التحليل العلمي لتزايد اعداد قنديل البحر و هل تفريعه السيسي فعلا السبب؟ 

Scientific_evidence_behind_JellyFish_number_increase_in_Egypt_1

بسبب زياده الفتي و كل واحد اصبح خبير في الأحياء المائيه ننشر المقال ده. زي اي حيوان لما تكون الظروف مواتيه و يقل الأعداء اللي بياكلوه فأعداد الحيوان ده بتزيد. الحيوانات اللي بتآكل قنديل البحر هي سلحفاة الماء المعروفة بأسم الترسه في مصر و سمك التونه. مصدر ١. البحر المتوسط من فتره بيعاني من مشكله الصيد المبالغ فيه لسمك التونه لدرجه ان الصيادين المصريين بيسيبوا شرق البحر المتوسط و بيروحوا يصطادوا في تونس و المغرب زي ما شفنا و بيتقبض عليهم لو فاكرين هناك. كمان السلحفاة البحريه sea turtle عندها مشاكل كبيره جدا في العالم كله و في مصر كمان اكتر. ليه؟ السلحفاة البحريه بتحط البيض بتاعها في حفر في رمل الشاطئ. لما البيض يفقس السلاحف الصغيره اول حاجه عاوزه تعملها انها تروح المياه عشان تقدر تعيش. المشكله ان السلاحف بتعرف طريق المياه من الضوء. في الليل دائماً اتجاه البحر بيكون ضوءه اعلى بسبب عدم وجود موانع رؤيه طبيعيه (جبال او تلال) لمسافات طويله و بالتالي دائماً يوجد خيط طفيف من ضوء الشمس في الأفق تستطيع صغار السلاحف رؤيته و الاستدلال به) . مصدر ٢. لكن مع انتشار العمران و القرى السياحيه على ساحل البحر المتوسط، القرى دي مليانه أضاءه و بالتالي السلاحف الصغيره بتتلخبط. بدل ما تروح في أتجاه البحر بتروح في اتجاه البر و متلقيش اكل و تموت. و بالتالي السلاحف تقريبا اندثرت في مصر. يعني اي تهديد لقناديل البحر مبقاش موجود. طيب دي الحيوانات اللي بتأكله. هل فيه عوامل تانيه بتخلي عدد القناديل يزيد؟

آه طبعا. اولا قناديل البحر تحب درجات الحرارة المرتفعة في المياه. هي أصلا تحب المناطق الاستوائية او القريبة من الاستوائية. tropical. وكاله المحيطات و الغلاف الجوي القوميه الامريكيه national oceanic and atmospheric administration و اختصارها NOAA عندها أقمار صناعيه بتقيس باستمرار درجات حراره المياه. مصدر ٣. حتلاقي ان درجه حراره المياه الْيَوْمَ مثلا في الاسكندرية ٢٦ درجه مئوية بينما المتوسط على مدار السنين السابقه كلها حوالي ٢٥ درجه مئوية. فرق درجه واحده. و ده يبان انه فرق مش كبير لكن الحقيقه ان تغيير درجه حراره المياه عمليه تحتاج طاقه كبيره جدا و مش بسبب ان يوم واحد بقى حر (جرب انك تسخن إبريق مياه حتلاقي انه بياخذ وقت طويل جدا بسبب خاصيه اسمها specific heat capacity القدره الحراريه الخاصه) و فرق الدرجه الواحدة ده بيخلي قنديل البحر ينبسط جدا و يتكاثر. و حنلاحظ من بيانات وكاله نواا ان فرق الدرجه المئويه الأعلى من المتوسط ده مستمر بقاله عده أشهر. ايه اهميه ده؟ قنديل البحر دوره حياته تقريبا شهرين لسته أشهر. يعني القنديل اللي احنا شايفينه ده مولود بسبب ارتفاع حراره المياه في أشهر يونيو و مايو و ابريل. و دي أشهر التكاثر لقناديل البحر. و لما حراره المياه بتزيد بيتكاثروا اكثر.

لذلك لما درجات حراره المياه بتزيد بتيجي مواسم او سنين يزيد فيها عدد قناديل البحر. و المواسم دي بيتقال عليها بالإنجليزي bloom او مواسم ازدهار قنديل البحر.

