صفحات منسية من حياة الرسول محمد عليه الصلاة و السلام الحلقه ٨

غار حراء أين هو و ما هي أهميته و ايه المعجزه فيه؟ و فيضانات مكه و تأثيرها (لحد دلوقتي) و أعاده بناء الكعبه بعد الفيضان و أمور منسيه في قصه بناء الحجر الأسود 

forgotten_pages_of_prohets_life_08_3

قبل ما نشوف نزول الوحي و نبدأ مرحلة مفصلية في حياة الرسول و يمكن حياة البشر كلهم، حنقف شوية مع اللي اتعلمناه من الحلقات السابقة (مصدر ١) و نحاول نطبقها في عالمنا دلوقتي. لو واحد قاهري عيلته ساكنة في التجمع الخامس بس قضى طفولته في الصعيد لان والداه توفيا و بعدين رجع يعيش في القاهرة و يدخل مدرسة اجنبية زي بقيه اقرانه. لكن دايما كان محتفظ بلكنته الصعيديه. و دايما بعيد عن اللعب او انه يطلع معاهم مثلا يعاكس بنات و متحفظ على الممارسات دي. و اكتر من كده انه باستمرار لابس ملابس فقرا مش بيغيرها. و بعدين كبر و اتجوز واحدة زيه برضة معترضة للاوضاع القائمة و الاتنين عملوا جمعية بتتقابل باستمرار يتكلموا عن ممارسات أهل مصر السيئة و فلوسهم معظمها رايحه للفقرا و مع ان معاهم فلوس كتير بعد لما ربنا فتح عليهم بالتجارة برضه لسه بيلبسوا هدوم مرقعة. تفتكروا مصر حتتعامل ازاي مع واحد زي ده؟ حيتقال عنهم ايه و حيتقال لهم ايه؟ الجمعية دي لوحدها تودي في داهية. مساعدة الفقرا دي ممكن تخلي الناس تبلغ عنهم و توديهم السجن. لبسهم هدوم مرقعه حيجيب تريقة في كل مكان. ده طبعاً غير انه أساساً من و هوه في المدرسه التريقة على لكنته الصعيدية و انه متحفظ و مش بيعمل الممارسات السيئة بتاعه اقرانه حتخلي الضغط عليه كبير جدا لدرجة ان اي إنسان محترم في مصر اما انه يجاري المجتمع في كل حاجه او انه بتجنن او يهرب او يدخل السجن الا طبعا اذا كان نبي مرسل.

لذلك الحقيقه انه بالرغم اننا بنحج و نصلي و نصوم و نعمل هوجة في رمضان و الناس بتزعقلنا لما بننسى نكتب عليه الصلاة و السلام بعد اسم النبي و كله يطلع يتهمنا في ديننا أساسا (تخيل بنكتب كتاب عن الرسول و يتهمونا) و كله يقولك كلنا فداؤك يا رسول الله (كلام بس) لكن في الحقيقة المجتمع المصري الحديث فيه صفات كثيرة من صفات جاهلية قريش. نحن لا نكفر الناس اعوذ بالله. نحن نقول ان فيه صفات كثيرة من الجاهلية. مع فارق كمان مهم. قريش سابت الرسول و السيدة خديجه في حالهم. طول لما الجمعية اللي عملوها و سموها الأحناف مش بتضرهم و لا بتضر مصالح قريش و تجارتها، قريش سابتهم يعملوا اللي عاوزينه. محدش قاطعه. محدش اتريق عليه. محدش قاله يا اللي اتجوزت واحده ست قد أمك عشان تاخد فلوسها (أثبتنا في الحلقه الماضية انه غير حقيقي). كل ده كان حيتقال للرسول محمد صلى الله عليه و سلم في المجتمع المصري الحديث و الاعلام المصري الموجود حتى و لو كان غير صحيح. ومش بعيد كان اخد تهمة ارهاب لو شكل جمعية سماها الأحناف. كام واحد فينا لما العيال في المدرسه حيتريقوا على واحد زي ده حنضم عليه و نساعده مش حنضم على بقية عيال المدرسة؟ كام واحد؟ احنا بقينا مجتمع و سلطة تكدب على النبي شخصيا لو كان موجود بينا. في حين ان قريش معملتش كده الا بعد لما بقى تهديد مباشر لمصالحها. فكر كده شويه و تدبر في الامر.

