هل شفيق هو جواو فيجوريدو؟ 

Is_Shafiq_like_Hugo_of_Brazil

شقيق بالتأكيد واحد من رجال الثوره المضاده. شفيق كان جزء من اتفاق الانقلاب مع السيسي و هو ما قاله شفيق بنفسه. مصدر ١. شفيق لا راجل ثوري و لا بتاع. شفيق كمان جزء من الدوله العميقه. دولة مبارك بكل فسادها. مفيش شك. و اخيرا شفيق راجل من الجيش أساسا و ان يكن أحسن الوحشين بمعنى انه على الأقل اخر واحد فيهم حارب حرب ضد عدو حقيقي و على الأقل مستوى تعليمه و فهمه للعالم افضل بكتير من بقيه الجيش الحالي و منهم السيسي اللي اتربوا على دواء الكفته. لذلك شفيق اقرب في العقلية لواحد زي السادات اللي هوه من الجيش لكن في نفس الوقت عاش حياة مدنية فترة طويلة. مع فارق ان السادات سياسي من الدرجه الاولى و شفيق رجل تنفيذي. أحسن الوحشين معناه وحش برضه على فكره. لكن. و نحط تحت لكن شويه خطوط. 

لكن في نفس الوقت شفيق بسبب كونه جزء من الدوله العميقه هو أكبر تهديد للسيسي اللي قضى على الثوره بقمع لا مثيل له. 

لكن كمان معنى ترشيح شفيق او حتى الرغبه ان الدوله العميقه في مصر و بعض رعاه الانقلاب قلقانين. القمع بدون نهايه و مستحيل يستمر على طول. مفيش تحسن اقتصادي. الفقر يزداد. اندفاع السيسي في علاقته مع اسرائيل يكشفه و يعري كل الحكام في مصر. عدم وجود ظهير سياسي للحكم الا الجيش همش كل الدوله العميقه. همش العمد و المشايخ و القضاء و الشرطه اللي كان الحزب الوطني ظهير لهم و أداه سياسيه للمجاملات و الاكراميات. و بالتالي فيه قلق. و شفيق جه بسبب القلق ده. 

كمان ترشيح شفيق بيفلق تحالف ٣٠ يونيو اكتر و اكتر و احنا اتكلمنا ان تفتيت تحالف الثوره المضاده احد المقومات و العلامات. مصدر ٢. جوة أهل الحكم نفسهم حتلاقي المتعاطف مع شفيق. جوة مؤيدي السيسي حتلاقي المتعاطف معاه. اللي اداله صوته في ٢٠١٢. و لذلك انطلقت جوقه اعلام السيسي بشكل رهيب ضد شفيق. 

طيب احنا ايه دورنا؟ احنا طبعا غير معترفين بنظام ٣٠ يونيو. هو نظام لا يمثل الشعب المصري. شفيق معترف بنظام ٣٠ يونيو. جميل. خلي شفيق يدخل يزيد انفلاق و تفتت نظام ٣٠ يونيو. و دورنا هو تشجيع الانفلاق ده. و الله تمثيليه و شفيق جاي مفروض من حد في الخليج و حيبقى زي السادات و حيطلق المعتقلين و يبقى فيه شويه انفتاح. اهلًا و سهلا بأي شيئ يسهل على المعتقلين و عائلاتهم. شفيق جاي يبقى سيسي جديد. على وضعنا. شفيق جاي يبقى عراب انطلاق نظام ديمقراطي حقيقي في مصر زي ما كان جواو فيجوريدو اخر رئيس عسكري في البرازيل و فتح الطريق بسياسه الانفتاح السياسي لعوده الديمقراطيه في البرازيل (كتبنا كل ده في مصدر ٣) . جميل مع انه احتمال بسيط. السيسي حيضرب شفيق و اتباعه بقوة و يزيد القمع ضدهم. عظيم. ده حيفتت تحالف ٣٠ يونيو اكتر و اكتر و يزيد فشل السيسي اكتر و اكتر. هل فعلا حيبقى فيه انتخابات حقيقية؟ أكيد لا. حيبقى فيه تزوير بدون شك. بس جميل بقى ان شفيق و تحالف ٣٠ يونيو يطلعوا يقولوا في العالم كله انه فيه تزوير و ان السيسي غير شرعي. فرق مع الغرب ان الكلام ده يقوله اسلاميين ملهمش للاسف علاقات مع الغرب و يقوله بتوع شفيق و بتوع البرادعي. هل ده حيوصل لحاجه؟ ممكن لانه ده كان بيضغط على مبارك جدا. و الدليل انه بيضغط على السيسي هو الحمله الاعلاميه المضاده و تهور الإمارات في التصرف اللي بيؤكد لنا اكتر و اكتر ان نظام محمد بن زايد هو العدو رقم ١ للشعب المصري و ان هدفهم إذلاله. 

طيب احنا نعمل ايه؟ الهدف مننساش هو فلق تحالف ٣٠ يونيو. احنا بنؤيد الكلام اللي يعجبنا و ضد ما لا نراه في مصلحتنا. شفيق و اتباعه يهاجموا التزوير و القمع في نظام السيسي. جميل. نهاجم معاهم. شفيق واتباعه يقولوا ثوره ٣٠ يونيو. احنا ضدهم. دي مسأله مبادئ. 

و هو العموم في الوقت الحالي شفيق مش محتاج تحالف مع اخوان و لا اسلاميين و لا ديمقراطيين. كل ده عبء عليه حاليا في الصراع مع السيسي لانه حيستخدم ضده في مصر و الغرب. كلام التحالفات ده مؤجل تماما لبعدين. بالعكس. التحالف عبء على شفيق و عبء على قيادات الإسلاميين و الديمقراطيين الان قدام الشارع بتاعهم. 

هل فيه مره حنبقى اذكياء؟ 

المصادر:

١- شفيق جزء مهم من الانقلاب 

https://m.youtube.com/watch?v=elk69cM1BnQ

٢- سلسله جوده عن كيف تكسر الانقلاب 

https://jawdablog.org/category/الانقلابات-العسكرية/كيف-تكسر-الإنقلاب/

٣- التحول الديمقراطي في البرازيل 

https://jawdablog.org/category/الانقلابات-العسكرية/الحكم-العسكري-في-البرازيل/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s