ليه السعوديه بتخاف من تركيا او قطر او الاخوان؟

Why_Saudi_Fear_Qata_and_Turkey

السعوديه قائمه على احتكار الحديث بإسم الاسلام. وظيفتها في المنطقه هي انها تظهر قدام الشعوب العربيه و الاسلاميه انها تمثل الاسلام الحقيقي و يمكن كمان تتشدد في احكام الاسلام اكثر من المطلوب او الطبيعي. بينما الحقيقه انها تابعه و متحالفه و جزء من نظام الهيمنه الغربي في المنطقه اللي نشأ بعد الحرب العالميه الاولى. النظام ده أتكون بعد انهيار الامبراطوريه او الخلافه العثمانيه اللي كانت الممثل الشرعي للمسلمين و اللي لم ينقطع من وفاه الرسول لحد الحرب العالميه الاولى يعني ١٣٠٠ سنه فيه مؤسسه اسمها الخلافه تتكلم باسم المسلمين. نظام السيطره على الشرق الاوسط بسيط جدا و عبقري في نفس الوقت (مصدر ١):

١- الشعوب دي الدين بيلعب دور كبير في حياتها و بالتالي بالرغم اننا مش عاوزين خلافه لكن عاوزين حد تبعنا يقدر يؤثر في المسلمين و يسمعوله. 

٢- لو التأثير الديني ده مشتغلش يبقى الدور على جيوش الدول العربيه تقدر انها تسيطر على الشعوب دي بالقوه. 

٣- لو ده مينفعش الغرب يفضل محتفظ بقواعد جويه رئيسيه حوالين المنطقه في قبرص البحر المتوسط و دييجو جارسيا المحيط الهندي و هـ ١ على حدود الاردن و العراق و العديد في قطر و انشرليك في تركيا و خالد بن سلطان في السعوديه و قدره التدخل في قواعد مصر. و ده طبعا غير اسرائيل ذاتها اللي بمثابه حامله طائرات ثابته في المنطقه يقدر سلاحها الجوي يسيطر على السماء في المنطقه كلها. 

٤- دي مش منطقه بتاعه قوات ارضيه. الشعوب دي مستثاره جدا من رؤيه اي اجنبي و المواجهه معاهم على الارض مكلفه (حتى لما بينسوا الدوس ده بيرجعوا يفتكروه في العراق مثلا). 

٥- وجود و زرع اسرائيل في المنطقه ضروري للامن الاوروبي 

يبقى الدور الوظيفي للسعوديه مفهوم دلوقتي. 

لو حصل و جت تركيا مثلا و قالت انها بتمثل امتداد الدوله العثمانيه و اردوغان على طول بيتكلم عن امجاد الدوله العثمانيه و السلطان محمد الفاتح (مصدر ٢) و مش بس كده لا كمان عنده تجربه تنميه ناجحه و تجربه ديمقراطيه هي الأفضل في الشرق الاوسط (مفيش انتخابات و لا حد بيفتح بقه في السعوديه). صحيح تجربه غير كامله و لسه فيها مشاكل و عقبات لكنها الأفضل في المنطقه فعلا. 

لما ييجي واحد زي اردوغان أكيد بيسحب الرأي العام الاسلامي و التأثير فيه من السعوديه. و بمرور الوقت يسحب دور السعوديه في المنطقه. و مش بس بيسحب دور السعوديه لكن ممكن كمان يبقى ليه تاثيرات اكبر:

١- كتير في الغرب بيقولوا ان تطرف الوهابيه في السعوديه احد اهم أسباب الاٍرهاب و ده زاد جدا بعد ١١ سبتمبر. و بالتالي فيه كتير في الغرب يلاقوا ان الدور التركي مفيد. 

٢- كمان الشعوب العربيه و المسلمه شايفه التواطؤ الواضح بين السعوديه و الإمارات و مصر مش بس مع امريكا. لا ده كان ايّام الزمن الجميل. دلوقتي تواطؤ مع اكتر العناصر اليمينيه تطرفا في اسرائيل و امريكا. السعوديه بتهاجم سياسه اوباما و مع ترامب مثلا! 

٣- و الشعوب دي نفسها مش بس معجبه بالنموذج التركي لانه ناجح اقتصاديا و سياسيا. لا كمان معجبه بيه لانه أكثر انحيازا للقضايا الأساسيه للشعوب العربيه سواء سرا او علنا. محدش يقدر يقول ان اردوغان مش واقف مثلا مع فلسطين مع القدس مع غزه مع حماس مع الاخوان مع قضايا الديمقراطيه في المنطقه. بوصلته باستمرار مع القضايا الأساسيه لشعوب المنطقه. 

