صفحات منسيه من حياه الرسول محمد صلى الله عليه و سلم  … الحلقه ١١

الأسباب الحقيقه لتصاعد الخلاف بين أهل مكه و الاسلام و ليه اسلام واحد اسمه عتيق بن عثمان كان شديد التأثير؟ forgotten_pages_of_prophet_life_11

شفنا في الحلقه السابقه ان الوحي امر الرسول انه يفاتح أهله اولا من الهاشميين بالإسلام (مصدر ١) و شفنا ان الامر كان كمان ان الرسول يعمل عزومه كبيره بلحم الخرفان المشوي و فطائر القمح و اللبن و هي الاكله المفضله لمكه وقتها. دي نقطه مهمه جدا نتعلمها و هي اهميه المكان العام و بنقول عليها دلوقتي environmentics او تصميم الأجواء العامه. انت بتفاتح حد في موضوع صعب و معقد. مفيش مانع اطلاقا انك تعملها في مطعم هو بيحبه او تعزمه في بيتك على اكل هو بيحبه. نقطه كمان على عزومه البيت ان عادات و تقاليد العرب وقتها عدم احراج صاحب البيت و بالتالي حيكونوا اكتر استعدادا يسمعوا. وما زالت الحقيقه العادات في العالم كله هو لما حد يعزم حد فالضيف يتجنب احراج المضيف مهما كانت الظروف. بنشوف احنا كمان ان حتى رئيس امريكا لما بيحب يناقش حد في موضوع صعب بيعزمه مثلا في كامب ديفيد. غريب بقى جدا ان احنا مش بنعمل كده عندنا. طبعا لا رؤسائنا بيعملوا كده و لا احنا في حياتنا العاديه بنعمل كده. العزومات في حياتنا تقتصر على المناسبات و الأعياد فقط و مش بنقتدي بسنه قدامنا أهي واضحه عن الرسول صلى الله عليه و سلم. يعني عيله انت على خلاف معاها او فيه بوادر خلاف مفيش مانع تعزمهم عندكم في البيت و تكرمهم. حد عندك في الشغل و فيه بوادر مشاكل او انت عاوزه يقبل وظيفه منك ممكن جدا تعزمه في مطعم هوه بيحبه او عندك في البيت. الحاجات دي بتقرب الناس من بعضها جدا. 

شفنا كمان ان الرسول عمل عزومتين في يومين ورا بعض. في الاولانيه الوحيد اللي تصرف بشكل غير لائق كان عم الرسول ابو لهب. بعد لما الرسول قرأ على بني هاشم القرآن ابو لهب وشه احمر. و خرج يزعق و يقول ان محمد ده عاوز يسحركم. بقيه بني هاشم استنكروا ان ابو لهب يعمل كده. احد اسباب تسميه ابي لهب بالكنيه دي انه كان بيتحمق بسرعه و يزعق و وشه يحمر من الغضب. لذلك هم كانوا متعودين على كده. في العزومه التانيه اليوم اللي بعده بنو هاشم جم كلهم الا ابو لهب. لكن الوحيد اللي دخل الاسلام منهم كان الصبي (كان حوالي ١٣ سنه) علي بن ابي طالب. و هنا بدأت المشاكل. لانه ازاي “طفل” زي ده يفتح بقه و بقيه كبار العيله كلهم مقالوش رأيهم. محمد ده عاوز يخلي العيال تتمرد علينا. بعدها خرج بقيه بني هاشم متضايقين جدا من دعوه محمد و استجابه علي. 

الرسول محمد صلى الله عليه و سلم خرج بعدها و ابتدى يجهر بالدعوة في صحن الكعبه. بجوار الكعبه. لمده سنه بحالها الرسول بيقرأ على الناس القرآن لكن مع نهايه السنه الاولى ما استجابش للدعوه الا عشرات بس من الناس و كلهم كانوا اما صبيان زي علي و من اصحاب علي او عبيد او عبيد لسه محررين من العبوديه او نساء. لكن بالرغم ان العدد قليل و تأثيرهم كان محدود و إنهم زي ما قريش كانت بتقول وقتها انهم كانوا من الرعاع لكن الغريب ان قريش قاومت الدعوه للإسلام بكل قوتها. ليه؟ ايه السبب؟ يعني لو قريش و أثرياؤها كانوا سابوا الاسلام من غير مقاومه كان ممكن جدا انه يبقى دعوه زي عشرات الدعوات الاصلاحيه اللي كانت موجوده وقتها و عشرات من مدعي النبوه. لكن قريش عملت حمله منظمه لمحاصره الاسلام انتهت بمحاوله اغتيال محمد شخصيا! و الحقيقه ناس كتير هاجمونا على الكلام ده لكن تاه عنهم ان جزء من عظمه الدعوه هو الهجوم عليها! اراده الله انها تكون دعوه عظيمه و تنتشر بسبب الهجوم ده. و في كده درس لينا كمان ان الهجوم و المقاومه جزء من اسباب النجاح. ده جزء من اراده الله في الكون. 

