رؤية حول أطراف الصراع في المنطقة

View_of_Conflict_parties_in_the_region

تغيرات العلاقه بين مصر و غزه أكيد كانت صادمه لناس كتير. ازاي غزه و فيها حماس/اخوان تقبل التعامل مع النظام المصري؟ و ازاي السيسي يقبل انه يخط أيده في أيد جماعه من الاخوان و فتحت السجون و يحاكم محمد مرسي بتهمه التخابر معها؟ الطرف الأولاني ارتاح لما قال انه حماس اعلم بشعابها بس يا ريت تاخدوا بالكم. و الطرف التاني قال السياسه نجاسه و السيسي مناور و احنا مالنا. وبعدين دخلت الكوره و نسيتنا الموضوع و لو مؤقتا. تعالوا نفهم شويه الأوضاع. 

في اي صراع في العالم لازم نفهم الاطراف المهمه جايه منين و عاوزه ايه قبل ما احنا ندخل في تفاصيل بعضها ممكن ميكونش مهم. 

الطرف الاول: السعوديه. و هي الطرف الخاسر في الحرب الأهليه السوريه. و كمان الطرف الخاسر في حرب اليمن. و السعوديين دلوقتي بيدوروا على اي مخرج من مستنقع اليمن. مصدر ١. اللي بمرور الوقت بقت تكلفته عاليه مش بس ماليا لكن كمان سمعه السعوديه الدوليه بقت تحت هجوم مستمر. السعوديه انفقت نصف الاحتياطي بتاعها في مغامرات محققتش اي حاجه. 

الطرف التاني: ايران. و هي الطرف المنتصر في الحرب الأهليه السوريه و كمان قدرت تورط السعوديه في حرب استنزاف في اليمن. كل الاطراف دلوقتي قبلت ان نظام بشار الأسد يستمر. الهدنه بين امريكا و روسيا في جنوب سوريا مستمره و فيها فصائل المقاومه صحيح واخده أماكن مهمه من سوريا لكن قاعده فيها من غير ما تحاول تتعرض لسيطره بشار في العاصمه. الحقيقه ان سوريا فعلا تم تقسيمها لكانتونات تابعه لفصائل مختلفه لكن كلهم دلوقتي مش معترضين على وجود بشار الأسد رئيس لسوريا و سيطرته على المدن السوريه الرئيسيه. 

الطرف التالت: تركيا. و هي صحيح انهزمت بسقوط نظام محمد مرسي في مصر و صحيح ان الانقلاب في تركيا، المدعوم من السعوديه و الإمارات و اسرائيل، كان على وشك كسر نظام اردوغان لكن تركيا استعادت حيويتها و سيطرت على شريطين الارض في تركيا من أدلب لحد الباب (انظر الخريطه) و بالتالي بكده منعت تماما اقامه اي دوله كرديه على الارض السوريه. و ده اللي قاله اردوغان مؤخرا لما قال ان تركيا عارفه ان فيه محاولات لاقامه دوله كرديه جنوب تركيا و ان تركيا لن تسمح بذلك. مصدر ٢. 

الطرف الرابع: اسرائيل و الإمارات. و دول هدفهم القضاء على اي نظام و لو حتى فيه مسحه اسلاميه (نجحوا في مصر و فشلوا في تركيا و قطر) و التخلص من النظام الإيراني و إجباره على التخلى عن التكنولوجيا النوويه و هي التهديد الأهم لأمن اسرائيل. 

ايران و تركيا في البدايه استخفوا باستفتاء استقلال كردستان العراق و افتكروه مناوره عاديه من مسعود برازاني بالذات ان برازاني تعاون مع تركيا بشكل كامل ضد تنظيم الدوله الاسلاميه و سمح لتركيا بإقامة قاعده عسكريه. لكن شكوك ايران و تركيا زادت جدا مع دخول اسرائيل على الخط. و حصلت ٤ حاجات كلنا مخدناش بالنا منهم:

١- اردوغان بشكل واضح قال لاكراد العراق ان اسرائيل مش حتنفعكم و انا ممكن احاصركم تماما. و بعدها توجه لزياره ايران. رئيس اركان الجيش الإيراني و التركي زاروا بعض كمان. 

