صفحات منسية من حياة الرسول محمد  صلى الله عليه و سلم الحلقة ٦…

شباب الرسول في مكة و قصة الراهب بحيرا

forgotten_pages_of_prohets_life_06

شفنا في الحلقة اللي فاتت (مصدر ١) علاقة الرسول الحقيقية بجده عبد المطلب و انه بالرغم ان عبد المطلب وفر للرسول محمد صلى الله عليه و سلم نوع من انواع الرعاية لكن الراجل كان على وشك الموت و ان محمد كان حفيد من عشرات الأحفاد بالنسبة له. و شفنا ان عدم وجود أبوين أدى الرسول فرصة للتواجد الدائم تقريبا بالقرب من الكعبة و كمان بالقرب من مجلس جده عبد المطلب و ده أدى الرسول فرصه لمراقبة مناسك العرب الدينيه تجاه الكعبة و لكن كمان انه يسمع حوارات جده السياسية و التجارية و دي كانت فرصه مفيش أطفال كتير بتجيلهم انهم يراقبوا حركه السياسة و الدين و الاقتصاد بالقرب من قمة الجزيرة العربية. فاحنا نلاحظ ان اليتم في حياة الرسول فتح أبواب جديدة خالص.                           

الحاجة التانيه اللي الرسول محمد عليه الصلاة و السلام حضرها في طفولته هي سوق عكاظ. سوق عكاظ كان بيتعقد وقت الحج. و كان كرنفال كبير جدا بيتباع فيه كل حاجه. بيتباع العبيد. بيتباع العاهرات. بيتباع السموم لو عاوز تقتل عدوك. و بيتباع الادوية لو عاوز تخف. بيتباع الحيوانات. بيتباع البني أدمين. بيتباع سلع و مجوهرات من الهند. مش بس كدة كمان. كان ده الوقت اللي بيتعمل فيه الصفقات التجارية. حاجه كده زي المعارض الصناعية او معرض لي بورجيه للطيران. مش بس ان طيارات بتعمل استعراضات الناس تدفع فلوس تشوفها لكن رجال الاعمال الكبار بيجوا يتفقوا حيشتروا و يبيعوا كام طياره. نفس الكلام في سوق عكاظ. تجار الشام و اليمن و الهند و روما و فارس بيجوا عشان يتفقوا مع بعض على صفقات رحلتي الشتاء و الصيف. اللي كانت كل رحله منهم بيبقى فيها حمولات آلاف من الجمال. يعني احنا مش بنتكلم عن كلام فارغ. ده جزء مهم من التجاره الدوليه وقتها. لذلك لما القرآن بعد كده يتكلم عن رحلتي الشتاء و الصيف ناس كتير تقول احنا مالنا و مال الكلام ده دلوقتي. مفيش ده دلوقتي. بالعكس رحلتي الشتاء و الصيف دول موجودين لحد دلوقتي. دول دلوقتي حركه التجاره الدوليه اللي من غيرها دول كتير تفلس و حضارات تنتهي و نعمة طبعا ان اي بلد تبقى على طرق التجاره الدوليه. مدن زي سنغافوره او جاوا او هونج كونج او باريس او نيويورك او سان فرانسيسكو او بورسعيد او فينيسيا في القرن ١٤ او أمستردام في القرن ١٥ او مطار تشارلز ديجول دلوقتي كلهم وجودهم مرهون بحركه التجاره الدوليه بالضبط زي مكه ما كانت في القرن السابع الميلادي. احنا بس مش بنفكر. 

سوق عكاظ كان بيبقى فيه استعراضات مثلا بيعملها فقير هندي انه يمشي على الشوك او يبلع النار. او ان العاهرات يتعرضوا على الناس. او ان قرود من افريقيا تيجي تعمل استعراضات او ان تعابين هنديه او افريقيه تعمل استعراضات. او ان ديوك رومي تيجي من شرق اسيا و تعمل عرض لمصارعة الديوك. الخ. كرنفال دولي حقيقي.. 

المشروبات الكحولية كمان كانت مستخدمه بكثافه في سوق عكاظ. اي صفقه تجاريه بتتم مع شرب الخمر المعموله من البلح او عرق البلح او الخمرة المعموله من لبن الجمال. 

