…صفحات منسيه من حياه الرسول محمد صلى الله عليه و سلم الحلقه ١٠

انقطاع الوحي و عودته و “عزومه” الرسول لعيلته و تلاوته للقرآن فيها و رد فعلهم خلال العزومه … الحلقه ١٠forgotten_pages_prophet_life_10_01

شفنا في الحلقه السابقه ازاي و فين نزل الوحي (مصدر ١). الحقيقه في نقطه مهمه جدا دايما بتغيب عننا و هي ود فعل السيده خديجه. لو واحده جوزها رجع قبل الفجر بقليل بعد غياب كذا ليله كان مختلي بنفسه فيهم و بيقول لها غطيني غطيني و عمال يرتعش. يا ترى ايه حيكون تصرفها؟ في الأغلب لو متفهمه كانت حتطمنه و تقوله متقلقش ده بس مَس من الجن (العرب كانوا يعتقدوا ان الجنون هو مَس من الجن). و تهديه و تخليه ينام و يحاول ينسى الموضوع كله. ده لو واحده متفهمه. طبعا ممكن جدا تقع في واحده متخليكش تروح تتأمل في الصحرا أساسا. السيده خديجه قالتله انه مستحيل يكون ده مَس من الجن او جنون او شعر. لأنك بتكرم اهلك و تعين الضعيف و الفقير. السيده خديجه معتقده برسالته من البدايه. بتقوله ده أكيد مش جنان و بالتالي دي رساله من الله. و بعدين اول ما يطلع الصبح تروح لورقه بن نوفل اللي يقول لها ان لو الوصف صحيح يبقى دي رساله و اختيار من الله. تصديق كامل و اطمئنان لا مثيل له من السيده خديجه. يقين فعلا. السيده خديجه كمان لاحظت شيئ مهم جدا. آيات سوره اقرأ مش طريقه و لا اُسلوب كلام الرسول اطلاقا. الرسول كان تاجر و اتربى في الباديه و أسلوبه كان خالي تماما من السجع او الشعر. كان أسلوبه و ده باين من الأحاديث في عبارات طويله متسلسلة و مترابطة و قليله من ناحيه المشاعر. بينما ما تلاه الرسول عليها كان شيئ تاني خالص. شيئ لم يعهده العرب و هي سيده تاجره من الأعيان و عارفه كويس ايه الشعر و ايه الكلام اللي ما اتسمعش قبل كده. ورقه قال للسيده خديجه ان أهل الرسول و عشيرته حيقاوموه لان ده اللي حصل لكل رسول. السيده خديجه معملتش زي اي زوجه (او ام حتى) مصريه و قالت احنا مالنا و مال الكلام ده. و ليه نجيب وجع الدماغ. احنا عايشين كويس. مالناش دعوه بالسياسه و ليه نقاوم اهلنا في قريش. ما نعيش و نربي العيال و خلاص. السيده خديجه مقالتش الكلام المعروف ده لأي حد عاوز يدخل في السياسه او يؤيد الشرعيه الديمقراطيه في مصر او غير ذلك.

الوحي بعد كده انقطع سنتين كاملتين. خلالهم الرسول صلى الله عليه و سلم كان بيطلع باستمرار لغار حراء. بس مفيش فايده. التجربه مش عاوزه تتكرر. الرسول انقطع عن التجاره في خلال السنتين دول و تفرغ للاختلاء و التفكر لعل و عسى الوحي يرجع. ليه ربنا عمل كده؟ ليه الوحي مكانش عمليه مستمره لا انقطاع فيها؟ ليه يسيب شك كبير عند الرسول؟

قبل ما نشرح ليه لازم نعيد التذكير ان عدم مفاتحه الرسول لأي حد غير السيده خديجه و ورقه اكبر دليل على نبوه الرسول. ليه؟ لانه لو كان مدعي نبوه او شاعر او مؤلف كان الطبيعي انه يجري يحكي القصه لأهل مكه كلهم و الا مفيش داعي للموضوع من اساسه. و شرحنا ده بالتفصيل في الحلقات السابقه.

