ليه قطر نجحت و تركيا نجحت في دحر العدوان و فشلت مصر؟

Why_Qatar_Turkey_Succeeded.jpg

رقم واحد: الداخل 

الشعب القطري و المقيمين محسوش بأي تأثير من الحصار. الحكومه و الشركات القطريه قدرت انها تتعامل بسرعه و مرونه. اهم مثل لكده كان شركه الخطوط الجويه القطريه اللي بسرعه غيرت كل مسارات الطيارات القطريه للتعامل مع الوضع الجديد (صوره ١) لدرجه انه مفيش و لا طياره وقفت و لا حركه اتأثرت الا في الحقيقه التأثير على مواطنين دول الحصار نفسها زي مصر مثلا. تخيلوا مثلا لو كانت الخطوط القطريه مقدرتش تغير المسارات دي كان اما طائراتها حتقف على الارض و يحصل فقدان ثقه في الاقتصاد القطري و الأهم ان كانت شحنات الأكل و العلاج مكانتش توصل قطر و بالتالي كانت حتبقى رجه كبيره في الداخل القطري. او كانت حتطير بعض الطيارات القطريه تحاول دخول المجال الجوي السعودي او الإماراتي و بالتالي كان حيتم اعتراضها و ينتج عن كده انهيار الثقه في الطيران القطري و محدش كان حيرضى يركبه. السرعه و المرونه دي بتيجي من الكفاءه. مهندسين و مخططين طيران على اعلى مستوى من كل جنسيات العالم يقودهم اكبر الباكر رئيس الخطوط القطريه و هو خبير دولي مهم في الطيران و تأثيره ضخم لدرجه ان بوينج بتصمم طيارات بتاثير منه (مصدر ١). 

دي نقطه على فكره الاخوان مقدروش يعملوها اولا لان معندهمش و مفيش في مصر كفاءات قادره مثلا على التعامل السريع مع ازمه الكهرباء سواء حقيقيه او مفتعله بالسرعه المطلوبه. و طبعا مفاصل الدوله مكانتش عاوزه تتعاون مع الحكومه الشرعيه بسبب غسيل مخ الاعلام. و ده درس مهم جدا للمستقبل. 

طبعا صمود و وقوف الشعب التركي جنب حكومته المنتخبه بسبب أعوام طويله من التقدم الاقتصادي و بسبب دور الاعلام الرئيسي في انه ينحاز للديمقراطيه و الشرعيه كانت نقطه مهمه جدا محصلتش في مصر. 

٢- توقع حدوث انقلاب و اعداد القوه اللازمه للتغلب عليه 

بدون شك ان احتمالات حدوث انقلاب في الأيام الاولى كان شبه مؤكد و كان الانقلاب ده حيستغل ان الجيش القطري موجود في اليمن. و من السهل العثور على امير متعاون. الحكومه القطريه بسرعه جابت القوات القطريه من اليمن و آمنت الوحدات العسكريه القطريه داخل قطر بناس موالين تماما لنظام الحكم. 

دي برضه نقطه تركيا عملتها للتعامل مع الانقلاب لانه على مدى سنين كان بيتم فيها تطهير الشرطه و الجيش بالدفع المستمر بعناصر مواليه. 

٣- العلاقات الخارجيه 

دي نقطه مهمه جدا و ركز معانا و الله. الناس كلها تقول الله عليك يا وزير خارجيه قطر ايه الحلاوه دي. لكن تقولهم يا ناس مهم جدا العلاقات الخارجيه يقولك الاستعانة بالأجانب و الغرب مستحيل نعتمد عليه الخ. طيب امال ايه لازمه وزير خارجيه قطر اذا؟ 

وزير خارجيه قطر مش هو اللي عمل الاتفاق الاستراتيجي التركي القطري. الراجل كان معظم وقته مقضيه في عواصم الغرب في ألمانيا و امريكا بالذات. ليه؟ واحده هي اللي بتحدد أتجاه الرأي العام الاوروبي و التانيه طبعا بتحدد اتجاه الرأي العام العالمي. 

الاخوان في مصر سابوا الساحه العالميه تماما لمحمد البرادعي في ألمانيا و أوروبا و للجيش في امريكا. 

قطر على مدى سنين نمت علاقات اقتصاديه و عسكريه و سياسيه قويه مع الغرب. مش عيب. العلاقات دي كانت في منتهى الاهميه لما وزير خارجيه ألمانيا طلع قال انه ضد الحصار و أحرج وزير خارجيه السعوديه اللي واقف جنبه (مصدر ٢). و كانت في منتهى الاهميه لما في الْيَوْمَ الاول للحصار تطلع وزاره الدفاع و الخارجيه في امريكا و يقولوا انهم ضد الحصار بالرغم ان ترامب كان معاه. مصدر ٣. لدرجه ان السعوديه تطلع تحتج على تدخل تيليرسون انه يحاول يوصل لحل. كتير احنا في مصر بنفتكر ان الغرب و امريكا بلد واحده يحكمها رئيس ديكتاتور زي بلدنا او انهم كلهم متؤامرين مع بعض. مش حقيقي الكلام ده. و شفناه قصاد عينا. 