الرسول عليه الصلاة و السلام أكيد لاحظ ازاي ان في نفس وقت الحج و التدين يحصل سوق عكاظ و نخلط الدين بكمية كبيرة مش بس من الدنيا لكن بالتهتك كمان. يعني بدل ما يبقى الدين حافز للاخلاق يبقى مولد للتهتك و الاباحية؟ 

بعد سنتين من وفاة والدة الرسول توفي جده عبد المطلب و عمره ٨ سنين. و بالتالي الرسول عليه الصلاة و السلام بقى يتيم لتالت مره. و بالتالي أتنقل محمد ص انه يعيش مع رأس آل هاشم و هو عمه ابو طالب. نقطه مهمه جدا نلاحظها ان تقاليد العرب دايما ان رأس العيله الجديد يأخذ كل التزامات رأس العيله السابق. بس دي تقاليد بس. كان ممكن جدا مع تهتك العلاقات الاجتماعية في مكة اللي كان عمال يزيد نتيجه لانتشار المدنية ان ابي طالب يقول انه ملوش دعوة بمحمد و خلاص خصوصا انه فقير و معندوش ورث (زي ما شفنا قبل كده ان في مكه القرن السادس اليتيم مكانش بيورث!). لكن الحقيقة ان ابي طالب كان راجل صاحب شرف و نخوة. 

بعد دخول محمد عليه الصلاة و السلام بيت ابي طالب، الرسول بدأ يشتغل بايده و بدأ السلم من أوله خالص. و ده ثابت تماماً في المصادر. الرسول متعاملش معاملة خاصة مثلا عكس اللي درسناه في كتب المدارس. بالعكس الرسول ص بدأ يشتغل صبي الجمال. يعني الولد اللي بيمشي جنب الجمل ياخد باله منه و يأكله و يشربه ويقعده. الخ. طبعا سنين الرسول في البدو أكيد كانت بتساعده جدا لان الجمل حيوان صعب جدا في التعامل معاه. اي ضربة او حركه ممكن تضايق الجمل و تبقى السيطره عليه مستحيلة. في الاول الرسول بدأ من قاع السلم خالص. و ده دليل انه مخدش اي معامله خاصه. بدأ انه يشتغل مع الإبل المخصصة للحلب. و دي طبعا بتبقى اسهل. و بعد كده بدأ انه يبقى صبي على جمال السفر. و دي طبعا مهمة جدا لان تجارة مكه كلها معتمدة عليها. زي دلوقتي لما نقول انه كابتن طائرة عابره للقارات. 

الجمل حيوان فريد جدا. اصوله في اثيوبيا و دخل الجزيرة العربية في القرن التالت يعني قبل الرسول بحوالي ٤٠٠ سنه. و لما وصل الجزيرة العربية اتضحت فوائده جدا لأنه قادر على التحكم في درجة حرارته و بالتالي يستحمل درجات حرارة شديدة البرودة و السخونة. كمان عنده قدره عاليه انه يخزن المياة في كرات الدم الحمراء مش في سنامه زي ما الناس فاهمه. الحقيقة انه بيخزن الدهن في السنام. لذلك يقدر يسافر مسافات طويله من غير اكل او شرب. لذلك الجمل مناسب جدا للسفر في الصحرا. لكن المشكلة ان البني آدم نفسه جسمه مش مناسب للسفر في الصحرا. و كان السفر و مازال عمليه صعبة على جسم البني آدم. من الأربع مؤسسين لقبيله قريش تلاتة منهم ماتوا بره مكة في غزة و العراق و اليمن. غير الاوبئه و الحشرات كان كمان فيه اللصوص و قطاع الطريق. لذلك السفر في الصحرا تجربة صعبة جدا. و كان بس الأغنياء اصحاب القافلة هم اللي بيركبوا الجمال. لكن الصبيان اللي بيسقوا الجمال و يراعوها زي الرسول في شبابه مكانوش بيركبوا. كانوا بيمشوا جنب الجمل. الرحله كل يوم كانت بين ٢٠-٣٠ ميل يعني مسافه ماراثون. و بعدها القافلة بتقف و الجمال تاكل و تشرب. و بعدين الصبيان يلموا روث الجمال اللي في العادة جاف جدا لان الجمال بتحتفظ بالمياة في جسمها و يستخدموه انهم يعملوا نار و يطبخوا لبقية القافله. و بعدين بعد كدة ممكن الصبيان تاكل و بعدين يتبادلوا السهر باليل لحراسة القافلة من اللصوص او من السلعوة او الديابة او أسد الجبال. حياة صعبة جدا.

الرسول تدرج من صبي للإبل الحلوبة و بعدين صبي لجمال السفر في القوافل الصغيره و بعدين ابتدا يروح في رحلة الصيف لدمشق (و قصادها رحله الشتاء لليمن). الرسول كان مع صبيان الجمال في رحلة الصيف لدمشق. الرحله دي بتاخد الطريق الساحلي للعقبة و بعدها تكمل شرق نهر الاردن لحد ما توصل لدمشق و القافلة في العادة كانت بتبقى حوالي ٢٠٠٠ جمل. 