و بعدين ننقل بقى على من يقول انه بيتبع سنه الرسول. و يلبس جلباب و يطلق لحية. كلام جميل جدا. طبعا ياخد ثواب على اتباع السنن. لكن للاسف بعضهم نسي أصل السنن. اصلها انك لا تتبهرج. اصلها انك تأخذ جزء كبير من فلوسك و تبقي فقط ما تحتاجه و تعطي الباقي للفقراء. اصلها مش انك تنعزل مع أصحابك و تلبسوا زي بعض و خلاص. اصلها انك تتعامل مع كل الناس بعدل و احسان. ده الأصل و ده كمان تاخد ثواب عليه. مش انك تطلق لحية و تسوق تاكسي و تقعد فيه تشتم الكل و تنافق و تشتغل مخبر لاجهزة السيسي الامنية. في الحالة دي ايه لزمه اللحية؟ تفتكر فعلا انها حتنفعك انك سبت الأصول و تمسكت بالفروع؟

فكروا كويس قوي في الكلام ده. و قولولنا رأيكم ايه. عشان احنا زهقنا من كل اللي بيقول انا اتبع سنه الرسول و في نفس الوقت المجتمع و هو و هي فيهم صفات من مجتمع قريش و بعضها كمان بشكل اسوأ من مجتمع قريش. لذلك لما بنقول الاسلام دين صالح لكل زمان و مكان الكلام ده حقيقي و مهم. لكن للاْسف بنقول كلام و خلاص و بنقول صالح لكل مكان و زمان بعيد عننا. يعني الغرب مثلا يعمله و يطبقه و أحنا نوعظ في الغرب و بقية العالم. ده معنى الاسلام صالح لكل مكان و زمان عندنا. احنا ساعات بنفتكر ان فقط عشان اتولدنا عرب مسلمين ده يخلينا بشكل اتوماتيكي أحسن من الناس كلها. مش حقيقي. كأننا مسمعناش او مش عايزين نسمع ان الفضل هو بالتقوى! للاسف مفيش كتير يخلينا في موضع الوعظ و الإرشاد للعالم ازاي مجتمع فيه كثير من صفات قريش يحاول يوعظ عالم محتاج جدا لرساله الاسلام عن المساواه و العدل. ازاي مجتمع غير عادل يتخيل انه ينشر رساله العدل؟ ازاي مجتمع مفيهوش أدنى مساواة و كله طبقيه و احتكار ورفض للتغيير بالضبط زي قريش و اكتر يحاول ينشر رساله المساواة؟ ده كلام برضه؟ و في الاخر يقول المجتمع ده انه افضل من بقية العالم و ان رساله الاسلام صالحة لكل العالم. بس طبعا العالم ده هوه اي مكان غير المجتمع بتاعي! و انا اختار من الاسلام زي ما انا عاوز! عجيب و الله.

جبال الحجاز هي جبال من الجرانيت الاحمر و هي جبال صخريه شديده الوعورة و صخرها خشن لدرجه انك لو وقعت عليها و حاولت تمسك الصخور ممكن جدا إيدك كلها تبقى دم. الرسول محمد صلى الله عليه و سلم قبل البعثة شفنا انه عمل جمعية الأحناف و كان هو و السيده خديجه و ورقة بن نوفل يتقابلوا فيها عاوزين يوصلوا للدين الصحيح و معترضين على ممارسات مكة و مجتمع قريش وقتها و انعدام العداله و المساواة في مجتمع كان بيفقد ارتباطه بالأصول العربيه بسرعه شديدة بسبب ضغوط التجاره و التمدين و العولمة. الرسول كمان كان يطلع قبل الغروب على الجبال يتأمل الجبال و يقضي ليلته في التأمل. مكانش بياخذ معاه الا لبسه البسيط و يتسلق الجبال المحيطة بمكة عشان يشوف منظر الغروب و يتأمله و كان معظم الوقت بيروح غار حراء على جبل النور القريب من مكه.

جبل النور يقع شمال شرق مكه على بعد حوالي ٣-٥ ميل يعني حوالي ٥-٨ كيلومتر. محتاجين شويه نفهم موقع غار حراء. غار حراء يقع على السفح الجنوبي الغربي لجبل النور (انظر الصور) على ارتفاع حوالي ٦٠٠ متر. جبل النور ممتد تقريبا على مسافه ٢ ميل يعني حوالي ٣ كيلو. لكن غار حراء واقع على السفح الجنوبي الغربي من جبل النور. يعني غار حراء واقع في اقرب نقطه من الجبل لمكه نفسها. و بالتالي مفيش حاجه بتحجب غار حراء عن مكة و الكعبة اطلاقا. مفيش قمة تانية او جبال تانية. الغار نفسه عبارة عن غرفة صغيره تتسع لاربع او ٥ أشخاص بالكتير. الغرفة دي نتخيل كده انها في بطن الجبل و لها فتحة واحده. الفتحة دي مواجهه لاتجاه الشمال. يعني و انت داخل من فتحه غار حراء بتكون تقريبا مواجه مكة و الكعبة. و الحيطه المقابله ليك قدامك على طول و انت داخل الغار ورآها على طول مكه. الحيطه دي بالتالي مواجهة لاتجاه الجنوب الغربي (انظر الصور و صور القمر الصناعي). حاجه كمان الغار سقفه عباره عن قمه صغيره من قمم الجبل و السقف ده عباره عن مجموعه من الصخور الكبيره. يعني انت ممكن تطلع فوق واحده من الصخور دي و تواجه مكه مباشره.

