بالراحه والهداوه كده..ليه كوارث القطارات بتتكرر؟… بقلم ياسر نجم

Train_crashes_in_Egypt

طبقاً لآخر الإحصائيات الرسمية..مصر بيحصل فيها 722 حادث قطار سنوياً..

يعنى فيه حادث قطار كل 12 ساعة..أو حادثين يومياً..

لكن اللى احنا بنسمع عنها هي “الكوارث” بس..يعنى الحوادث الكبيرة..اللى بيموت فيها العشرات..

.

فى كل مرة بتحصل كارثة قطار…وسائل الإعلام بتستضيف الخبراء والمختصين..علشان يحللوا الأسباب..

والأسباب كلها بتدور فى محيط “الفلوس”…

مافيش فلوس..

ماعنديش أديك..

مش قادر..مش مش عايز..مش قادر أديك..

.

مثلا: 

– التشغيل بالنظام الميكانيكى اللى بيعتمد على العنصر البشري..بينما العالم كله بيشغل نظام اليكتروني أوتوماتيك..وده محتاج فلوس..

– نظم السلامة الحديثة محتاجه فلوس..

– العربات متهالكة..وتغييرها وصيانتها محتاجه فلوس..

– 1400 مزلقان محتاجين تطوير وصيانة..ودول بفلوس..

– السواقين والعمال محتاجين تدريب ورعاية صحية ورفع مستوى المعيشة وتعيين أعداد جديدة..وكل ده محتاج فلوس..

________________________

الحسبة طبقاً للخبراء = 70 مليار جنيه..

ب70 مليار جنيه..تبقى عندنا سكة حديد آمنة..على مستوى عالمي..

………………………………………..

طب السيسي بيديهم كام من ال70 مليار ؟

ده تصريح لرئيس هيئة السكك الحديدية..من 3 شهور بيقول فيه انه طلب 10 مليار ميزانية سنوية..علشان يمشى بيهم حاله..

مش ال70 مليار المطلوبين للقضاء على كوارث السكك الحديدية..ده طلب بس 10 مليار علشان مستوى الكوارث يفضل زى ما هو..مايتدهورش..

ادوا له كام ؟ 

3 مليار ونص..

🙂

http://bit.ly/2w0kuAj

شفتوا مين المسئول الأول عن كوارث السكة الحديد..؟

مش السواق اللى بيحشش..

ولا العامل المهمل..

ولا مهندس الصيانة المستهتر..

ولا الجاموسة اللى بتعدى المزلقان..

المسئول هو اللى لسه معتمد على كل دول..فى عالم السكك الحديدية بتدار فيه بالأقمار الصناعية..

المسئول هو اللى مابيدربش دول..ومابيرعاهمش صحياً..ومابيوفرلهمش حياة كريمة..وأداء مهني محترف..

وإذا كان حد فيهم مش نافع رغم التدريب والرعاية والأجر الكريم..تبقى برضه مسئوليتك انك تعزله من عمل يرتبط بأرواح وسلامة الناس..

لما وزير النقل اللى انت معينه علشان يبقى مسئول عن المنظومة دي..يسيب ده كله ويصرح رسمياً من أسبوعين ان 80% من حوادث القطارات سببها المساجد اللى فى المحطات..تبقى الكارثة فى مين ؟

http://bit.ly/2uyK53L

__________________________________________

طيب مش يمكن الدولة فعلا مافيهاش فلوس..

ومافيش..ومامعيش..واحنا فقرا أوي..

وأنا مش مش عايز..أنا مش قادر ؟

السيسي قال انه عايز يصرف على السكة الحديد..بس التمويل عنده لازم يكون من جيب المواطن..برفع أسعار التذاكر..

_________________________________________

مش هانتكلم عن ال64 مليار جنيه اللى السيسي رماهم فى ترعة القناة..

ولا ال80 مليار اللى رماهم فى سلاح مش هايستخدمه..

ولا تبرعات الخليج ولا ولا ولا..

لأن الكلام ده اتقال واتعاد بدل المرة 100…

…………………

لأ..

هانتكلم فى حسبة أخرى..الدول اللى سابقانا بقرون حلت بيها معادلة التمويل بين الدولة أو شبه الدولة من جهة والمواطنين من جهة أخرى..

المعادلة دى تنطبق على أى دولة سواء فقيرة او غنية..

قالوا لك ايه ؟

قالوا ان الأمن والسلامة على الدولة..البنية التحتية على الدولة..

والخدمات على المواطن..

يعنى حضرتك كدولة ملزم توفر الامن والسلامة لمواطنيك..ملزم توفر البنية التحتية اللازمة للخدمات..

مافيش مواطن بيدفع من التذاكر تمن أمن وسلامة ولا تمن بنية تحتية..

يتكلفوا 50 مليار..70 مليار..100 مليار..دول على الدولة..والمواطن مايدفعش فيهم مليم..

المواطن بقى عايز خدمة مكيفة..أكل وشرب..كراسي مريحة..قطارات سريعة..انترنت فى القطر..أفلام فى القطر..غلى التذاكر علشان كل ده زى ما انت عايز..

.

مش بس كده..

قالوا: ان المواطنين المفروض يدفعوا 15% من دخلهم فى المواصلات..

وبما ان دخل الأسرة المصرية المتوسط طبقاً للجهاز المركزى للإحصاء = 3000 جنيه شهريا..

فحضرتك مجموع اللى الأسرة المصرية تصرفه على المواصلات المفروض يبقى فى حدود 450 جنيه شهرياً..

بنزين..أوتوبيسات..قطارات..ميكروباصات..لأفراد الأسرة مجتمعين المفروض يبقى 450 جنيه..

كده المواطنين يبقوا عملوا اللى عليهم وزياده…

.____________________________________

انت بقى عملت اللى عليك…؟

طبقاً للدراسات العلمية المتخصصة..زى الاتنين دول..

http://bit.ly/2vwGxMD

http://bit.ly/2uQt8NP

حوادث القطارات بتقل كلما زاد انفاقك على البنية التحتية والامن والسلامة..

والفقر مش حجة..

لأنهم ربطوا الإنفاق بنسبة من الناتج القومي..

فيه دول زى الصين بتصرف 1.25% من الناتج القومى..

الهند بتصرف 0.5% من الناتج القومى..

_________________________________

طيب الناتج القومى المصري كام ؟

6 تريليون جنيه…

يبقى السكة الحديد تستحق منهم: 

30 مليار جنيه سنويا علشان تبقى زى الهند..

و75 مليار جنيه سنويا علشان تبقى زى الصين..

وانت رئيس هيئة السكك الحديدية متشحتف على 10 مليار..بتديه منهم 3.5..

واحنا هنا بنتكلم على 70 مليار جنيه مرة واحده بس مش كل سنة…علشان تحفظ نزيف أرواح وثروات المصريين..

………………………………..

المصيبة مش فى السواق اللى بيحشش ولا الجاموسه اللى بتعدى المزلقان..

المصيبة انك مش عايز…مش مش قادر..

انت مش عايز تسيب المصريين يصرفوا من فلوسهم (فلوسهم مش فلوسك بالمناسبة)..علشان يبقوا بنى آدمين زى باقى البشر فى العالم كله اللى بيتنقلوا فى حياتهم اليومية وهم آمنين على حياتهم والأسر اللى مستقبلها متشعلق فى رجوعهم لبيوتهم بسلام..

هى دى حرب المصريين الحقيقية علشان يحققوا أمنهم وسلامتهم..مش أى حرب تانيه..

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s