آيات القرآن و التنزيل وقتها كانت بتتغير بشكل ملحوظ. في البدايه كانت الآيات عن معجزات الخلق. بتقول بصوا على كرم ربنا حواليكم. بصوا خلقلكم ايه. اتفكروا في الليل و النهار. الخ. الآيات دي كلها أهل قريش مكانش عندهم مشكله معاها خالص. و لا كان عندهم اي مشكله مع فكره انه فيه اله فوق الجميع اسمه الله. هم نفسهم زي ما شفنا في الحلقات السابقه كانوا مقتنعين بكده و مقتنعين ان الكعبه هي بيت هذا الاله. مفيش مشكله هنا خالص. لكن الآيات ان مفيش إلهه تانيه غير الله ده بقى موضوع تاني خالص. زي ما شفنا في الحلقه الاولى الالهه دول دي اللَّات و مناه و العزه و هُبل مكانوش بس اصنام حوالين الكعبه الناس بستخدمهم عشان يتقربوا بيهم لله. حاجه كده زي أولياء الله الصالحين دلوقتي! المشكله الأكبر عند أهل قريش ان كل قبيله كان ليها الالهه بتاعتها. و الالهه دول موجودين حوالين الكعبه و كل قبائل الجزيره العربيه الكبيره ألهتها ممثله حوالين الكعبه عشان لما ييجوا يحجوا يلاقوا الالهه بتاعتهم و ينبسطوا و يدفعوا فلوس اكتر. الاعتزاز بالقبليه كان جزء مهم من الثقافه وقتها. القبيله هي اللي بتحميني و بتحمي اهلي. القبيله هي وطن. و كمان دين بحكم ان الالهه بتختلف من قبيله للتانيه. يعني القبيله هي الوطن و الدين كمان في زماننا الحالي. تخيل كده واحد جاي بيقولك اساس وطنك و دينك دلوقتي مش سليم. أكيد حتحصل مشاكل. و ده بالضبط اللي حصل. نقطه كمان بتحصل. ان معنى كده ان الولاء مبقاش للقبيله و تقاليدها. ولاء المؤمنين الجداد دول بقى لبعضهم. بقى لله فقط و للإسلام. ده تغيير استراتيجي مهم. لان من غيره مستحيل توحيد القبائل المختلفه دي كلها و هم مش بس مختلفين قبليا لا دول كمان لهم آلهه مختلفه. ان ولاء أمه الاسلام يبقى لبعضها مش لقبيله و مش لوطن! لاحظ الرسول مقالهمش القبائل وحشه. اطلاقا. قالهم ان فيه رباط اهم من القبائل و هو رباط الإيمان باله واحد. دي خبطه ضخمه جدا لأساس الشكل السياسي للجزيره العربيه و مكه بالتأكيد. دي النقطه الاولى و هي تغيير سياسي كبير و التغيير ده مكانس . 

النقطه التانيه هي نقطه اقتصاديه. دلوقتي لو كل قبيله مبقاش ليها الالهه بتوعها موجودين حوالين الكعبه يبقى القبائل دي مش حتيجي الكعبه. و لو مجوش الكعبه يبقى “سبوبه” مكه كلها حتقف. 

