“لو بتحب النبي اعمل شير”

الاعلام في امريكا مشغول جدا الأيام دي بقصة ازاي روسيا اتدخلت في الانتخابات الامريكية عن طريق فيسبوك. مصدر ١. كتير منكم يمكن ميعرفش ان فيسبوك بيستخدم ألجوريثم algorithm بيحدد بيه مين و عدد الناس اللي اي بوست توصلهم. مثلا احنا على صفحة جوده فيه ربع مليون مشترك. انت طبعا فاكر اننا لما نحط بوست بيوصل لكل الربع مليون. الحقيقة ده ابعد ما يكون عن الصحة. فيسبوك بيختار عينة عشوائية من المشتركين في اول ساعه او نحو ذلك بعد نشر البوست و يبعتلهم البوست و يشوف هل حيفتحوه و يقروه و يعملوا لايك و شير مثلا و لا لأ. كل تصرف من دول ليه سكور score. و بناءا على العينة دي و تصرفها الاْلجوريثم بيقرر كام واحد في المشتركين و مين بالضبط حيوصلهم البوست.

طيب لو احنا عاوزين البوست يوصل لأعداد اكبر نعمل ايه؟ لازم تدفع يا حبيبي. بس عشان البوست يوصل للمشتركين. و على فكره التسعيرة تختلف من بلد للتانية. المواطن الامريكي مثلا تسعيرته اعلى تقريبا ١٠٠ مرة عن المواطن المصري! و لو مش حتدفع فيسبوك بيقفل المحبس عليك الا في حالة واحدة بس ان البوست بتاعتك تكون رهيبة مع العينة العشوائية. و حتى في الحالة دي أخرنا اننا نوصلها ل ١٠٪‏ بس من كل المشتركين. و لو البوست مش شعبية قوي مش حتوصل الا بالكتير ١٪‏ من المشتركين و الباقي كله بالدفع.

خطورة ده انه ممكن جدا ان بوست ممتاز و مفيد جدا لكن مش شعبي ميوصلش الا لعدد محدود الا اذا دفعت رقم كبير و اذا كنت فقير و معندكش الا فكرك فالبوست بتاعك مش حيروح لحد.

الروس اتوصلوا لفكرة ممتازه لكن مؤسفة جدا جدا. و الفكره دي تم استعمالها من قبل حلف الإمارات – السيسي – اسرائيل – بوتين – و اليمين الامريكي المتطرف في مصر بشكل ضخم خلال رياسة د مرسي و خلال الأيام الاولى للانقلاب. الفكرة هي انك تعمل حساب مثلا بإسم American veterans او الجنود الأمريكيين المتقاعدين او واحد تاني بإسم army of Jesus جيش يسوع. مين مش حيحب يشترك في حسابات بالاسم ده. لو تلاحظ نفس الكلام أتعمل في مصر في حسابات من نوعيه “كلنا ولادك يا مصر” و “بنحب مصر” الخ. و الحساب مثلا يبدأ في الاول بنشر مقتطفات من الإنجيل او صور العلم الامريكي او صور الجنود الأمريكيين اللي بيحاربوا في الخارج. مليون لايك طبعا لحاجه زي كدة. و من غير اي دفع حتلاقي البوستات دي بتتنشر بشكل كبير لان العينة العشوائية اللي بيختارها فيسبوك كلها بتحب الكلام ده و بتلاقي نفسها بضغط من الدين او الوطنيه مضطرة انها تعمل لايك. مفيش اسهل من كده انك تثبت انك متدين او وطني. و طبعا البوست كمان تقول حاجة زي “لو بتحب يسوع اعمل شير”. او لو بتحب امريكا اعمل شير. او لو بتحب أهالي الجنود اللي ماتوا في أفغانستان اعمل شير. و طبعا حيعملوا شير لإثبات التدين او الوطنيه. و بعدين فجأة مع مواعيد الانتخابات في امريكا كل الحسابات دي تبدأ تنشر حاجة فيها خلط واضح بين الدين او الوطنية و بين الرسالة الحقيقية للموقع. مثلا يعمل بوست زي اللي في الصوره. عيله جندي أمريكي ميت بتعيط و تحتها مكتوب ان “هيلاري كلنتون مستحيل تفهم المشاعر دي”. طبعا انت دلوقتي قدام صورة انت أكيد حتعملها لايك. كمان انت بقى عندك شعور بالانتماء للموقع ده. ده موقع بتاع رجالة المحاربين الأمريكيين و كل كلامهم لحد دلوقتي كان مدح في امريكا. أكيد الموقع ده أهل ثقه. فأنت دلوقتي في اضعف حالاتك و أكيد حتصدق كمان ان هيلاري فعلا مش بتتعاطف مع الناس دي. و لو الليكات و الشير اقل شوية من الطبيعي هنا تدخل الفلوس و تزود الانتشار.