لذلك النموذج التركي تهديد خطير جدا للنظام السعودي من اساسه. 

نفس الكلام ينطبق على الاخوان المسلمين. جماعه ذات أصول دينيه و ميول قريبه من الشارع العربي الاسلامي و اتجاهاته و ممكن قبولها في الغرب. و بالتالي نفس الخطورة الاستراتيجيه على النظام السعودي. و العن بقى لو توحدت الجماعه مع الأتراك و نجحت في مصر و سوريا و ليبيا كمان كان الاتجاه في عام ٢٠١٣ اذا هذا يصبح تهديد لوجود السعوديه من الأساس existential threat. و ده احد أسباب الانقلاب في مصر و تراجع الدعم للثوره السوريه بل و حتى الرغبه في بقاء نظام الأسد. المهم الا يصل الاخوان. ببساطه فالأسد تهديد اقل اهميه لان ايران غير قادره على تحريك الجموع السنيه و كذلك من الصعب تخيل دخول ايران في حرب مباشره مع السعوديه. في الحساب السعودي يجب التخلص من الاخوان اولا ثم يأتي الدور على تركيا و ايران. بالطبع فالاخوان أسهل أيضا من تركيا و ايران. و مصر سهل التأثير فيها بالمال عكس دول ضخمه و كبيره و بها مؤسسات قويه مثل ايران و تركيا. 

قطر بالطبع لها ذات الميول مع اتجاهات الشارع العربي و الاسلامي و هي ميول اسلاميه ذات توجهات معتدله و ان كانت مع فلسطين و غزه و حماس و نضال الشعوب العربيه للديمقراطيه. اذا فهو أيضا نموذج ناجح في وقت تحاول فيه دبي و ابو ظبي إظهار ان نموذجها التارك للدين هو النموذج الوحيد الناجح و هو ما تبدى في تصريحات وزير خارجيه الإمارات عن سعيهم لاقامه نظم علمانية في الشرق الاوسط. مصدر ٣. و هي تصريحات تستهدف الرأي العام العالمي و الغرب بينما الحديث لشعوب ان حكومات السعوديه و مصر و الإمارات تطبق الاسلام الحقيقي. 

و تلجأ السعوديه و اتباعها للمزايدة على تركيا و قطر و الاخوان فتقول اذا كُنتُم بهذا القرب من طموح الشعوب لماذا لا تطردون امريكا من القواعد و تذهبون لتحرير فلسطين الخ. و هي ذات المزايادات التي قام بها الخوارج ضد الامام علي في الفتنه الكبرى. حيث أرغموا سيدنا على ان يلجأ للتحكيم مع معاويه في معركه صفين بغرض حقن دماء المسلمين و لما استجاب لهم على مضض و عاد للكوفه اتهموه بالتفريط و أهدروا دمه و قتلوه لانه لم يسمع لرأيهم و يذهب في الحال مره اخرى لقتال معاويه، و حجتهم انهم اكتشفوا خطأهم و انهم تابوا و أصلحوا عن ضغطهم على الامام علي لقبول التحكيم! نفس الأفكار التي اودت بوحده صف المسلمين و أسست لقيام الدوله القمعيه في الاسلام و نهايه الخلافه الراشده. وهم يعلمون تماما ان ما يطلبونه من تركيا أو قطر غير ممكن و انه ما لا يدرك كله لا يترك كله بالنظر للاوضاع الحاليّه. 

الصراع في الشرق الاوسط هو بين نظم رجعيه عاوزه ان تحالف اسلام السعوديه مع الجيوش العربيه يفضل مسيطر و يقمع شعوب المنطقه و بين نظام جديد عاوز يكون اكثر تلبيه لآمال شعوب المنطقه و اكثر اقترابا من رغباتها و اتجاهاتها حتىلو بالتعاون مع مجموعات في الغرب ترى ان ذلك في صالحها – مش عيب. الغباء هو العيب . 

#دراسات_جوده_الاستراتيجيه

مصدر ٤ فيه كل دراساتنا السابقه عن الموضوع. 

المصادر:

١- صفحات مخفيه من تاريخ مصر: سايكس بيكو و الحرب العالميه الاولى

https://jawdablog.org/category/التاريخ/صفحات-مخفيه-من-التاريخ/

٢- اردوغان و احاديثه عن محمد الفاتح 

http://time.com/time-person-of-the-year-2016-erdogan-runner-up/

٣- تصريحات وزير خارجيه الإمارات عن اقامه نظم علمانية

https://arabic.cnn.com/middle-east/2017/07/28/uae-ambassador-us-qatar-crisis

٤- دراسات جوده الاستراتيجيه

https://jawdablog.org/category/الإقتصاد/استراتيجيات-وحلول/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s