هل انت خايف؟

Are_you_Afraid.jpg

هل انت خايف؟ بتقول انا مش حاشير البوست دي عشان صحابي ميبلغوش عني؟ هل مش قادر تكتب عن السيسي عشان والدتك محلفاك تبعد عن السياسه و ان محدش بينفع حد و بص لمستقبلك و كمان هي عندها حساب على فيسبوك بتتابعك؟ لو انت واحد من دول استمر معانا. 

مفيش دوله استبدادية تقدر انها تعتقل كل المواطنين. لكن كلهم بيتبعوا و بيطبقوا بشكل علمي جدا نظريات الخوف! يعني دوله بتروج لعلاج الإيدز بالكفته لكن بتيجي عند السيطره الامنيه و بتستخدم أحدث النظريات! ازاي؟ 

البريطانيون في الحرب العالميه التانيه كانت لندن كل يوم تنقصف بالطيران الألماني بشكل عنيف جدا. و كل يوم كان شويه ناس تموت. كل يوم. لكن علماء النفس لما حلّلوا سلوك الإنجليز وقتها لقوا ان بعد الغاره لما تخلص كله بيرجع بيته من الملجأ و محدش كان خايف. بالعكس. في المقابل لقوا ان قبل الضرب الألماني و في بداياته الإنجليز كانوا خايفين جدا مع ان عدد القتلى وقتها كان صفر او قليل جدا. غربيه. يعني لما القتلى قليلين قوي الخوف كان عالي جدا. لكن لما القتلى زادوا الخوف بقى اقل؟ علماء النفس لاحظوا ان الخوف بيقل مع ارتفاع عدد القتلى لحد مستوى معين. بعد كده اَي زياده في عدد القتلى بتخلي الخوف يرجع يزيد مره كمان زي ما حصل في ألمانيا نفسها نتيجه القصف الامريكي. و بيخلي السكان عاوزين يتخلصوا من الحرب بأي شكل و لو حتى بالاستسلام. مصدر ١. 

العلماء لما درسوا سلوك الخوف ده لقوا ان انتظار المجهول مخيف جدا لأنك بتكون فاكر ان المجهول ده حيقتلك انت شخصيا او عائلتك و بالتالي لازم تخاف. لما المجهول بيبتدي يحصل بتفضل خايف لأنك مش عارف الأمور ممكن تروح فين. مثلا زي حاله الاٍرهاب في امريكا. عدد قتلى الاٍرهاب في امريكا قليل جدا في كل تاريخها و مع ذلك الخوف من الاٍرهاب اعلى بكتير من الخوف من حوادث السيارات. نفس الكلام عدد القتلى من سمك القرش. عددهم في استراليا قليل جدا لكن الناس دائماً تخاف و تفكر كذا مره قبل ما تنزل الشواطئ. لكن لما المجهول بيحصل بقوه و تلاقي ان عدد القتلى قليل جدا و ان عائلتك و انت نجيتوا و محصلش حاجه للعيله. خلاص الخوف بيروح و بيحصل تعود. زي حاله القصف الألماني للندن. لكن لما القصف يبقى فعال جدا و يموت مثلا واحد من كل عشره او واحد من كل خمسه من السكان يعني بالتأكيد انت حتفقد حد من عيلتك خلال القصف لازم تبتدي تقول انك لازم تهرب او تستسلم. زي حاله اللاجئين السوريين مثلا او استسلام الألمان في الحرب العالميه الثانيه. 

لذلك الدوله الاستبداديه زي مصر حريصه انها لا تعتقل عدد كبير من السكان. بالعكس حريصه ان العدد يكون محدود لمثلا ٤٠-٦٠ الف. و ده عدد ميخليش الشعب يفقد الخوف. بالعكس يفضل موضوع الإعتقال مجهول و مخيف. كمان حريصه انها تعامل بعض المعتقلين بقسوه و تمنع الزيارات و مبسوطه جدا من انتشار أخبار كده. بسبب رئيسي ان ده بيخوف الناس اكتر. و كمان الدوله الاستبداديه حريصه تنشر اشاعات تخوف الناس من استخدام الانترنت و استخدام الفيسبوك و وسائل التواصل الاجتماعي. 

لذلك احنا مش قدام شعب سلبي و لا حاجه. احنا قدام تصرفات طبيعيه نتيجه الخوف من عدو بيستخذم نظريات علم النفس في التعامل معانا. 

لكن احنا كمان مطلوب مننا نكسر حاجز الخوف ده. كفايه اننا نقولك ان احتمالات انك تعتقل صغيره جدا جدا. ٥٠ الف معتقل هم بيمثلوا واحد في ال ٢٠٠٠ من الشعب المصري. احتمالات انك تموت في حادثه عربيه هي ١ في كل ٥٠٠ خلال حياتك كلها. مصدر ٢. يعني انت اربع مرات اكثر عرضه انك تموت في حادثه عربيه عن انك تعتقل. و مع ذلك انت بتسوق باستهتار و مش بتربط الحزام و مش بتحترم إشارات المرور. تخيل؟ 

الحاجه التانيه اننا مش عاوزينك تعتقل خالص. بالعكس عاوزينك بره ترازي في نظام السيسي. 

١- لو خايف من صحابك على فيسبوك اعمل حساب جديد بأسم مختلف و خصصه لفضح السيسي. 

٢- استخدم VPN عشان محدش يتصنت عليك. و ادخل عليه بالحساب المستعار. 

٣- ابعد عن سواق التاكسي. كلهم مع الأمن. 

٤- تأثيرك في العيله مهم جدا. صعب يبلغوا عنك. و في نفس الوقت بتشوفهم كتير. استخدم البوستات بتاعتنا و غيرنا انك توريهم ان السيسي حيودينا في داهيه. ناقش بهدوء و دون انفعال. و اسمع لوجهه نظرهم. على فكره كتير غير رأيه بالشكل ده. استمر. لو حماتك سيساويه بنتها لها تأثير اكتر منك. و لو غيرت حماتك يبقى غيرت ولادها كمان. خليك ناصح. 

و اقرأ السلسله كلها عن كيفيه إسقاط الانقلاب في مصدر ٣. 

النظام بيمثل عليك بالضبط زي الصوره المرفقه. 

المصادر:

——-

١- مالكولم جلادويل: ديفيد و جولايث

https://www.amazon.com/David-Goliath-Underdogs-Misfits-Battling/dp/0316204374

٢- احتمالات الموت من أسباب مختلفه

http://www.iii.org/fact-statistic/mortality-risk

٣- إسقاط الانقلاب بأساليب القرن ٢١

https://jawdablog.org/category/الانقلابات-العسكرية/كيف-تكسر-الإنقلاب/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s