forgotten_pages_of_prohets_life_08_1

forgotten_pages_of_prohets_life_08_2

الموقع ده موقع استراتيجي مهم جدا. ليه؟ 

اولا حيطة الغار المواجهه لاتجاه الجنوب الغربي و مواجهة لمكة هي حيطة قبلية زي ما بنقول. يعني في الشتاء الشمس بتواجهها معظم الوقت و بالتالي الحجر فيها بيحتفظ بالسخونة في ليل شتاء مكه البارد جدا بالذات على ارتفاع ٦٠٠ متر.

كمان فتحة الغار مواجهة للشمال و بالتالي في الصيف بتدخل نسمه هواء باردة خصوصا ان أتجاه الشمال الغربي جنبها مفتوح تماما و لا يحجبه شيئ لمسافات طويله و بالتالي نسمات الهواء بتكون موجودة.

طبعا بص في الصور على أتجاه سجاد الصلاة في الغار حتعرف انك مش محتاج بوصله عشان تعرف تصلي ازاي في أتجاه الكعبه. اتجاه فتحه الغار و الغار كله في اتجاه الكعبة مباشرة. معجزة في حد ذاتها.

نقطة كمان. لو عاوز تعرف المواعيد زي غروب الشمس و شروقها فالموضوع سهل جدا. تتسلق واحده من الصخور في سقف الغار حتكون مباشرة في اتجاه الجنوب الغربي. و من هناك يمكن منه رؤية الكعبة (قبل الابنيه الحديثه). و ممكن مراقبة الشمس و هي بتغرب خلف مكة. لذلك تخيل منظر مكة على بعد ٥ كيلومتر و الشمس بتغرب ورآها و تغمر الصحراء كلها بما فيها مكة بأشعة ذهبية. كمان لما الشمس بتبدي تشرق تقدر تشوف اول انوار الشمس في أتجاه الجنوب الشرقي.

الرسول كان ساعات بيقضي ليالي متتالية في التأمل في غاز حراء و مياخدش معاه الا بعض المياة و الطعام البسيط. و بعد لما ينزل يوصل الكعبة و يطوف حواليها ٧ مرات. و بعدها يرجع لرفيق روحه و حياته السيدة خديجة.

على فكره تسلق غار حراء و النزول منه عمليه مش سهله. مش بس التسلق بس. الاسوء هو انه مكة و الحجاز كله فيه مشكله فيضانات الأمطار flash floods (الموجودة لحد دلوقتي زي ما كلنا عارفين). اي منطقه صخريه جبليه مشكلتها انه لما المطر بينزل بيتجمع في مخرات بين الجبال و التجميع ده بيبقى له قوة مدمرة. و مشكلة الكعبة و مكة انها بالضبط اوطى نقطه في المنطقه كلها و بالتالي كل السيول بتتجمع بالضبط في مكة عند الكعبة. العالم الحديث طبعا حل المشكل ده بحفر انفاق لتجميع السيول و ابعادها في مسارات مختلفه. لكن ده مش موضوعنا. لكن بصفة عامة فيه مكانين خطرين وقت الفيضان. انك تكون في غار في جبل لان الصخور ممكن تقع عليك. او انك تكون في مخرات السيل و اسوء نقطه لكدة هي اوطى نقطه.

في سنه ٦٠٥ و الرسول كان في غار حراء جت عاصفه كبيره و عملت سيول أهل مكه معمرهمش شافوا زيها. بالرغم ان قريش كانت بانيه حيطه زي نص دايره حوالين الكعبه لكن السيل كان قوي جدا كسر الحيطه و بناء الكعبة. السيل مش بيجي بس و فيه مياه لكن بيشيل معاه طوب و زلط بياخده من الجبل و ده بيكون قاتل. مع انتهاء السيل مبنى الكعبه كان اتحطم خالص.