٢- ترامب يهدد انه يلغي الاتفاق النووي مع ايران. 

٣- الجيش التركي يجهز لدخول أدلب شمال سوريا بعد تفاهمات اردوغان – بوتين. 

٤- حسن نصر الله يطلع في تحذيرات واضحه انه اسرائيل عاوزه حرب في المنطقه و انه لو حصل حرب اسرائيل حتواجه قصف مشافتوش قبل كده و نصح الاسرائليين انهم او حصل حرب يسيبوا اسرائيل. مصدر ٣. 

في نفس الوقت سلمان زار روسيا و هو الحقيقه اعلان هزيمه السعوديه و خروجها على الأقل مؤقتا من الصراع و الهدف هو تثبيت محمد بن سلمان بأي شكل. و ده نفس ما يؤكده تذلل السعوديه للعراق و ايران دلوقتي و انها بقت طير مدبوح. 

لذلك قدامنا ان السعوديه فقدت كل اوراقها في المنطقه و بالتالي معندهاش مانع انها تستعيد ورقه حماس. لانه لو طارت ورقه حماس فهي بالتأكيد رايحه اما تركيا او ايران او الاتنين معا و الاتنين بقى بينهم دلوقتي تنسيق على اعلى المستويات. 

و كمان قدامنا ان حماس شايفه ان الكبار (تركيا و ايران و اسرائيل) على وسك انهم يدخلوا قصاد بعض من غير مواربه. ايران بشكل واضح بتهدد اسرائيل ان إلغاء الاتفاق النووي معناه الحرب و ان التصويت الكردي عمليه إسرائيليه امريكيه زي ما حسن نصر الله قال. كلام واضح. تركيا شايفه ان اسرائيل بتهدد أمنها القومي و بالتالي بتثبت مركزها في شمال سوريا عشان متحصلش اي خلخله في جنوب تركيا تستغلها اسرائيل. كلام واضح مبقاش فيه مواربه و لا اتهام لدول تانيه. كلام موجه بشكل كامل و العلاقات بين تركيا و امربكا عماله تسوء باستمرار مع تعليق منح التأشيرات بين الدولتين. 

و بالتالي لو الكبار داخلين في حرب او انه على الأقل المنطقه قربت على صراع واضح بين الكبار يبقى مفيش مانع ان حماس تشتري وقت و يمكن في الوقت ده يحصل تحسن حقيقي للاوضاع في غزه و يبقى برضه مكسب. 

مصر في الناحيه التانيه طرف مش من الاطراف الرئيسيه في المنطقه. الحقيقه هي امتداد للسياسه السعوديه و الاماراتية و الاسرائيليه في المنطقه. و اسرائيل و الإمارات (و هم في الحقيقه طرف واحد) شايفين انه مفيش مانع لو حماس تتنازل شويه عن الحكم و انها تبعد عن ايران. كل ده من المصلحه لانه لو غزه وقعت في المجال الإيراني التركي التعامل معاها حيحتاج قوه مسلحه و مين عالم الوضع يبقى ايه. و هو أساسا اسرائيل كانت معارضه الحصار المصري الشديد على غزه و شايفه انه مالوش لزمه بالشكل ده. اذا قليل من الفتح في غزهعلى الأقل تبعد عن ايران و تركيا و ربما يحصل فعلا و حماس تتهبل و تسلم سلاحها و يبقى المشكله خلصت. و ايران و تركيا فاهمين و عارفين ان اللي في القلب في القلب. مفيش مانع حماس تناور شويه لحد ما نشوف الأمور رايحه فين. و مصر و إعلاميوها زي ما احنا عارفين ميقدروش يقولوا للسعوديه لا. 

فهمنا شويه. 

المصادر:

١- محاوله السعوديه الخروج من اليمن 

http://www.independent.co.uk/news/world/middle-east/saudi-arabia-crown-prince-yemen-war-end-leaked-emails-mohammed-bin-salman-defence-minister-a7893131.html

٢- تصريحات اردوغان عن دوله كرديه في سوريا 

http://m.jpost.com/Breaking-News/Erdogan-says-Turkey-working-with-Syria-rebels-to-implement-Idlib-accord-506949

٣- تصريحات حسن نصر الله 

https://www.timesofisrael.com/topic/hassan-nasrallah/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s