احنا ليه بنقلش كتير و هل التقليش ليه تأثير؟

Why_Egyptians_like_sarcasmjpg

“متضاده القلش”

Satire Paradox

ادخل على اي صفحه فيسبوك لأي مصري حتلاقي كتير من البوستات هي ما يطلق عليه القلش. او التريقه يعني باللغة المصريه القديمه. المصريون معروف عنهم مثلا او بيحبوا يقولوا عن نفسهم انهم ولاد نكته او دمهم خفيف. احنا في جوده ممكن نكتب بوست في منتهى الجديه لكن نلاقي عشرات الناس داخله تقلش سواء متفقه معانا او مختلفه. كتير من المصريين متخيلين نفسهم عادل امام في مدرسه المشاغبين. لدرجه انه صعب جدا ينشأ حوار جاد حوالين اي شيئ. بلد كلها بتقلش. كلها عايشه في مسرحيه كوميديه. أنصار الشرعيه بيقلشوا و السيساويه كمان. لكن السؤال هل التقليش ده مفيد؟ 

مصر مش البلد الوحيدة اللي بتتريق على احوالها السياسيه. مهما تخيل المصريين انهم اكثر شعب في العالم خفه دم هم في الحقيقه مش لوحدهم. تينا في Tina Fey كوميديانه امريكيه ربما هي اهم كوميديانه في العالم دلوقتي. تينا اتريقت على ساره بيلين مرشحه نائب الرئيس الامريكي في انتخابات ٢٠١٢ بشكل امريكا كله اتكلمت عنه و مكانش فيه حديث الا عن تينا في. تينا اتريقت على لهجه ساره و على لبسها و على جهلها. اتريقت على كل حاجه فيها في اهم برنامج قلش في العالم كله و هو Saturday night live او SNL اختصارا. البرنامج ده رجع في انتخابات ٢٠١٦ و ركز على التريقه على دونالد ترامب بشكل كاسح و ان كان برضه اتريق على هيلاري كلنتون في انتخابات ٢٠١٦. و ممكن تشوف مقاطع من التريقه دي في مصدر ١ و هي فعلا مضحكه جدا لدرجه تهزيئ دونالد ترامب. تينا في طبعا يساريه زي معظم هوليوود و عدوه لترامب و اليمين الامريكي المتطرف كله. و بالتالي ترقيتها موجهه في الأغلب انها تخلي الناخب الامريكي مينتخبش ترامب. 

من سنه ٢٠٠٣ و اسرائيل فيها برنامج اسمه “ارتز نهدرات” او “الارض الحلوه” و لما بالعبري بيتقال الارض معناها ارض اسرائيل او “ارتز اسرائيل”. يعني ممكن الترجمه السليمه لاسم البرنامج هو “بلدنا الحلوه”. البرنامج ده بيتذاع الساعه ٩ مساءا يوم الجمعه بعد نشره الأخبار. و كل اسرائيل بتتفرج عليه. البرنامج ده بيقدمه مجموعه من اليسار في اسرائيل و هم مع حقوق الشعب الفلسطيني تماما و ضد نتنياهو على طول الخط و مع قيام دوله فلسطينييه و ضد المستوطنات. البرنامج بيتريق باستمرار على فكر المستوطنين لدرجه انه ذاع حلقه جاب فيها أطفال المستوطنين و هم بيتكلموا ازاي ان العالم كله اعدائهم عشان يوري قد ايه الكلام ده غلط. و الاسكتش فعلا مضحك و ممكن تتفرج عليه مدبلج للإنجليزي في مصدر ٢.

تخيل من ٢٠٠٣ بيحاولوا. و نفس الكلام تينا في من ٢٠١٢. يعني مش بس الشعب المصري اللي دمه خفيف. ربما الفارق ان كل مصري متخيل نفسه عادل امام Adel Imam wannabe. لكن مش كل امريكيه متخيله نفسها تينا في. 