النقطه الثالثه كانت ان الرساله الجديده دي هاجمت حاجه هي في صميم عقيده العربي وقتها. و كانت المشكله من سوره التكاثر:

أَلْهَاكُمُ التَّكَاثُرُ حَتَّى زُرْتُمُ الْمَقَابِرَ كَلاَّ سَوْفَ تَعْلَمُونَ ثُمَّ كَلاَّ سَوْفَ تَعْلَمُونَ كَلاَّ لَوْ تَعْلَمُونَ عِلْمَ الْيَقِينِ لَتَرَوُنَّ الْجَحِيمَ ثُمَّ لَتَرَوُنَّهَا عَيْنَ الْيَقِينِ ثُمَّ لَتُسْأَلُنَّ يَوْمَئِذٍ عَنِ النَّعِيمِ

٨ آيات لكن في منتهى القوه و معناهم موجود بشكل او اخر خلال القرآن الكريم. ازاي ال ٨ آيات دول يهاجموا صميم عقائد العربي؟ 

العربي القديم كان بالنسبه له الأصل و الأهل شيئ مهم جدا في حياته. فالواحد يقول فلان بن فلان بن فلان بن فلان الخ. و يتنافسوا في مين يعرف اكبر عدد من الاجداد. و العربي القديم كان يزور المقابر و يعملها شواهد و يتباهى بقوه و عزه اجداده. و كان جزء من الحياه هو زياره اطلال الاجداد. الأماكن اللي الاجداد عاشوا فيها. و من هنا جت قصائد التباكي على الاطلال و التفاخر بالاجداد اللي لازم اي قصيده شعر عربيه لازم تبدأ بيها. الشعر وقتها زي التلفزيون دلوقتي. تخيل كده انه كل لما التلفزيون يفتح الإرسال ميبقاش القرآن و لا السلام الوطني لكن يبقى تفاخر بالقبيله و اصولها و سرد كامل لكل اجداد القبيله. كون ان آيات من القرآن تيجي و تقول كل ده مش مهم خالص. ملوش وزن عند الله. و مش بس كده تقول كمان ان الاجداد اللي انت عمال تتفاخر بيهم دول حيدخلوا النار لو مكانوش مؤمنين بالله الواحد دون شريك. ده بقى بالنسبه لأهل مكه و اي عربي هجوم مباشر على النظام الاجتماعي كله. هجوم مباشر على ركن أساسي من العقيدة. 

الاسوء ان موقفناش عند كده. القرآن بيقول إنكم كمان حتتسألوا عن النعيم. يعني عن تكنيز الثروه من غير هدف الا تكنيز الثروه. يعني كل اللي قريش مبنيه عليه و هو عمليه تجاريه اقتصاديه محضه القرآن بيقول ان ده حيبقى سبب تعاستك. تخيل كده ان حد يروح البورصه او وول ستريت في نيويورك او التجمع الخامس في مصر و يقول للناس كنز الثروات فقط بغرض كنز الثروات انتم حتتسألوا عنه. هجوم مباشر على الأساس الاقتصادي للمجتمع كله. و تيجي سوره زي الهمزه تؤكد الكلام ده و تقول بمنتهى الوضوح و القوه: وَيْلٌ لِّكُلِّ هُمَزَةٍ لُّمَزَةٍ الَّذِي جَمَعَ مَالا وَعَدَّدَهُ يَحْسَبُ أَنَّ مَالَهُ أَخْلَدَهُ كَلاَّ لَيُنبَذَنَّ فِي الْحُطَمَةِ. يعني اللي بيكنز الثروه من غير سبب حيدخل النار. مش بس حيتحاسب. لا. حيدخل النار. 

نقطه رابعه هي ان المؤمنين الجداد دول و كان بينهم العبيد و بينهم النساء و الصبيان و بينهم اللي كانوا بيسموهم المؤتلفه. و دول جماعات من العرب كانوا عايشين على أطراف مكه و مش بينتموا لأي قبيله كبيره و مالهمش ضهر يسندهم و بيأخذوا اي شغلانه مكه بتديهالهم بحكم فقرهم. حاجه كده زي سكان العشوائيات. كل دول كانوا بيتصرفوا ان كلهم زي بعض. مساواه. بيصلوا مع بعض من غير طبقيه. تخيل! يعني معنى كده ان ركن أساسي في المجتمع الدين الجديد ده جاي يخلخله تماما. 

دي كانت اسباب الهجوم على الدين الجديد. و طبعا ابتدوا يقولوا شوفوا اتباع محمد. مش ماشي وراه غير العيال و الستات و الرعاع. و الكلام ده مش بس كان تريقه على محمد صلى الله عليه و سلم. ده كمان كان بيخلي مكه مترددة لانها بتطمن نفسها انه الدين الجديد ده بالرغم انه دعوه خطيرة جدا لكن تأثيرها محدود. 