طيب ليه الانقطاع و الشك؟ الفتره الزمنيه دي مش بس كانت فتره شك بالنسبه للرسول عن الوحي. الحقيقه هي كانت فتره انعدام يقين في العالم كله. في سنه ٦١٠ ميلاديه اللي هي سنه الوحي العالم كان عمال يتغير سياسيا بشكل كبير جدا. الجنرال هرقل اكبر قاده الامبراطوريه الرومانيه الشرقيه أزاح الإمبراطور في انقلاب و نصب نفسه إمبراطور. هرقل قاد جيش من شمال افريقيا و دخل القسطنطينيه عاصمه الامبراطوريه و قتل الإمبراطور في انقلاب ضخم. فارس كان ملكها وقتها اسمه خسرو الثاني و كان لقبه الذي لا يهزم أبدا. جيوش خسرو استغلت الاضطراب السياسي في بيزنطه و احتلت العراق و استعادت معظم اسيا الصغرى (تركيا الحاليه) و بدأت تهدد دمشق و القدس ذاتهم. طبعا. أهل مكه تجار شاطرين. و اي تاجر مش بيحب عدم الاستقرار السياسي. بالذات لو في دمشق او القدس اللي معظم التجاره معاهم. و لو فارس دخلت دمشق يبقى ده فبه تهديد لتجاره مكه لأنهم وقتها لازم يتعرفوا على الحكام الجداد و يعملوا علاقات معاهم. الخ. طبعا عدم استقرار.

لذلك سنه ٦١٠ دي كانت سنه من عدم اليقين و عدم الاستقرار سواء سياسيا او طبعا من ناحيه انقطاع الوحي عن الرسول محمد صلى الله عليه و سلم. نتعلم من كده ايه؟ الشك هو جزء من التمرين على التدين. سيدنا ابراهيم قال كي يطمئن قلبي. ربنا بيقولنا كلنا انه حيختبرنا. و الاختبار حيكون بالشك و قله اليقين. و السؤال حنعمل ايه؟ كمان ربنا بيعلمنا انه الشك شيئ طبيعي. مش عيب. مش حرام. ده جزء من الاختبار. جزء من الحياه. لو كل شيئ معروف و كل شيئ في الحياه انت متيقن منه ١٠٠٪‏ تفتكر انه دي تبقى حياه؟ لذلك لما حد يجي و يقول و الله انا مش متاكد من كذا و من كذا و شاكك في كذا نعرف ان ده طريق و اختبار للإيمان. و نساعده مش نضربه و مش نوقف كلامه.

بعد سنتين من الانقطاع الوحي فجأه رجع تاني. و رجع بآيات في منتهى الجمال في سوره الضحى. وَالضُّحى وَاللَّيْلِ إِذَا سَجَى مَا وَدَّعَكَ رَبُّكَ وَمَا قَلَى وَلَلآخِرَةُ خَيْرٌ لَّكَ مِنَ الأُولَى وَلَسَوْفَ يُعْطِيكَ رَبُّكَ فَتَرْضَى أَلَمْ يَجِدْكَ يَتِيمًا فَآوَى وَوَجَدَكَ ضَالًّا فَهَدَى وَوَجَدَكَ عَائِلا فَأَغْنَى فَأَمَّا الْيَتِيمَ فَلا تَقْهَرْ وَأَمَّا السَّائِلَ فَلا تَنْهَرْ وَأَمَّا بِنِعْمَةِ رَبِّكَ فَحَدِّثْ

الحقيقه الآيات دي فيها شيئ مش موجود في اي كتاب سماوي اطلاقا و دي بدايه لكتير من الآيات في القرآن بذات الأسلوب. القرآن هو الكتاب السماوي الوحيد اللي بيهتم بالبيئة! بص كده على آيات اللي بتتكلم عن الشجر و الزرع و الحيوانات و المياه و الليل و النهار. القرآن بيقولنا قبل اي من الناس بتوع الحفاظ على البيئه بيقولنا بصوا حواليكم وحافظوا على نعمه ربنا. ربنا عارف ان في خلال السنين بعد القرآن الانسان حيعمل ايه في البيئه و حيغير قد ايه فيها. مفيش كتاب سماوي عمل كده. كمان القران بيقولنا فيه ربنا انه مش محتاج يورينا معجزات تانيه. المعجزات حوالينا كلنا. بص حواليك و انت تشوفها. انت مش محتاج ربنا ينزلك مائده من السماء.

