مقارنة في مترو الإنفاق

Comparison_of_events_in_Subway_Statons

تخيل انك راكب في مترو الانقاق في القاهره. واحد باين عليه انه جيش او شرطه قام مزعق في اتنين مراهقين مربيين دقنهم و واحد منهم ماسك قرآن بيقرأ فيه و بيقولهم “يا اخوان يا ولاد الك.. امشوا من هنا. انتم أصل المشاكل اللي احنا فيها يا ارهابيين يا مجرمين يا ولاد المت…” و بعدين راح قايم يجري وراهم و الولدين خايفين و راح ضاربهم بالقلم. الولدين في قمه الخوف. واحد منهم قال للراجل “و النبي يا عمو الله يخليك. انت بتضربنا ليه. احنا راجعين من عند جدتنا و مروحين البيت. عملنا لك ايه بس”. راح الراجل مطلع مطوه قرن غزال و قالهم “اقعد ساكت يا لا و انضرب من سكات بدل ما اضرب المطوه في كرشك اموتك. انزل من المترو ده و امشي على رجليك”. الولد التاني قاله: “ازاي بس امشي على رجليا. احنا ساكنين في حدائق حلوان و المترو في سعد زغلول. يرضيك يا عمو”. الراجل راح زاققهم و خرجهم بره المترو و نزلهم في المحطه بعد لما غزهم بالمطوه في وشهم و عورهم”.

تفتكر انت تصرفك لو بتتفرج حيكون ايه؟

كتير حيقول و انت مالي. ما يمكن فعلا بتاع شرطه و لا بتاع و يودينا في داهيه. و بعدين ده معاه مطوه. و بعدين ما يمكن يكونوا اخوان فعلا و يمكن يكونوا ارهابيين و بيمثلوا. مين عالم. يا عم احنا عاوزين نرجع لعيالنا. في مخك حتدور على ٢٥ تبرير انك متتدخلش في الموضوع. صح و لا احنا غلطانين؟

السيناريو ده حصل بالضبط في المترو في مدينه بورتلاند اكبر مدينه في ولايه اوريجون في الغرب الامريكي. الساعه ٤:٣٠ يوم ٢٦ مايو العصر و القطار كان ابتدى يتملى بالناس اللي مروحه من شغلها واحد اسمه جيريمي جوزيف كريستيان، مواطن أمريكي شاب ابيض، أتهجم على بنتين مراهقتين. واحده منهم مسلمه لابسه حجاب. و التانيه صاحبتها سمراء البشره من غير حجاب. جيريمي أتهجم عليهم و شتمهم و قالهم “انتم المفروض تموتوا. ارجعوا على السعوديه يا لا. انتم و امثالكم سبب مشاكل امريكا”.

تلاته من الركاب كلهم بيض البشره مسيحيي الديانه و لا علاقه لهم بالإسلام و لا بالسود، راحوا لجيريمي و قالوله انه لازم يسكت و ينزل من المترو. في الوقت ده المترو كان واقف في المحطه. واحد من التلات ركاب حاول يزق جيريمي عشان ينزل. جيريمي قاله لو حاولت تزقني تاني حاقتلك و فعلا طلع مطواه. البنتين هربوا في اخر القطر طبعا خايفين. التلات ركاب حاولوا انهم يمنعوا جيريمي من انه يجري وراهم. راح جيريمي ضرب التلات ركاب دول بالمطوه في رقبتهم شرحهم. 

طبعا حصل هرج و مرج. جيريمي طلع يجري من القطر. البنتين برضه طلعوا يجروا بره القطر. الركاب طلعوا يجروا ورا جيريمي عشان يمسكوه. البوليس جه و قبض على جيريمي. و هم بيقبضوا عليه قال “انا دلوقتي حاموت في زنزانتي سعيد أني خلصت و قتلت دول. دي اخره الليبرالية و اللي بيجي منها”.

الركاب التلاته اتنين منهم ماتوا. واحد اسمه ريكي جون بست و عمره ٥٣ سنه. و اب و عنده اولاد و كان جندي سابق في الجيش الامريكي. التاني اسمه تاليسين نامكاي ميتشه. شاب عنده ٢٣ سنه. و التالت مصاب و في حاله خطره و اسمه ميكا ديفيد فلتشر. تاليسين نامكاي ميتشه و هو بيموت و الإسعاف بيحاول ينقذه قال “قولوا لكل ركاب القطر ده أني بحبهم. بحبهم كلهم”.

المسلمين في امريكا اتبرعوا لذكرى الاتنين دول لحد دلوقتي بمئات الآلاف من الدولارات و كتير راحوا يعزوا والده تاليسين اللي مكانتش شايله اَي حقد تجاه المسلمين. بالعكس حضنت المسلمين اللي جم يعزوها و بكت معاهم.

لاحظ ان سهل قوي ان التلات ركاب دول يقولوا و احنا مالنا. دول اجانب و سود و مش من ملتنا. يعني عندهم أسباب اكتر بكتير من أسبابك للسكوت لو انت شفت نفس المنظر في مصر.

لذلك لما نلاقي ناس “اسلاميين” يقولوا أصل الغرب كله بيكرهنا و ازاي نتعامل مع الغرب اللي بيكرهنا و يشتمونا لما نقول يا ناس يا هوه الغرب مش كله سواء. فيه محايدين و فيه بيكرهونا و فيه بيحبونا. و هدفنا اننا نكتر اللي بيحبونا عشان يقفوا قصاد اللي بيكرهونا. امال ندعو الناس ازاي؟ بالاشارة؟ بالوهم؟ الرحمه يعني. 

طيب طلب اخير. خليك إيجابي. ادخل على صفحه والده تاليسين على فيسبوك

https://m.facebook.com/asha.deliverance

او

https://m.facebook.com/photo.php?fbid=1347336828675862&id=100001986730164&set=a.326523747423847.74070.100001986730164&source=48

و اكتبلها تعزيه. أظن ده اقل واجب. قلها:

Please accept our condolences on my behalf and on behalf of more than a billion Muslims and Muslim countries around the world. We are a civilization of peace. Your son is a true hero. He exemplifies what our religion and humanity stand for. Thank you and may Allah bless you and your son with his mercy. Ameen. 

تقبلي منا العزاء بالأصاله عننا و عن مليار مسلم حول العالم. نحن حضاره السلام. و ابنك هو بطل و هو يمثل الإنسانيه و ما أتى به الاسلام. شكرًا لك. و نرجو من الله ان يشمل ابنك و يشملك برحمته. امين. 

حتخليك إيجابي و لا حنقضيها نقاش في ان الدعاء بالرحمه لا يجوز؟

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s