صفحات منسية من حياة الرسول محمد  صلى الله عليه و سلم  … الحلقه ٤

كيف ماتت آمنة والدة الرسول؟ 

forgotten_pages_of_prohets_life_04

شفنا في الحلقة الماضية ان حليمة السعدية رجعت الطفل محمد (عليه الصلاة و السلام) لوالدته السيدة آمنة و عمره ٥ سنين. مصدر ١. و شفنا ان ده كان عمر متأخر جدا ان مرضعه ترجع طفل و عرفنا ليه حليمة اتأخرت في ترجيع الطفل. و فهمنا كمان ازاي ان ام في وقتها تسيب ابنها الوحيد يعيش بعيد عنها و عرفنا ليه. شفنا كمان ان السيده آمنة متجوزتش بعد وفاه عبد الله بن عبد المطلب و ده بالنسبة للتقاليد العربية موضوع غريب جدا. جرت العادات العربية ان الارملة يتولاها عائلة زوجها المتوفي و في الغالب يتزوجها احد أخواته (تعدد الزوجات كان طبيعي جدا وقتها). لكن ده محصلش في حاله آمنة نتيجة ان مكة بدأت تتحول لمجتمع تجاري حضري مشغول بالحياة و المكسب و ابتدى يبعد عن التقاليد الاصيلة. 

بعد لما حليمة رجعت الطفل محمد لوالدته في مكة بفتره بسيطة جدا، السيدة آمنة اخدت قرار غريب جدا. أنها تاخد طفلها الوحيد اللي كان عمره دلوقتي قرب على ٦ سنين و تروح بيه المدينة او يثرِب! 

مكة كانت مجتمع حضري تجاري كبير. حاجة كده زي نقول دبي دلوقتي. يثرِب كانت حاجة مختلفه خالص. يثرِب كانت مدينه زراعية. و كانت عباره عن وادي طويل فيه مجموعه من الواحات المتقاربة من بعضها. كل واحة فيها شجر و زرع و عايش فيها قبيله من قبائل يثرِب. و منهم زي ما كلنا عارفين الاوس و الخزرج و يهود بني القنيقاع اللي هم أصلا هربوا من القدس هربانين من الاضطهاد الروماني (حنشوف قصتهم بالتفاصيل بعدين). كل واحدة من القبائل دي كانت واخذة واحة و على طرف الارض الزراعيه فيه بيوتهم جنب بعضها مبنية من الحجارة و حوالين مجموعة البيوت بتاعة نفس القبيله سُوَر محاوط البيوت. العلاقات بين قبائل يثرِب دي كان فيها مشاكل. و ده شيئ متوقع. ليه؟ لان أكيد بيبقى فيه خلافات على حدود الارض الزراعيه و المياه. انت أخذت المية مني. لا انت واخد الارض دي مني. و هكذا. و بطبيعة الحال لما يبقى مفيش اختلاط كبير و كل قبيله قافلة على نفسها بسور فالمشاكل بتزيد. ده على فكرة عكس قريش اللي كانوا كلهم بيتجوزوا من بعض و بينهم علاقات تجارية و مصالح مشتركة كبيرة. 

علاقة عائله الرسول صلى الله عليه و سلم بيثرب أعمق شويه من المشهور. مثلاً جد الرسول عليه الصلاة و السلام عبد المطلب أتولد في يثرب. و كمان عبد الله والد الرسول مات فيها كمان زي ما شفنا في الحلقات اللي فاتت. و كمان والدة عبد المطلب (اللي هي تبقى ام جد الرسول) أصلا من يثرب و أنجبت ابنها عبد المطلب في يثرب. يعني فيه شويه جذور. لكن كلها علاقات قديمه. لذلك مش واضح قوي السبب ان السيدة آمنة تقرر انها تسيب مكة و تاخد قافلة عشان تروح يثرب. سفر مش سهل و معاها طفل عنده ٦ سنين و رايحة مكان ملهاش فيه عيلة مباشرة. 

محدش من المؤرخين عنده توثيق للسبب ورا ان السيدة آمنه تروح يثرب. لكن فيه اجتهادات عن الأسباب:

١- انها كانت مريضة و فكرت ان الخروج من مكه لمكان الجو فيه افضل ممكن مريح لصحتها. محتمل ان سبب عدم زواجها كمان هو مرضها. و ده بيؤكد تفسخ التقاليد في مجتمع مكة التجاري و ازدياد نظرتهم للمرأه انها سلعة. 

٢- ربما انها كانت عاوزة تزور مكان وفاة زوجها. 