If_You_Love_Prophet_then_Share_02

If_You_Love_Prophet_then_Share_01

اللعبه دي بالضبط أتلعبت في مصر و ده يؤكد لنا انه تحالف واحد بيلعب نفس الألعاب بنفس الصياغات و هو حلف الإمارات – السيسي – اسرائيل – بوتين – و اليمين الامريكي المتطرف. اكاونتات باسم “كلنا بنحب الرسول” و “صلوا على النبي” و “الثورة المصريه” و “كلنا بنحب مصر” و “كلنا ولادك يا مصر” و “من قلب ميدان التحرير” و “مليون لايك لحبيبنا النبي” الخ كلها اتعملت و بدأت انها بتقول كلام وطني قوي و ديني قوي و انها عاوز تاخد لايك و شير بكلام من نوعية “عاوزين حب النبي يلف الفيس كله”. فاكرين الكلام ده؟ مش ملاحظين ان كل الكلام ده اختفى او قل جدا عن ايّام ٢٠١١-٢٠١٣؟ و طبعا الحسابات الثوريه منها كلها اختفت تماما و ملهاش حس. ادخل على اي واحد منهم حتلاقي اخر بوست عملها كانت في ٢٠١٤!

و بعدين بمرور الوقت ينشروا حاجات من نوعية صوره محمد مرسي و جنبها صورة جندي مصري بعد مثلا حادثة رفح و يقولك اللي مع الجندي المصري يعمل لايك. أكيد ناس كتير حتعمل لايك. و هكذا انت فهمت اللعبه.

في مصر كمان بحكم انها معرضة و مكشوفه اكتر كتير من امريكا كانت بتحصل فبركة لأحداث حقيقية هدفها بس انها تعمل بلبله. تخيلوا. نشوف ازاي. في اخر أكتوبر ٢٠١٢ مثلا مجموعه طيارات مصريه عملت اختراق لحاجز الصوت فوق القاهره و ده المفروض ميحصلش في بلد طبيعيه. لكن الفبركة و ازاي توصل لاستخدام الطيران لخلق الشائعات بدل الدفاع عن مصر. فاكرين الحادثة دي؟ الناس اتخضت جدا طبعا. و محدش طلع في الْيَوْمَ الأولاني يشرح اي حاجه. و طبعا الاكونتات إياها اشتغلت جامد و قالتلك ان طيارات إسرائيليه اف ٣٥ اخترقت حاجز الصوت فوق القاهرة! مصدر ٢. 

و طبعا وقتها مكانتش آلاف ٣٥ دخلت الخدمة في اي حته في العالم أساسا و لا حتى الطيران الامريكي نفسه. كمان ايه يخلي اسرائيل تبعت طيارات بس تخترق حاجز الصوت فوق القاهره. يعني معنى كده انها وصلت لحد فوق القاهرة بسرعه اقل من سرعه الصوت و بعدين اخترقت حاجز الصوت فوق القاهره ذاتها و بالتالي مكانها بقى واضح و معروف و معنى كده انه ممكن اعتراضها بسهوله. و بعدين ايه الهدف من كدة أساسا. لكن محدش وقف يسأل. كله جري ورا الاكونتات إياها و المتحدث احمد علي (فاكرينه؟) قعد ساكت شويه عشان يخلي الإشاعات تزيد والموضوع مترتب أساسا. و للاسف ده كان اختبار كمان لمحمد مرسي. لان حادثة زي دي كان لازم اقاله وزير الدفاع (السيسي) و كل طاقمه لانه حتى لو بيقول انه تدريب محدش في العالم بيعمل تدريب عسكري باختراق حاجز الصوت فوق العاصمة! بالذات في بلد كلها صحرا. ده حتى اسرائيل نفسها الصغيرة مساحهً مش بتعملها اطلاقا. لكن عدت و طبعا جه بعدها مظاهرات قصر الرئاسه في مصر و كانت اول محاوله حقيقيه للانقلاب.

ادينا بنتعلم. لما يجيلك بوست واضح جدا انها بتقول كلنا بنحب النبي و أعمل لايك و شير لأجل النبي او بوست من حساب اسمه كلنا بنحب جنودنا و اعمل لايك عشان الضابط المصري اللي بيدافع عنك، احترس جدا جدا جدا. اتفقنا؟

المصادر:

١- اخر تطورات التدخل الروسي في انتخابات امريكا 

https://www.thedailybeast.com/russian-trolls-didnt-need-millions-to-sow-chaos-they-had-jesus?via=newsletter&source=DDAfternoon

٢- حادثه اختراق حاجز الصوت فوق القاهره

http://www.albidapress.net/press/mobile/view.php?id=23614

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s