لكن حصل تغيير كبير جدا لما اسلم واحد اسمه عتيق بن عثمان و اللي احنا عرفناه بعد كده بكنيته ابي بكر الصديق. ابو بكر كان عالم في الأنساب او خبير انساب. بمعنى انه خبير في تقفي الاجداد. بالنسبه للمجتمع العربي وقتها دي اهم وظيفه. لان ابو بكر هوه اللي كان بيدي اي حد في قريش كلها القدره على انه يتفاخر بأجداده. من غير ابو بكر محدش يقدر يتباهى بأي نسب. هو المرجع الرئيسي في الموضوع. بيديهم شهاده تثبت اذا كانوا يتفاخروا و لا لأ. فجأه ابو بكر شهد الشهادتين و أشهر إسلامه. ابن اسحاق بيقول عند نقطه اسلام عتيق بن عثمان اصبح محمد عليه الصلاه و السلام و الدين الجديد بقى حديث كل بيت في مكه. ده كده بالضبط زي لما وزير الاعلام في مصر اللي هوه الشخص اللي بيحدد مين يشتهر و مين لأ، فجأه يطلع في التلفزيون و يقول يا ناس يا أهل مصر كل ده غلط و انا كفرت بكل اللي بنعمله و من دلوقتي مفيش غير الدين الجديد. تخيلوا مدى تأثير ده في مجتمعنا حيكون ايه! 

من النقطه دي حده الهجوم على الاسلام و الرسول دخلت منعطف في منتهى الخطوره لأننا دخلنا في طريق حينتهي بمحاوله اغتيال أساسا لانه بقى مستحيل السكوت على الدين الجديد ده. 

الحلقه الجايه بعون الله حنشرح مقاطعه بني هاشم و اسبابها. لكن حنختم المره دي اننا نسأل شويه اسئله. 

مين في مصر مش بيتباهى بأجداده و أهله؟ كل الطبقه الوسطى و العليا في مصر بتتمنظر. اللي يقولك انا اجدادي من تركيا و اللي يقول بابا بيشتغل كذا و ماما كيت. و اللي بيتمنظر بعربيه بابا جابها. مش بس كده. عادات زي زياره الأضرحة للتقرب بيها لله. مش لسه موجوده العادات دي؟ و كمان فيه اللي بيجمع فلوس بس عشان يجمع فلوس. و كمان المجتمع المصري بقى فيه طبقيه شديده جدا. تخيل لو ابن الزبال دخل عليك و قالك اللي أنت بتعمله ده غلط. شوف انت ممكن تعمل ايه لو انت وكيل نيابه و لا ضابط شرطه. ده احنا شفنا ناس و منهم واحد زي علاء الأسواني يقولك ان مش لازم ندي حق التصويت للجميع! و ان الأغنياء او المتعلمين بس يبقالهم حق التصويت! 

لسه موجود صفات من الجاهليه و الله. احنا نسينا الأسس الرئيسيه للإسلام. لذلك بيصعب علينا ان مجتمعاتنا تمسك في الرفايع و تسيب الأصول. 

المصادر:

1- الحلقات السابقه من صفحات منسيه من حياه الرسول محمد صلى الله عليه و سلم

https://jawdablog.org/2017/12/09/forgotten_pages_prophet_life_10/

https://jawdablog.org/2017/12/01/forgotten_pages_of_prohets_life_09/

https://jawdablog.org/2017/11/17/forgotten_pages_of_prohets_life_08/

https://jawdablog.org/2017/11/11/forgotten_pages_of_prohets_life_07/

https://jawdablog.org/2017/11/04/forgotten_pages_of_prohets_life_06/

https://jawdablog.org/2017/10/28/forgotten_pages_of_prohets_life_05/

https://jawdablog.org/2017/10/21/forgotten_pages_of_prohets_life_04/

https://jawdablog.org/2017/10/14/forgotten_pages_of_prohets_life_03/

https://jawdablog.org/2017/10/07/forgotten_pages_of_prohets_life_02/

https://jawdablog.org/2017/09/30/forgotten_pages_of_prohets_life_01/

٣- ابن إسحاق

٤- المسلم الاول

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s