ترامب وزيارة السعودية

Trump_visiting_Saudi

امريكا بقالها عشرات السنين في علاقات مع العرب، اتقال عن العلاقات دي كل حاجه: علاقه استراتيجيه، زواج كاثوليكي، صداقه، … كل حاجه. عمر امريكا في تاريخ العلاقات دي ما وقعت اتفاق تحالف مع اَي دوله عربيه. فكر كده بنفسك حتلاقي محصلش أبدا اَي حلف. امريكا باعت سلاح للعرب. اشترت منهم بترول. دخلت حروب معاهم و دخلت حروب ضدهم. ادتهم معونه. اخدت منهم فلوس. من أفغانستان للعراق لفلسطين لليبيا لكله دخلوا حروب مع بعض اخرها في ليبيا. محصلش أبدا انها عملت معاهم اَي معاهده تحالف او اي معاهده سياسيه حتى باستثناء معاهده واحده هي اتفاقيه السلام المصريه الاسرائليه اللي امريكا موقع رسمي عليها و ضامن ليها و فيها تعهدات سياسيه محدده من امريكا تجاه مصر. تخيلوا! حتى اتفاق وادي عربه و أوسلو مفيهمش تعهدات امريكيه محدده باستثناء ضمان عام للتنفيذ. امريكا عندها تحالف سياسي و عسكري مع حلف الاطلنطي و أوروبا طبعا. مع اليابان. مع كوريا. مع كندا. مع المكسيك. عندها تحالف سياسي مع دول امريكا اللاتينية اللي هو منظمه الدول الامريكيه. عندها تحالف سياسي رسمي مع اسرائيل اسمه اتفاق التعاون الاستراتيجي. امريكا عندها معاهده سياسيه مع ايران! تخيل. و هي اتفاقيه النووي مع ايران و امريكا موقعه عليها و فيها تعهدات محدده من امريكا تجاه ايران! لكن و لا ورقه تحالف سياسي او اتفاق سياسي مع اي دوله عربيه باستثناء ما أشرنا له! 

حتى السعوديه اللي امريكا هي الضامن الوحيد لأمنها و الضامن الوحيد لاستمرار ال سعود، معندهاش ورقه واحده مصدق عليها رسميا من الولايات المتحده (تحتاج المعاهدات السياسيه إقرار و موافقه الكونجرس) تقول ان امريكا تضمن اَي شيئ للسعوديه. 

الأسبوع الجاي ترامب حيوصل السعوديه و هو في اسوء حالاته داخليا و في ناس بتتكلم عن محاكمته في امريكا. الزعماء العرب بربطه المعلم حيتجمعوا في السعوديه عشان يسمعوا خطبته عن الاسلام! و عشان يعلنوا انشاء “حلف عربي” طبعا مفهوم ان هدفه ضد ايران عشان العرب يعادوا ايران بسلاح أمريكي و فرحه إسرائيليه ان العداء بين ايران و العرب و الشيعه و السنه يقعد ٥٠٠ سنه جايه و تبقى المشكله مش فلسطين و لا بتاع.

حتلاحظ حاجه. برغم الزيطه و الزمبليطه، امريكا مش حتمضي ورقه واحده في اعلان التحالف ده. ازاي تحالف سياسي عسكري من غير تحديد أهدافه كتابه؟ من غير التزامات محدده للاطراف؟ مكتوبه؟ و يوافق عليها الشعوب في الدول المختلفه؟ ازاي يا ناس يا هوه يبقى فيه تحالف سياسي عسكري بدون تنسيق القدرات العسكريه و الدفاعية للجيوش؟ من غير المصالح المشتركه ما تبقى واضحه؟ 

على فكره احنا مش ضد تحالف مكتوب مع امريكا. بالعكس. ده حيحدد العلاقات و الالتزامات بوضوح و يخلي الشعوب تعرف رأسها من رجليها زي الأوروبيين و اليابانيين و المكسيكيين كمان. 

احنا ضد السبهلله! 

لكن ليه امريكا تكتب حاجه على ورق طالما ممكن تأخذ كل حاجه من غير ورق؟ 

يا عّم مشيها بالبركة و تعالى نرحب بالشيخ ترامب أمير المؤمنين. 

المراجع:

سلسله دراسات استراتيجيه كلها هنا:

https://jawdablog.org/category/الإقتصاد/استراتيجيات-وحلول/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s