هل انت نازي؟ اختبر نفسك

Test_yourself_Are_you_Nazi

كتير من المصريين مؤمنون بالمعتقدات التاليه. لو انت مؤمن بيهم يبقى عندك ميول نازيه:

١- الاعتقاد ان فعلا الجنس الآري جنس متفوق. 

و ده اعتقاد عجيب جدا انه يبقى عند مصري مسلم او مسيحي. لانه تسليم بتفوق جنس مختلف. معنى كده انه استعباد السود مثلا مش مشكله بالمخالفة للدين الاسلامي. اللطيف ان الحقائق العلميه بتقول غير كده. يعني البشر كلهم مشتركين في ٩٩٪‏ من الجينات. الأهم ان امريكا و جنودها بعضهم من السود و اغلبهم طليان او أنجلو ساكسون و الاتحاد السوفيتي و هم سلاف و بالنسبه للاريين هم الأحقر، مش بس كسبوا ألمانيا في الحرب. لا. دول خلصوا عليها تماما. 

٢- الاعتقاد ان هتلر كان لسبب غامض سيتعامل بشكل لطيف مع العرب

و هو اعتقاد عجيب لا اساس له. كل ما في الامر ان هتلر كان يحاول تهييج الشعوب العربيه ضد بريطانيا للوصول لمنابع البترول و قناه السويس. و الموضوع لقى صدى عند المصريين (و منهم انور السادات نفسه) للتخلص من الإنجليز المكروهين. إنما في الحقيقه العرب و اليهود بالنسبه للاريين ينتمون لذات الاجناس الحقيره. و بعدين منذ متى يتعامل المحتل مع الشعوب بشكل رقيق؟ و هل الحل هو استبداد الاحتلال باحتلال اخر؟ و لكن كانت الصيحه وقتها الى الامام يا روميل. و وصل البعض لحد ان هتلر اعتنق الاسلام و اصبح الحاج هتلر! يا للعجب على التأليف! 

٣- الاعتقاد ان افضل الحكام عن من يحكم بالحديد و النار!

مع ان كل من حكم بالحديد و النار انتهى به الامر لإفلاس و هلاك شعبه. محمد علي. عبد الناصر. ماو تسي تونج. ستالين. هتلر. الخ. كلهم. لماذا نستعذب القتل و الدمار؟ هل حكم الخلفاء الراشدون بالحديد و النار؟ هل حكم عمر بن الخطاب بانه كان يقتل الناس عمال على بطال؟ ما هذا الهراء و كيف أصبحنا مرضى لهذا الحد؟ 

٤- الاعتقاد ان ذبح اليهود على يد هتلر امر مقبول. 

بالرغم انه يتخالف تماما مع الشريعه الاسلاميه. فاليهود لم يحاربوا ألمانيا. ما ذنب طفله مثل ان فرانك ان تموت في معتقل ألماني فقط لانها يهوديه دون جرم؟ هل هذا من شرع الله؟ و اذا كان ذلك مقبولا لماذا نبكي إذن عندما يقتل مسلمون في الغرب؟ 

٥- الدخول في معركه عدد اليهود الذين ماتوا في الهولوكست 

و هي معركه ليس لنا فيها ناقه و لا جمل. من الناحيه الدينيه و لو حتى قتلت نفس واحده دون سبب فكأنما قتل الناس جميعا. و من الناحيه السياسيه نبدو امام العالم اننا غير مهتمين بالنفس البشرية و بالتالي نستحق ما يحدث لنا. بينما الحقيقه اننا نتضرر من جريمه هتلر و ما أعقبها من جرائم يرتكبها اليهود ذاتهم في حق اهلنا في فلسطين و غيرها. 

٦- الاعتقاد انه الضرب و القتل طالما لا يراه احد و لا يعاقب عليه احد هو امر مقبول. و ان خصمك ليس له ايه حقوق. 

انا حاوريك. قابلني بره. اداله علقه. واد فظيع. دكر. خلص عليهم. أحسن. كلها أمور موجوده و مستخدمه و لا مثيل لها الحقيقه في المجتمعات المتحضره. 

الاخوان خلصنا عليهم في رابعه. الف واحد ماتوا. تسلم الايادي. ده دكر. 

٧- تعذيب الانسان و الحيوان امر ممكن و مقبول. مثلا مش عيب ان الضابط يضرب سواق التوكتوك طالما حيربيه انه ما يتطاوش على اسياده. مش غلط ضرب الحرامي و تعذيبه عشان يعترف. البت الشغاله اخدت علقه عشان اتاخرت. حط السم للقطط و الكلاب. مش مهم يتعذبوا طالما حتخلص منهم. المهم انا انا انا فوق الجميع. 

٨- الضرب في المدارس و البيت تربيه زمان و مفيش أحسن منها. 

بالرغم ان كل الدراسات العلميه ترفض ذلك لانها تَخَلَّق شخصيات مشوهه. 

٩- مش مهم نص الشعب يموت او حتى اكتر عشان البقيه يعيشوا كويس. البلد دي نص شعبها عاوز اباده. 

مع ان الهدف الاسمى للدين هو الحياه! امال نعبد ربما ازاي؟

١٠- اختراع قصص عن نهايه العالم فيها ألمانيا و هتلر و اليهود و الاسلام في اختراعات و افتكاسات تأخذ بعضا من الدين و تحوره بما ليس فيه و تصبح قصص تدخل عقول الأطفال. 

لو انت تعتقد في ٨-١٠ من المعتقدات أعلاه فأنت نازي و يجب ان تعالج. 

لو انت تعتقد في ٤-٧ من أعلاه فلديك اتجاهات نازيه. و يجب ان تثقف نفسك و ننصحك بقراءه كتاب ويليام شايرار في مصدر ١. 

لو انت تعتقد في ١-٣ من أعلاه فلديك ميول نازيه و لكنها طفيفه جدا مقارنه بالغالبية العظمى من المصريين. 

لو انت لا تعتقد في اي من تلك المعتقدات فمبروك. ربما تكون الوحيد في مصر. 

و نريد ان نعرف نسبكم. شاركونا. 

المصادر

١- صعود و هبوط الرايخ الثالث

The Rise and Fall of the Third Reich by William Shirer

https://itunes.apple.com/us/book/the-rise-and-fall-of-the-third-reich/id507396608?mt=11

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s