كاس العالم في الأرجنيتن سنه ٧٨

World_Cup_in_Argentina_1978

كاس العالم في الأرجنيتن سنه ٧٨ كان اول عهد كتير مننا بالفرجه على كاس عالم. ده المونديال بتاع جيل الخطيب و فاروق جعفر و حسن شحاته اللي اتغلبوا من تونس في تونس بعد لما كسبناهم في القاهره بتشجيع أسطوري من ضمنه ان محمد نوح غنى في ميكروفون أستاد القاهره مدد مدد شدي حيلك يا بلد. و ده خلى الفيفا يلغي التشجيع في الميكروفون. تونس راحت كاس العالم في الأرجنتين و لو انت من الجيل ده حتفتكر اننا شجعنا تونس اللي كسبت اول ماتش ليها مع المكسيك ٣-١. كاس العالم ده كان بتاع ماتش الأرجنتين ضد بيرو (بلبسهم الأبيض اللي فيه خط احمر) اللي الأرجنتين كسبت ٦-صفر! و شفنا فيه كيمبيس الارجنتيني بيجيب ٦ اجوان في كأس العالم. و شفنا التشجيع الارجنتيني الجنوني و هما بيقولوا “ارجنتينا ارجنتينا” و كانت اول مره في حياتنا نشوف ورق الكونفيتي بيترمي في الملعب بالكميات المهوله دي. و سهرنا طول الليل نتفرج على ماتش النهائي و هو بيتلعب ٣٠ دقيقه إضافي بعد التعادل ١-١ بين الأرجنتين و هولندا. و في الاخر الأرجنتين كسبت ٣-١. و ده كان برضه جيل باولو روسي في إيطاليا. و لو نفتكر مدرب الأرجنتين العقر جدا و اسمه سيزار لويس مينوتي. و كان في منتهى الهدوء و التركيز لحد لما الأرجنتين كسبت الكأس. 

اللي متعرفهوش عن كاس العالم ده ان لعيبه الأرجنتين مكانوش عاوزين يلعبوا احتجاجا على الانقلاب العسكري اللي حصل في الأرجنتين سنه ١٩٧٦ يعني قبلها بسنتين و الجيش شال فيه رئيسه الأرجنتين إيزابيل بيرون. و كان سيزار لويس مينوتي بيقول للعيبه انتم مش بتلعبوا عشان الجيش. انتم بتلعبوا عشان العمال في المصانع و المدرسين و الفلاحين في الارياف و عشان خباز العيش. كل دول عاوزين يفرحوا و يشوفوا الأرجنتين بتكسب. مصدر ١. 

اللي متعرفهوش ان الأرجنتين في خلال السنتين قبل كاس العالم اختفى فيها عشرات الالاف اختفاء قسري. و كان منهم ناس مسجونين في سجن اسمه سجن مدرسه ميكانيكا البحريه. السجن ده كان على مسافه اقل من ٢ كيلومتر من أستاد مونيمنتال اللي لعبت عليه الأرجنتين كل ماتشاتها في بوينس آيرس. المساجين كانوا بيسمعوا هتافات المشجعين في الاستاد. الأرجنتين كلها كانت عارفه ان المعتقلين كانوا جوه السجن ده. الجيش مكانش مخبي انه بيعتقل الناس و يقتلها. بالعكس كان عاوز ده يكون معروف عشان محدش يفتح بقه. مصدر ٢. 

محدش كان قادر يفتح بقه في الأرجنتين الا مجموعه صغيره من الستات امهات المعتقلين. كانوا كل اسبوع يعملوا مظاهره صغيره و سموا نفسهم امهات ميدان مايو. بلازا ديلا مايو. الناس حاولت تضغط على دول العالم انها متشاركش في كاس العالم عشان أيد عسكر الأرجنتين مختلطه بالدم. هولندا اترددت انها تروح لكن في الاخر راحت و ده كان الجيل الذهبي لهولندا. 

عمال و مهندسين الملعب اللي كانوا بيجهزوه لكأس العالم قعدوا يفكروا يعملوا ايه حركه احتجاجية ضد الجيش من غير ما يروحوا ورا الشمس. اتفقوا في الاخر انهم حيدهنوا الجزء الأسفل من قوائم المرمى باللون الأسود. لما سألوهم بعد كده ازاي الجيش مخدش باله. قالوا ان العسكر خدوا بالهم و سألوا ليه القائم اسود من تحت. قالولهم عشان دي التقاليد لما كاس العالم يتلعب في امريكا اللاتينية. و صدقوهم. يبدو برضه ٥٠٪‏ حتى هناك و حتى في الكوره. و كانت اخر مره يتلعب كاس عالم بشريط اسود على المرمى احتجاج. 

شعار كاس العالم ده كان أيدين حاضنه الكوره و دي كانت تحيه الرئيس خوان بيرون و اتعملت شعار الدوره. الجيش حاول انه يغيرها لكن الفيفا رفض. و اضطروا يقبلوها بس يقولوا دي مش أيدين بيرون دي أيدين الأرجنتين. 

الأرجنتين كسبت كاس العالم. بعدها ب ٤ سنين اقتصاد الأرجنتين انهار زي ما بيحصل تحت اي حكم عسكري. الجيش الارجنتيني حب يغسل مشاكله بانه يدخل حرب الفولكلاند ضد بريطانيا. كان معتمد ان امريكا حتقف مع الأرجنتين. الأرجنتين خسرت الحرب. و الجيش قدام فضيحه هزيمه عسكريه ضخمه و انهيار اقتصادي أتنازل عن الحكم و الديمقراطيه رجعت الأرجنتين. و أتحاكم الجنرالات دول كلهم. 

لذلك متتريقش على الأمهات اللي بينزلوا يعملوا مظاهرات صغيره في مصر. و ما تتريقش على اي مظهر احتجاج و لو صغير. بكره الثوره تكبره و كل المجرمين يتحاكموا. 

المصادر:

١- https://www.theguardian.com/football/in-bed-with-maradona/2017/jul/05/1978-world-cup-argentina-political-protest-goalposts

٢- https://www.britannica.com/event/Dirty-War

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s