انشغلنا بشورت الوليد بن طلال

Talal_and_the_minister.jpg

انشغلنا بالشورت و ان الوزيره رايحه تقابل الوليد بن طلال في مركبه و نسينا قصه الوليد بن طلال مع الاستثمار في مصر. ابن طلال لو نفتكر “اشترى” ١٠٠ الف فدان في مشروع توشكى و دفع في كل فدان ٥٠ جنيه مصري فقط لا غير مقابل ان مصر توصله المياه و الكهربا و الخدمات! فاكرين الموضوع ده. طبعا بصرف النظر ان مشروع توشكى فاشل هندسيا. مصدر ١. 

في ١٢ ابريل ٢٠١١ بعد الثوره المصريه الوليد بن طلال صرح للصحافه العالميه انه مش حيتنازل أبدا عن حقه و حق شركته في امتلاك الارض في توشكى و انه معندوش اي نيه للتنازل عن الارض. مصدر ٢. ده كان في الوقت اللي كان فيه مطلب شعبي ضاغط على الحكومه بتاعه عصام شرف و المجلس العسكري وقتها ان الصفقات دي صفقات مشبوهه و لازم أعاده النظر فيها. 

في ٢٠ ابريل ٢٠١١ ظهرت الأهرام القاهريه برضه بخبر زياره عصام شرف للرياض و انه قابل فيها الوليد بن طلال و وقعوا مذكره تفاهم memorandum of understanding (يعني مش عقد ملزم لسه) و انه بموجبها الوليد بيتنازل عن معظم أراضي توشكي. مصدر ٣. 

في يوم ٢٥ ابريل (عيد سينا) ٢٠١١ ظهرت مجله فوربس الامريكيه بخبر يؤكد ان الوليد تنازل عن معظم الارض في توشكى. مصدر ٤. 

في يونيو ٢٠١١ و مع اشتداد الضغوط الشعبيه وقع الوليد عقد رسمي مع وزير الزراعه و رئيس الوزرا عصام شرف يتنازل بموجبه عن ٧٥ الف فدان لمصر و انه يخلي ٢٥ الف فدان يزرعها و يوصل لها البنيه التحتيه على حسابه. مصدر ٥. 

الموضوع بعدها سكت و لا حس و لا خبر لحد فجأه في ٢ أكتوبر ٢٠١٣ ظهر بيان على الموقع الرسمي ان صاحب السمو الملكي الامير الوليد بن طلال استقبل فريد ابو حديد وزير الزراعه المصري اللي أطلعه (الوزير اطلع الوليد) على تطورات الأوضاع السياسيه في مصر و ان الوليد اطمئن على احكام عدلي منصور و المشير عبد الفتاح السيسي على سيطرتهم على كامل الاراضي المصريه! (المفروض مقابله عن الاستثمار!)

لو تقرأ البيان (مصدر ٦) حتلاقي ان “الوزير فريد ابو حديد بدأ اللقاء بشكر صاحب السمو الملكي على أتاحه الفرصه له للقاء الامير”. و كمان حتلاقي في البيان انهم “ناقشوا ملكيه الوليد بن طلال ل ٢٥ الف فدان في توشكى”. و طبعا انتهى البيان بتعداد استثمارات الوليد في مصر (فنادق الفور سيزونس و سلسله كافيهات و روتانا – و كلها استثمارات استهلاكية لا تنتج و لا تصنع و لا تزرع و هو جزء مهم من خطه الخليج للتعامل مع مصر كي تبقى سوق استهلاكي كبير في الفناء الخلفي لدول الخليج. مصدر ٧). 

في ديسمبر ٢٠١٥ الوليد قابل السيسي و أعلن بعدها انه حيتبرع لمصر بمساحه ١٠ آلاف فدان في توشكى قدر هو قيمتها ب ٧٠٠ مليون جنيه كتبرع “لتحسين ظروف معيشه المواطن المصري”. يعني من اننا طالبين استثمارات و بنسترجع حقوقنا في ٢٠١١ لأننا بقينا شحاتين مستنيين العطف السامي في ٢٠١٥. 

المصيبه انه قدر تمن الفدان ب ٧٠ الف جنيه. نفس الفدان اللي هوه اشتراه بخمسين جنيه. و يقولك انه اتبرع بالأرض اللي قيمتها ٧٠٠ مليون جنيه لمصر! ده يخرب بيت كده فعلا. و مش بس كده أكيد انه استخدم التبرع ده انه يقلل الضرايب اللي بيدفعها عن ممتلكاته في امريكا و بالتالي من مصلحته تضخيم حجم التبرع. و لو فعلل مقدر تمن الفدان ب ٧٠ الف جنيه يبقى طبعا اللي باع بخمسين كان حرامي. و كله تقليل للضرائب يَصْب في مصلحه الوليد و ال سعود. و ممكن جدا قيمه تقليل الضرايب عن الوليد اعلى من اللي دفعه أساسا في الارض بكتير. 

يعني مش بس اننا بنتحلب. لا كمان بنتعامل اننا شحاتين. 

شوفتوا الفرق بين ايّام الثوره و ايّام الشحاته؟ أهي الشحاته و الركوع ده هو اللي السعوديه و الخليج عاوزه. 

المصادر

١- تحليل جوده لمشروع توشكى 

https://jawdablog.org/2015/01/02/mistakes_in_toshki_repeated/

https://jawdablog.org/2014/12/30/leave_the_sinai_desert_or_reconstruction/

٢- تصريحات ابن طلال في ١٢ ابريل ٢٠١١

http://english.ahram.org.eg/NewsContent/3/12/9846/Business/Economy/Saudi-prince-denies-he-will-give-up-contested-land.aspx

٣- مذكره التفاهم بين مصر و الوليد 

http://english.ahram.org.eg/NewsContent/3/12/10457/Business/Economy/Egyptian-government-and-Saudi-prince-reach-agreeme.aspx

٤- فوربس توكد تنازل الوليد عن معظم ارض توشكى 

https://www.forbes.com/sites/kerryadolan/2011/04/25/saudi-prince-alwaleed-gives-up-most-of-disputed-egypt-land/amp/

٥- مراسم توقيع عقد تنازل الوليد عن معظم ارض توشكى 

https://www.forbes.com/sites/kerryadolan/2011/06/08/saudi-billionaire-alwaleed-signs-deal-to-hand-land-back-to-egypt/#d0f7247a663e

٦- لقاء بعد الانقلاب 

http://www.kingdom.com.sa/prince-alwaleed-meets-with-egyptian-minister-of-agriculture-hrh-egyptian-minister-of-agriculture-discuss-toshka

٧- ماذا يريد الخليج من مصر

https://jawdablog.org/2015/06/23/ماذا-تريد-السعوديه-من-مصر؟-تعالوا-نتكل/

٨- لقاء وليد و السيسي

http://www.alwaleed.com.sa/news-and-media/news/alwaleed-philanthropies-prince-alwaleed-grant-egp-1-5-billion-to-build-10000-housing-units-contribute-10000-acres-to-egyptian-ns/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s