الزمن ده كان فترة الاختلاف المسيحي. كمان كان وقت تداعي الامبراطوريه البيزنطينة بسبب حروبها الطويلة مع الفرس و إهمال الحصون و القلاع بتاعتها في الشرق الاوسط. و بالتالي رهبان مسيحيين كانوا بياخدوا القلاع المهجورة دي و يسكنوا فيها اما انهم هربانين من الامبراطورية البيرنطية اللي وقتها كانت بتميز ضد اي حد مش معتنق المذهب الأرثوذكسي اليوناني المسيحي. 

ابن إسحاق بيروي القصة ان القافله مرت من احد القلاع البيزنطيه اللي مستخدمة كدير في الاردن كالعادة. الدير كان فيه راهب مسيحي اسمه بحيرا. القوافل كانت بتبقى مكونة من اجزاء. كل جزء مملوك لتاجر كبير. لما عدى الجزء بتاع ابو طالب، الراهب بحيرا لاحظ انه فيه سحابه صغيره ثابتة فوق نقطة محددة في القافلة. بحيرا خرج و عزم قافلة ابو طالب عنده. كل الناس دخلوا القلعه. لكن بحيرا حس انه فيه حد ناقص. سألهم مين ناقص. قالوله آه فعلا الولد اللي بياخذ باله من الجمال سبناه معاهم. بحيرا اصر ان كل الناس تيجي . لما الرسول محمد ص دخل الراهب بحيرا قال لابي طالب ان ابن اخوك هذا ينتظره مستقبل عظيم. 

نقطه اخيرة لازم نفهمها ، قبل ما نوصل لمرحله صعود محمد عليه الصلاه و السلام، ان محدش بيسافر ٣ شهور في الصحراء يقطع فيهم ٦٠٠-١٠٠٠ ميل عشان يوصل و يأكل و يلف و يرجع تاني. ده حتى المسافر بالطيارة مش بيعملها. في العادة التجار دول بيوصلوا و يقعدوا ساعات شهور و يتزاوجوا و يشتروا أراضي و بيوت. لذلك كتير من تجار مكة الكبار كان عندهم ارض و بيوت في الشام مثلا و زوجات كمان و مختلطين بالسياسة الداخلية للشام و اليمن لان طبعا تأثيرها عليهم كبير. مين بيحكم و رأيه ايه في مكة و تجارتها كل ده تاثيره كبير. و بالتالي ظهور معاوية بعد كده و علاقاته الواسعه بالشام كان موضوع طبيعي. ان تاجر كبير من مكة يملك مزارع في مصر و بيوت في دمشق و ارض نخيل في العراق كان موضوع طبيعي. دمشق وقتها كانت تحت سيطرة الامبراطورية البيزنطية بس كانت سيطرة ضعيفة بسبب تدهور احوال البيزنطيين نفسهم. و بالتالي كان فيها كل انواع المؤامرات. كمان كان فيها كل الأديان. كان فيها مسيحيين و يهود و كلهم كانوا منقسمين على أنفسهم جدا و كانوا بيقولوا نفس القصص بين الإنجيل و التوراه لكن بأشكال و صياغات مختلفه و بالتالي أكيد ده كان موضوع مبهر للصبي محمد ص. ازاي ان أديان التوحيد يبقى فيه بينها الخلافات دي كلها؟ ازاي التوحيد يعمل الانقسام ده كله؟ 

ابو طالب عم الرسول بعد قصه بحيرا فعلا لاحظ ان الصبي محمد ص فعلا متميز. و بالتالي ابتدا يعتمد عليه اكتر و يرقيه اكتر في المناصب خلال فتره فتوة النبي محمد عليه الصلاه و السلام. و حنتابع في الحلقه الجايه وصوله لمرحله الرجوله. 

– الصورة هي لدير جبل نيبو و يقع على الضفه الشرقيه لنهر الاردن و هو قلعه بيزنطية تعود للقرن السادس الميلادي و محتمل ان قصه بحيرا حدثت في مكان مشابه لها. 

المصادر:

١- الحلقات السابقه من صفحات منسيه من حياه الرسول صلى الله عليه و سلم

https://jawdablog.org/2017/10/28/forgotten_pages_of_prohets_life_05/

https://jawdablog.org/2017/10/21/forgotten_pages_of_prohets_life_04/

https://jawdablog.org/2017/10/14/forgotten_pages_of_prohets_life_03/

https://jawdablog.org/2017/10/07/forgotten_pages_of_prohets_life_02/

https://jawdablog.org/2017/09/30/forgotten_pages_of_prohets_life_01/

٢- ابن هشام 

٣- ابن إسحاق 

٤- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

One comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s