استخرج المشاكل في التويته؟

What_is_wrong_with_this_tweet

خلف احمد الحبتور هو ملياردير اماراتي تخصصه انشاء و اداره الفنادق فمثلا يمتلك فندق سان ريجيس دبي و ويستين دبي. خلف بعث تويته تعزيه للسيسي (اولا) و الشعب المصري (ثانيا) في حادثه القطار الاخيره. ثم أعقبها مباشره بالرد على تويته التعزيه كاتبا:

“تسليم اداره القطاعات العامه في مصر كالسكك الحديديه و المطارات و الفنادق و المشافي لشركات خاصه مثل الدول الغربيه من مصلحه شعبها” 

استخرج المشاكل في التويته. أدي بعض من المشاكل اللي احنا طلعناها:

١- في تقاليدنا و تقاليد العروبه ان اللي ييجي في العزاء ميجيش في نفس اللحظه بيدور على مصلحه و انه يورث القتيل. 

٣- كلام الحبتور خاطئ تماما. مثلا السكك الحديديه في امريكا و هي معقل الغرب و اكثر دوله راسمالية. نظن مفيش رأسمالية اكتر من امريكا. السكك الحديديه في امريكا مقسومه لنوعين. نوع هو نقل البضائع و ده مملوك لشركات خاصه. و نوع هو لنقل الركاب و تديره شركه امتراك Amtrak و هي شركه مملوكه بالكامل للحكومه الامريكيه. قطاع عام يعني. طيب ليه الامريكان عملوا كده؟ لان البضائع ملهاش حقوق. الشركه صاحبه القطار قطاع خاص و حتاخد ربح من شركه تانيه عاوزه تنقل البضائع. في الأغلب شركات الفحم او البترول او القمح او الكيماويات اللي عاوزه تنقل البضاعه و حتدفع ربح لشركه القطار الخاصه. المشكله هي في نقل الركاب مينفعش بسهوله في بلد زي امريكا تعمله شركه خاصه. ليه؟ لان لو عملته شركه خاصه الشركه دي حتركز بس على الأماكن اللي ممكن تعمل منها أقصى ربح. طبيعي. و الأماكن دي في امريكا اتنين بس. خط الشمال الشرقي في امريكا بين واشنطن و نيويورك و بوسطن. و خط كاليفورنيا بين لوس انجيليس و سان فرانسيسكو. المناطق دي فيها كثافه سكانيه عاليه جدا ومستوى دخل مرتفع و مرور مزدحم و مطارات مزدحمة جدا و بالتالي النقل بالقطار عليه إقبال شديد و زبون حيدفع كتير. بقيه امريكا محدش حيهتم بيها. بقيه امريكا دي قاره بحالها. معنى كده انا لو راكب في كانساس سيتي بولايه ميزوري في منتصف امريكا و عاوز اركب القطر اروح نيويورك مش حينفع لان العدد محدود جدا و ميستاهلش قطر بحاله يروح لهم. لكن ده مواطن أمريكي و عنده حقوق. غير البضاعه اللي معندهاش حقوق. و بالتالي شركه أمتراك مملوكه للحكومه الامريكيه. مصدر ١. و مش بس كده. لان أمتراك مضطرة بالقانون تمشي قطارات في كل امريكا بأسعار مخفضه (غير قطارات الشاطئ الشمالي الشرقي و كاليفورنيا) فهي بتخسر و الحكومه بتدعمها بحوالي ١,٥ مليار دولار كل سنه. مصدر ٢. 

بالمناسبه بريطانيا فعلا خصخصت القطارات عندها و هي الاقتصاد الرئيسي الوحيد في العالم اللي عمل كده. و الموضوع ده في كل انتخابات مثار جدال كبير خصوصا ان ناس كتير بتقول ان الحوادث زادت من ساعه الخصخصه. لكن بريطانيا ممكن تعمل خصخصه للسكك الحديديه اسهل من امريكا او حتى ألمانيا. ليه؟ لان بريطانيا كلها مشابهه جدا في كثافه السكان للشاطئ الشمالي الشرقي في امريكا. عباره عن مناطق متتالية من مدن كبيره جدا و متوسطات الدخل بينهم متقاربة باستثناء المناطق الشمالية من اسكوتلندا. و بالتالي تسيير القطارات في بريطانيا كلها عمليه بصفه عامه مربحه و ممكنه. مع ملاحظه ان عمليه تمويل اداره خطوط السكك الحديديه في بريطانيا عمليه معقده و فيها قوانين كثيره تشمل من يدير الخط و من يدير نظام الأمان و من يدير القطار و من يدير الصيانه. مصدر ٣. 

