تسريبات_سفير_الامارات … الحلقة الثالثة

تعالوا كده نفهم شبكه الخيانه اللي تسريبات بريد سفير الإمارات الالكتروني كشفها. و مفيش كلام تاني يتقال عنها غير شبكه علاقات من الخيانه. 

اول مجموعه بتظهر هي “مؤسسه الدفاع عن الديمقراطيات”. و هو مركز تفكير think tank أمريكي و مقره واشنطن. لحد كده مفيش عيب. هوه حد يكره الدفاع عن الديمقراطيه. ياريت. مين بقى يا معلم اكبر ممولي المؤسسه دي (مصدر ١): 

– بيرنارد ماركوس مؤسس شركه هوم ديبو الامريكيه و اتبرع ب ١١ مليون دولار. الراجل ده ملياردير كوّن ثروته من تأسيس شركه هوم ديبو اللي بتبيع مستلزمات صيانه البيوت. الراجل ده أسس معهد اسرائيل للديمقراطيه (برضه ديمقراطيه. كلهم ديمقراطيين الناس دي) و دفع ٥ مليون دولار عشان يتم تأسيس مبنى المعهد ده في القدس في حي الطالبيه في القدس الشرقيه. 

– بول سينجر. ده كمان بيليونير يهودي أمريكي. الراجل ده أسس جماعه اسمها مشروع فيلوس و هي منظمه مسيحيه متطرفه مواليه لإسرائيل و ترى ان تسريع نهايه العالم يكون بمساعده اسرائيل. حاجه كده تطرف ديني خالص و طبعا بتأخذ الطلبه المسيحيين انهم يزوروا اسرائيل. الراجل ده كان له دور في افلاس الأرجنتين. اداهم قروض و رفض انهم يعملوا مصالحه و يسددوا بس ٣٠٪‏ من القروض اللي عليهم. رفع قضيه ضد الأرجنتين في انجلترا و امريكا. خسر القضايا. راح رايح غانا و خد حكم هناك بالحجز على سفينه أرجنتينيه واقفه هناك. الأرجنتين اشتكت في المحاكم الدوليه و كسبت القضيه و اجبرت غانا انها ترجع للارجنتين السفينه. غانا كانت موعوده نصيب من السفينه و لما اخدت المقلب رفعت قضيه على بول سينجر. علاقات فعلا سويه جدا. 

– شيلدون اديلسون. برضه ملياردير يهودي أمريكي. ده بقى راجل جايب من الاخر. يعني هو اكبر مالك لكلزينوهات القمار في العالم. الراجل ده كان عضو في الحزب الديمقراطي و سابه عشان لقى ان الحزب واخد اتجاه ضد اسرائيل. مول فيلم كامل ضد اوباما (طبعا). و دفع لحمله ترامب الانتخابيه ٢٥ مليون دولار و بقى اكبر متبرع لحمله ترامب الانتخابيه. ده طبعا غير انه مؤسس حركه بيرث رايت اليهوديه اللي معناها ان العوده لإسرائيل هي حق اكتسبه اليهود بالولادة و بيناذي . و طبعا هو من أنصار ضرب ايران و معادي تماما لسياسات اوباما و لكل ما هو اوباما. ده مول فيلم كامل ضد اوباما يعني. 

شيلدون اديلسون ده في حديث في جامعه يشيفا (في اسرائيل طبعا) قال:

“و فيها ايه لما نضرب ايران بالنووي. نضرب قنبله في الصحراء هناك متقتلش حد لكن كفايه انها تهدد ايران انها تحسن سلوكها و تتعامل معانا”. مصدر ٢. 

يعني احنا مش ضد التعاون مع اليهود. لكن فيه يهود كتير و أغنياء جدا كمان مع حقوق الفلسطينيين زي مثلا جورج سوروس و مؤيد للحزب الديمقراطي. او السناتور بيرني ساندرز المرشح السابق للرئاسه في امريكا و العدو اللدود لترامب الان و رافض تام لسياساته في الشرق الاوسط. مش عيب اننا نتكلم مع الناس دي. مش عيب حتى نتكلم مع يهود محايدين. لكن دول الإماراتيين بيتكلموا مع اليهود المتعصبين ضد الاسلام و المسلمين! 

مركز ثينك بروجريس كتب عن مؤسسه الدفاع عن الديمقراطيه انها “مؤيده تماما لإسرائيل. و هدفها هو دفع و تأييد التدخل العسكري الامريكي في الشرق الاوسط و عدم التوافق مع ايران. و انها مؤيده تماما لليمين المتطرف في اسرائيل.” مصدر ٣. 

يعني مَش مؤيدين لإسرائيل. لا. احنا تجاوزنا الموضوع ده. دول مؤيدين للمتطرفين اليمينيين في اسرائيل. دول مش صهاينه. لا. اطلاقا. دول صهاينه متطرفين من بتوع هدم الأقصى و قيام الحرب العالميه التالته عشان نخلص. و نجيب من بعيد ليه. ما ملك الاْردن نسيب بتوع الإمارات قالها. مصدر ٤. 

لذلك لما بتقولكم احذروا من الاندفاع للعداء ضد ايران احنا عارفين بنقول ايه. الناس المتطرفين دول في امريكا و اسرائيل عاوزين المسلمين يحاربوا مع بعض. 

كمان نلاحظ عدائهم كلهم لاوباما و دي نقطه دائماً كنّا نوضحها. ان الغرب مش كله دول. و ان فيه ناس ممكن تساعدنا. 

طبعا البقيه من الإيميلات مع جوش بولتون و مع جون حنا و هم من اقطاب اليمين في اداره جورج بوش الابن! نقول كمان و لا كفايه كده؟ 

هذه عصابه أحكمت سيطرتها على مقادير المنطقه و تدفع دفعا في أتجاه الحرب و القتل. 

المصادر:

١- ممولو مؤسسه الدفاع عن الديمقراطيه:

http://www.jta.org/2013/08/06/news-opinion/politics/top-jewish-republicans-fund-fdd-iran-sanctions-think-tank

٢- حديث شيلدون عن ايران:

https://www.reviewjournal.com/columns-blogs/steve-sebelius/loose-nukes-talk-adelson-isnt-helping

٣- ثينك بروجريس عن مؤسسه الدفاع عن الديمقراطيه:

https://thinkprogress.org/exclusive-documents-shed-light-on-those-underwriting-the-foundation-for-defense-of-democracies-80976d047d1a

٤- تصريحات ملك الاْردن عن الحرب العالميه الثالثه 

https://jawdablog.org/2016/04/09/jordan_king_leaks/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s