هل مصر حتبقى قد الدنيا؟ هل ده أساسا ممكن؟ و لو ممكن ازاي؟

Can_Egypt_Succeed1

فيه مقياس للاقتصاد جديد و الاقتصاديين بدءوا يقولوا ان المقياس ده اهم من الناتج القومي او حتى اهم من دخل الفرد او معدلات نمو الاقتصاد لان المقاييس دي بتقيس شكل الاقتصاد دلوقتي النهارده. لكن المقياس الجديد ده بيدينا فكره مهمه عن شكل الاقتصاد بكره و بعد بكره. و الناس لقيوا ان الدول اللي عندها المقياس ده عالي دول حتبقى غنيه في المستقبل حتى لو فقيره دلوقتي. المقياس ده اسمه “معدل رسمله البشر” او human capitalization rate.

المقياس ده بيقيس حاجه بسيطه قوي. قدره الفرد انه يوصل لاعلى مراتب ممكن يحققها بإمكاناته الطبيعية اللي ربنا خلقه بيها. يعني لو واحد مولود بموهبه الرسم يوصل انه يبقى اهم رسّام في البلد. لو واحد عنده موهبه الإختراع او الفيزياء او الرياضيات يوصل انه يبقى مخترع او عالم فيزياء. الخ.

في العالم اللي احنا عايشين فيه دلوقتي و في اقتصاد اعتماده على الموارد الطبيعية من حديد و فحم و بترول و اعتماده على القوه البشرية العضليه عمال يقل و اعتماد العالم على مخ البشر، واضح ليه معدل رسمله البشر مهم جدا. لو بلد كل اللي بتعمله ان يبقى عندها مواهب تقضي عليها حتى لو البلد دي غنيه بالموارد الطبيعية زي البترول مثلا دلوقتي بمرور الوقت أكيد حتفتقر. عرفنا ليه المقياس ده مهم جدا في تحديد مستقبل الدوله.

المشكله ازاي نقيس معدل الرسمله ده؟ مفيش طريقه سهله. لكن بنبدأ دايما بافتراض هو ان ربنا بيدي الناس مواهب و قدرات ذاتيه بصفه عامه بصرف النظر عن اللون او الجنس او الدين او المستوى الاجتماعي. مين ربنا بيديله اي موهبه حاجه في أيده هوه. لو بدأنا بالفرضية دي يبقى مفروض ميبقاش فيه علاقه قويه بين دخل الأب و دخل الابن مثلا. ليه لو الأب غني و الابن برضه يفضل غني و لو الأب فقير ولاده برضوا يفضلوا فقرا أكيد دي مش نيه ربنا في توزيع المواهب.

علماء الاقتصاد لما درسوا العلاقه بين دخل الأب و الابن في دول مختلفه لقيوا ان افضل دول العالم من ناحيه انه تقريبا مفيش علاقه بين دخل الأب و الابن كانت الدول التاليه: الدانمارك و النرويج و فنلندا و كندا و السويد. بمعني الأب في الدانمارك ممكن يبقى غني جدا لكن الابن ممكن يبقى فقير او غني تقريبا باحتمالات متساويه. معنى كده ان غنى الأب مش عامل خالص في الدول دي.

في امريكا و انجلترا و فرنسا و ألمانيا لقيوا ان تقريبا لو الأب غني احتمالات الابن يبقى غني برضه حوالي ٤٠٪‏. و لو الأب فقير احتمالات الابن يبقى فقير برضه حوالي ٤٠٪‏. يعني ممكن الأب يبقى غني و ٦٠٪‏ من الوقت الابن يبقى فقير او العكس. الصوره الثانيه من مصدر ٢.

Can_Egypt_Succeed2

العامل ده احنا بنسميه الحراك الاقتصادي economic mobility بمعنى ان الفرد ممكن يتولد في عيله غنيه او فقيره لكن بمجهوداته الذاتيه يقدر يغير حياته و يتحول من الغنى للفقر او العكس فقط وفقا لموهبته و امكانياته اللي أتولد بيها. عشان نقيسه احنا بنسأل الناس ٥ اسئله و عاوزينكم تحاولوا تجاوبوا عليهم و الاجابه بنعم او لا (صوره ٣ من مصدر ٢):

Can_Egypt_Succeed3

١- في بلدي هل الناس بياخدوا حقهم بناءا على مجهودهم؟

٢- في بلدي الناس بتتقدم بناءا على ذكائهم و قدراتهم؟

٣- القدوم من عيله غنيه شرط ضروري و أساسي للتقدم في الحياه؟

٤- الفروق في الدخول في بلدي كبير جدا؟

٥- انها مسئوليه الحكومه انها تقلل الفروق في الدخل؟

زي ما باين في صوره ٣ حوالي ٦٠-٧٠٪‏ من الأمريكان شايفين ان الانسان في امريكا بياخد حقه بناءا على مجهوده و قدراته.

