افشال مصر عن عمد

Failing_Egypt_Intentionally

سيطره الجيش و الأجهزه الامنيه في مصر وصلت لمرحله محصلتش في التاريخ. الجيش و المخابرات و الشرطه بقوا بياخدوا مشاريع الإنشاءات و الطرق. بقوا بيوزعوا اكل على الفقرا. مصدر ١. بقوا بينفذوا مشاريع انشاء مدارس. مصدر ٢. السيسي نفسه بيقولك الجيش بيقوم بدور موازي للدوله. مصدر ٣. ده مش كلامنا. ده كلامه. طيب هل الجيش بيعمل الاستثمارات دي دون عائد؟ أكيد لا. ما كلنا عارفين انك لما بتروح بنزينه وطنيه بتدفع و لما تروح مدارس لغات الجيش بتدفع. و لما بتروح تعدي في طريق الجيش بتدفع. دول قالولنا بعضمه لسانهم ان المشاريع دي عرق الجيش و مش حنسمح للدوله التدخل فيها. مصدر ٤. مش مش حنسمح للشعب الجربوع لا سمح الله. دي مفيش فيها نقاش. دول عبيد إحساناتنا. مش حنسمح للدوله ذات نفسها. طيب السؤال الذي يطرح بلح الان (و لا بلاش موضوع البلح ده) ايه لزمه الدوله؟ ليه نصرف على وزاره الشئون الاجتماعيه طالما الجيش بيوزع شنط رمضان و بيعمل موائد رمضان؟ و ليه نصرف على وزاره تعليم طالما الجيش بيعمل مدارس أحسن بكتير؟ و ليه يبقى عندنا وزاره طرق و كباري و شركات طرق و كباري طالما الجيش بيعملهم أحسن و كمان بيطلع بمكسب و سبوبه؟ ما نلغي كل الكلام ده. بلا دوله بلا بتاع. ليه نحتفظ بشبه الدوله طالما ممكن نخليها مفيش و نخلي الجيش يمسكها كلها بدل الرقص على السلالم ده؟ 

طيب انا لو وكيل وزاره قد الدنيا في واحد من الوزارات دي و الجيش لا مؤاخذه بيقوم بدور موازي ليا، انا شعوري ايه و الجيش و لا المخابرات و لا الشرطه دول انا حاولت اعدل عليهم حأروح ورا الشمس؟ أكيد انا حاقعد ساكت خالص و مش حأعمل حاجه. يعني حتى المراكب السايره حتقف. لو حاجه محتاجه توقيع ليه انا أوقع ما اخلي الجيش هو اللي يوقع. كمان انا لو في الجيش و انا جناب اللواء في جهاز الخدمه الوطنيه المسئول عن مثلا تنفيذ مشروع طريق، طبعا انت عاوز أنفذ الأوامر بتاعتي في تنفيذ الطريق ده، لكن كمان انا يهمني جدا ان لو فيه موظف مدني في وزاره الطرق مسئول عن تنفيذ طريق تاني، يهمني جدا انه مينجحش. أصله لو نجح انا لزمتي ايه؟ و طبعا بسهوله اروح للسيسي و أقوله شايف يا فندم المدنيين دول مش ممكن ينجحوا في حاجه أبدا! دي طبيعه انسانيه طالما الموضوع فيه سبوبه. 

مش مصدقنا. تابع كده موضوع قانون الاستثمار الجديد اللي أقره مجلس النواب من كام يوم. المشروع ده بيتكلموا عنه من امتى؟ عليك نور. من ايّام مؤتمر شرم الشيخ الاقتصادي رحمه الله عليه. فاكره. بص كده مصدر ٥. وزير الاستثمار من وقتها يا مؤمن بيقولك ان حيطلع قانون في خلال ايّام ميخرش الميه. و لو فاكرين القانون ده كان واحد من شروط المانحين عشان يستثمروا في مصر. مفيش قانون استثمار في الدنيا بياخد ٣ سنين. ليه؟ لانه معروف المستثمرين عاوزين ايه. عاوزين شباك واحد لإنشاء الشركات الجديده. عاوزين إعفاءات ضريبية. و عاوزين تقاضي شفاف و واضح. الوصفه معروفه في الدنيا كلها. طيب لحد يوم الموافقه في مجلس الشعب او الأمه او النواب او كما يسمونه هذه الأيام، رئيس الوزرا متخانق مع وزيره الاستثمار و التعاون الدولي. هي عاوزه انها تصدر لايحه القانون و هو بيقولك على جثتي اللائحة لازم انا اللي اصدرها. و المجلس مش عارف يمشي مع مين. مصدر ٦. و طبعا الخلافات بقت قدام العالم كله و نقلتها كل وسائل الاعلام و طبعا لا فيه استثمار جاي و لا بتاع مش بس لانه قانون فاشل لكن التخبط واضح و مبين انه مفيش استقرار. مصدر ٧. 

الجيش طبعا و الجهات الامنيه كلها بتبص على كده و تقول للناس و للسيسي مش قلنالكم المدنيين مش عارفين يعملوا حاجه. 

و أوضح حاجه على كده هي رفت احمد درويش و تكليف مهاب مميش انه يمسك مشروع لا مؤاخذه تطوير قناه السويس! هذا المشروع اللي عمل حفره ضيعت فيها مصر كل فلوسها من بنات أفكار مهاب مميش! اللي كلم السيسي في التليفون قام السيسي قاله اتفضل اشتغل. صرفنا مليارات الدولارات في مكالمة بين اتنين ضباط جيش ودونا كلنا في داهيه. لا دراسه جدوى و لا بتاع. بالضبط كده زي لما ناصر سأل عامر قاله الجيش جاهز. رد عامر قاله برقبتي يا ريس. نفس الفكر. نفس الأسلوب. نفس النتيجه. مع اننا نشف بقنا نقول انه مشروع فاشل. نقسم بالله العظيم قلناها. مصدر ٨. 

افشال المدنيين عن عمد. افشال مصر عن عمد. 

انتظروا ذات النتيجه. 

المصادر:

١- 

http://www.shorouknews.com/mobile/news/view.aspx?cdate=12072013&id=7509fe98-0ce9-4f19-b393-bc18beeaba7b

٢- 

http://www.elyomnew.com/news/24hours/2016/09/16/59040

٣-

http://onaeg.com/?p=2871148

٤- 

http://www.shorouknews.com/mobile/news/view.aspx?cdate=27032012&id=0de8ea0c-136a-4270-9a7c-79b576b91b51

٥- 

http://m.elwatannews.com/news/details/1026217

٦-

https://arabic.cnn.com/business/2017/05/07/egypt-parliament-new-investment-law

٧- 

https://m.almesryoon.com/Story/1073383

٨- 

https://jawdablog.org/category/الإقتصاد/مشروع-السيسي-لقناه-السويس/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s