٣- انها مكانتش على علاقه طيبة ببني هاشم عيلة الرسول و انها فعلاً كانت متضايقة انهم مش بيرعوها و يرعوا طفلها عكس التقاليد العربيه. و بالتالي قررت انها تروح مكان مش بتوحش البادية و صعوبتها لكن كمان مش بتوحش مكة التجاري ضد الضعيف. احنا نقدر نفكر في يثرب انها زي الريف دلوقتي. مجتمع زراعي معظم أهله بيشتغلوا بالزراعه. عكس الباديه اللي كانوا بيشتغلوا بالرعي و حياتهم كلها في خيام و حياة صعبة. و بالتالي صعب لسيدة من سيدات قريش انها تعيش في البادية في خيام و رعي. لكن ربما تقدر تعيش في مجتمع زراعي العلاقات و التقاليد فيه لسه محترمة لكن في نفس الوقت عايشين في بيوت من الحجارة و مستوى حياتهم افضل من البادية. 

٤- انها تزور أخوال الرسول محمد في يثرب او فرع العائلة من ام جد الرسول. و ربما انها تعيش معاهم او ربما مجرد زيارة مؤقتة و وبما انها كانت تطلب رعايتهم سواء بسبب خلاف مع بني هاشم. 

٥- او ممكن كل الأسباب دي مجتمعه. 

احنا نلاحظ كمان ازاي ان سيدة من سيدات قريش تقدر تاخد قرار زي دة و تروح لوحدها و تسافر من مكة ليثرب على ضهر جمل في سفر بيستغرق أسابيع. الأمور مكانتش بالطريقة اللي احنا فاكرنها. للاسف زي ما حنشوف احنا عندنا أفكار مش سليمه عن ازاي العرب سواء قبل او بعد الاسلام تعاملوا مع النساء. طبعاً كان فيه عادة وأد البنات بدأت في الصعود عشان الأب عاوز حد يساعده في التجارة او الزراعة او الرعي. لكن مكانتش منتشرة بالطريقه اللي الأفلام بتقول عنها و الا مكانش حيبقى فيه السيده خديجه او السيده آمنة مثلا. كان بعض الناس في مكة بتعملها. و الاسلام لذلك مش ضد العاده دي عشان الكل كان بيعملها. الاسلام ضدها حتى لو واحد بس عملها. هوه ده العدل. كمان نشوف قد ايه كانت  السيدة أمنة ليها رأي مستقل و تقدر تتحرك لوحدها في سفر طويل و ربما حتى بعد خلاف مع أهل زوجها المتوفي. الستات كان لهم شخصيات قويه و مستقله و حنشوف بعد الاسلام ان السيدة خديجه او السيده عائشة حتقوم بدور مهم جدا مش بس تربيه الأولاد لكن ادوار سياسيه و اقتصاديه مستقلة و قوية. اي تحجيم لدور الستات لا له علاقه بعادات العرب و لا الاسلام. له اكتر علاقه بوأد البنات مثلا. 

لأي سبب كان، آمنة اخدت الطفل محمد عليه الصلاه و السلام و عمره ٦ سنين و راحوا يثرب. لكن ما استقروش كتير هناك. بالعكس أمنة رجعت بعد شهر في نفس قافلة العودة. و ربما انها كانت متوقعة ان حيبقى فيه استقبال افضل او يبقى فيه مراعاه ان عيلة عبد المطلب ليها أصل في يثرب او حتى ان الجو في يثرب كان برضه حار و مقبض زي مكه. او ربما انها فعلاً كانت رايحه في زياره مؤقته. 

السيدة آمنه و معاها ابنها ذو الست سنوات لفوا و رجعوا على مكة. فيه منطقه اسمها الابواء و هي مكان توقف للقوافل في الطريق بين مكة و المدينة عشان الإبل و الناس المسافرة تاكل و تشرب. السيده آمنة مرضت و مقدرتش تكمل الرحلة و توفيت و دفنت في الابواء (انظر الخريطه). و رجع الطفل محمد عليه الصلاه والسلام لمكة على نفس القافله دون أمه. و بكده اصبح يتيم الأب و الام. 

في الحلقه الجايه ان شاء الله حنشوف حياته في مكة. 

المصادر:

١- الحلقات السابقة من صفحات منسية من حياة الرسول 

https://jawdablog.org/2017/10/14/forgotten_pages_of_prohets_life_03/

https://jawdablog.org/2017/10/07/forgotten_pages_of_prohets_life_02/

https://jawdablog.org/2017/09/30/forgotten_pages_of_prohets_life_01/

٢- سيره ابن هشام 

٣- المسلم الاول 

https://books.google.com/books/about/The_First_Muslim.html?id=8b2JDQAAQBAJ&printsec=frontcover&source=kp_read_button

One comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s