حميد اولوكاي وشركه شوباني

Chobani_Yougurt_How_did_it_Start.jpg

حميد اولوكاي أتولد سنه ١٩٧٢ لعيله كرديه في تركيا. عيله اولوكاي كانت بتشتغل في رعي الأغنام و البقر و تعمل منهم حليب تركي رائب و جبنه و زبادي و تبيعهم. حميد والده بعته يتعلم في جامعه أنقره اداره اعمال و بعدين سافر نيويورك سنه ١٩٩٤يأخذ كورسات إنجليزي. من هناك نقل من مدينه نيويورك لمدينه ألباني Albany عاصمه ولايه نيويورك و درس في الجامعه هناك دراسات عليا في اداره الاعمال. والد حميد زاره في نيويورك. الراجل الكبير حاول يأكل الجبنه الموجوده في السوق هناك. طبعا معجبتهوش. قاله يا حميد لازم تستورد الجبنه التركيه و تبيعها في امريكا لان الناس حتتبسط منها جدا.

حميد عمل شركه صغيره سماها شركه الفرات للمنتجات الغذائيه لان بلده الأصليه في تركيا على نهر الفرات. الشركه نجحت نجاح معقول بس مش فظيع يعني. بالعكس يا دوبك الشركه ابتدت تعمل فلوس بعد سنتين من بدايتها. حميد لقي اعلان في الجرايد ان شركه كرافت الامريكيه الضخمه بتقفل مصنع ألبان قريب منه و انها بتبيع المصنع. حميد أخذ قرض من وكاله مساعده الاعمال الصغيره الحكومية الامريكيه small business administration و اشترى المصنع و شغل الموظفين المطرودين فيه. حميد حول المصنع انه ينتج زبادي. حميد كان بيكره الزبادي الامريكي لانه سايب و سكره كتير. و كان بيحب الزبادي المرّمل اللي احنا متعودين عليه زمان قبل هجوم شركات الزبادي متعددة الجنسيات علينا في مصر. حميد جاب واحد من تركيا متخصص في تصنيع الزبادي المرمل اللي بدهنه و قشطته ده اللي كنّا زمان بناكله في السلطانيه الفخار و عمل شركه سماها شوباني chobani و معناها راعي الغنم بالتركي و الكردي و الفارسي. 

الشركه دي دلوقتي بقت اكبر شركه زبادي في العالم. و إنتاجها بقى على كل الأرفف في امريكا. حميد مش بس نقل الفكره من بلادنا. لا كمان ابتدى يبدع. يعني مثلا بيعمل علب زبادي مقسومة نصين: نص فيه الزبادي العادي و نص تاني مثلا فيه شوكرلاته او قطع فواكه أو تشيري و الفكره انك تقلب الاتنين على بعض و تقلبهم زي ما انت عاوز. الإقبال عليها كبير لأنك بتشوف انت بتقلب ايه سواء فواكه او قطع مكسرات او شوكولاته. 

حميد ساب تركيا في ١٩٩٤ لما كانت مشاكل الأكراد مع حكرمه تركيا في قمتها. طبعا الأكراد و الأتراك دلوقتي كتير منهم بيفضل في تركيا لان الأمور فيها مفتوحه اكتر بكتير من التسعينات. سيبك من تركيا و خلينا في حالنا دلوقتي.السؤال هنا حميد يفرق عنك و عننا ايه؟ و ليه حميد مش بيظهر منه في بلادنا او مصر بالذات؟ الأسباب هي:

١- حميد لقى وكاله مساعده الاعمال الصغيره في امريكا تديله قرض يبدأ بيه. حميد في مصر لو فقير او من اقليه او مهاجر من بلد تانيه (افرض كده انه مهاجر من السودان حتى تفتكر حد في مصر حيسلفه؟) مش حيلاقي بنك يعبره أساسا. 

٢- محدش اتريق على اسم حميد. لو حميد اسمه ادريس و من السودان تفتكر كام واحد في مصر كان حيطهقه في عيشته؟ احنا عنصريين جدا على فكره. 

٣- حميد لو كان كبر في مصر أكيد كان حيخبط في الجيش اللي كان حياخذ شركته و يدخل الجيش نفسه مجال انتاج الزبادي و يبقى خير زبادين الارض. 

٤- ده طبعا لو البروقراطيه المصريه العريقه اللي الجيش عمادها مخلتش حميد يجري ورا الأقسام و المصالح عشان يجيب شهاده اعفاء التحنيد و موافقه الجيش انه يشتري مصنع مفلس لكن أكيد عماد الصناعه المصريه في ذات الوقت. 

٥- حميد ملقاش حد مرتشي يقوله عشان تقنن وضعك ادخل بشنط الفلوس و اللي ممعهوش ميلزموش و كل قطه تلم عيالها و السلام عليكم و رحمه الله. 

الوصفه سهله و الله العظيم. 

و لو عاوز تعرف اكتر عن حميد شوباني:

http://www.chobani.com/story

على فكره اليمين المتعصب الصهيوني في امريكا بيكره حميد شوباني جدا و بيتهم باراك اوباما و حميد انهم اصحاب عشان الاتنين مسلمين. خد بالك و فكر في كده. 

http://shoebat.com/2015/07/01/barack-hussein-obama-fast-tracks-his-turkish-muslim-pal-into-a-huge-multi-million-dollar-contract-to-replace-meat-with-yogurt-in-michelle-obamas-not-so-healthy-school-lunch-program/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s