اخيرا الوزير احمد ابو الغيط كشف المؤامره بين امريكا و الإسلاميين. في حديث لقناه روسيا الْيَوْمَ (مصدر ١) احمد ابو الغيط فضح الإسلاميين الاخوان و غيرهم و صفقتهم مع امريكا. احنا دلوقتي عرفنا و فهمنا اللي اتباع السيسي كانوا بيتكلموا عنه و الحاجات الوحشه اللي الاخوان المتأسلمون كانوا حيعملوها. ابو الغيط قال ان فيه ٤ شروط للصفقه بين الغرب و الإسلاميين:
١- انتم (يعني الإسلاميين) تاخذوا الحكم في الدول العربيه و الاسلاميه
٢- بس اوعوا تتعرضوا للمدن بتاعه الغرب. يعني متعملوش تفجيرات في روما او برلين او غيرها من عواصم الغرب.
٣- متقربوش من اسرائيل لان دي كمان تبعنا.
٤- مصالح الغرب الرئيسيه في المنطقه تفضل مؤمنه. البترول و القناه و خلافه.
المذيع حب يضيف شرط كمان و هو ان الغرب يغرق الدول العربيه بالقروض و الديون كجزء من الصفقه مع الإسلاميين. الحقيقه ان ابي الغيط كان عادل جدا و قال للمذيع انه دي هو مسمعهاش و ميعرفعاش.
الحمد لله ان السيسي منع عننا البلوه دي. كان حيجيلنا الاخوان اللي كانوا حيعملوا التالي:
١- حيوقفوا التهديد المستمر اللي مبارك كان عامله و السيسي من بعده عامله لكل عواصم الغرب. كل يوم روما مش بتنام من الصواريخ المصريه. و لندن على طول تحت تهديد قنابل و متفجرات المصريين اللي الحكومه المصريه بتاعه السيسي بتبعتهم.
٢- الاخوان كانوا حيوقفوا التهديد المستمر اللي كان ابو الغيط نفسه بيعمله لإسرائيل لما مسك أيد وزيره خارجيه اسرائيل. و كمان لما الوزير اللي جه دلوقتي بيعمله لما بيزور نتنياهو و يتفرج على ماتش كوره معاه في بيته. و كان طبعا الاخوان حيعملوا لا سمح الله اعلى تنسيق أمني بين مصر و اسرائيل لدرجه ان الطيران الاسرائيلي كان حيدخل مصر يضرب في أهل سينا (مصدر ٢).
٣- و اخيرا الاخوان كانوا حيرجعوا الغرب و مصالحه في المنطقه. الحمد لله دلوقتي السفن الامريكيه متقدرش تعدي في قناه السويس و العرب مشبشبين لامريكا و قاطعين عنها البترول و رئيس امريكا بيجي لحد عندهم و بياخدوا هما منه فلوس الجزيه. و السيسي رجع من امريكا بيقول انه اخد من امريكا ميات المليارات حيعمل بيها وظائف وظائف وظائف في مصر.
الحمد لله يا اخي ان الغمه انزاحت مننا و من عن عنينا.
روح يا احمد يا ابو الغيط ربنا يديك على قد نيتك.
المصادر:
١- حديث ابي الغيط بالصوت و الصوره
٢- التنسيق الأمني بين مصر و اسرائيل
Categories: نمو الفاشية في مصر
Leave a Reply