التضخم و زياده الأسعار حتفضل مستمره في مصر

Inflation_prices_increase_Egypt.jpg

حنسألك سؤال غريب شويه. لو انت عاوز تنزل سعر الطماطم بأسرع وقت ممكن تعمل ايه؟ بسيطه. اول حاجه تنزل طماطم كتيره في السوق. تغرق السوق طماطم. الحاجه التانيه انك تقلل استهلاك الطماطم. يعني مثلا لو فيه في البلد مصنع صلصه تقفله. و الحاجه التالته و الاخيره انك تحاول تلم الفلوس من الناس عشان لو الفلوس قلت معاهم مش حيشتروا طماطم الا لو رخصت. الخطوه الاولانيه دي بنسميها زياده العرض supply. التانيه تقليل الطلب demand. التالته بنقول عليها تقليل إمداد الفلوس money supply. التلاته مع بعض لازم يخسفوا سعر الطماطم. ده بالضبط اللي السيسي و طارق عامر بيحاولوا يعملوه. نفهم ازاي. الهدف الرئيسي للسيسي و عامر دلوقتي هو تقليل سعر الدولار بأي شكل عشان يغطوا على الطريقه السيئه جدا اللي تم بيها تعويم الجنيه و اللي نتج عنها قفزه كبيره جدا في كل الأسعار واضح انها عامله مخاوف أمنيه اكتر من اللي باين على السطح و حنعرف دلوقتي ليه.

الدولار سلعه زي اي سلعه. زي الطماطم. عشان يقللوا سعر الدولار اول حاجه انهم استلفوا ١٢ مليار دولار من صندوق النقد الدولي دخل منهم الجزء الأولاني و هو عده مليارات. الفلوس دي بدل ما تروح في استثمارات مصر محتاجاها بشده. الفلوس دي واضح انها نزلت السوق لتقليل سعر الدولار بدليل ان الدولار فعلا انخفض ١٦ قرش بحالهم. لو الفلوس دي راحت استثمارات مكانش الدولار حيتحرك خالص. 

الخطوه التانيه ان عمليات استيراد المعدات او اي أغراض راسمالية او استثماريه في مصر كلها واقفه. مفيش بناء مصانع جديده. مفيش استيراد معدات. مفيش. معنديش. مصدر ١. طبعا ده بيقلل الطلب على الدولار و برضه يقلل سعره. 

الخطوه التالته انك تسحب الجنيهات من الناس. تعمل كده ازاي؟ تزود سعر الفايده على الجنيه في البنوك. تقوم الناس تحط فلوسها في البنوك فتقل كميه الفلوس مع الناس. و طبعا كمان تقل حركه الاستثمار اكتر و بالتالي يقل الاحتياج للدولار اكتر و هكذا. 

واضح من التسرع بالذات في كل الخطوات دي ان الهدف هو تقليل سعر الدولار و بالتالي تخفيض الأسعار بأي شكل. و بالتالي الطريقه المفاجئة اللي تم بيها قرار الفايده يقولنا ان السيسي و المخابرات (القوه الحقيقيه ورا السيسي) قلقانين فعلا من الوضع و احتمالات انفجاره. 

حاجه كمان نقولها. كل البنوك العالميه بتقول ان الإجراءات دي مَش حتنجح. مصدر ٢. و التضخم و زياده الأسعار حتفضل مستمره في مصر! الإجراءات دي بالكثافة دي بتشتغل في اي حته في الدنيا الا مصر. تخيلوا. عارفين ليه؟ ببساطه لان مصر فيها احتكار شديد جدا. شويه عائلات و شركات مع الجيش محتكرين معظم السلع في مصر. وبالتالي بالرغم ان الدولار ممكن ينزل حاجه بسيطه لكن الأسعار مش حتنزل معاه. حتطلع معاه. لكن مش حتنزل معاه. لسبب بسيط ان العائلات دي بتفرض الأسعار في السوق. السوق المصريه مش خاضعه للعرض و الطلب العادي في السلع الأساسيه المحتكره زي الحديد او الإسمنت او الخشب او الفراخ او اللحمه او الخضار. التجار ببساطه بتستغل الأجواء و ترفع الأسعار. و محدش ميقدرش ميشتريش. و قدره اي حكومه دلوقتي التعامل مع ده محدوده جدا. تعمل ايه؟ تسجن التاجر الكبير؟ استحاله. تسجن كبار المحتكرين؟ او حاولت تعمل كده حيوقفوا السوق. 

لذلك كان المفروض قبل تعويم الجنيه هو تمرير قانون لضرب الاحتكار زي ما حصل في العالم كله وزياده المنافسه. و بالتالي الأسعار ممكن السيطره عليها بالمنافسه و الإجراءات الماليه التلاته بتاعه طارق عامر تشتغل. لكن ابو ٥٠٪‏ طبيب الفلاسفه و اللي عمه بتاع النكسه و اتعين بالواسطة تفتكروا ننتظر منهم ايه؟ 

و على فكره احنا عندنا حلقات كامله بنشرح فيها الاقتصاد ببساطه. اقرأهم. مصدر ٣. 

و كمان كتبنا في مصدر ٤ ازاي الأجانب بتعمل فلوس حلوه جدا من غباء السيسي و طارق عامر. 

و على فكره الدولار حيرجع يطلع تاني لان اسلحه طارق عامر حتخلص و نرجع لنفس الدوره تاني. 

المصادر:

١- استيراد المعدات الاستثمارية في مصر 

https://tradingeconomics.com/egypt/imports

٢- رأي بنك باريبا في اداء عامر و السيسي

http://economic-research.bnpparibas.com/Views/DisplayPublication.aspx?type=document&IdPdf=30085

٣- تعالوا نتعلم الاقتصاد 

https://jawdablog.org/category/الإقتصاد/حلقات-تعالوا-نفهم-الاقتصاد/

٤- 

https://jawdablog.org/2017/02/27/why_dolllar_value_falled_and_coming_back_up_agaon/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s