احنا عاوزين نسيب خيالك يتصور كام في الميه من المصريين حيشوفوا ان الانسان في مصر بيتقدم و يعلى بناءا على كفاءته و ذكائه؟ كام في الميه؟

و رد على سؤال كمان: في رأيك ايه العلاقه بين دخل الأب و دخل الابن في مصر؟ ١٠٠٪‏؟ ام اقل قليلا؟

احنا من كام سنه درسنا اتجاهات الثراء و الفقر في مصر و لقينا ان الفقر و الغنى في مصر متمكن لدرجه ان فيه علاقه بين توزيع الثروه في مصر وقت الفتح الاسلامي لمصر و توزيعها دلوقتي! تخيل. مصدر ٣.

نزيدك في الحب جانب؟ ان المصريين الحقيقه بيكرهوا الحراك الاجتماعي جدا. تخيل؟ يعني مثلا ايّام السادات و كانت فتره حراك اجتماعي ضخم و أعاده لتوزيع الثروه، كانت تطلع أفلام تكره الناس في الحراك الاجتماعي ده. يعني مش عيب ان الزبال يبقى معاه فلوس و يبقى رجل اعمال (مش يمكن دي قدراته الشخصيه) و يتعلم و يعلم أولاده. بدل ما نشجعه انه يتعلم و يبقى رجل اعمال اكبر بقى الهدف ندمره؟ و الغريب ان ده يبقى مثلا لصالح الحفاظ على موظف حكومي وصل لوضعه بالواسطة! محدش فكر في الموضوع انه بدل رفض الحراك الاجتماعي يلقى الأفضل تقنينه و تقويمه بحيث يبقى قايم على الكفاءه. الحقيقه ان التفكير الطبقي في مصر سائد جدا بشكل انه بيمثل منظومة اجتماعيه متكاملة. يعني ابن البواب او السمكري بقى عنده لهجته الخاصه بيهم اللي مش بيتكلم بيها لم بيبقى مع ناس من خارج الطبقه. اللغه ذاتها بقت معتمده على الطبقه. لدرجه ان وظائف معينه زي القضاء و الشرطه و الجيش و الخارجيه مستحيل يشتغل فيها الا ناس من طبقه معينه و ساعات كمان الا من أبناء العاملين في ذات المهنه. ده حتى جزء من ثوره الطبقه الغنيه على محمد مرسي كانت سببها “شوف مراته لابسه ايه”. مثلا. طبقيه مقننه بالقانون و العرف و ساعات بيدخلوا فيها الدين كمان. ده ابن الممثل بيبقى ممثل. و ابن لعيب الكوره بيبقى لعيب كوره و في نفس مركز ابوه كمان.

أساسا الدراسات العالميه (مصدر ٤) لقيت ان التعليم العالي في مصر زي قلته بصفه عامه. العائد منه قليل جدا return on education. فعلا. يعمل ايه التعليم في وطن بالطبقية دي و معندوش اي قدره على استيعاب الأفكار او الطموحات البشرية؟

و بعدين تقولي قد الدنيا؟

لما نشوف معدل رسمله بشريه عالي يبقى فيه أمل. غير كده أنسى.

ضيعوني و اي فتى اضاعوا.

المصادر:

١- محاضره عن اهميه معدل رسمله البشر

http://nymag.com/arts/books/features/52014/index5.html

٢- دراسه معهد بروكنز الامريكي عن الحراك الاقتصادي 

https://www.brookings.edu/wp-content/uploads/2016/07/02_economic_mobility_sawhill_ch3.pdf

٣- دراسه جوده عن اعداد و ثروه المسيحيين في مصر 

https://www.facebook.com/jawda.org/posts/776581009078781

https://jawdablog.org/2015/01/21/egypt_taboo_33_christians_numbers_in_egypt_2/

٤- العايد من التعليم في مصر

https://www.brookings.edu/blog/future-development/2017/07/25/inequality-of-opportunity-in-egypt/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s