تمنها ١٠٠ مليار دولار مقدم و ٣٥٠ مليار دولار مؤخر

Trump_in_Sudi_Arabia.jpg

مشهد بائس جدا مشهد ترامب و هو مش بيبتسم حتى في وش حد من اللي قاعدين و بعدين يقوم يزعق فيهم عشان الاٍرهاب و الإرهابيين و يقولهم “اطردوهم من عندكم” drive them out. ده كل اللي قاعدين دول قوات الشرطه و الجيش بتاعتهم بتقبض على الملتحي و المنقبه و اَي حد تدينه بيزيد. اطردوهم ايه اكتر من كده و كل قيادات اَي جمعيه حتى فيها اسم الاسلام او المسلمين اما في السجن او في الخارج؟ ده رئيس اكثر دول الشرق الاوسط تعدادا بيقولك في خطبه رسميه انه مش بيقعد ولاده في جوامع بعد الصلاه! مع ان الجوامع دي كلها محدش بيؤم فيها الا بتصريح من أمن الدوله! 

لكن طبعا بالنسبه للحكام اللي قاعدين دول ضرب الحبيب زي اكل الزبيب. طالما قال انه مش حيسعى لأي إصلاح في الشرق الاوسط و انه مهتم بالاستقرار. و طبعا الاستقرار بالنسبه لكل اللي قاعدين دول معناه استقرارهم هم على كراسيهم. و انه محدش حيوجع دماغهم و يقولهم إصلاحات ديمقراطيه و حريات و بتاع. 

و بعدين الحكام دول حيقولوا “اطردوا الإرهابيين و المتطرفين من عندكم” دي رساله مش ليهم. هم عاملين اللي عليهم بتعذيبنا و ضربنا و قتلنا و طردنا و اكتر ما يقدروا عليه ان دلوقتي حيزودوا جرعه الضرب و القتل. دي رساله للشعوب و أئمة المساجد كمان. طبعا ده على اساس اننا كل يوم بنصلي الجمعه مع شويه ارهابيين! فاحنا بقى في الزاويه اللي تحت بيتنا حنقوم عليهم وفق فتوى الامام ترامب و حنقوم طاردينهم من المنطقه بتاعتنا. كأن أهل سينا كانوا قاعدين زهقانين فقالوا هاتولنا آلاف ١٦ تضربنا و اسرائيل تقصفنا. 

و الأكثر بؤسا هو ان ترامب اللي ورى العين الحمرا لكل الحكام دول و اللي كلهم ادلدلوا عشان كلمه من بنته و صوره من مراته، ترامب ده خارج من بلده بفضيحة شكلها حتقلب انه هوه نفسه يتشال زي نيكسون. و جاي بلادنا عشان يحاول ينسى و ينّسي الشعب الامريكي مصائبه. و احنا بقى منطقتنا اللي تشيل. 

و نزود في البؤس كمان ان محدش وقف و قاله طيب اخبار العنصريه ضد المسلمين في الغرب ايه. طيب اخبار كلامك انت شخصيا عن المسلمين و المهاجرين و اللاجئين ايه، اللي بناءا عليه شويه حثاله طلعت حرقت جوامع في امريكا فيها مصلين لا بيهم و لا عليهم. محدش قاله طيب الاسرائليين اللي واخدين ارضنا و ضاربينا و قاتلين ناس من اول دير ياسين لآخر صابرا و شاتيلا و غزه اخبارهم ايه دول؟ محدش حيقولهم طيب احنا نهدي اللعب و أنتم كمان تهدوا اللعب. و لا تهديه اللعب دي عندنا احنا بس؟ 

و ياريت البؤس خلص. لا امعانا في الزياده يقوم ترامب قايلهم أنتم عاوزين نضرب ايران بالنيابه عنكم. احنا مش بنضرب ايران نيابه عن حد و مش حنضرب حد بالنيابه عن حد. أنتم حتعملوها بنفسكم زي الشطار. إنما عاوزيني أقول ايران وحشه. خلاص. ايران وحشه خالص قوي. مبسوطين؟ و احنا وراكم حنديكم الاستراتيجيه! 

تمنها كام بقى الاستراتيجيه دي يا معلم؟ تمنها ١٠٠ مليار دولار مقدم و ٣٥٠ مليار دولار مؤخر. و الله العظيم قالوها كده. ١٠٠ مليار دولار down payment. مالهاش ترجمه الا كده. 

شوف كام لاجئ سوري و كام فقير مصري و كام مريض يمني و كام شحات سعودي و كام شركه تعاون عربيه الفلوس دي كان ممكن تساعد؟ 

كأن آلاف ١٦ اللي بتضرب الأهالي في سينا جايبه نتيجه قوي فنقوم نزودهم بقى. كأن الطيارات حتجيب للشباب شغل. كأن الدبابه حتخلي ابن القاضي مياخدش مكان واحد متفوق في تعيينات النيابه. كأن الصاروخ حيخلي الجيش ميلمش كل وظائف المقاولات و نوادي الافراح في البلد. 

مبروك علينا العتبه الخضرا.

#زمن_الجزية

#عصر_الشيخ_ترمب

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s