٤- التدخل العسكري و الاقتصادي التركي و العلاقات الايرانيه 

و ده يمكن اهم عامل. لكن مش لوحده. لان كان ممكن يحصل انقلاب او تنهار الثقه في الاقتصاد القطري قبل ما اي جندي تركي يوصل. لكن مع العوامل التانيه ده بقى عامل رئيسي لتثبيت النظام القطري. 

التحالفات الإقليميه مهمه جدا. في حاله مصر كان مستحيل ان جيش تركي يوصل مصر في ظروف الازمه في ٢٠١٣ لكن كان ممكن جدا ان تركيا تشتري الاعلاميين المصريين زي ما الإمارات اشترتهم و ده كان حيغير اتجاهات الرأي العام. 

في المستقبل وجود قوات تحالفات اقليميه على ارض الدوله بيمنع او على الأقل بيقلل جدا احتمالات الانقلابات طالما القوات ذي كلها من دول مؤيده للديمقراطيه. حتى مع الاحتكاك بين الجيش المصري و التونسي و التركي مثلا حيتعلموا دور الجيش في الحياه و يشوفوا العالم ماشي ازاي. و التواجد ده مش بس يكون على الارض المصريه لكن تواجد مشترك على ارض الدول الديمقراطيه في المنطقه. مثلا المصري و التونسي كمان في تركيا بوحدات منظمه وفقا لاتفاقيات دفاع مشترك و شراكه استراتيجيه. ده من احد اهم أسباب عمليات الدمقرطة في العالم. مصدر ٤. 

كمان مستحيل ننسى ان سماح ايران للطيران القطري بالمرور بشكل رئيسي في اجواء ايران سهل الأمور جدا. و كمان بدا واضح ان ايران واقفه مع قطر في الموضوع بالطبع ضد العدو الرئيسي في المنطقه لها السعوديه. و قطر نمت علاقات طويله و وديه مع ايران و العلاقات دي أثمرت تماما في الحصار. ده موجه للناس اللي بتقول اسرائيل أحسن من ايران ! كلام غريب عن دوله مسلمه جاره نختلف معاها في سياستها في سوريا دون شك و نقف صد ظلمها في يوريا دون شك لكن مش نقف ضدها او معاها عمال على بطال. 

٥- دور الاعلام 

وجود قناه الجزيره مش بس عنصر دفاع عن قطر. لا كمان هو عنصر هجوم و كاسح كمان و ده يفسر انه التخلص منها هو احد اهم مطالب دول الحصار. جهاز إعلامي له سمعه عالميه بيوصل لكل الناس و عنده ارتباطات بالصحافة العالميه لدرجه لما مصر اعتقلت صحفيين اجانب من الجزيره العالم كله احتج و كريستييان امانبور عملت حمله “الصحافه ليست جريمه” و لو نفتكر ان اللي خرج احمد منصور من السجن في ألمانيا هو علاقاته و علاقات قناه الجزيره الدوليه. 

و دي نقطه مهمه الآخوان في مصر أهملوها. معملوش قناه ناجحه و يمكن كان حتى الاسهل انهم يشتروا الاعلاميين المصريين الموالين للانقلاب لأنهم كما معروف بيشتغلوا بالفلوس زي ما فضحهم صدام حسين. 

٦- متانه شبكه العلاقات الذاخليه 

في قطر يعتمد الحكم على شبكه من العلاقات مع القبائل القطريه الرئيسيه و كلها اجمعت على موالاتها لتميم بالرغم من محاولات تاثيرات سعوديه بحكم الامتداد القبلي بين البلدين. في نفس الوقت يعتمد الحكم في تركيا على شبكه من الكتاتيب ذات النزعه الصوفيه و المواليه لأردوغان باستماته و منتشره في كل أنحاء الدوله التركيه. هذه الشبكه من العلاقات تأتي متانتها للأختبار وقت الشدائد. 

في مصر يعتمد الحكم على شبكه من الأعيان و العمد في القرى و الصعيد و هم يشكلون عَصّب الدوله. عجز الاخوان في مصر عن استماله هؤلاء بل ركزوا على استماله المسئولين في دوله مبارك في الشرطه و الجيش بينما هؤلاء عمادهم هم العمد و المشايخ.

معلش بنتعلم. 

احنا مش بنقول كده عشان نعايب. احنا بنقول عشان نتعلم. 

المصادر 

١- تأثير اكبر الباكر الدولي 

http://www.reuters.com/article/us-airshow-paris-qatar-airways-mid-marke-idUSKBN19A24C?il=0

٢- علاقات قطر مع ألمانيا 

http://www.reuters.com/article/us-gulf-qatar-germany-idUSKBN19H2A3

٣- تصريحات الدفاع و الخارجيه في امريكا يوم حصار قطر 

https://www.theguardian.com/us-news/2017/jun/24/qatar-blockade-trump-administration-foreign-policy

٤- محددات الديمقراطيه 

https://play.google.com/store/books/details?id=V8sTVEtzG9IC&source=productsearch&utm_source=HA_Desktop_US&utm_medium=SEM&utm_campaign=PLA&pcampaignid=MKTAD0930BO1&gclid=Cj0KCQjw_JrMBRDPARIsACis1HwWxwEt8ZR0RXJGdNeSuls1MQ8DwTXLVvsZGQUZEA0Xy3N7SqePH98aAvMFEALw_wcB&gclsrc=aw.ds&dclid=CKj3-MX-w9UCFRJIAQoddrMFJg

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s