ثانيا. قنديل البحر بيحب السماد الزراعي جدا و بيتغذى عليه. بيبقى بالنسبه له افضل من البلانكتون plankton و هو الغذاء الطبيعي الموجود في البحر.

مصر بتستخدم سماد زراعي fertilizers بكميات ضخمه جدا و عماله تزيد. في سنه ٢٠٠٢ مصر كانت بتستخدم ٤٠٠ كيلو سماد لكل فدان. دلوقتي مصر بتستخدم ٦٠٠ كيلوجرام سماد لكل فدان. مصدر ٤. و ده طبعا بسبب تراجع مساحه الارض المزروعة وانخفاض الانتاجيه الطبيعية و بناء السد العالي. ده طبعا مقارنه بحوالي ١٥٠ كيلو للفدان في امريكا او ٢٠٠ كيلو للفدان في اسرائيل. جزء من السماد ده بيروح في المصارف و منه للبحر المتوسط و قناه السويس و بيبقى بيئه ممتازه لتكاثر قناديل البحر.

ثالثا. و دي النقطه اللي ركزت الأخبار عليها هو موضوع قناه السويس. و هو موضوع مهم و لم يدرس بعنايه. فيه ظاهره اسمها العلمي هجرات دليسبس Lesspsian migration متسميه على اسم فرديناند دي ليسبس صاحب فكره قناه السويس. مصدر ٥. الهجره دي ببساطه ان مع حفر قناه السويس حصلت هجره للكائنات البحريه من البحر الأحمر و المحيط الهندي في اتجاه البحر المتوسط لأول مره في التاريخ. طيب ليه سمك المتوسط مش بيروح الأحمر؟ لسببين. الاول ان جو البحر الأحمر حار جدا بالنسبه لسمك المتوسط. كمان الغذاء فيه اقل بكتير من البحر المتوسط. العامل التاني ان البحر الأحمر المد فيه اعلى بشويه بسيطه و بالتالي مع تزايد المد البحري في الأيام القمريه بيحصل تدفق للمياه من الأحمر في اتجاه المتوسط و المياه دي بتبقى فيها كائنات بحريه. بالنسبه للكائنات البحريه اللي جايه من البحر الأحمر و متعوده على بيئه قاسيه و عندها عنف جامد جدا بتوصل البحر المتوسط بتلاقيه جنه. اولا بتآكل و بتخلص على الكائنات الاصليه في المتوسط لانها عندها قدره اعلى بكتير على التأقلم مع اجواء افضل بحكم جيناتها و تكوينها. و يا سلام بقى لو كمان درجات الحراره في المتوسط زادت شويه بسيطه. يبقى مفيش احلى من كده.

في بدايه حفر قناه السويس كان عمقها بسيط و تدفق المياه خلالها من الموجه المديه tidal wave محدود. كمان المياه دي و الكائنات اللي فيها كانت بتعدي في البحيرات المره و بحيره التمساح و دي بحيرات نسبه الملوحة بتاعتها عاليه و بتقتل كتير من الكائنات البحريه اللي جايه من البحر الأحمر.

مع التوسعات اللي تمت على مدار عقود تدفق المياه خلال القناه بيزيد و بالتالي ملوحه البحيرات بتقل. و الكائنات البحريه اللي بتعدي بتزيد بطريقتين. من زياده كميه المياه و من قله الملوحه.

الخبراء في العالم بقالهم فتره ملاحظين ان مدى هجرات دي ليسبس دي عمال يزيد لحد لما كائنات البحر الأحمر استعمرت دلوقتي معظم شرق البحر المتوسط في اليونان و الشام و مصر و دي ظاهره شغاله على مدى سنين و محدش فعلا عارف تأثيرها الكامل حيكون ايه.

تأثير تفريعه السيسي الحقيقه مش واضح و محتاج دراسه بيئيه اكثر عمقا. و دي حاجه احنا في جوده طالبنا بيها من زمان و كانت حتحصل لو تم اشراك البنك الدولي في التمويل زي ما مصر عملت كل مره وسعت فيها قناه السويس. مصدر ٦.

