تعالوا ننبهر شويه بالفكر الجديد في السعوديه. الطبيعي ان سياسه السعوديه على مدى عشرات السنين هي الحفاظ على سعر البترول اعلى ما يمكن لكن اقل من انه يسبب كساد عالمي او يسبب ان الغرب يخترع تكنولوجيات جديده تقلل الاحتياج للبترول. كلام واضح و بسيط. لذلك دايما السعوديه بسبب إنتاجها الكبير كانت اما بتزود الانتاج بكثافه زي ايّام حرب الخليج ١٩٩٠ عشان تقلل احتمالات زياده الأسعار وقتها او تقلل الانتاج بشكل كبير لما بيحصل ان الأسعار تقل جدا زي أواخر التسعينات. و دايما السعوديه كان بيتقال عليها swing producer. في الوقت اللي احنا فيه دلوقتي و سعرالبترول في اقل مستوياته و السعوديه عماله تصرف من احتياطيها الاستراتيجي بشكل متسارع على حرب اليمن وعلى جزيه ترامب و على رز السيسي، المفروض ان السعوديه تكون بتقلل الانتاج بشكل كبير. كلام بسيط وواضح.
الحقيقه بقى ان السعوديه دلوقتي بتزود الانتاج قليلا لحوالي عشره مليون برميل بدل تسعه مليون في الْيَوْمَ زي ما كان الحال في ٢٠١٣. مصدر ١!
المحللون لاحظوا الحكايه دي و استنتجوا على طول (مصدر ٢) ان هدف السعوديه مش انها تحافظ على سعر مناسب للبترول. هدف السعوديه دلوقتي ان سعر البترول يفضل واطي لحد سنه ٢٠١٨ لما محمد بن سلمان حيبيع جزء من شركه أرامكو في البورصه. و لو السعوديه قبل البيع مباشره قللت الانتاج جامد مقارنه بدلوقتي سعر البترول وقتها حيزيد و بالتالي حتزيد قيمه شركه أرامكو و يبان ان محمد بن سلمان ناجح في حاجه.
لو السعوديه دلوقتي قللت الانتاج على بال ما ييجي عام ٢٠١٨ حيكون المنتجين في امريكا بتوع البترول الصخري رجعوا ينتجوا تاني و بالتالي يقوم سعر البترول ينزل بحلول عام ٢٠١٨.
يعني السعوديه عاوزه تعمل توقيت زياده سعر البترول يكون بالضبط عشان يلمع محمد بن سلمان.
الفكر الجديد فعلا. و و الله حيخربها و حتقولوا جوده قالت.
المصادر:
١- انتاج السعوديه من البترول
https://ycharts.com/indicators/saudi_arabia_crude_oil_production
٢- تحليل أهداف السعوديه البتروليه
Categories: الدول العربية
Leave a Reply