في العباد محبة * ولا خير ممن خصه الله بالحب

(بيقول ازاي انتم من شويه بتحبوه و بتقولوا عليه الصادق الأمين و جايين دلوقتي تكرهوه. “و لا خير” معناها مفيش أحسن) 

وأن الذي ألصقتمُ من كتابكم * لكم كائن نحسا كراغيه السقب

(راغيه السقب هي ناقه بني صالح المذكوره في القرآن و لما عقروها ربنا جابلهم العذاب. يعني بيقول الكتاب اللي انتم كتبتوه ده و لصقتوه على الكعبه حيجيلكوم بالنحس الشديد زي قتل ناقه سيدنا صالح)

أفيقوا أفيقوا قبل أن يحُفر الثرى * ويصبح من لم يجن ذنبا كذي الذنب

(فوقوا قبل ما نحفر قبرنا كلنا و يتاخد المذنب مع البرئ)

ولا تتبعوا أمر الوشاة وتقطعوا * أواصرنا بعد المودة والقرب

(يعني بعد ما كنا عايشين كويس متمشوش ورا اللي بيعملوا الوشايه. و قصده طبعا ابو جهل و ابو لهب. في أيامنا دلوقتي نقدر نقول اسرائيل و ترامب و النظام المصري و ابن زايد)

وتستجلبوا حربا عوانا وربما * أمرّ على من ذاقه جلب الحرب 

(و تخلوها تبقى حرب حتبقى اسوء على اللي بدأ الحرب و أفتكر انها حلوه)

فلسنا ورب البيت نُسلم أحمدا * لعزَّاء من عض الزمان ولا كرب

(يعني و رب البيت احنا مش حنسلم محمد. حتى لو بقينا في كرب او جوع. برضه مش حيحصل)

أليس أبونا هاشم شد أزره * وأوصى بنيه بالطعان وبالضرب

(و احنا من بني هاشم على فكره مبيهمناش الحرب و الضرب)

ولسنا نمل الحرب حتى تملنا * ولا نشتكي ما قد ينوب من النكب

(و لو بدأنا الحرب مش بنستسلم أبدا)

ولكننا أهل الحفائظ والنهى * إذا طار أرواح الكماة من الرعب

(يعني احنا محافظين على التقاليد و على اعراضنا و احنا أهل العقل حتى في الوقت اللي ارواح الشجعان بتطير من الرعب. الكماه جمع كمي و هو الشجاع. يعني بيقولهم انتم فرطتوا واتجننتوا)

الله فعلا. القصيده دي جابت الأنبياء و مدت الرسول محمد صلى الله عليهم و سلم ليهم و جابت شجاعه العربي الأصيل و انتهت بأننا مش بنخاف و لا بنتهدد و نلاحظ اهم شيئ انها عرَّت اللي كتبوا وثيقه المقاطعه و كشفت انهم منافقون لانها أكدت اهم نقاط انه ازاي تقولوا ان محمد غير صادق و كُنتُم اول ناس بتحبوه و تصدقوه و ازاي تقولوا انه صابئ و هو مقالش حاجه مختلفه عن اللي قاله صالح او موسى و انتم مصدقين انهم أنبياء و ازاي بتطالبوني بتسليمه و ده مش من عاده العرب. ابو طالب الحقيقه خلص على كل حججهم و عراهم و كشفهم انهم منافقين. بالضبط زي المشهد اللي شايفينه دلوقتي. بالضبط مع اختلاف الألفاظ. 

مجموعه من المؤمنين بينهم بنت الرسول و زوجها عثمان هاجروا الحبشه فيما اطلق عليه الهجره الاولى. و ده مع عدم نجاح المقاطعه قوي و عدم إقتناع بقيه العائلات في قريش بالمقاطعة خلى ابي جهل و ابي سفيان يتجننوا. و مكانش قصادهم غير العنف. و فعلا بدأت عمليه ممنهجه من العنف ضد المؤمنين و بدأ تشديد الحصار بشكل خانق جدا. و بدأت عمليات تعذيب المؤمنين و منهم سيدنا بلال و ال ياسر. اي حد ملوش ضهر كان بيتعذب. اي حد له ضهر كان بيتبهدل و يتشتم. أجروا بلطجيه عشان يضايقوا المؤمنين و هم ماشيين في الشارع. اي حاجه اقل من الحرب المفتوحه بقت مباحه. 

حنشوف ان حمله العنف دي بقالها نتايج عكسيه الحلقه الجايه ان شاء الله. 

1- الحلقات السابقه من صفحات منسيه من حياه الرسول محمد صلى الله عليه و سلم

https://jawdablog.org/category/التاريخ/صفحات-منسية-من-حياة-الرسول-ص/

https://jawdablog.org/2017/12/09/forgotten_pages_prophet_life_10/

https://jawdablog.org/2017/12/01/forgotten_pages_of_prohets_life_09/

https://jawdablog.org/2017/11/17/forgotten_pages_of_prohets_life_08/

https://jawdablog.org/2017/11/11/forgotten_pages_of_prohets_life_07/

https://jawdablog.org/2017/11/04/forgotten_pages_of_prohets_life_06/

https://jawdablog.org/2017/10/28/forgotten_pages_of_prohets_life_05/

https://jawdablog.org/2017/10/21/forgotten_pages_of_prohets_life_04/

https://jawdablog.org/2017/10/14/forgotten_pages_of_prohets_life_03/

https://jawdablog.org/2017/10/07/forgotten_pages_of_prohets_life_02/

https://jawdablog.org/2017/09/30/forgotten_pages_of_prohets_life_01/

٣- ابن إسحاق

٤- المسلم الاول

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.