كمان ربنا بيقول للرسول ان فتره الشك انتهت و ان ربنا منساكش طبعا و مسابكش. ده جزء من التدريب. جزء من الوصول للإيمان هو المرور بالشك.

الرسول برضه فضل فتره بيقول الآيات و يتلوها مع السيده خديجه فقط. مفيش حد تاني. تفتكروا لو كان الرسول متجوزها عشان فلوسها زي ما بيقولوا كانت حتبقى دي العلاقه بينهم؟

و فضل الوضع كده لحد لما الوحي جِبْرِيل قال للرسول انه جه اوان انه يقول لاهله بني هاشم و يتلو عليهم القرآن. و جِبْرِيل قاله بالضبط ازاي يعمل كده. انه يعملهم وليمه من الأكل اللي بيحبوه و هو لحمه الخروف و اللبن و العيش. و فعلا عزومه كبيره عزمهم كلهم بما فيهم عمه ابي لهب و عمه ابي طالب.

بعد العزومه و اتبسطوا من الأكل الرسول تلى عليهم آيات من القرآن. كلهم طبعا سمعوا و كانوا متعجبين. ايه ده. مسمعوش كلام زي ده قبل كده. الا ابو لهب قام و زعق و كان معروف عنه انه يتحمق جدا و وشه يحمر. و قال ده بيسحركم. و قام ماشي. طبعا بقيه بني هاشم اتضايقوا جدا. ازاي ابو لهب يعمل كده. عند العرب عيب جدا حد يمشي من وسط عزومه بالشكل ده.

الْيَوْمَ التاني الرسول كرر العزومه. طبعا ابو لهب مجاش. و الرسول تلا عليهم القرآن و دعاهم للهدايه. هنا بقى وقعت الواقعه. ابتدى بنو هاشم يقولوا ده ابو لهب كان عنده حق بقى. محمد (صلى الله عليه و سلم) يبدو انه لما فلوسه كترت اتجنن (حاشى لله) و طلعوا يمشوا و يقولوا نسيبه يومين حيعقل. الا واحد بس قال للرسول محمد انه آمن به. الواحد ده هو على بن ابي طالب رضي الله عنه. و لو نفتكر هو كان عايش مع الرسول بيتعلم منه التجاره. الرسول طبعا مدح في سيدنا علي جدا. طبعا ده عمل مشكله جامده. علي وقتها كان ١٣-١٤ سنه. ازاي عيل زي ده يقول كلام مختلف في قعده الكبار؟ ازاي يخالف الكبار. طبعا محمد هوه اللي مقومه. يعني محمد (صلى الله عليه و سلم) عاوز يغير عادتنا و تقاليدنا كلها كده و عاوز يقوم العيال علينا؟ نفس أسلوبنا و تصرفاتنا لو حد صغير قال كلام صح. مش كده؟ لذلك بنقول و اعترضتوا ان مجتمعاتنا فيها كتير من عادات الجاهليه.

الصوره لعمله هرقل و خريطه العالم وقتها. 

forgotten_pages_prophet_life_10_02

و نكمل ان شاء الله. 

المصادر:

1- الحلقات السابقه من صفحات منسيه من حياه الرسول محمد صلى الله عليه و سلم

https://jawdablog.org/2017/12/01/forgotten_pages_of_prohets_life_09/

https://jawdablog.org/2017/11/17/forgotten_pages_of_prohets_life_08/

https://jawdablog.org/2017/11/11/forgotten_pages_of_prohets_life_07/

https://jawdablog.org/2017/11/04/forgotten_pages_of_prohets_life_06/

https://jawdablog.org/2017/10/28/forgotten_pages_of_prohets_life_05/

https://jawdablog.org/2017/10/21/forgotten_pages_of_prohets_life_04/

https://jawdablog.org/2017/10/14/forgotten_pages_of_prohets_life_03/

https://jawdablog.org/2017/10/07/forgotten_pages_of_prohets_life_02/

https://jawdablog.org/2017/09/30/forgotten_pages_of_prohets_life_01/

٣- ابن إسحاق

٤- المسلم الاول

https://www.theguardian.com/books/2014/sep/21/sapiens-brief-history-mankind-review-yuval-noah-harari

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s