تعالوا نتعلم الاقتصاد ببساطه … كل موظف يجيب جنيه

تعالوا نتعلم الاقتصاد ببساطه … كل موظف يجيب جنيه و ال opportunity cost!

Every_employee_pays_pound

المعلم تامر العسكري هو اكبر تاجر خضار في المنطقه. المعلم تامر مشغل ١٠ عمال عنده بيديهم الف جنيه في الشهر. لكن المعلم تامر بيستقطع من مرتبهم رسم تأمين صحي و رسم مواصلات و رسم طرق و رسم كباري مجموعهم على بعض ٣٠٠ جنيه. العمال بيدفعوا الرسوم دي لكن في نفس الوقت المعلم تامر بيفرض عليهم انهم لازم يتعالجوا في المستشفى بتاعه المعلم تامر (بناها في سنه ٢٠١٣ من عرق جبينه زي ما بيقول) و ان العمال لازم يستخدموا المواصلات بتاعه المعلم تامر برضه اللي عملها برضه من عرق جبينه. كل ده كويس. المشكله هي ان العمال لما بيمرضوا و يروحوا مستشفي المعلم تامر بيلاقوا انهم اما يدفعوا كل تكاليف العلاج او انهم يستنوا شهور لحد ما حد يعبرهم في القسم المجاني في مستشفى المعلم تامر. و نفس الكلام لما يستخدموا المواصلات. مش بس كده المعلم تامر زود أسعار المواصلات و زود كمان الرسوم اللي بيخصمها من العمال. الاتنين في ذات الوقت! ده طبعا غير كارته الطرق و الكباري اللي بياخدها مع انه بياخذ ضرائب، نقصد رسوم من العمال عنده. العمال مش قادره تعمل حاجه لان المعلم تامر هو راجل قوي و مقتدر و اَي حد بيقف في طريقه بيختفي ورا الشمس. 

المعلم تامر اخد من سنتين فلوس من العمال بتوعه و فاللهم انا حاخد فلوسكم و استثمرها في مشروع جامد قوي. أنتم شايفين المستشفي بتعمل ربح قد ايه؟ قالوا آه. قالهم بس انا مش حاستثمر فلوسكم في المستشفى اللي ربحها مضمون و لا مشروع النادي على النيل بتاع الافراح اللي برضه ربحه مضمون. لا. انا حاخد فلوسكم و استثمرها في اننا نعمل مشروع حفره في الصحرا. شويه من العمال قالوا ازاي يا معلم حفره في الصحرا. قالهم أنتم مش فاهمين حاجه. الحفره دي حتعمل أرباح زي الحلاوه. هوه فيه مشروع انا دخلت فيه خسر؟ يا مسريين لازم تثقوا فيا. بقيه العمال هجمت على العمال المعترضين و ضربتهم. و كل عامل دفع ١٠٠ جنيه و عملوا حفره في الصحرا. طبعا الفلوس ضاعت. المعلم تامر قاللهم العوض على الله. 

بعد شويه المعلم تامر قاللهم طيب انا فوق الرسوم اللي باخصمها منكم و مش بتاخدوا حاجه مقابلها، انا عاوز من كل واحد منكم جنيه في الشهر. جنيه واحد بس. يعني عشره جنيه منكم العشره. شوفوا انا حأعمل ايه بالعشره جنيه دول. انا حاغير حياتكم خالص! 

في علم الاقتصاد في حاجه بنسميها opportunity cost او تكلفه الفرصه. معناها ايه؟ معناها لو انت معاك جنيه و ممكن تحطه في استثمار حيرجعلك ١٠ جنيه مثلا او في استثمار تاني حيرجعلك ٥ جنيه أكيد طبعا حتحطه في الفرصه اللي تجيبلك عشره جنيه. لكن لو نفرض انك مش فاهم و حتحط الجنيه في الاستثمار اللي حيجيلك منه ٥ جنيه يبقى كده ضاع عليك ١٠ جنيه كان ممكن تعملهم او ضاع عليك الفرق و هوه ٥ جنيه. و ده اللي بنسميه تكلفه الفرصه. تكلفه الفرصه بتيجي من اختياراتك انت. هي نتيجه للاختيار اللي بتعمله. و دائماً انت عاوز ان تكلفه اختياراتك او تكلفه الفرصه تكون اقل ما يمكن. 

المعلم تامر العسكري بياخذ من العمال ٣٠٠ جنيه من كل عامل في الشهر رسوم. العمال مش بياخدوا حاجه خالص من الرسوم دي. في نفس الوقت المعلم تامر العسكري بيحقق أرباح كبيره من المستشفيات و النوادي و محلات الخضار بتاعته. العمال ممكن انهم يشاركوا المعلم تامر في مستشفياته و يكبروها و ينتفعوا بها. لذلك بدل ما يجيلهم عايد من ال ٣٠٠ جنيه بتاعه كل عامل، كل عامل بيدخله و لا حاجه من ال ٣٠٠ جنيه دول. يعني كل عامل بيضيع عليه تكلفه فرصه قيمتها الأرباح اللي كان ممكن يحققها من المستشفيات و الطرق و الكباري اللي دخلها كله بيروح للمعلم تامر مع انه بيبنيها من ال ٣٠٠ جنيه بتاعه كل عامل. 

معنى كده ان العمال بسكوتهم على المعلم تامر بيضيع عليهم فرصه الأرباح دي. 

و طبعا أكيد حيروح عليهم ال opportunity cost من الجنيه اللي حيلمه المعلم تامر بالعافيه. و ضيف عليه ال opportunity cost من الفلوس اللي راحت في حفره الصحرا. 

فهمنا تكلفه الفرصه؟ 

طيب عرفنا مين هو المعلم تامر؟ 

و سلسله تعالوا نتعلم الاقتصاد ببساطه كلها هنا:

https://jawdablog.org/category/الإقتصاد/حلقات-تعالوا-نفهم-الاقتصاد/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s