طبعا كان لازم أعاده بناء الكعبة و بسرعة قبل ما الخبر ينتشر في بلاد العرب و يكون فأل سيئ يهدد مصدر رزق مكة كلها و سبب وجودها أساسا. مجلس كبار قريش قرر انهم يرفعوا اساسات الكعبه شويه بحيث ان الطوب و باب الكعبة يكون فوق اعلى فيضان ممكن. كمان قرروا انهم يستغلوا الفرصه و يعملوا المبنى بشكل أقوى. قرروا انهم يستخدموا خشب من بقايا سفينة جنحت في البحر الاحمر بسبب نفس العاصفة اللي هدت مبنى الكعبة. و فعلا راحت قافلة تجيب الخشب من السفينه دي. كل أهل مكه كانوا بيساهموا في البناء و كله كان معتبر ده شرف. الشغل كان متقسم بدقه بين عائلات مكة المختلفة عشان مفيش عيلة تقول انها نالت شرف مكانش لحد تاني. ده مش بس سبب ديني. كمان لان اي عيله حتاخد شرف اكتر من الباقيين ممكن بسهوله تحول ده لمكاسب تجارية ساعة الحج. كل ده مشي كويس لحد ما وصلوا انهم يرفعوا الحجر الأسود الموجود في الركن الشمالي الشرقي من الكعبه (المواجه لغار حراء!). كل الناس كانت عاوزة هي اللي ترفع الحجر في مكانه. طبعا اللي حيرفع الحجر ممكن يجي في موسم الحج و أكيد الحجاج عاوزين يتباركوا بايده و يدفعوا مقابل ده او يحكيلهم عن ازاي قدر يعملها و القدرات الروحانية الالهية الخاصه اللي خلته يقدر يعمل كده. و كله بحسابه.

الخلاف اللفظي زاد جدا حوالين مين يرفع الحجر و ابتدى على وشك يبقى فيه استخدام للسلاح. واحدة من عَائلات قريش حطت أيدها في دم الحيوانات و رفعوا أيديهم قدام الناس و قالوا انهم حيقلبوها دم لو مش هم اللي يرفعوا الحجر. و ابتدت فعلا الناس تضرب بعضها بالأيادي الاول لكن السيوف مكانتش بعيدة. واحد من كبار السن حاول يهدي الموقف و قال احنا كلنا أعصابنا تعبانة و مرهقين من الشغل في البناء. بدل ما احنا نقرر قرار صعب زي ده نسيب القرار لله. اول واحد يدخل الحرم بصرف النظر من اي عيله هوة يبقى هوه الشخص اللي يقرر مين يرفع الحجر الأسود. و اول واحد دخل كان الرسول محمد راجع من غار حراء عشان يطوف حوالين الكعبه.

الناس لما شافت الرسول جاي قالوا “الأمين قادم و نرضى بحكمه”. مكة كانت ينطلق على الرسول الصادق الأمين بسبب معاملاته التجاريه اللي شرحناها قبل كده.

الرسول قال ادوني عباءة و حطوها على الارض و حطوا الحجر الأسود في المنتصف و ترفعوها كلكم. بعد لما رفعوها للارتفاع المناسب كلهم قام الرسول صلى الله عليه و سلم و دفع الحجر في مكانه.

قريش وثقت في الرسول بسبب معاملاته لانه الصادق الأمين. كمان هم عارفين انه مش مصدر تهديد ليهم. يعني مش حيروح يقول انه هوه اللي حط الحجر و يأخذ مزايا تجارية بسبب ذلك. تعاملاته مختلفة عن كده. هوه ميعملش كده. كمان هوه واحد منهم و فاهم ايه الحكم المناسب في وضع زي ده لكن كمان هوه مختلف زي ما شرحنا قبل كده.

الحلقه الجايه حنشوف الوحي ازاي نزل. لكن نختم المره دي بأننا نقول لو الخلاف بتاع الحجر الأسود موجود دلوقتي تفتكروا مجتمعنا حيرضى بحكم واحد فيه من صفات الرسول محمد صلى الله عليه و سلم؟ و الا كان حيرضى بس بحكم الحاكم و حاشيته؟ اللي كان هوه بس اللي حيحط الحجر الأسود؟ فكر كويس في الاجابة عشان تفهم اننا في أمور كتيره بقينا اسوء من قريش قبل الاسلام.

و نكمل ان شاء الله.

المصادر:

١- الحلقات السابقه من صفحات منسيه من حياه الرسول محمد صلى الله عليه و سلم

https://jawdablog.org/2017/11/11/forgotten_pages_of_prohets_life_07/

https://jawdablog.org/2017/11/04/forgotten_pages_of_prohets_life_06/

https://jawdablog.org/2017/10/28/forgotten_pages_of_prohets_life_05/

https://jawdablog.org/2017/10/21/forgotten_pages_of_prohets_life_04/

https://jawdablog.org/2017/10/14/forgotten_pages_of_prohets_life_03/

https://jawdablog.org/2017/10/07/forgotten_pages_of_prohets_life_02/

https://jawdablog.org/2017/09/30/forgotten_pages_of_prohets_life_01/

٢- ابن هشام 

٣- ابن إسحاق 

٤- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

One comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s