مالكولم جلادويل باحث كندي في الاجتماع عمل دراسه اكتشف فيها ان الناخب اليمين الامريكي اللي مع ترامب كان برضه بيتفرج على تينا في و بيضحك عليها! لكن برضه راح انتخب ترامب! 

في اسرائيل كل اسرائيل بتتفرج على ارتز نهدرات. كلها. يوم جمعه بليل و التلفزيون الاسرائيلي مفيهوش مليون قناه بتصرف عليها الإمارات و المخابرات و السعوديه زي مصر. مفيش اختيارات كتيره غير انك تنزل الشارع او انك تتفرج على التلفزيون. و نزول الشارع يوم جمعه بليل بعد غروب الشمس له محاذير دينيه عند بعض الاسرائلين. فالناس بتقعد تتفرج. من ٢٠٠٣ البرنامج بيشتم في نتنياهو و مع ذلك الناس صوتت ليه. 

في مصر الناس بتقلش من قرون على الأقل. و مع ذلك الظلم و الاستبداد استمر في مصر. حسني مبارك مسقطش بسبب اننا ضحكنا عليه. حسني مبارك سقط بسبب ان المصريين قرروا يعملوا عمل جاد جدا جدا في حياتهم و هو الثوره. خلال الثوره محدش أفتكر نفسه عادل امام. كان فيه تريقه طبعا لكن حجمها كان قليل جدا جدا بالنسبه الطبيعي في مصر. كل واحد اخد الأمور بجديه. كان ناس بتموت بحقيقي. كان ناس بتضحي بنفسها بحقيقي. 

مالكولم جلالدويل (مصدر ٣) اكتشف ان الكوميديان او اللي عاوز يهرج بيبتدي يركز بس ان يبقى دمه خفيف. هو بيعمل كده عشان تينا في يتقال عنها انها أظرف واحده في تاريخ أمريكي. نفس الكلام في مصر انت بتقلش عشان الناس تقول عنك انك ظريف و دمك خفيف! و ده في حد ذاته بقى مطلب عند الشعب المصري. مطلب انه يبان ان دمه خفيف. مش مشكله بقى اننا عندنا استبداد و هو قضيه جاده جدا. مش مشكله ان شباب بيروح منه احلى سنين عمره. لا المهم دلوقتي حالا اننا أبقى ظريف. فنبتدي نتريق على مشيه السيسي و طريقه كلامه و على أمه و على ولاده. مع ان طريقه كلام السيسي مش هي المشكله الرئيسيه. المشكله هي انه مستبد استولى على الحكم بانقلاب و دي قضيه مصير الوطن ده كله. المشكله انه متعاون مع اسرائيل و بينفذ سياساتها مش ان أمه يهوديه. المشكله انه قاتل لكثير من المصريين دون وجه حق مش انه كلامه غير مترابط. بالعكس كتير من اتباع السيسي بيضكوا على كلامه الغير مترابط و بعدين يقولوا بس دكر و بينفذ و منيمهم من المغرب. المشكله انه باع الارض في مقابل فلوس محدش عارف رايحه فين. مش انه مش عارف يتكلم إنجليزي. طبعا مفيش مانع نظهر للناس انهم كانوا بيتريقوا على إنجليزي مرسي جالهم الاسوء منه. لكن هل احنا وقفنا عند كده و بعدين ركزنا في القضايا الأساسيه الجاده جدا؟ لا. اطلاقا. 

لذلك دي دعوه اننا نغير سلوكنا شويه. حتى في ديننا بعض المرح مستحب و مفيش فيه عيب لكن المرح في كل شيئ غير مستحب. بالعكس بيخلينا نطلع طاقتنا فيما لا يفيد و مبيحصلش منه حاجه اذا كان هدفنا اننا نعمل تغيير. 

المصادر:

١- Saturday night live و التريقه على دونالد ترامب 

http://www.nbc.com/saturday-night-live/video/donald-trump-cold-open/3503043?snl=1

٢- ارتز نهدرات

https://youtu.be/M9Sdkps0Quo

٣- هل القلش له تأثير؟ 

http://revisionisthistory.com/episodes/10-the-satire-paradox

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s