جزيرة الوراق ومنهاتن مصر

Warrak_Island

نفاجأك احنا شويه. محدش في جوده معترض اطلاقا على تحويل جزيره الوراق في القاهره الى مانهاتن مصريه. اطلاقا. الاعتراض هو على ٣ نقط:

١- الاستيلاء على الارض من أصحابها القانونيين بالقوه. ليه المبدأ ده مهم؟ لان اساس القانون في اي مكان في العالم هو الحفاظ على الملكيه الفردية. لو انهار المبدأ ده (و هو بالفعل مهتز في مصر) يبقى انا لو صاحب بيت او عماره او ارض او شركه في اي حته في مصر، اصرف عليها و اعملها صيانه او تطوير ليه؟ عشان تاني يوم الحكومه تيجي تهدها و تاخدها؟ أكيد لا. طيب ما الصيانه و التطوير دول اللي بيشغلوا الناس و يخلوهم ينتجوا و يخلوا البلد شكلها جميل. الخ. الحقيقه ان نزع ملكيات الأجانب و تأميم ملكيات الباشوات في مصر و إقرار قانون ايجار مجحف للملاك في الستينات احد اهم نتائجه هو تدهور الشكل الحضري لكل المدن المصريه و تحولها لصفيحة الزباله اللي احنا عايشين فيها. الاستمرار في نفس السياسه هو استمرار في الانتقال من وش لقعر صفيحة الزباله. ببساطه لانه محدش حيستمر في صيانه او تطوير اي حاجه. 

حل كده؟ ان المستثمر اللي عاوز يبني في جزيره الوراق يقعد مع الأهالي و يشتري منهم. و بالطبع زي اي سلعه في سعر معين حيبقى جاذب جدا للأهالي. و ممكن كمان إشراكهم في الأرباح من البناء على الجزيره. و أهالي الوراق بدل ما يروحوا في الشارع ويزودوا الجريمه والتسول و القبح حياخدوا فلوس معقوله و يمكن حد منهم يأخذ الفلوس دي و يستثمرها و تدور العجله. 

٢- طبعا فيه ناس تقول بس دول بانيين عشوائي و واخدين ارض الدوله. و بالتالي يجب طردهم عشان هيبه الدوله. ناس كتير قالت ان الوراق بالذات قانونيه. لكن بفرض ان الكلام ده صحيح، الحقيقه ان كل تجارب العالم بتقول ان حتى لو سكان المناطق العشوائية slums غير قانونيين فالافضل انك تملكهم الارض بسعر زهيد او حتى ببلاش! تخيل. مش مصدق اقرأ تقارير البنك الدولي في مصدر ١ عن تجارب افريقيا و بنجلاديش و امريكا اللاتينية. 

ليه كده؟ اولا عشان تقدر توصل خدمات أساسيه للناس دول زي الكهربا و المياه و المجاري و الأمن و المدارس من غير ما يسرقوها. و بالتالي تقدر تدخل دخل و لو بسيط. و كمان تقدر توفر لهم الأمن و تمنع التجارات غير المشروعه في الأعضاء و المخدرات وتهريب البنات و كلها أمور بتزيد في المناطق العشوائية و تهدد المدن بأكملها و في حاله القاهره التهديد ده خطير جدا لان حزام العشوائيات هو في الحقيقه في كل مكان في القاهره. و طبعا التعليم في المدارس يبقى قفزه مهمه لسكان المناطق دي. الحاجه التانيه ان الناس من غير تملك بيوتهم بيبقوا على طول عايشين في خطر الطرد و لذلك عمرهم ما حيحطوا فلوس في دهان او صيانه بيوتهم. صيانه اي بيت في العشوائيات بتشغل حوالي ٥ عمال في المتوسط. السباك و بتاع الدهان و بتاع المحاره و البناء بتاع الطوب و الكهربائي. لو مفيش تملك مفيش خدمات و محدش من دول حيشتغل. يعني حيبقوا عواطليه. يعني يتجاروا في المخدرات و يطلعوا على الأماكن الغنيه يقتلوا اللي فيها و يسرقوهم. 

يعني انك تدي تملك للناس دي في مصلحتك انت كواحد غني عايش في كومباوند أساسا. 

٣- السبب التالت هو انه مفيش مانهاتن بتتعمل من بناء بيوت او ناطحات سحاب. ده المنظر من بره بس. مانهاتن تعتمد في الحقيقه على حريات في الاستثمار و سهوله اداره اعمال و وجود أفكار للاستثمار. ناطحات السحاب هي اداه و ليست غايه. الناس عملت ناطحات السحاب لان عاوزين المستثمرين يتعاونوا في منطقه صغيره هي جزيره غير قابله للنمو الجغرافي. فرانكفورت مثلا فيها سوق أوراق ماليه ضخمه لكن محتاجتش تعمل مانهاتن. الأهم من ناطحات السحاب هو وجود ناس بتفهم و أفكار. الناس دي دلوقتي كلها بره مصر. و محدش منهم حيرجع من غير اجواء حريات. 

زهقنا و الله. 

المصادر:

١- دراسات البنك الدولي عن تملك الارض في المناطق العشوائية. 

http://documents.worldbank.org/curated/en/938981468013830990/pdf/404240BD0Dhaka10ALSO03582401PUBLIC1.pdf

http://www.worldbank.org/en/news/press-release/2015/12/01/growing-african-cities-face-housing-challenge-and-opportunity

http://www.bbc.co.uk/schools/gcsebitesize/geography/urban_environments/urbanisation_ledcs_rev3.shtml

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s