مصر من الصعب انك تخصخص خدمه القطارات فيها. لان شركه القطار دي حتعمل قطر ممتاز بين القاهره و اسكندريه و اخر سياحي بين القاهره و الأقصر و خلاص. بقيه الناس تموت مش مهم. طبعا ممكن انك تبيع حق تسيير قطار من القاهره لإسكندرية مثلا لشركه خاصه في مقابل استخدام العايد انك تحطه في تطوير السلامه لقطارات الغلابه. لكن السؤال هوه مش ده اللي حاصل دلوقتي المفروض و الا تمن تذاكر الدرجه الاولى لخط اسكندريه بيروح فين؟ السؤال بيروح في الفساد و مرتبات الجيش. طيب لو أدينا الرخصه لشركه خاصه ما العايد برضه حيروح في نفس ذات الفساد و مرتبات الجيش. اذا مش ده الحل. 

احنا ممكن نكتب كلام كتير عن ان المطارات في امريكا يملكها حكومات المدن و الولايات و ان اكبر نظم المستشفيات في امريكا تابعه للجامعات و للمشروعات الخيريه. 

لكن الحقيقه ان الحبتور مش فاهم هوه أساسا بيتكلم عن ايه. و هو بيدعي عن الغرب ما لا يعلم و بيفتي و بيتشطر على المصريين لأنه فاكرهم كلهم سيسي. 

شيئ مؤسف انه بتاع فنادق و تسويق سياحه فندقيه للعرب الساعين لكل ما هو غير مسموح به في بلادهم الاصليه عنده، بيدينا محاضرات عن اداره السكك الحديديه. لكن اللي يلاقي السيسي و ميتمنظرش لازم نلومه. و السبوبه حلوه. 

٣- الراجل مقلش “خصخصه”. الراجل بيقول “تسليم”. Handover. و الله العظيم شيئ مخجل. فاكر ان مصر عجل و وقع فكترت سكاكينه. عاوز ياخذها تسليم. مش كمان انه يدفع فلوس في مقابل عمليه خصخصه محترمه او حتى غير محترمه. 

٤- قبل خصخصه الخدمات، المفروض نخصخص القطاعات الصناعية الخاسره. الحديد و الصلب. النسيج. الخ. دي كلها قطاعات ستستفيد من الخصخصه بضخ استثمارات جديده. و لكن الحبتور و الإمارات مش عاوزين تصنيع في مصر. هم عاوزين مصر تبقى اقتصاد خدمي ريعي. عاوزين يحلبوا المواطن الغلبان اللي مضطر يركب قطر. مفيش طريق تاني. و يدفع الفلوس للامارات. مصدر دخل مضمون جدا أحسن من اي بترول. و تسعين مليون يركبوا قطارات لو كل واحد دفع مائه جنيه في السنه بنتكلم في ٤ مليار دولار. مكسبهم يمكن اتنين مليار دولار. يدخلوا للحبتور احلى من اي هوتيل في دبي ممكن يقف لو حصلت حرب في الشرق الاوسط. لكن لو حصلت قنبله نوويه المصريين حيفضلوا يطلبوا الخدمات دي. 

٥- كثير قالوله ملكش دعوه. الحقيقه دي مش مشكلتنا اطلاقا لان من حق اي حد يقول اي حاجه عن اي بلد. 

مصر بتتسلم مش بتتباع. مرحله البيع دي قديمه قوي. 

و قال كانوا بيقولوا مرسي حيبيعها لقطر. كل حاجه قالوها عليه كانوا مبيتين انهم يعملوها. ميقدروش يصدقوا انه فيه نضاف في العالم. 

المصادر:

١- شركه أمتراك 

http://www.allgov.com/departments/independent-agencies/national-railroad-passenger-corporation-amtrak?agencyid=7344

٢- دعم أمتراك 

http://thehill.com/policy/transportation/269711-amtrak-requests-18b-for-2017-fiscal-year

٣- السكك الحديديه في بريطانيا 

http://www.independent.co.uk/news/uk/home-news/britains-railways-doing-well-despite-privatisation-a6843966.html

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s