Scientific_evidence_behind_JellyFish_number_increase_in_Egypt_2

ناس كتير بتقول هوه يعني التفريعه الصغيره دي هي اللي حتعمل المشاكل دي. و ده اعتراض حقيقي. من ناحيه كميه المياه وتدفقاتها التأثير فعلا محدود و محكوم اكتر بعمق و سعه القناه عند بوغاز السويس. التفريعه لاحقا تأثيرها شبه معدوم على تدفقات المياه. لكن فيه عامل مهم احنا كخبراء نبص عليه و نقول ده عامل ممكن يغير التوازن البيئي و هو ان التفريعه الجديده تتجنب تماما ترعه التمساح. انظر الخريطه المرفقه و في أسفلها البحيره المره العظمى و تظهر بحيره التمساح جنوب الإسماعيلية. مصدر ٧.

أيه المشكله البيئيه في كده؟ بحيره التمساح كانت بتشتغل كفلتر ثانوي secondary filter يقتل مزيد من الأحياء اللي قدروا ينفذوا من البحيرات المره. دلوقتي جزء من المياه بتتجنبها تماما. يعني احتمالات الكائنات تعدي بتزيد. كمان بحيره التمساح و الفرع الغربي لقناه السويس بيوصله الصرف الزراعي و الصحي من الإسماعيلية. دلوقتي لان تدفقات المياه في القناه كلها زي ما هي (لانها محدده بمساحه المدخل في بوغاز السويس) بس دلوقتي التدفقات انقسمت على فرعين يعني نفس الصرف الزراعي و الصحي بقى بيدخل على نصف تدفقات المياه اللي معديه في الفرع الغربي للقناه. و ده معناه ان تركيز الصرف (اللي مليان سماد و اكل بيحبه قنديل البحر) بالمقارنه بالتدفقات المائيه الجديده في الفرع الغربي بيزيد. يعني الفرع الغربي للقناه بقى بيئه ممتازه لنمو قناديل البحر. يعني الفرع الشرقي بقى ممتاز للقناديل لانه مش بيعدي في التمساح و الغربي كمان لان تركيز السماد فيه بقى اعلى بالمقارنه بالتدفقات المائيه الجديده. يعني كل كائن بحري جاي من البحر الأحمر بقى عنده غذاء اكثر في الفرع الغربي. لذلك الموضوع اعقد من السطحيه اللي ناس كتير أخدتها بيه و محتاج دراسه متعمقة زي ما الخبراء الاسرائيلين طالبوا. طبعا هم بيقولوا كده لان هم متأثرين كمان بشكل مباشر في سواحلهم. و ممكن هم او اليونان او تركيا يطلبوا تعويضات عن السياحه او لو حد مات من قرصه قنديل البحر. و ممكن يفرضوا على مصر انها تركب شباك في مداخل القناه تمنع كائنات البحر الأحمر من الهجره. و ده حصل قبل كده لما كندا فرضت مثلا على امريكا انها تنضف الأمطار الحمضيه و تنضف شواطئ البحيرات العظمى. و ده بين امريكا و كندا. تخيل ايه اللي ممكن يحصلنا.

الغباء أعيانا. و زهقنا.

نظريه الكفته في اداره مصر ما زالت مستمره.

المصادر:

——-

١- تحقيق ناشيونال جيوجرافيك عن قناديل البحر 

http://voices.nationalgeographic.org/2014/08/16/animals-jellyfish-science-oceans-united-kingdom-world/

٢- اندثار السلاحف المائيه

https://www.worldwildlife.org/species/sea-turtle

٣- درجه حراره المياه في الاسكندرية 

https://www.seatemperature.org/africa/egypt/alexandria-july.htm

٤- استخدام دول العالم للسماد الزراعي 

http://data.worldbank.org/indicator/AG.CON.FERT.ZS

٥- هجرات دي ليسبس

https://www.seatemperature.org/africa/egypt/alexandria-july.htm

٦- ملف جوده عن مشروع السيسي لقناه السويس

https://jawdablog.org/c…/الإقتصاد/مشروع-السيسي-لقناه-السويس/

٧- صور ناسا لمشروع قناه السويس

https://earthobservatory.nasa.gov/IOTD/view.php?id=87948

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s